उडुपिकृष्णसुप्रभातम् Udupi Shrikrishna Suprabhatam

उत्तिष्ठोत्तिष्ठ गोविन्द उत्तिष्ठ गरुडध्वज ।उत्तिष्ठ कमलाकान्त त्रैलोक्यं मङ्गलं कुरु ॥॥नारायणाखिल शरण्य रथाङ्ग पाणे ।प्राणायमान विजयागणित प्रभाव ।गीर्वाणवैरि कदलीवन वारणेन्द्र ।मध्वेश कृष्ण भगवन् तव सुप्रभातम् ॥ १॥

uttiṣṭhottiṣṭha govinda uttiṣṭha garuḍadhvaja |uttiṣṭha kamalākānta trailokyaṃ maṅgalaṃ kuru ||||nārāyaṇākhila śaraṇya rathāṅga pāṇe |prāṇāyamāna vijayāgaṇita prabhāva |gīrvāṇavairi kadalīvana vāraṇendra |madhveśa kṛṣṇa bhagavan tava suprabhātam || 1||

उत्तिष्ठ दीन पतितार्तजनानुकम्पिन् ।उत्तिष्ठ विश्व रचना चतुरैक शिल्पिन् ।उत्तिष्ठ वैष्णव मतोद्भव धामवासिन् ।मध्वेश कृष्ण भगवन् तव सुप्रभातम् ॥ २॥

uttiṣṭha dīna patitārtajanānukampin |uttiṣṭha viśva racanā caturaika śilpin |uttiṣṭha vaiṣṇava matodbhava dhāmavāsin |madhveśa kṛṣṇa bhagavan tava suprabhātam || 2||

उत्तिष्ठ पातय कृपामसृणान् कटाक्षान् ।उत्तिष्ठ दर्शय सुमङ्गल विग्रहन्ते ।उत्तिष्ठ पालय जनान् शरणं प्रपन्नान् ।मध्वेश कृष्ण भगवन् तव सुप्रभातम् ॥ ३॥

uttiṣṭha pātaya kṛpāmasṛṇān kaṭākṣān |uttiṣṭha darśaya sumaṅgala vigrahante |uttiṣṭha pālaya janān śaraṇaṃ prapannān |madhveśa kṛṣṇa bhagavan tava suprabhātam || 3||

उत्तिष्ठ यादव मुकुन्द हरे मुरारे ।उत्तिष्ठ कौरवकुलान्तक विश्वबन्धो ।उत्तिष्ठ योगिजन मानस राजहंस ।मध्वेश कृष्ण भगवन् तव सुप्रभातम् ॥ ४॥

uttiṣṭha yādava mukunda hare murāre |uttiṣṭha kauravakulāntaka viśvabandho |uttiṣṭha yogijana mānasa rājahaṃsa |madhveśa kṛṣṇa bhagavan tava suprabhātam || 4||

उत्तिष्ठ पद्मनिलयाप्रिय पद्मनाभ ।पद्मोद्भवस्य जनकाच्युत पद्मनेत्र ।उत्तिष्ठ पद्मसख मण्डल मध्यवर्तिन् ।मध्वेश कृष्ण भगवन् तव सुप्रभातम् ॥ ५॥

uttiṣṭha padmanilayāpriya padmanābha |padmodbhavasya janakācyuta padmanetra |uttiṣṭha padmasakha maṇḍala madhyavartin |madhveśa kṛṣṇa bhagavan tava suprabhātam || 5||

मध्वाख्यया रजतपीठपुरेवतीर्णः ।त्वत्कार्य साधनपटुः पवमान देवः ।मूर्तेश्चकार तव लोकगुरोः प्रतिष्ठाम् ।मध्वेश कृष्ण भगवन् तव सुप्रभातम् ॥ ६॥

madhvākhyayā rajatapīṭhapurevatīrṇaḥ |tvatkārya sādhanapaṭuḥ pavamāna devaḥ |mūrteścakāra tava lokaguroḥ pratiṣṭhām |madhveśa kṛṣṇa bhagavan tava suprabhātam || 6||

सन्यास योगनिरताश्रवणादिभिस्त्वाम् ।भक्तेर्गुणैर्नवभिरात्म निवेदनान्तैः ।अष्टौयजन्ति यतिनो जगतामधीशम् ।मध्वेश कृष्ण भगवन् तव सुप्रभातम् ॥ ७॥

sanyāsa yoganiratāśravaṇādibhistvām |bhakterguṇairnavabhirātma nivedanāntaiḥ |aṣṭauyajanti yatino jagatāmadhīśam |madhveśa kṛṣṇa bhagavan tava suprabhātam || 7||

या द्वारकापुरि पुरातव दिव्यमूर्तिः ।सम्पूजिताष्ट महिषीभिरनन्य भक्त्या ।अद्यार्चयन्ति यतयोष्टमठाधिपास्ताम् ।मध्वेश कृष्ण भगवन् तव सुप्रभातम् ॥ ८॥

yā dvārakāpuri purātava divyamūrtiḥ |sampūjitāṣṭa mahiṣībhirananya bhaktyā |adyārcayanti yatayoṣṭamaṭhādhipāstām |madhveśa kṛṣṇa bhagavan tava suprabhātam || 8||

वामेकरे मथनदण्डमसव्य हस्ते ।गृह्णंश्च पाशमुपदेष्टु मना इवासि ।गोपालनं सुखकरं कुरुतेति लोकान् ।मध्वेश कृष्ण भगवन् तव सुप्रभातम् ॥ ९॥

vāmekare mathanadaṇḍamasavya haste |gṛhṇaṃśca pāśamupadeṣṭu manā ivāsi |gopālanaṃ sukhakaraṃ kuruteti lokān |madhveśa kṛṣṇa bhagavan tava suprabhātam || 9||

सम्मोहिताखिल चराचररूप विश्व ।श्रोत्राभिराममुरली मधुरारवेण ।आधायवादयकरेण पुनश्चवेणुम् ।मध्वेश कृष्ण भगवन् तव सुप्रभातम् ॥ १०॥

sammohitākhila carācararūpa viśva |śrotrābhirāmamuralī madhurāraveṇa |ādhāyavādayakareṇa punaścaveṇum |madhveśa kṛṣṇa bhagavan tava suprabhātam || 10||

गीतोष्णरश्मिरुदयन्वहनोदयाद्रौ ।यस्याहरत्सकललोकहृदान्धकारम् ।सत्वं स्थितो रजतपीठपुरे विभासी ।मध्वेश कृष्ण भगवन् तव सुप्रभातम् ॥ ११॥

gītoṣṇaraśmirudayanvahanodayādrau |yasyāharatsakalalokahṛdāndhakāram |satvaṃ sthito rajatapīṭhapure vibhāsī |madhveśa kṛṣṇa bhagavan tava suprabhātam || 11||

कृष्णेति मङ्गलपदं कृकवाकुवृन्दम् ।वक्तुं प्रयत्य विफलं बहुशः कुकूकुः ।त्वां सम्प्रबोधयितुमुच्चरतीतिमन्ये ।मध्वेश कृष्ण भगवन् तव सुप्रभातम् ॥ १२॥

kṛṣṇeti maṅgalapadaṃ kṛkavākuvṛndam |vaktuṃ prayatya viphalaṃ bahuśaḥ kukūkuḥ |tvāṃ samprabodhayitumuccaratītimanye |madhveśa kṛṣṇa bhagavan tava suprabhātam || 12||

भृङ्गापिपासव इमे मधु पद्मषन्दे ।कृष्णार्पणं सुमरसो स्वितिहर्षभाजः ।झङ्कार राव मिषतः कथयन्ति मन्ये ।मध्वेश कृष्ण भगवन् तव सुप्रभातम् ॥ १३॥

bhṛṅgāpipāsava ime madhu padmaṣande |kṛṣṇārpaṇaṃ sumaraso svitiharṣabhājaḥ |jhaṅkāra rāva miṣataḥ kathayanti manye |madhveśa kṛṣṇa bhagavan tava suprabhātam || 13||

निर्यान्ति शावक वियोगयुता विहङ्गाः ।प्रीत्यार्भकेशु च पुनः प्रविशन्ति नीडम् ।धावन्ति सस्य कणिकानुपचेतु मारात् ।मध्वेश कृष्ण भगवन् तव सुप्रभातम् ॥ १४॥

niryānti śāvaka viyogayutā vihaṅgāḥ |prītyārbhakeśu ca punaḥ praviśanti nīḍam |dhāvanti sasya kaṇikānupacetu mārāt |madhveśa kṛṣṇa bhagavan tava suprabhātam || 14||

भूत्वातिथिः सुमनसामनिलः सुगन्धम् ।सङ्गृह्यवाति जनयन् प्रमदं जनानाम् ।विश्वात्मनोर्चनधियातव मुञ्च निद्राम् ।मध्वेश कृष्ण भगवन् तव सुप्रभातम् ॥ १५॥

bhūtvātithiḥ sumanasāmanilaḥ sugandham |saṅgṛhyavāti janayan pramadaṃ janānām |viśvātmanorcanadhiyātava muñca nidrām |madhveśa kṛṣṇa bhagavan tava suprabhātam || 15||

तारालि मौक्तिक विभूषण मण्डिताङ्गी ।प्राचीदुकूल मरुणं रुचिरं दधान ।खेसौखसुप्तिक वधूरिव दृश्यतेद्य ।मध्वेश कृष्ण भगवन् तव सुप्रभातम् ॥ १६॥

tārāli mauktika vibhūṣaṇa maṇḍitāṅgī |prācīdukūla maruṇaṃ ruciraṃ dadhāna |khesaukhasuptika vadhūriva dṛśyatedya |madhveśa kṛṣṇa bhagavan tava suprabhātam || 16||

आलोक्य देह सुषमां तव तारकालिः ।ह्रीणाक्रमेण समुपेत्य विवर्णभावम् ।अन्तर्हितेवनचिरात्यज शेषशय्याम् ।मध्वेश कृष्ण भगवन् तव सुप्रभातम् ॥ १७॥

ālokya deha suṣamāṃ tava tārakāliḥ |hrīṇākrameṇa samupetya vivarṇabhāvam |antarhitevanacirātyaja śeṣaśayyām |madhveśa kṛṣṇa bhagavan tava suprabhātam || 17||

साध्वीकराब्जवलयध्वनिनासमेतो ।गानध्वनिः सुदधि मन्थन घोष पुष्टः ।संश्रूयते प्रतिग्रहं रजनी विनष्टा ।मध्वेश कृष्ण भगवन् तव सुप्रभातम् ॥ १८॥

sādhvīkarābjavalayadhvanināsameto |gānadhvaniḥ sudadhi manthana ghoṣa puṣṭaḥ |saṃśrūyate pratigrahaṃ rajanī vinaṣṭā |madhveśa kṛṣṇa bhagavan tava suprabhātam || 18||

भास्वानुदेश्यति हिमांशुर भूद्गतश्रीः ।पूर्वान्दिशामरुणयन् समुपैत्यनूरुः ।आशाः प्रसाद सुभगाश्च गतत्रियामा ।मध्वेश कृष्ण भगवन् तव सुप्रभातम् ॥ १९॥

bhāsvānudeśyati himāṃśura bhūdgataśrīḥ |pūrvāndiśāmaruṇayan samupaityanūruḥ |āśāḥ prasāda subhagāśca gatatriyāmā |madhveśa kṛṣṇa bhagavan tava suprabhātam || 19||

आदित्य चन्द्र धरणी सुत रौहिणेय ।जीवोशनः शनिविधुं तुदकेतवस्ते ।दासानुदास परिचारक भृत्य भृत्य ।मध्वेश कृष्ण भगवन् तव सुप्रभातम् ॥ २०॥

āditya candra dharaṇī suta rauhiṇeya |jīvośanaḥ śanividhuṃ tudaketavaste |dāsānudāsa paricāraka bhṛtya bhṛtya |madhveśa kṛṣṇa bhagavan tava suprabhātam || 20||

इन्द्राग्नि दण्डधर निर्रिति पाशिवायु ।वित्तेश भूत पतयो हरितामधीशाः ।आराधयन्ति पदवी च्युति शङ्कया त्वाम् ।मध्वेश कृष्ण भगवन् तव सुप्रभातम् ॥ २१॥

indrāgni daṇḍadhara nirriti pāśivāyu |vitteśa bhūta patayo haritāmadhīśāḥ |ārādhayanti padavī cyuti śaṅkayā tvām |madhveśa kṛṣṇa bhagavan tava suprabhātam || 21||

वीणां सती कमलजस्य करे दधाना ।तन्त्र्यागलस्य चरवे कलयन्त्य भेदम् ।विश्वं निमज्जयति गानसुधारसाब्धौ ।मध्वेश कृष्ण भगवन् तव सुप्रभातम् ॥ २२॥

vīṇāṃ satī kamalajasya kare dadhānā |tantryāgalasya carave kalayantya bhedam |viśvaṃ nimajjayati gānasudhārasābdhau |madhveśa kṛṣṇa bhagavan tava suprabhātam || 22||

देवर्षिरंबर तलादवनीं प्रपन्नः ।त्वत्सन्निधौ मधुरवादित चारु वीणा ।नामानिगायति नत स्फुरितोत्तमाङ्गो ।मध्वेश कृष्ण भगवन् तव सुप्रभातम् ॥ २३॥

devarṣiraṃbara talādavanīṃ prapannaḥ |tvatsannidhau madhuravādita cāru vīṇā |nāmānigāyati nata sphuritottamāṅgo |madhveśa kṛṣṇa bhagavan tava suprabhātam || 23||

वातात्मजः प्रणत कल्प तरुर्हनूमान् ।द्वारे कृताञ्जलि पुटस्तवदर्शनार्थी ।तिष्ठत्यमुं कुरुकृतार्थमपेत निद्रम् ।मध्वेश कृष्ण भगवन् तव सुप्रभातम् ॥ २४॥

vātātmajaḥ praṇata kalpa tarurhanūmān |dvāre kṛtāñjali puṭastavadarśanārthī |tiṣṭhatyamuṃ kurukṛtārthamapeta nidram |madhveśa kṛṣṇa bhagavan tava suprabhātam || 24||

सर्वोत्तमो हरिरिति श्रुतिवाक्य वृन्दैः ।चन्द्रेश्वर द्विरदवक्त्र षडाननाद्याः ।उद्घोशयन्त्य निमिषा रजनी प्रभात ।मध्वेश कृष्ण भगवन् तव सुप्रभातम् ॥ २५॥

sarvottamo haririti śrutivākya vṛndaiḥ |candreśvara dviradavaktra ṣaḍānanādyāḥ |udghośayantya nimiṣā rajanī prabhāta |madhveśa kṛṣṇa bhagavan tava suprabhātam || 25||

मध्वाभिदे सरसि पुण्यजले प्रभाते ।गङ्गेंभ सर्वमघमाशु हरेति जप्त्वा ।मज्जन्ति वैदिक शिखामणयो यथावन् ।मध्वेश कृष्ण भगवन् तव सुप्रभातम् ॥ २६॥

madhvābhide sarasi puṇyajale prabhāte |gaṅgeṃbha sarvamaghamāśu hareti japtvā |majjanti vaidika śikhāmaṇayo yathāvan |madhveśa kṛṣṇa bhagavan tava suprabhātam || 26||

द्वारे मिलन्ति निगमान्त विदस्त्रयीज्ञाः ।मीमांसकाः पदविदोनयदर्शनज्ञाः ।गान्धर्ववेद कुशलाश्च तवेक्षणार्थम् ।मध्वेश कृष्ण भगवन् तव सुप्रभातम् ॥ २७॥

dvāre milanti nigamānta vidastrayījñāḥ |mīmāṃsakāḥ padavidonayadarśanajñāḥ |gāndharvaveda kuśalāśca tavekṣaṇārtham |madhveśa kṛṣṇa bhagavan tava suprabhātam || 27||

श्री मध्वयोगि वरवन्दित पादपद्म ।भैष्मी मुखांभोरुह भास्कर विश्ववन्द्य ।दासाग्रगण्य कनकादिनुत प्रभाव ।मध्वेश कृष्ण भगवन् तव सुप्रभातम् ॥ २८॥

śrī madhvayogi varavandita pādapadma |bhaiṣmī mukhāṃbhoruha bhāskara viśvavandya |dāsāgragaṇya kanakādinuta prabhāva |madhveśa kṛṣṇa bhagavan tava suprabhātam || 28||

पर्याय पीठ मधिरुह्य मठाधिपास्त्वाम् ।अष्टौ भजन्ति विधिवत् सततं यतीन्द्राः ।श्री वादिराजनियमान् परिपालयन्तो ।मध्वेश कृष्ण भगवन् तव सुप्रभातम् ॥ २९॥

paryāya pīṭha madhiruhya maṭhādhipāstvām |aṣṭau bhajanti vidhivat satataṃ yatīndrāḥ |śrī vādirājaniyamān paripālayanto |madhveśa kṛṣṇa bhagavan tava suprabhātam || 29||

श्रीमन्ननन्त शयनोडुपिवास शौरे ।पूर्णप्रबोध हृदयांबर शीत रश्मे ।लक्ष्मीनिवास पुरुषोत्तम पूर्णकाम ।मध्वेश कृष्ण भगवन् तव सुप्रभातम् ॥ ३०॥

śrīmannananta śayanoḍupivāsa śaure |pūrṇaprabodha hṛdayāṃbara śīta raśme |lakṣmīnivāsa puruṣottama pūrṇakāma |madhveśa kṛṣṇa bhagavan tava suprabhātam || 30||

श्री प्राणनाथ करुणा वरुणालयार्त ।सन्त्राण शौन्द रमणीय गुणप्रपूर्ण ।सङ्कर्षणानुज फणीन्द्र फणा वितान ।मध्वेश कृष्ण भगवन् तव सुप्रभातम् ॥ ३१॥

śrī prāṇanātha karuṇā varuṇālayārta |santrāṇa śaunda ramaṇīya guṇaprapūrṇa |saṅkarṣaṇānuja phaṇīndra phaṇā vitāna |madhveśa kṛṣṇa bhagavan tava suprabhātam || 31||

आनन्दतुन्दिल पुरन्दर पूर्वदास ।वृन्दाभिवन्दित पदांबुजनन्द सूनो ।गोविन्द मन्दरगिरीन्द्र धरांबुदाभ ।मध्वेश कृष्ण भगवन् तव सुप्रभातम् ॥ ३२॥

ānandatundila purandara pūrvadāsa |vṛndābhivandita padāṃbujananda sūno |govinda mandaragirīndra dharāṃbudābha |madhveśa kṛṣṇa bhagavan tava suprabhātam || 32||

मीनाकृते कमठरूप वराहमूर्ते ।स्वामिन् नृसिंह बलिसूदन जामदग्न्यः ।श्री राघवेन्द्र यदुपुङ्गव बुद्ध कल्किन् ।मध्वेश कृष्ण भगवन् तव सुप्रभातम् ॥ ३३॥

mīnākṛte kamaṭharūpa varāhamūrte |svāmin nṛsiṃha balisūdana jāmadagnyaḥ |śrī rāghavendra yadupuṅgava buddha kalkin |madhveśa kṛṣṇa bhagavan tava suprabhātam || 33||

गोपाल गोप ललनाकुलरासलीला ।लोलाभ्रनील कमलेश कृपालवाल ।कालीयमौलि विलसन्मणिरञ्जिताङ्घ्रे ।मध्वेश कृष्ण भगवन् तव सुप्रभातम् ॥ ३४॥

gopāla gopa lalanākularāsalīlā |lolābhranīla kamaleśa kṛpālavāla |kālīyamauli vilasanmaṇirañjitāṅghre |madhveśa kṛṣṇa bhagavan tava suprabhātam || 34||

कृष्णस्य मङ्गल निधेर्भुवि सुप्रभातम् ।येहर्मुखे प्रतिदिनं मनुजाः पठन्ति ।विन्दन्ति ते सकल वाञ्छित सिद्धिमाशु ।ज्ञानञ्च मुक्ति सुलभं परमं लभन्ते ॥ ३५॥

kṛṣṇasya maṅgala nidherbhuvi suprabhātam |yeharmukhe pratidinaṃ manujāḥ paṭhanti |vindanti te sakala vāñchita siddhimāśu |jñānañca mukti sulabhaṃ paramaṃ labhante || 35||

॥ श्रीकृष्णार्पणमस्तु ॥

|| śrīkṛṣṇārpaṇamastu ||