देवीषट्कम् Shri Devi Shatkam

श्रीगणेशाय नमः ।अम्ब शशिबिम्बवदने कम्बुग्रीवे कठोरकुचकुम्भे ।अम्बरसमानमध्ये शम्बररिपुवैरिदेवि मां पाहि ॥ १॥

śrīgaṇeśāya namaḥ |amba śaśibimbavadane kambugrīve kaṭhorakucakumbhe |ambarasamānamadhye śambararipuvairidevi māṃ pāhi || 1||

कुन्दमुकुलाग्रदन्तां कुङ्कुमपङ्केन लिप्तकुचभाराम् ।आनीलनीलदेहामम्बामखिलाण्डनायकीं वन्दे ॥ २॥

kundamukulāgradantāṃ kuṅkumapaṅkena liptakucabhārām |ānīlanīladehāmambāmakhilāṇḍanāyakīṃ vande || 2||

सरिगमपधनिसतान्तां वीणासङ्क्रान्तचारुहस्तां ताम् ।शान्तां मृदुलस्वान्तां कुचभरतान्तां नमामि शिवकान्ताम् ॥ ३॥

sarigamapadhanisatāntāṃ vīṇāsaṅkrāntacāruhastāṃ tām |śāntāṃ mṛdulasvāntāṃ kucabharatāntāṃ namāmi śivakāntām || 3||

अरटतटघटिकजूटीताडिततालीकपालताटङ्काम् ।वीणावादनवेलाकम्पितशिरसं नमामि मातङ्गीम् ॥ ४॥

araṭataṭaghaṭikajūṭītāḍitatālīkapālatāṭaṅkām |vīṇāvādanavelākampitaśirasaṃ namāmi mātaṅgīm || 4||

वीणारसानुषङ्गं विकचमदामोदमाधुरीभृङ्गम् ।करुणापूरितरङ्गं कलये मातङ्गकन्यकापाङ्गम् ॥ ५॥

vīṇārasānuṣaṅgaṃ vikacamadāmodamādhurībhṛṅgam |karuṇāpūritaraṅgaṃ kalaye mātaṅgakanyakāpāṅgam || 5||

दयमानदीर्घनयनां देशिकरूपेण दर्शिताभ्युदयाम् ।वामकुचनिहितवीणां वरदां सङ्गीत मातृकां वन्दे ॥ ६॥

dayamānadīrghanayanāṃ deśikarūpeṇa darśitābhyudayām |vāmakucanihitavīṇāṃ varadāṃ saṅgīta mātṛkāṃ vande || 6||

माणिक्यवीणा मुपलालयन्तीं मदालसां मञ्जुलवाग्विलासाम् ।महेन्द्रनीलद्युतिकोमलाङ्गीं मातङ्गकन्यां मनसा स्मरामि ॥ ७॥

māṇikyavīṇā mupalālayantīṃ madālasāṃ mañjulavāgvilāsām |mahendranīladyutikomalāṅgīṃ mātaṅgakanyāṃ manasā smarāmi || 7||

॥ इति श्रीकालिकापुराणे देवीषट्कं अथवा मातङ्गीषट्कं समाप्तम् ॥

|| iti śrīkālikāpurāṇe devīṣaṭkaṃ athavā mātaṅgīṣaṭkaṃ samāptam ||