नवग्रहस्तोत्रम् ५ Navagrah Stotram

वेदैर्ज्योतिर्मयत्वे जगति परिणमद्भिस्सदात्मप्रसूतैर्द्ध्वान्तं निर्मूलयद्भिर्बुधवरहृदये बोधभावं दधानैः ।त्रैलोक्यं भासयन्तं रविमखिलसुरैः स्तूयमानप्रभावंमृत्युग्रस्तात्मनां नो हृदयरुगगदङ्कारमाद्यं प्रपद्ये ॥ १॥

vedairjyotirmayatve jagati pariṇamadbhissadātmaprasūtairddhvāntaṃ nirmūlayadbhirbudhavarahṛdaye bodhabhāvaṃ dadhānaiḥ |trailokyaṃ bhāsayantaṃ ravimakhilasuraiḥ stūyamānaprabhāvaṃmṛtyugrastātmanāṃ no hṛdayarugagadaṅkāramādyaṃ prapadye || 1||

पुंसामुद्दामजन्मान्तरसुकृतपरीपाकयोगैकलभ्यस्सम्पद्विद्यायुरोजांसि विमलकिरणो यत्कटाक्षः करोति ।सारस्सर्वग्रहाणामनिमिषसदसा स्वादनीयस्वरूपःसोमस्त्राणाय नस्तादुतितरमहिमा रोहिणीप्राणनाथः ॥ २॥

puṃsāmuddāmajanmāntarasukṛtaparīpākayogaikalabhyassampadvidyāyurojāṃsi vimalakiraṇo yatkaṭākṣaḥ karoti |sārassarvagrahāṇāmanimiṣasadasā svādanīyasvarūpaḥsomastrāṇāya nastādutitaramahimā rohiṇīprāṇanāthaḥ || 2||

सत्वं यस्य प्रसादाद्भवति तनुभृतमप्रकम्प्यं विपद्भिःस्फूर्ज्जद्वैरिप्रपञ्चत्रुटनपटुतरप्रक्रमो विक्रमश्च ।चित्राकल्पप्रदीपाकृतिरतिसुकुमारः कुमारो धरण्याःनित्यानन्दाय भूयादुरुदुरितवनाङ्गारकोऽङ्गारको नः ॥ ३॥

satvaṃ yasya prasādādbhavati tanubhṛtamaprakampyaṃ vipadbhiḥsphūrjjadvairiprapañcatruṭanapaṭutaraprakramo vikramaśca |citrākalpapradīpākṛtiratisukumāraḥ kumāro dharaṇyāḥnityānandāya bhūyāduruduritavanāṅgārako'ṅgārako naḥ || 3||

वेदे शास्त्रे पुराणे चतुरतरकलानां कलापे च दाक्ष्यंपुंसां वक्त्रोक्तिचाटुप्रहसनरसिकत्वञ्च यस्सन्तनोति ।सर्वज्ञः शर्ववामेक्षणजनिरमराराधितश्रीमदङ्घ्रिःश्रीमान् निश्रेयसाय प्रभवतु विशदागाधबोधो बुधो नः ॥ ४॥

vede śāstre purāṇe caturatarakalānāṃ kalāpe ca dākṣyaṃpuṃsāṃ vaktrokticāṭuprahasanarasikatvañca yassantanoti |sarvajñaḥ śarvavāmekṣaṇajaniramarārādhitaśrīmadaṅghriḥśrīmān niśreyasāya prabhavatu viśadāgādhabodho budho naḥ || 4||

प्रत्यक्षीभूतलोकत्रयविमलदृगालोकिताशेषमूर्तिर्न्नीतिप्राकारसंरक्षीतरिपुपरिषद्दुर्गमस्वर्गमार्गः ।भद्रं दद्यात् ग्रहाणामुरुतरमहसामग्रणी रासरागैर्योगीन्द्रैस्सेव्यमानः सुरगुरुरमराधीश्वराणां गुरुर्न्नः ॥ ५॥

pratyakṣībhūtalokatrayavimaladṛgālokitāśeṣamūrtirnnītiprākārasaṃrakṣītaripupariṣaddurgamasvargamārgaḥ |bhadraṃ dadyāt grahāṇāmurutaramahasāmagraṇī rāsarāgairyogīndraissevyamānaḥ suragururamarādhīśvarāṇāṃ gururnnaḥ || 5||

तुष्टे यस्मिन् समस्तासुरनिकरगुरौ नीतिशास्त्रप्रवीणेलोकोऽयं सत्कलत्राद्यखिलसुखसमृद्धिं प्रयातीक्षणेन ।रुष्टेतत् प्रत्यवायं व्रजति च सततं नन्द्यमानप्रवृत्तिःपायाद्दुष्कर्मभूभृत्कुलदलनकलाभार्गवो भार्गवो नः ॥ ६॥

tuṣṭe yasmin samastāsuranikaragurau nītiśāstrapravīṇeloko'yaṃ satkalatrādyakhilasukhasamṛddhiṃ prayātīkṣaṇena |ruṣṭetat pratyavāyaṃ vrajati ca satataṃ nandyamānapravṛttiḥpāyādduṣkarmabhūbhṛtkuladalanakalābhārgavo bhārgavo naḥ || 6||

चण्डश्चण्डीशखण्डद्युतिरमितजटाजूटतुङ्गोत्तमाङ्गोद्राघीयश्मश्रुजालोज्ज्वलमुखकमलो मङ्गलः पिङ्गलाक्षः ।चण्डांशोरंशजन्मा कृशतनुरतिशूरश्शनैः सञ्चरिष्णुःब्रह्मण्यः क्रूरकर्मा मम शनिरशनैः श्रेयसे बोभवीतु ॥ ७॥

caṇḍaścaṇḍīśakhaṇḍadyutiramitajaṭājūṭatuṅgottamāṅgodrāghīyaśmaśrujālojjvalamukhakamalo maṅgalaḥ piṅgalākṣaḥ |caṇḍāṃśoraṃśajanmā kṛśatanuratiśūraśśanaiḥ sañcariṣṇuḥbrahmaṇyaḥ krūrakarmā mama śaniraśanaiḥ śreyase bobhavītu || 7||

विष्णोर्विश्वेश्वरस्यासुरकुलविमतव्रातकल्पान्तवह्नेश्चक्रं यत्कण्ठनालादसुरसमुपयातिं न वैयात्यमाप ।यस्यैतौ पुष्पवन्तावभिनवकबलिभावमाद्यं दधानौभद्रं नः सैंहिकेयो ग्रहगणगणनासु प्रतीपप्रयाणः ॥ ८॥

viṣṇorviśveśvarasyāsurakulavimatavrātakalpāntavahneścakraṃ yatkaṇṭhanālādasurasamupayātiṃ na vaiyātyamāpa |yasyaitau puṣpavantāvabhinavakabalibhāvamādyaṃ dadhānaubhadraṃ naḥ saiṃhikeyo grahagaṇagaṇanāsu pratīpaprayāṇaḥ || 8||

ब्रह्मण्याः कमलोद्भवस्य तनया निर्द्धूतवैश्वानरज्ज्वालाजालसहोदरोरुमहसः सर्वग्रहाग्रेसराः ।आनन्दोदयहेतवो रिपुकुलप्रोत्सादजीवातवोदुःखैकार्णवसेतवः प्रणमतां ते केतवः पान्तु नः ॥ ९॥

brahmaṇyāḥ kamalodbhavasya tanayā nirddhūtavaiśvānarajjvālājālasahodarorumahasaḥ sarvagrahāgresarāḥ |ānandodayahetavo ripukulaprotsādajīvātavoduḥkhaikārṇavasetavaḥ praṇamatāṃ te ketavaḥ pāntu naḥ || 9||

इति नवग्रहस्तोत्रं सम्पूर्णम् ।श्री नवग्रहेभ्यो नमः ॥

iti navagrahastotraṃ sampūrṇam |śrī navagrahebhyo namaḥ ||