ऋणमोचन अङ्गारकस्तोत्रम् Angarakastotram

। श्रीरस्तु ।श्रीपरमात्मने नमः ।अथ ऋणग्रस्तस्य ऋणविमोचनार्थं अङ्गारकस्तोत्रम् ।स्कन्द उवाच ।ऋणग्रस्तनराणां तु ऋणमुक्तिः कथं भवेत् ।ब्रह्मोवाच ।वक्ष्येऽहं सर्वलोकानां हितार्थं हितकामदम् ।अस्य श्री अङ्गारकमहामन्त्रस्य गौतम ऋषिः । अनुष्टुप्छन्दः ।अङ्गारको देवता । मम ऋणविमोचनार्थे अङ्गारकमन्त्रजपे विनियोगः ।ध्यानम् ।रक्तमाल्याम्बरधरः शूलशक्तिगदाधरः ।चतुर्भुजो मेषगतो वरदश्च धरासुतः ॥ १॥

| śrīrastu |śrīparamātmane namaḥ |atha ṛṇagrastasya ṛṇavimocanārthaṃ aṅgārakastotram |skanda uvāca |ṛṇagrastanarāṇāṃ tu ṛṇamuktiḥ kathaṃ bhavet |brahmovāca |vakṣye'haṃ sarvalokānāṃ hitārthaṃ hitakāmadam |asya śrī aṅgārakamahāmantrasya gautama ṛṣiḥ | anuṣṭupchandaḥ |aṅgārako devatā | mama ṛṇavimocanārthe aṅgārakamantrajape viniyogaḥ |dhyānam |raktamālyāmbaradharaḥ śūlaśaktigadādharaḥ |caturbhujo meṣagato varadaśca dharāsutaḥ || 1||

मङ्गलो भूमिपुत्रश्च ऋणहर्ता धनप्रदः ।स्थिरासनो महाकायो सर्वकामफलप्रदः ॥ २॥

maṅgalo bhūmiputraśca ṛṇahartā dhanapradaḥ |sthirāsano mahākāyo sarvakāmaphalapradaḥ || 2||

लोहितो लोहिताक्षश्च सामगानां कृपाकरः ।धरात्मजः कुजो भौमो भूमिदो भूमिनन्दनः ॥ ३॥

lohito lohitākṣaśca sāmagānāṃ kṛpākaraḥ |dharātmajaḥ kujo bhaumo bhūmido bhūminandanaḥ || 3||

अङ्गारको यमश्चैव सर्वरोगापहारकः ।सृष्टेः कर्ता च हर्ता च सर्वदेशैश्च पूजितः ॥ ४॥

aṅgārako yamaścaiva sarvarogāpahārakaḥ |sṛṣṭeḥ kartā ca hartā ca sarvadeśaiśca pūjitaḥ || 4||

एतानि कुजनामानि नित्यं यः प्रयतः पठेत् ।ऋणं न जायते तस्य श्रियं प्राप्नोत्यसंशयः ॥ ५॥

etāni kujanāmāni nityaṃ yaḥ prayataḥ paṭhet |ṛṇaṃ na jāyate tasya śriyaṃ prāpnotyasaṃśayaḥ || 5||

अङ्गारक महीपुत्र भगवन् भक्तवत्सल ।नमोऽस्तु ते ममाशेषं ऋणमाशु विनाशय ॥ ६॥

aṅgāraka mahīputra bhagavan bhaktavatsala |namo'stu te mamāśeṣaṃ ṛṇamāśu vināśaya || 6||

रक्तगन्धैश्च पुष्पैश्च धूपदीपैर्गुडोदनैः ।मङ्गलं पूजयित्वा तु मङ्गलाहनि सर्वदा ॥ ७॥

raktagandhaiśca puṣpaiśca dhūpadīpairguḍodanaiḥ |maṅgalaṃ pūjayitvā tu maṅgalāhani sarvadā || 7||

एकविंशति नामानि पठित्वा तु तदन्तिके ।ऋणरेखा प्रकर्तव्या अङ्गारेण तदग्रतः ॥ ८॥

ekaviṃśati nāmāni paṭhitvā tu tadantike |ṛṇarekhā prakartavyā aṅgāreṇa tadagrataḥ || 8||

ताश्च प्रमार्जयेन्नित्यं वामपादेन संस्मरन् ।एवं कृते न सन्देहः ऋणान्मुक्तः सुखी भवेत् ॥ ९॥

tāśca pramārjayennityaṃ vāmapādena saṃsmaran |evaṃ kṛte na sandehaḥ ṛṇānmuktaḥ sukhī bhavet || 9||

महतीं श्रियमाप्नोति धनदेन समो भवेत् ।भूमिं च लभते विद्वान् पुत्रानायुश्च विन्दति ॥ १०॥

mahatīṃ śriyamāpnoti dhanadena samo bhavet |bhūmiṃ ca labhate vidvān putrānāyuśca vindati || 10||

मूलमन्त्रः।अङ्गारक महीपुत्र भगवन् भक्तवत्सल ।नमस्तेऽस्तु महाभाग ऋणमाशु विनाशय ॥ ११॥

mūlamantraḥ|aṅgāraka mahīputra bhagavan bhaktavatsala |namaste'stu mahābhāga ṛṇamāśu vināśaya || 11||

अर्घ्यम् ।भूमिपुत्र महातेजः स्वेदोद्भव पिनाकिनः ।ऋणार्थस्त्वां प्रपन्नोऽस्मि गृहाणार्घ्यं नमोऽस्तु ते ॥ १२॥

arghyam |bhūmiputra mahātejaḥ svedodbhava pinākinaḥ |ṛṇārthastvāṃ prapanno'smi gṛhāṇārghyaṃ namo'stu te || 12||

इति ऋणमोचन अङ्गारकस्तोत्रं सम्पूर्णम् ।

iti ṛṇamocana aṅgārakastotraṃ sampūrṇam |