केतुस्तोत्रम् Ketu Stotram

अथ केतुस्तोत्रप्रारम्भः ।ॐ अस्य श्रीकेतुस्तोत्रमहामन्त्रस्य वामदेव ॠषिः ।अनुष्टुप्छन्दः । केतुर्देवता ।केतुप्रसादसिद्ध्यर्थे जपे विनियोगः ।गौतम उवाच ।मुनीन्द्र सूत तत्त्वज्ञ सर्वशास्त्रविशारद ।सर्वरोगहरं ब्रूहि केतोः स्तोत्रमनुत्तमम् ॥ १॥

atha ketustotraprārambhaḥ |oṃ asya śrīketustotramahāmantrasya vāmadeva ṝṣiḥ |anuṣṭupchandaḥ | keturdevatā |ketuprasādasiddhyarthe jape viniyogaḥ |gautama uvāca |munīndra sūta tattvajña sarvaśāstraviśārada |sarvarogaharaṃ brūhi ketoḥ stotramanuttamam || 1||

सूत उवाच ।शृणु गौतम वक्ष्यामि स्तोत्रमेतदनुत्तमम् ।गुह्याद्गुह्यतमं केतोः ब्रह्मणा कीर्तितं पुरा ॥ २॥

sūta uvāca |śṛṇu gautama vakṣyāmi stotrametadanuttamam |guhyādguhyatamaṃ ketoḥ brahmaṇā kīrtitaṃ purā || 2||

आद्यः करालवदनो द्वितीयो रक्तलोचनः ।तृतीयः पिङ्गलाक्षश्च चतुर्थो ज्ञानदायकः ॥ ३॥

ādyaḥ karālavadano dvitīyo raktalocanaḥ |tṛtīyaḥ piṅgalākṣaśca caturtho jñānadāyakaḥ || 3||

पञ्चमः कपिलाक्षश्च षष्ठः कालाग्निसन्निभः ।सप्तमो हिमगर्भश्च धूम्रवर्णोष्टमस्तथा ॥ ४॥

pañcamaḥ kapilākṣaśca ṣaṣṭhaḥ kālāgnisannibhaḥ |saptamo himagarbhaśca dhūmravarṇoṣṭamastathā || 4||

नवमः कृत्तकण्ठश्च दशमः नरपीठगः ।एकादशस्तु श्रीकण्ठः द्वादशस्तु गदायुधः ॥ ५॥

navamaḥ kṛttakaṇṭhaśca daśamaḥ narapīṭhagaḥ |ekādaśastu śrīkaṇṭhaḥ dvādaśastu gadāyudhaḥ || 5||

द्वादशैते महाक्रूराः सर्वोपद्रवकारकाः ।पर्वकाले पीडयन्ति दिवाकरनिशाकरौ ॥ ६॥

dvādaśaite mahākrūrāḥ sarvopadravakārakāḥ |parvakāle pīḍayanti divākaraniśākarau || 6||

नामद्वादशकं स्तोत्रं केतोरेतन्महात्मनः ।पठन्ति येऽन्वहं भक्त्या तेभ्यः केतुः प्रसीदति ॥ ७॥

nāmadvādaśakaṃ stotraṃ ketoretanmahātmanaḥ |paṭhanti ye'nvahaṃ bhaktyā tebhyaḥ ketuḥ prasīdati || 7||

कुलुक्थधान्ये विलिखेत् षट्कोणं मण्डलं शुभम् ।पद्ममष्टदलं तत्र विलिखेच्च विधानतः ॥ ८॥

kulukthadhānye vilikhet ṣaṭkoṇaṃ maṇḍalaṃ śubham |padmamaṣṭadalaṃ tatra vilikhecca vidhānataḥ || 8||

नीलं घटं च संस्थाप्य दिवाकरनिशाकरौ ।केतुं च तत्र निक्षिप्य पूजयित्वा विधानतः ॥ ९॥

nīlaṃ ghaṭaṃ ca saṃsthāpya divākaraniśākarau |ketuṃ ca tatra nikṣipya pūjayitvā vidhānataḥ || 9||

स्तोत्रमेतत्पठित्वा च ध्यायन् केतुं वरप्रदम् ।ब्राह्मणं श्रोत्रियं शान्तं पूजयित्वा कुटुम्बिनम् ॥ १०॥

stotrametatpaṭhitvā ca dhyāyan ketuṃ varapradam |brāhmaṇaṃ śrotriyaṃ śāntaṃ pūjayitvā kuṭumbinam || 10||

केतोः करालवक्त्रस्य प्रतिमां वस्त्रसंयुताम् ।कुम्भादिभिश्च संयुक्तां चित्रातारे प्रदापयेत् ॥ ११॥

ketoḥ karālavaktrasya pratimāṃ vastrasaṃyutām |kumbhādibhiśca saṃyuktāṃ citrātāre pradāpayet || 11||

दानेनानेन सुप्रीतः केतुः स्यात्तस्य सौख्यदः ।वत्सरं प्रयता भूत्वा पूजयित्वा विधानतः ॥ १२॥

dānenānena suprītaḥ ketuḥ syāttasya saukhyadaḥ |vatsaraṃ prayatā bhūtvā pūjayitvā vidhānataḥ || 12||

मूलमष्टोत्तरशतं ये जपन्ति नरोत्तमाः ।तेषां केतुप्रसादेन न कदाचिद्भयं भवेत् ॥ १३॥

mūlamaṣṭottaraśataṃ ye japanti narottamāḥ |teṣāṃ ketuprasādena na kadācidbhayaṃ bhavet || 13||

इति केतुस्तोत्रं सम्पूर्णम् ।

iti ketustotraṃ sampūrṇam |