नवग्रहकवचम् Navagraha kavacha

ब्रह्मोवाच ।शिरो मे पातु मार्ताण्डो कपालं रोहिणीपतिः ।मुखमङ्गारकः पातु कण्ठश्च शशिनन्दनः ।बुद्धिं जीवः सदा पातु हृदयं भृगुनन्दनः ।जठरञ्च शनिः पातु जिह्वां मे दितिनन्दनः ।पादौ केतुः सदा पातु वाराः सर्वाङ्गमेव च ।तिथयोऽष्टौ दिशः पान्तु नक्षत्राणि वपुः सदा ।अंसौ राशिः सदा पातु योगाश्च स्थैर्यमेव च ।गुह्यं लिङ्गं सदा पान्तु सर्वे ग्रहाः शुभप्रदाः ।अणिमादीनि सर्वाणि लभते यः पठेद् ध्रुवम् ॥एतां रक्षां पठेद् यस्तु भक्त्या स प्रयतः सुधीः ।स चिरायुः सुखी पुत्री रणे च विजयी भवेत् ॥अपुत्रो लभते पुत्रं धनार्थी धनमाप्नुयात् ।दारार्थी लभते भार्यां सुरूपां सुमनोहराम् ।रोगी रोगात्प्रमुच्येत बद्धो मुच्येत बन्धनात् ।जले स्थले चान्तरिक्षे कारागारे विशेषतः ।यः करे धारयेन्नित्यं भयं तस्य न विद्यते ।ब्रह्महत्या सुरापानं स्तेयं गुर्वङ्गनागमः ।सर्वपापैः प्रमुच्येत कवचस्य च धारणात् ॥नारी वामभुजे धृत्वा सुखैश्वर्यसमन्विता ।काकवन्ध्या जन्मवन्ध्या मृतवत्सा च या भवेत् ।बह्वपत्या जीववत्सा कवचस्य प्रसादतः ॥इति ग्रहयामले उत्तरखण्डे नवग्रह कवचं समाप्तम् ।

brahmovāca |śiro me pātu mārtāṇḍo kapālaṃ rohiṇīpatiḥ |mukhamaṅgārakaḥ pātu kaṇṭhaśca śaśinandanaḥ |buddhiṃ jīvaḥ sadā pātu hṛdayaṃ bhṛgunandanaḥ |jaṭharañca śaniḥ pātu jihvāṃ me ditinandanaḥ |pādau ketuḥ sadā pātu vārāḥ sarvāṅgameva ca |tithayo'ṣṭau diśaḥ pāntu nakṣatrāṇi vapuḥ sadā |aṃsau rāśiḥ sadā pātu yogāśca sthairyameva ca |guhyaṃ liṅgaṃ sadā pāntu sarve grahāḥ śubhapradāḥ |aṇimādīni sarvāṇi labhate yaḥ paṭhed dhruvam ||etāṃ rakṣāṃ paṭhed yastu bhaktyā sa prayataḥ sudhīḥ |sa cirāyuḥ sukhī putrī raṇe ca vijayī bhavet ||aputro labhate putraṃ dhanārthī dhanamāpnuyāt |dārārthī labhate bhāryāṃ surūpāṃ sumanoharām |rogī rogātpramucyeta baddho mucyeta bandhanāt |jale sthale cāntarikṣe kārāgāre viśeṣataḥ |yaḥ kare dhārayennityaṃ bhayaṃ tasya na vidyate |brahmahatyā surāpānaṃ steyaṃ gurvaṅganāgamaḥ |sarvapāpaiḥ pramucyeta kavacasya ca dhāraṇāt ||nārī vāmabhuje dhṛtvā sukhaiśvaryasamanvitā |kākavandhyā janmavandhyā mṛtavatsā ca yā bhavet |bahvapatyā jīvavatsā kavacasya prasādataḥ ||iti grahayāmale uttarakhaṇḍe navagraha kavacaṃ samāptam |