अक्षमालास्तुतिः Akshamalastutih

श्रीगायत्रीं त्रयीं विद्यां प्रणम्य परमेश्वरीम् ।अक्षमालास्तुतिं दिव्यां करोमि सुखदां सताम् ॥ १॥

śrīgāyatrīṃ trayīṃ vidyāṃ praṇamya parameśvarīm |akṣamālāstutiṃ divyāṃ karomi sukhadāṃ satām || 1||

अथाऽव्यक्ताऽऽदिशक्तिर्या महादेवीन्दिरेश्वरीम् ।उमोर्ध्वकेशी ऋग्वेदा ऋरूपा ऋद्धिदायिनी ॥ २॥

athā'vyaktā''diśaktiryā mahādevīndireśvarīm |umordhvakeśī ṛgvedā ṛrūpā ṛddhidāyinī || 2||

ऌप्तधर्माऽस्ति ऌनाम्नी त्वेकाक्षरविहारिणी ।ऐन्द्री ह्योङ्काररूपा या चौपासनफलप्रदा ॥ ३॥

ḷptadharmā'sti ḷnāmnī tvekākṣaravihāriṇī |aindrī hyoṅkārarūpā yā caupāsanaphalapradā || 3||

अण्डमध्यस्थिता देवी अकारमनुरूपिणी ।षोडशीं लोकपूज्यां तां सर्वदा संस्मराम्यहम् ॥ ४॥

aṇḍamadhyasthitā devī akāramanurūpiṇī |ṣoḍaśīṃ lokapūjyāṃ tāṃ sarvadā saṃsmarāmyaham || 4||

ततो व्यञ्जनवर्णस्थां कमलां खगवाहनाम् ।गङ्गां च धर्मदां देवीं ङक्षरां प्रणमाम्यहम् ॥ ५॥

tato vyañjanavarṇasthāṃ kamalāṃ khagavāhanām |gaṅgāṃ ca dharmadāṃ devīṃ ṅakṣarāṃ praṇamāmyaham || 5||

चण्डिकां सततं वन्दे देवीं छन्दोऽनुगां पराम् ।जयन्तीं क्षणनिर्घोषां ञरूपवृषवाहनाम् ॥ ६॥

caṇḍikāṃ satataṃ vande devīṃ chando'nugāṃ parām |jayantīṃ kṣaṇanirghoṣāṃ ñarūpavṛṣavāhanām || 6||

टङ्कवर्णान्वितां दिव्यां ठठशब्दनिनादिनीम् ।डमरूभूषणां देवीं ढक्काहस्तां नमाम्यहम् ॥ ७॥

ṭaṅkavarṇānvitāṃ divyāṃ ṭhaṭhaśabdaninādinīm |ḍamarūbhūṣaṇāṃ devīṃ ḍhakkāhastāṃ namāmyaham || 7||

णवर्णरूपिणीं दिव्यां तप्तकाञ्चनभूषणाम् ।थावरां सततं वन्दे दण्डकारण्यवासिनीम्! ॥ ८॥

ṇavarṇarūpiṇīṃ divyāṃ taptakāñcanabhūṣaṇām |thāvarāṃ satataṃ vande daṇḍakāraṇyavāsinīm! || 8||

धर्मशीलां नदीरूपां परब्रह्मात्मिकां तथा ।फलदां बहुनेत्रां च भवानीं प्रणतोऽस्म्यहम् ॥ ९॥

dharmaśīlāṃ nadīrūpāṃ parabrahmātmikāṃ tathā |phaladāṃ bahunetrāṃ ca bhavānīṃ praṇato'smyaham || 9||

मालिनी तां महामायां पञ्चविंशतिवर्णिकाम् ।नत्वा पुनः स्मराम्यत्र यक्षवर्णात्मिकाद्भुताम् ॥ १०॥

mālinī tāṃ mahāmāyāṃ pañcaviṃśativarṇikām |natvā punaḥ smarāmyatra yakṣavarṇātmikādbhutām || 10||

यक्षिणां योगमायां तां रामां लक्ष्मीं सुखप्रदाम् ।वरदां शारदां दिव्यां षण्मुखीं च सरस्वतीम् ॥ ११॥

yakṣiṇāṃ yogamāyāṃ tāṃ rāmāṃ lakṣmīṃ sukhapradām |varadāṃ śāradāṃ divyāṃ ṣaṇmukhīṃ ca sarasvatīm || 11||

हरिरुद्रप्रियां देवीं क्षमाशीलां नवात्मिकाम् ।पञ्चाशद्वर्णरूपां तां स्मरामि सर्वदा शुभाम् ॥ १२॥

harirudrapriyāṃ devīṃ kṣamāśīlāṃ navātmikām |pañcāśadvarṇarūpāṃ tāṃ smarāmi sarvadā śubhām || 12||

यस्य स्मरणमात्रेण प्रसन्नां वर्णमात्रिका ।सम्भूयात् सा सदा लोके सर्वमङ्गलकारिणी ॥ १३॥

yasya smaraṇamātreṇa prasannāṃ varṇamātrikā |sambhūyāt sā sadā loke sarvamaṅgalakāriṇī || 13||

नेत्रद्वयखयुग्मेऽब्दे श्री द्विजेन्द्रविनिर्मिता ।ज्येष्ठमासेऽत्र काश्यां वै प्रोद्गता साऽक्षमालिका ॥ १४॥

netradvayakhayugme'bde śrī dvijendravinirmitā |jyeṣṭhamāse'tra kāśyāṃ vai prodgatā sā'kṣamālikā || 14||

इति रत्नमयीं देवीं गायत्रीतुष्टिकारिणीम् ।स्तुतिं पठेन्नरो नित्यं ब्रह्मसायुज्यमाप्नुयात् ॥ १५॥

iti ratnamayīṃ devīṃ gāyatrītuṣṭikāriṇīm |stutiṃ paṭhennaro nityaṃ brahmasāyujyamāpnuyāt || 15||

इति श्रीगार्ग्यमुनि द्विजेन्द्रकविकृता अक्षमालास्तुतिः सम्पूर्णा ।

iti śrīgārgyamuni dvijendrakavikṛtā akṣamālāstutiḥ sampūrṇā |