योगमीनाक्षीस्तोत्रम् Shri Yogaminakshi Stotram

शिवानन्दपीयूषरत्नाकरस्थां शिवब्रह्मविष्ण्वामरेशाभिवन्द्याम् ।शिवध्यानलग्नां शिवज्ञानमूर्तिं शिवाख्यामतीतां भजे पाण्ड्यबालाम् ॥ १॥

śivānandapīyūṣaratnākarasthāṃ śivabrahmaviṣṇvāmareśābhivandyām |śivadhyānalagnāṃ śivajñānamūrtiṃ śivākhyāmatītāṃ bhaje pāṇḍyabālām || 1||

शिवादिस्फुरत्पञ्चमञ्चाधिरूढां धनुर्बाणपाशाङ्कुशोत्भासिहस्ताम् ।नवीनार्कवर्णां नवीनेन्दुचूडां परब्रह्मपत्नीं भजे पाण्ड्यबालाम् ॥ २॥

śivādisphuratpañcamañcādhirūḍhāṃ dhanurbāṇapāśāṅkuśotbhāsihastām |navīnārkavarṇāṃ navīnenducūḍāṃ parabrahmapatnīṃ bhaje pāṇḍyabālām || 2||

किरीटाङ्गदोद्भासिमाङ्गल्यसूत्रां स्फुरन्मेखलाहारताटङ्गभूषाम् ।परामन्त्रकां पाण्ड्यसिंहासनस्थां परन्धामरूपां भजे पाण्ड्यबालाम् ॥ ३॥

kirīṭāṅgadodbhāsimāṅgalyasūtrāṃ sphuranmekhalāhāratāṭaṅgabhūṣām |parāmantrakāṃ pāṇḍyasiṃhāsanasthāṃ parandhāmarūpāṃ bhaje pāṇḍyabālām || 3||

ललामाञ्चितस्निग्धफालेन्दुभागां लसन्नीरजोत्फुल्लकल्हारसंस्थाम् ।ललाटेक्षणार्धाङ्गलग्नोज्ज्वलाङ्गीं परन्धामरूपां भजे पाण्ड्यबालाम् ॥ ४॥

lalāmāñcitasnigdhaphālendubhāgāṃ lasannīrajotphullakalhārasaṃsthām |lalāṭekṣaṇārdhāṅgalagnojjvalāṅgīṃ parandhāmarūpāṃ bhaje pāṇḍyabālām || 4||

त्रिखण्डात्मविद्यां त्रिबिन्दुस्वरूपां त्रिकोणे लसन्तीं त्रिलोकावनम्राम् ।त्रिबीजाधिरूढां त्रिमूर्त्यात्मविद्यां परब्रह्मपत्नीं भजे पाण्ड्यबालाम् ॥ ५॥

trikhaṇḍātmavidyāṃ tribindusvarūpāṃ trikoṇe lasantīṃ trilokāvanamrām |tribījādhirūḍhāṃ trimūrtyātmavidyāṃ parabrahmapatnīṃ bhaje pāṇḍyabālām || 5||

सदा बिन्दुमध्योल्लसद्वेणिरम्यां समुत्तुङ्गवक्षोजभारावनम्राम् ।क्वणन्नूपुरोपेतलाक्षारसार्द्रस्पुरत्पादपद्मां भजे पाण्ड्यबालाम् ॥ ६॥

sadā bindumadhyollasadveṇiramyāṃ samuttuṅgavakṣojabhārāvanamrām |kvaṇannūpuropetalākṣārasārdraspuratpādapadmāṃ bhaje pāṇḍyabālām || 6||

यमाद्यष्टयोगाङ्गरूपामरूपामकारात्क्षकारान्तवर्णामवर्णाम् ।अखण्डामनन्यामचिन्त्यामलक्ष्याममेयात्मविद्यां भजे पाण्ड्यबालाम् ॥ ७॥

yamādyaṣṭayogāṅgarūpāmarūpāmakārātkṣakārāntavarṇāmavarṇām |akhaṇḍāmananyāmacintyāmalakṣyāmameyātmavidyāṃ bhaje pāṇḍyabālām || 7||

सुधासागरान्ते मणिद्वीपमध्ये लसत्कल्पवृक्षोज्ज्वलद्बिन्दुचक्रे ।महायोगपीठे शिवाकारमञ्चे सदा सन्निषण्णां भजे पाण्ड्यबालाम् ॥ ८॥

sudhāsāgarānte maṇidvīpamadhye lasatkalpavṛkṣojjvaladbinducakre |mahāyogapīṭhe śivākāramañce sadā sanniṣaṇṇāṃ bhaje pāṇḍyabālām || 8||

सुषुम्नान्तरन्ध्रे सहस्रारपद्मे रवीन्द्वग्निसम्युक्तचिच्चक्रमध्ये ।सुधामण्डलस्थे सुनिर्वाणापीठे सदा सञ्चरन्तीं भजे पाण्ड्यबालाम् ॥ ९॥

suṣumnāntarandhre sahasrārapadme ravīndvagnisamyuktaciccakramadhye |sudhāmaṇḍalasthe sunirvāṇāpīṭhe sadā sañcarantīṃ bhaje pāṇḍyabālām || 9||

षडन्ते नवान्ते लसद्द्वादशान्ते महाबिन्दुमध्ये सुनादान्तराळे ।शिवाख्ये कलातीतनिश्शब्ददेशे सदा सञ्चरन्तीं भजे पाण्ड्यबालाम् ॥ १०॥

ṣaḍante navānte lasaddvādaśānte mahābindumadhye sunādāntarāḷe |śivākhye kalātītaniśśabdadeśe sadā sañcarantīṃ bhaje pāṇḍyabālām || 10||

चतुर्मार्गमध्ये सुकोणान्तरङ्गे खरन्ध्रे सुधाकारकूपान्तराळे ।निरालम्बपद्मे कलाषोडशान्ते सदा सञ्चरन्तीं भजे पाण्ड्यबालाम् ॥ ११॥

caturmārgamadhye sukoṇāntaraṅge kharandhre sudhākārakūpāntarāḷe |nirālambapadme kalāṣoḍaśānte sadā sañcarantīṃ bhaje pāṇḍyabālām || 11||

पुटद्वन्द्वनिर्मुक्तवायुप्रलीनप्रकाशान्तराले ध्रुवोपेतरम्ये ।महाषोडशान्ते मनोनाशदेशे सदा सञ्चरन्तीं भजे पाण्ड्यबालाम् ॥ १२॥

puṭadvandvanirmuktavāyupralīnaprakāśāntarāle dhruvopetaramye |mahāṣoḍaśānte manonāśadeśe sadā sañcarantīṃ bhaje pāṇḍyabālām || 12||

चतुष्पत्रमध्ये सुकोणत्रयान्ते त्रिमूर्त्याधिवासे त्रिमार्गान्तराळे ।सहस्रारपद्मोचितां चित्प्रकाशप्रवाहप्रलीनां भजे पाण्ड्यबालाम् ॥ १३॥

catuṣpatramadhye sukoṇatrayānte trimūrtyādhivāse trimārgāntarāḷe |sahasrārapadmocitāṃ citprakāśapravāhapralīnāṃ bhaje pāṇḍyabālām || 13||

लसद्द्वादशान्तेन्दुपीयूषधारावृतां मूर्तिमानन्दमग्नान्तरङ्गाम् ।परां त्रिस्तनीं तां चतुष्कूटमध्ये परन्धामरूपां भजे पाण्ड्यबालाम् ॥ १४॥

lasaddvādaśāntendupīyūṣadhārāvṛtāṃ mūrtimānandamagnāntaraṅgām |parāṃ tristanīṃ tāṃ catuṣkūṭamadhye parandhāmarūpāṃ bhaje pāṇḍyabālām || 14||

सहस्रारपद्मे सुषुम्नान्तमार्गे स्फुरच्चन्द्रपीयूषधारां पिबन्तीम् ।सदा स्रावयन्तीं सुधामूर्तिमम्बां परञ्ज्योतिरूपां भजे पाण्ड्यबालाम् ॥ १५॥

sahasrārapadme suṣumnāntamārge sphuraccandrapīyūṣadhārāṃ pibantīm |sadā srāvayantīṃ sudhāmūrtimambāṃ parañjyotirūpāṃ bhaje pāṇḍyabālām || 15||

नमस्ते सदा पाण्ड्यराजेन्द्रकन्ये नमस्ते सदा सुन्दरेशाङ्कवासे ।नमस्ते नमस्ते सुमीनाक्षि देवि नमस्ते नमस्ते पुनस्ते नमोऽस्तु ॥ १६॥

namaste sadā pāṇḍyarājendrakanye namaste sadā sundareśāṅkavāse |namaste namaste sumīnākṣi devi namaste namaste punaste namo'stu || 16||

इति श्रीयोगमीनाक्षीस्तोत्रं सम्पूर्णम् ।

iti śrīyogamīnākṣīstotraṃ sampūrṇam |