राघवाष्टकम् १ Raghavashtakam

राघवं करुणाकरं मुनिसेवितं सुरवन्दितंजानकीवदनारविन्ददिवाकरं गुणभाजनम् ।वालिसूनुहितैषिणं हनुमत्प्रियं कमलेक्षणंयातुधानभयंकरं प्रणमामि राघवकुञ्जरम् ॥ १॥

rāghavaṃ karuṇākaraṃ munisevitaṃ suravanditaṃjānakīvadanāravindadivākaraṃ guṇabhājanam |vālisūnuhitaiṣiṇaṃ hanumatpriyaṃ kamalekṣaṇaṃyātudhānabhayaṃkaraṃ praṇamāmi rāghavakuñjaram || 1||

मैथिलीकुचभूषणामलनीलमौक्तिकमीश्वरंरावणानुजपालनं रघुपुङ्गवं मम दैवतम् ।नागरीवनिताननांबुजबोधनीयकलेवरंसूर्यवंशविवर्धनं प्रणमामि राघवकुञ्जरम् ॥ २॥

maithilīkucabhūṣaṇāmalanīlamauktikamīśvaraṃrāvaṇānujapālanaṃ raghupuṅgavaṃ mama daivatam |nāgarīvanitānanāṃbujabodhanīyakalevaraṃsūryavaṃśavivardhanaṃ praṇamāmi rāghavakuñjaram || 2||

हेमकुण्डलमण्डितामलकण्ठदेशमरिन्दमंशातकुंभमयूरनेत्रविभूषणेनविभूषितम् ।चारुनूपुरहारकौस्तुभकर्णभूषणभूषितंभानुवंशविवर्धनं प्रणमामि राघवकुञ्जरम् ॥ ३॥

hemakuṇḍalamaṇḍitāmalakaṇṭhadeśamarindamaṃśātakuṃbhamayūranetravibhūṣaṇenavibhūṣitam |cārunūpurahārakaustubhakarṇabhūṣaṇabhūṣitaṃbhānuvaṃśavivardhanaṃ praṇamāmi rāghavakuñjaram || 3||

दण्डकाख्यवने रतामरसिद्धयोगिगणाश्रयंशिष्टपालनतत्परं धृतिशालिपार्थकृतस्तुतिम् ।कुंभकर्णभुजाभुजंगविकर्तने सुविशारदंलक्ष्मणानुजवत्सलं प्रणमामि राघवकुञ्जरम् ॥ ४॥

daṇḍakākhyavane ratāmarasiddhayogigaṇāśrayaṃśiṣṭapālanatatparaṃ dhṛtiśālipārthakṛtastutim |kuṃbhakarṇabhujābhujaṃgavikartane suviśāradaṃlakṣmaṇānujavatsalaṃ praṇamāmi rāghavakuñjaram || 4||

केतकीकरवीरजातिसुगन्धिमाल्यसुशोभितंश्रीधरं मिथिलात्मजाकुचकुंकुमारुणवक्षसम् ।देवदेवमशेषभूतमनोहरं जगतां पतिंदासभूतभयापहं प्रणमामि राघवकुञ्जरम् ॥ ५॥

ketakīkaravīrajātisugandhimālyasuśobhitaṃśrīdharaṃ mithilātmajākucakuṃkumāruṇavakṣasam |devadevamaśeṣabhūtamanoharaṃ jagatāṃ patiṃdāsabhūtabhayāpahaṃ praṇamāmi rāghavakuñjaram || 5||

यागदानसमाधिहोमजपादिकर्मकरैर्द्विजैःवेदपारगतैरहर्निशमादरेण सुपूजितम् ।ताटकावधहेतुमंगदतातवालिनिषूदनंपैतृकोदितपालकं प्रणमामि राघवकुञ्जरम् ॥ ६॥

yāgadānasamādhihomajapādikarmakarairdvijaiḥvedapāragatairaharniśamādareṇa supūjitam |tāṭakāvadhahetumaṃgadatātavāliniṣūdanaṃpaitṛkoditapālakaṃ praṇamāmi rāghavakuñjaram || 6||

लीलया खरदूषणादिनिशाचराशुविनाशनंरावणान्तकमच्युतं हरियूथकोटिगणाश्रयम् ।नीरजाननमंबुजांघ्रियुगं हरिं भुवनाश्रयंदेवकार्यविचक्षणं प्रणमामि राघवकुञ्जरम् ॥ ७॥

līlayā kharadūṣaṇādiniśācarāśuvināśanaṃrāvaṇāntakamacyutaṃ hariyūthakoṭigaṇāśrayam |nīrajānanamaṃbujāṃghriyugaṃ hariṃ bhuvanāśrayaṃdevakāryavicakṣaṇaṃ praṇamāmi rāghavakuñjaram || 7||

कौशिकेन सुशिक्षितास्त्रकलापमायतलोचनंचारुहासमनाथबन्धुमशेषलोकनिवासिनम् ।वासवादिसुरारिरावणशासनं च परांगतिंनीलमेघनिभाकृतिं प्रणमामि राघवकुञ्जरम् ॥ ८॥

kauśikena suśikṣitāstrakalāpamāyatalocanaṃcāruhāsamanāthabandhumaśeṣalokanivāsinam |vāsavādisurārirāvaṇaśāsanaṃ ca parāṃgatiṃnīlameghanibhākṛtiṃ praṇamāmi rāghavakuñjaram || 8||

राघवाष्टकमिष्टसिद्धिदमच्युताश्रयसाधकंमुक्तिभुक्तिफलप्रदं धनधान्यसिद्धिविवर्धनम् ।रामचन्द्रकृपाकटाक्षदमादरेण सदा जपेत्रामचन्द्रपदांबुजद्वयसन्ततार्पितमानसः ॥ ९॥

rāghavāṣṭakamiṣṭasiddhidamacyutāśrayasādhakaṃmuktibhuktiphalapradaṃ dhanadhānyasiddhivivardhanam |rāmacandrakṛpākaṭākṣadamādareṇa sadā japetrāmacandrapadāṃbujadvayasantatārpitamānasaḥ || 9||

राम राम नमोऽस्तु ते जय रामभद्र नमोऽस्तु तेरामचन्द्र नमोऽस्तु ते जय राघवाय नमोऽस्तु ते ।देवदेव नमोऽस्तु ते जय देवराज नमोऽस्तु तेवासुदेव नमोऽस्तु ते जय वीरराज नमोऽस्तु ते ॥ १०॥

rāma rāma namo'stu te jaya rāmabhadra namo'stu terāmacandra namo'stu te jaya rāghavāya namo'stu te |devadeva namo'stu te jaya devarāja namo'stu tevāsudeva namo'stu te jaya vīrarāja namo'stu te || 10||

॥ इति श्रीराघवाष्टकं संपूर्णम् ॥

|| iti śrīrāghavāṣṭakaṃ saṃpūrṇam ||