सिद्धान्तरहस्यम् Siddhantarahasyam

श्रावणस्यामले पक्षे एकादश्यां महानिशि ।साक्षाद्भगवता प्रोक्तं तदक्षरश उच्यते ॥ १॥

śrāvaṇasyāmale pakṣe ekādaśyāṃ mahāniśi |sākṣādbhagavatā proktaṃ tadakṣaraśa ucyate || 1||

ब्रह्मसम्बन्धकरणात्सर्वेषां देहजीवयोः ।सर्वदोषनिवृत्तिर्हि दोषाः पञ्चविधाः स्मृताः ॥ २॥

brahmasambandhakaraṇātsarveṣāṃ dehajīvayoḥ |sarvadoṣanivṛttirhi doṣāḥ pañcavidhāḥ smṛtāḥ || 2||

सहजा देशकालोत्था लोकवेदनिरूपिताः ।संयोगजाः स्पर्शजाश्च न मन्तव्याः कथञ्चन ॥ ३॥

sahajā deśakālotthā lokavedanirūpitāḥ |saṃyogajāḥ sparśajāśca na mantavyāḥ kathañcana || 3||

अन्यथा सर्वदोषाणां न निवृत्तिः कथञ्चन ।असमर्पितवस्तूनां तस्माद्वर्जनमाचरेत् ॥ ४॥

anyathā sarvadoṣāṇāṃ na nivṛttiḥ kathañcana |asamarpitavastūnāṃ tasmādvarjanamācaret || 4||

निवेदिभिः समर्प्यैव सर्वं कुर्यादिति स्थितिः ।न मतं देवदेवस्य सामिभुक्तं समर्पणम् ॥ ५॥

nivedibhiḥ samarpyaiva sarvaṃ kuryāditi sthitiḥ |na mataṃ devadevasya sāmibhuktaṃ samarpaṇam || 5||

तस्मादादौ सर्वकार्ये सर्ववस्तुसमर्पणम् ।दत्तापहारवचनं तथा च सकलं हरेः ॥ ६॥

tasmādādau sarvakārye sarvavastusamarpaṇam |dattāpahāravacanaṃ tathā ca sakalaṃ hareḥ || 6||

न ग्राह्यमिति वाक्यं हि भिन्नमार्गपरं मतम् ।सेवकानां यथा लोके व्यवहारः प्रसिद्।ह्ध्यति ॥ ७॥

na grāhyamiti vākyaṃ hi bhinnamārgaparaṃ matam |sevakānāṃ yathā loke vyavahāraḥ prasid|hdhyati || 7||

तथा कार्यं समर्प्यैव सर्वेषां ब्रह्मता ततः ।गङ्गात्वं सर्वदोषाणां गुणदोषादिवर्णना ।गङ्गात्वेन निरूप्या स्यात्तद्वदत्रापि चैव हि ॥ ८॥

tathā kāryaṃ samarpyaiva sarveṣāṃ brahmatā tataḥ |gaṅgātvaṃ sarvadoṣāṇāṃ guṇadoṣādivarṇanā |gaṅgātvena nirūpyā syāttadvadatrāpi caiva hi || 8||

इति श्रीवल्लभाचार्यविरचितं सिद्धान्तरहस्यं समाप्तम् ।

iti śrīvallabhācāryaviracitaṃ siddhāntarahasyaṃ samāptam |