केतुस्तोत्रम् २ Ketustotram 2

ॐ धूम्रा द्विबाहवः सर्वे गोदानो विकृताननाः ।गृध्रयानासनस्थाश्च पान्तु नः शिखिनन्दनाः ॥ १॥

oṃ dhūmrā dvibāhavaḥ sarve godāno vikṛtānanāḥ |gṛdhrayānāsanasthāśca pāntu naḥ śikhinandanāḥ || 1||

श्रीभैरव्युवाच ।धन्या चानुगृहीतास्मि कृतार्थास्मि जगत्प्रभो ।यच्छ्रुतं त्वन्मुखाद्देव केतुस्तोत्रमिदं शुभम् ॥ २॥

śrībhairavyuvāca |dhanyā cānugṛhītāsmi kṛtārthāsmi jagatprabho |yacchrutaṃ tvanmukhāddeva ketustotramidaṃ śubham || 2||

श्रीपरमेश्वर उवाचशृणु देवि प्रवक्ष्यामि केतुस्तवमिमं परम् ।सर्वपापविशुद्धात्मा स रोगैर्मुच्यते ध्रुवम् ॥ ३॥

śrīparameśvara uvācaśṛṇu devi pravakṣyāmi ketustavamimaṃ param |sarvapāpaviśuddhātmā sa rogairmucyate dhruvam || 3||

श्वेतपीतारुणः कृष्णः क्वचिच्चामीकरप्रभःशिवार्चनरतः केतुर्ग्रहपीडां व्यपोहतु ॥ ४॥

śvetapītāruṇaḥ kṛṣṇaḥ kvaciccāmīkaraprabhaḥśivārcanarataḥ keturgrahapīḍāṃ vyapohatu || 4||

नमो घोरायाघोराय महाघोरस्वरूपिणे ।आनन्देशाय देवाय जगदानन्ददायिने ॥ ५॥

namo ghorāyāghorāya mahāghorasvarūpiṇe |ānandeśāya devāya jagadānandadāyine || 5||

नमो भक्तजनानन्ददायिने विश्वभाविने ।विश्वेशाय महेशाय केतुरूपाय वै नमः ॥ ६॥

namo bhaktajanānandadāyine viśvabhāvine |viśveśāya maheśāya keturūpāya vai namaḥ || 6||

नमो रुद्राय सर्वाय वरदाय चिदात्मने ।त्र्यक्षाय त्रिनिवासाय नमः सङ्कटनाशिने ॥ ७॥

namo rudrāya sarvāya varadāya cidātmane |tryakṣāya trinivāsāya namaḥ saṅkaṭanāśine || 7||

त्रिपुरेशाय देवाय भैरवाय महात्मने ।अचिन्त्याय चितिज्ञाय नमश्चैतन्यरूपिणे ॥ ८॥

tripureśāya devāya bhairavāya mahātmane |acintyāya citijñāya namaścaitanyarūpiṇe || 8||

नमः शर्वाय चर्च्याय दर्शनीयाय ते नमः ।आपदुद्धरणायापि भैरवाय नमो नमः ॥ ९॥

namaḥ śarvāya carcyāya darśanīyāya te namaḥ |āpaduddharaṇāyāpi bhairavāya namo namaḥ || 9||

नमो नमो महादेव व्यापिने परमात्मने ।नमो लघुमते तुभ्यं ग्राहिणे सूर्यसोमयोः ॥ १०॥

namo namo mahādeva vyāpine paramātmane |namo laghumate tubhyaṃ grāhiṇe sūryasomayoḥ || 10||

नमश्चापद्विनाशाय भूयो भूयो नमो नमः ।नमस्ते रुद्ररूपाय चोग्ररूपाय केतवे ॥ ११॥

namaścāpadvināśāya bhūyo bhūyo namo namaḥ |namaste rudrarūpāya cograrūpāya ketave || 11||

नमस्ते सौररूपाय शत्रुक्षयकराय च ।महातेजाय वै तुभ्यं पूजाफलविवर्धिने ॥ १२॥

namaste saurarūpāya śatrukṣayakarāya ca |mahātejāya vai tubhyaṃ pūjāphalavivardhine || 12||

वह्निपुत्राय ते दिव्यरूपिणे प्रियकारिणे ।सर्वभक्ष्याय सर्वाय सर्वग्रहान्तकाय ते ॥ १३॥

vahniputrāya te divyarūpiṇe priyakāriṇe |sarvabhakṣyāya sarvāya sarvagrahāntakāya te || 13||

नमः पुच्छस्वरूपाय महामृत्युकराय च ।नमस्ते सर्वदा क्षोभकारिणे व्योमचारिणे ॥ १४॥

namaḥ pucchasvarūpāya mahāmṛtyukarāya ca |namaste sarvadā kṣobhakāriṇe vyomacāriṇe || 14||

नमस्ते चित्ररूपाय मीनदानप्रियाय च ।दैत्यदानवगन्धर्ववन्द्याय महते नमः ॥ १५॥

namaste citrarūpāya mīnadānapriyāya ca |daityadānavagandharvavandyāya mahate namaḥ || 15||

य इदं पठते नित्यं प्रातरुत्थाय मानवः ।ग्रहशान्तिर्भवेत्तस्य केतुराजस्य कीर्तनात् ॥ १६॥

ya idaṃ paṭhate nityaṃ prātarutthāya mānavaḥ |grahaśāntirbhavettasya keturājasya kīrtanāt || 16||

यः पठेदर्धरात्रे तु वशं तस्य जगत्त्रयम् ।इदं रहस्यमखिलं केतुस्तोत्रं तु कीर्तितम् ॥ १७॥

yaḥ paṭhedardharātre tu vaśaṃ tasya jagattrayam |idaṃ rahasyamakhilaṃ ketustotraṃ tu kīrtitam || 17||

सर्वसिद्धिप्रदं गुह्यमायुरारोग्यवर्धनम् ।गुह्यं मन्त्रं रहस्यं तु तव भक्त्या प्रकाशितम् ॥ १८॥

sarvasiddhipradaṃ guhyamāyurārogyavardhanam |guhyaṃ mantraṃ rahasyaṃ tu tava bhaktyā prakāśitam || 18||

अभक्ताय न दातव्यमित्याज्ञा पारमेश्वरि ॥ १९॥

abhaktāya na dātavyamityājñā pārameśvari || 19||

श्रीदेव्युवाच \भगवन्भवतानेन केतुस्तोत्रस्य मे प्रभो ।कथनेन महेशान सत्यं क्रीतास्म्यहं त्वया ॥ २०॥

śrīdevyuvāca \bhagavanbhavatānena ketustotrasya me prabho |kathanena maheśāna satyaṃ krītāsmyahaṃ tvayā || 20||

श्री ईश्वर उवाच ।इदं रहस्यं परमं न देयं यस्य कस्यचित् ।गुह्यं गोप्यतमं चेयं गोपनीयं स्वयोनिवत् ॥ २१॥

śrī īśvara uvāca |idaṃ rahasyaṃ paramaṃ na deyaṃ yasya kasyacit |guhyaṃ gopyatamaṃ ceyaṃ gopanīyaṃ svayonivat || 21||

अग्निपुत्रो महातेजाः केतुः सर्वग्रहान्तकः ।क्षोभयन्यः प्रजाः सर्वाः स केतुः प्रीयतां मम ॥ २२॥

agniputro mahātejāḥ ketuḥ sarvagrahāntakaḥ |kṣobhayanyaḥ prajāḥ sarvāḥ sa ketuḥ prīyatāṃ mama || 22||

इति केतुस्तोत्रं सम्पूर्णम् ।

iti ketustotraṃ sampūrṇam |