वेदान्तपरभागवतम् Vedantaparabhagavatam

वसुदेवः शुद्धसत्त्वं तद्वृत्तिर्देवकी मता ।कृष्ण आत्माऽऽगतस्तत्र पितृबन्धविमोचकः ॥ १॥

vasudevaḥ śuddhasattvaṃ tadvṛttirdevakī matā |kṛṣṇa ātmā''gatastatra pitṛbandhavimocakaḥ || 1||

गोकुलं प्रापितोऽथापि दैवात्पित्रेन्द्रियाभिधम् ।सवृत्तिसात्त्विकात्माख्ययशोदानन्दतातभाक् ॥ २॥

gokulaṃ prāpito'thāpi daivātpitrendriyābhidham |savṛttisāttvikātmākhyayaśodānandatātabhāk || 2||

दुर्वासनापूतनाघ्नो रेमे गोप्याख्यवृत्तिभिः ।विलीय तत्सञ्चितगोरसाद्गोगोपपालकः ॥ ३॥

durvāsanāpūtanāghno reme gopyākhyavṛttibhiḥ |vilīya tatsañcitagorasādgogopapālakaḥ || 3||

नानाकौतुककृद्दुर्हृद्वृत्तिवृन्दावने स्थितः ।गोप्याशापूरकोऽविद्यानिशायां चित्ररासकृत् ॥ ४॥

nānākautukakṛddurhṛdvṛttivṛndāvane sthitaḥ |gopyāśāpūrako'vidyāniśāyāṃ citrarāsakṛt || 4||

गोप्योर्द्वयोर्द्वयोर्मध्ये वशस्तदनुरूपवत् ।रेमे दैवात्तद्वियुक्तो दुर्हृत्प्राक्पितृसङ्गतः ॥ ५॥

gopyordvayordvayormadhye vaśastadanurūpavat |reme daivāttadviyukto durhṛtprākpitṛsaṅgataḥ || 5||

भवाब्धिमध्ये देहाख्यां कृत्वा द्वारवतीं पुरीम् ।सोऽनुप्रविष्टस्तां तत्र वृत्त्याख्या विविधाः स्त्रियः ॥ ६॥

bhavābdhimadhye dehākhyāṃ kṛtvā dvāravatīṃ purīm |so'nupraviṣṭastāṃ tatra vṛttyākhyā vividhāḥ striyaḥ || 6||

सर्वाः पतिव्रताः कान्तं मेनिरे तं वशीकृतम् ।आत्मारामोऽप्यसङ्गोऽपि ततो दीन इवाबभौ ॥ ७॥

sarvāḥ pativratāḥ kāntaṃ menire taṃ vaśīkṛtam |ātmārāmo'pyasaṅgo'pi tato dīna ivābabhau || 7||

षोडशस्त्रीसहस्रेशः संसारं समवर्धयत् ।परोपदेशकृत्पञ्चप्राणपाण्डवपालकः ॥ ८॥

ṣoḍaśastrīsahasreśaḥ saṃsāraṃ samavardhayat |paropadeśakṛtpañcaprāṇapāṇḍavapālakaḥ || 8||

उरीकृत्य ब्रह्मशापं विनाश्य स्वजनान् क्षणात् ।पुरीं द्वारवतीं चापि कृष्ण एकस्ततः स्वयम् ॥ ९॥

urīkṛtya brahmaśāpaṃ vināśya svajanān kṣaṇāt |purīṃ dvāravatīṃ cāpi kṛṣṇa ekastataḥ svayam || 9||

हृतपाण्डवसारोऽगाद्वैकुण्ठं पूर्वधाम तत् ।भक्तः सुभक्त्या भगवत्सम्बन्धीदं सदा पठेत् ।भवार्तिहृद् भागवतं स नूनं भवभर्जकः ॥ १०॥

hṛtapāṇḍavasāro'gādvaikuṇṭhaṃ pūrvadhāma tat |bhaktaḥ subhaktyā bhagavatsambandhīdaṃ sadā paṭhet |bhavārtihṛd bhāgavataṃ sa nūnaṃ bhavabharjakaḥ || 10||

इति श्री परमपूजनीय श्रीवासुदेवानन्दसरस्वतीविरचितंवेदान्तपरभागवतं सम्पूर्णम् ॥

iti śrī paramapūjanīya śrīvāsudevānandasarasvatīviracitaṃvedāntaparabhāgavataṃ sampūrṇam ||