लक्ष्मीकवचम् २ महालक्ष्मीकवचम् २ Shri Lakshmi Khavacham 2

शुकं प्रति ब्रह्मोवाचमहालक्ष्म्याः प्रवक्ष्यामि कवचं सर्वकामदम् ।सर्वपापप्रशमनं दुष्टव्याधिविनाशनम् ॥ १॥

śukaṃ prati brahmovācamahālakṣmyāḥ pravakṣyāmi kavacaṃ sarvakāmadam |sarvapāpapraśamanaṃ duṣṭavyādhivināśanam || 1||

ग्रहपीडाप्रशमनं ग्रहारिष्टप्रभञ्जनम् ।दुष्टमृत्युप्रशमनं दुष्टदारिद्र्यनाशनम् ॥ २॥

grahapīḍāpraśamanaṃ grahāriṣṭaprabhañjanam |duṣṭamṛtyupraśamanaṃ duṣṭadāridryanāśanam || 2||

पुत्रपौत्रप्रजननं विवाहप्रदमिष्टदम् ।चोरारिहं च जपतां अखिलेप्सितदायकम् ॥ ३॥

putrapautraprajananaṃ vivāhapradamiṣṭadam |corārihaṃ ca japatāṃ akhilepsitadāyakam || 3||

सावधानमना भूत्वा श्रुणु त्वं शुक सत्तम ।अनेकजन्मसंसिद्धिलभ्यं मुक्तिफलप्रदम् ॥ ४॥

sāvadhānamanā bhūtvā śruṇu tvaṃ śuka sattama |anekajanmasaṃsiddhilabhyaṃ muktiphalapradam || 4||

धनधान्यमहाराज्यसर्वसौभाग्यकल्पकम् ।सकृत्स्मरणमात्रेण महालक्ष्मीः प्रसीदति ॥ ५॥

dhanadhānyamahārājyasarvasaubhāgyakalpakam |sakṛtsmaraṇamātreṇa mahālakṣmīḥ prasīdati || 5||

क्षीराब्धिमध्ये पद्मानां कानने मणिमण्टपे ।तन्मध्ये सुस्थितां देवीं मनीषाजनसेविताम् ॥ ६॥

kṣīrābdhimadhye padmānāṃ kānane maṇimaṇṭape |tanmadhye susthitāṃ devīṃ manīṣājanasevitām || 6||

सुस्नातां पुष्पसुरभिकुटिलालकबन्धनाम् ।पूर्णेन्दुबिम्बवदनां अर्धचन्द्रललाटिकाम् ॥ ७॥

susnātāṃ puṣpasurabhikuṭilālakabandhanām |pūrṇendubimbavadanāṃ ardhacandralalāṭikām || 7||

इन्दीवरेक्षणां कामकोदण्डभ्रुवमीश्वरीम् ।तिलप्रसवसंस्पर्धिनासिकालङ्कृतां श्रियम् ॥ ८॥

indīvarekṣaṇāṃ kāmakodaṇḍabhruvamīśvarīm |tilaprasavasaṃspardhināsikālaṅkṛtāṃ śriyam || 8||

कुन्दकुड्मलदन्तालिं बन्धूकाधरपल्लवाम् ।दर्पणाकारविमलकपोलद्वितयोज्ज्वलाम् ॥ ९॥

kundakuḍmaladantāliṃ bandhūkādharapallavām |darpaṇākāravimalakapoladvitayojjvalām || 9||

रत्नताटङ्ककलितकर्णद्वितयसुन्दराम् ।माङ्गल्याभरणोपेतां कम्बुकण्ठीं जगत्प्रियाम् ॥ १०॥

ratnatāṭaṅkakalitakarṇadvitayasundarām |māṅgalyābharaṇopetāṃ kambukaṇṭhīṃ jagatpriyām || 10||

तारहारिमनोहारिकुचकुम्भविभूषिताम् ।रत्नाङ्गदादिललितकरपद्मचतुष्टयाम् ॥ ११॥

tārahārimanohārikucakumbhavibhūṣitām |ratnāṅgadādilalitakarapadmacatuṣṭayām || 11||

कमले च सुपत्राढ्ये ह्यभयं दधतीं वरम् ।रोमराजिकलाचारुभुग्ननाभितलोदरीम् ॥ १२॥

kamale ca supatrāḍhye hyabhayaṃ dadhatīṃ varam |romarājikalācārubhugnanābhitalodarīm || 12||

पत्तवस्त्रसमुद्भासिसुनितंबादिलक्षणाम् ।काञ्चनस्तम्भविभ्राजद्वरजानूरुशोभिताम् ॥ १३॥

pattavastrasamudbhāsisunitaṃbādilakṣaṇām |kāñcanastambhavibhrājadvarajānūruśobhitām || 13||

स्मरकाह्लिकागर्वहारिजंभां हरिप्रियाम् ।कमठीपृष्ठसदृशपादाब्जां चन्द्रसन्निभाम् ॥ १४॥

smarakāhlikāgarvahārijaṃbhāṃ haripriyām |kamaṭhīpṛṣṭhasadṛśapādābjāṃ candrasannibhām || 14||

पङ्कजोदरलावण्यसुन्दराङ्घ्रितलां श्रियम् ।सर्वाभरणसंयुक्तां सर्वलक्षणलक्षिताम् ॥ १५॥

paṅkajodaralāvaṇyasundarāṅghritalāṃ śriyam |sarvābharaṇasaṃyuktāṃ sarvalakṣaṇalakṣitām || 15||

पितामहमहाप्रीतां नित्यतृप्तां हरिप्रियाम् ।नित्यं कारुण्यललितां कस्तूरीलेपिताङ्गिकाम् ॥ १६॥

pitāmahamahāprītāṃ nityatṛptāṃ haripriyām |nityaṃ kāruṇyalalitāṃ kastūrīlepitāṅgikām || 16||

सर्वमन्त्रमयां लक्ष्मीं श्रुतिशास्त्रस्वरूपिणीम् ।परब्रह्ममयां देवीं पद्मनाभकुटुंबिनीम् ।एवं ध्यात्वा महालक्ष्मीं पठेत् तत्कवचं परम् ॥ १७॥

sarvamantramayāṃ lakṣmīṃ śrutiśāstrasvarūpiṇīm |parabrahmamayāṃ devīṃ padmanābhakuṭuṃbinīm |evaṃ dhyātvā mahālakṣmīṃ paṭhet tatkavacaṃ param || 17||

ध्यानम् ।एकं न्यंच्यनतिक्षमं ममपरं चाकुंच्यपदांबुजंमध्ये विष्टरपुण्डरीकमभयं विन्यस्तहस्ताम्बुजम् ।त्वां पश्येम निषेदुषीमनुकलंकारुण्यकूलंकषस्फारापाङ्गतरङ्गमम्ब मधुरं मुग्धं मुखं बिभ्रतीम् ॥ १८॥

dhyānam |ekaṃ nyaṃcyanatikṣamaṃ mamaparaṃ cākuṃcyapadāṃbujaṃmadhye viṣṭarapuṇḍarīkamabhayaṃ vinyastahastāmbujam |tvāṃ paśyema niṣeduṣīmanukalaṃkāruṇyakūlaṃkaṣasphārāpāṅgataraṅgamamba madhuraṃ mugdhaṃ mukhaṃ bibhratīm || 18||

अथ कवचम् ।महालक्ष्मीः शिरः पातु ललाटं मम पङ्कजा ।कर्णे रक्षेद्रमा पातु नयने नलिनालया ॥ १९॥

atha kavacam |mahālakṣmīḥ śiraḥ pātu lalāṭaṃ mama paṅkajā |karṇe rakṣedramā pātu nayane nalinālayā || 19||

नासिकामवतादंबा वाचं वाग्रूपिणी मम ।दन्तानवतु जिह्वां श्रीरधरोष्ठं हरिप्रिया ॥ २०॥

nāsikāmavatādaṃbā vācaṃ vāgrūpiṇī mama |dantānavatu jihvāṃ śrīradharoṣṭhaṃ haripriyā || 20||

चुबुकं पातु वरदा गलं गन्धर्वसेविता ।वक्षः कुक्षिं करौ पायूं पृष्ठमव्याद्रमा स्वयम् ॥ २१॥

cubukaṃ pātu varadā galaṃ gandharvasevitā |vakṣaḥ kukṣiṃ karau pāyūṃ pṛṣṭhamavyādramā svayam || 21||

कटिमूरुद्वयं जानु जघं पातु रमा मम ।सर्वाङ्गमिन्द्रियं प्राणान् पायादायासहारिणी ॥ २२॥

kaṭimūrudvayaṃ jānu jaghaṃ pātu ramā mama |sarvāṅgamindriyaṃ prāṇān pāyādāyāsahāriṇī || 22||

सप्तधातून् स्वयं चापि रक्तं शुक्रं मनो मम ।ज्ञानं बुद्धिं महोत्साहं सर्वं मे पातु पङ्कजा ॥ २३॥

saptadhātūn svayaṃ cāpi raktaṃ śukraṃ mano mama |jñānaṃ buddhiṃ mahotsāhaṃ sarvaṃ me pātu paṅkajā || 23||

मया कृतं च यत्किञ्चित्तत्सर्वं पातु सेन्दिरा ।ममायुरवतात् लक्ष्मीः भार्यां पुत्रांश्च पुत्रिका ॥ २४॥

mayā kṛtaṃ ca yatkiñcittatsarvaṃ pātu sendirā |mamāyuravatāt lakṣmīḥ bhāryāṃ putrāṃśca putrikā || 24||

मित्राणि पातु सततमखिलानि हरिप्रिया ।पातकं नाशयेत् लक्ष्मीः महारिष्टं हरेद्रमा ॥ २५॥

mitrāṇi pātu satatamakhilāni haripriyā |pātakaṃ nāśayet lakṣmīḥ mahāriṣṭaṃ haredramā || 25||

ममारिनाशनार्थाय मायामृत्युं जयेद्बलम् ।सर्वाभीष्टं तु मे दद्यात् पातु मां कमलालया॥ २६॥

mamārināśanārthāya māyāmṛtyuṃ jayedbalam |sarvābhīṣṭaṃ tu me dadyāt pātu māṃ kamalālayā|| 26||

फलश्रुतिः ।य इदं कवचं दिव्यं रमात्मा प्रयतः पठेत् ।सर्वसिद्धिमवाप्नोति सर्वरक्षां तु शाश्वतीम् ॥ २७॥

phalaśrutiḥ |ya idaṃ kavacaṃ divyaṃ ramātmā prayataḥ paṭhet |sarvasiddhimavāpnoti sarvarakṣāṃ tu śāśvatīm || 27||

दीर्घायुष्मान् भवेन्नित्यं सर्वसौभाग्यकल्पकम् ।सर्वज्ञः सर्वदर्शी च सुखदश्च शुभोज्ज्वलः ॥ २८॥

dīrghāyuṣmān bhavennityaṃ sarvasaubhāgyakalpakam |sarvajñaḥ sarvadarśī ca sukhadaśca śubhojjvalaḥ || 28||

सुपुत्रो गोपतिः श्रीमान् भविष्यति न संशयः ।तद्गृहे न भवेद्ब्रह्मन् दारिद्र्यदुरितादिकम् ॥ २९॥

suputro gopatiḥ śrīmān bhaviṣyati na saṃśayaḥ |tadgṛhe na bhavedbrahman dāridryaduritādikam || 29||

नाग्निना दह्यते गेहं न चोराद्यैश्च पीड्यते ।भूतप्रेतपिशाचाद्याः संत्रस्ता यान्ति दूरतः ॥ ३०॥

nāgninā dahyate gehaṃ na corādyaiśca pīḍyate |bhūtapretapiśācādyāḥ saṃtrastā yānti dūrataḥ || 30||

लिखित्वा स्थापयेद्यत्र तत्र सिद्धिर्भवेत् ध्रुवम् ।नापमृत्युमवाप्नोति देहान्ते मुक्तिभाग्भवेत् ॥ ३१॥

likhitvā sthāpayedyatra tatra siddhirbhavet dhruvam |nāpamṛtyumavāpnoti dehānte muktibhāgbhavet || 31||

आयुष्यं पौष्टिकं मेध्यं धान्यं दुःस्वप्ननाशनम् ।प्रजाकरं पवित्रं च दुर्भिक्षर्तिविनाशनम् ॥ ३२॥

āyuṣyaṃ pauṣṭikaṃ medhyaṃ dhānyaṃ duḥsvapnanāśanam |prajākaraṃ pavitraṃ ca durbhikṣartivināśanam || 32||

चित्तप्रसादजननं महामृत्युप्रशान्तिदम् ।महारोगज्वरहरं ब्रह्महत्यादिशोधनम् ॥ ३३॥

cittaprasādajananaṃ mahāmṛtyupraśāntidam |mahārogajvaraharaṃ brahmahatyādiśodhanam || 33||

महाधनप्रदं चैव पठितव्यं सुखार्थिभिः ।धनार्थी धनमाप्नोति विवहार्थी लभेद्वधूम् ॥ ३४॥

mahādhanapradaṃ caiva paṭhitavyaṃ sukhārthibhiḥ |dhanārthī dhanamāpnoti vivahārthī labhedvadhūm || 34||

विद्यार्थी लभते विद्यां पुत्रार्थी गुणवत्सुतम् ।राज्यार्थी राज्यमाप्नोति सत्यमुक्तं मया शुक ॥ ३५॥

vidyārthī labhate vidyāṃ putrārthī guṇavatsutam |rājyārthī rājyamāpnoti satyamuktaṃ mayā śuka || 35||

एतद्देव्याःप्रसादेन शुकः कवचमाप्तवान् ।कवचानुग्रहेणैव सर्वान् कामानवाप सः ॥ ३६॥

etaddevyāḥprasādena śukaḥ kavacamāptavān |kavacānugraheṇaiva sarvān kāmānavāpa saḥ || 36||

इति लक्ष्मीकवचं ब्रह्मस्तोत्रं समाप्तम् ।

iti lakṣmīkavacaṃ brahmastotraṃ samāptam |