गोपीजनवल्लभाष्टकम् Shrigopijanavallabhashtakam

॥ अथ श्रीगोपीजनवल्लभाष्टकम् ॥सरोजनेत्राय कृपायुताय मन्दारमालापरिभूषिताय ।उदारहासाय ससन्मुखाय नमोऽस्तु गोपीजनवल्लभाय ॥ १॥

|| atha śrīgopījanavallabhāṣṭakam ||sarojanetrāya kṛpāyutāya mandāramālāparibhūṣitāya |udārahāsāya sasanmukhāya namo'stu gopījanavallabhāya || 1||

आनन्दनन्दादिकदायकाय बकीबकप्राणविनाशकाय ।मृगेन्द्रहस्ताग्रजभूषणाय नमोऽस्तु गोपीजनवल्लभाय ॥ २॥

ānandanandādikadāyakāya bakībakaprāṇavināśakāya |mṛgendrahastāgrajabhūṣaṇāya namo'stu gopījanavallabhāya || 2||

गोपाललीलाकृतकौतुकाय गोपालकाजीवनजीवनाय ।भक्तैकगम्याय नवप्रियाय नमोऽस्तु गोपीजनवल्लभाय ॥ ३॥

gopālalīlākṛtakautukāya gopālakājīvanajīvanāya |bhaktaikagamyāya navapriyāya namo'stu gopījanavallabhāya || 3||

मन्थानभाण्डाखिलभञ्जनाय हैयङ्गवीनाशनरञ्जनाय ।गोस्वादुदुग्धामृतपोषिताय नमोऽस्तु गोपीजनवल्लभाय ॥ ४॥

manthānabhāṇḍākhilabhañjanāya haiyaṅgavīnāśanarañjanāya |gosvādudugdhāmṛtapoṣitāya namo'stu gopījanavallabhāya || 4||

कलिन्दजाकूलकुतूहलाय किशोररूपाय मनोहराय ।पिशङ्गवस्त्राय नरोत्तमाय नमोऽस्तु गोपीजनवल्लभाय ॥ ५॥

kalindajākūlakutūhalāya kiśorarūpāya manoharāya |piśaṅgavastrāya narottamāya namo'stu gopījanavallabhāya || 5||

धराधराभाय धराधराय शृङ्गारहारावलिशोभिताय ।समस्तगर्गोक्तिसुलक्षणाय नमोऽस्तु गोपीजनवल्लभाय ॥ ६॥

dharādharābhāya dharādharāya śṛṅgārahārāvaliśobhitāya |samastagargoktisulakṣaṇāya namo'stu gopījanavallabhāya || 6||

इभेन्द्रकुम्भस्थलखण्डनाय विदेशवृन्दावनमण्डनाय ।हंसाय कंसासुरमर्दनाय नमोऽस्तु गोपीजनवल्लभाय ॥ ७॥

ibhendrakumbhasthalakhaṇḍanāya videśavṛndāvanamaṇḍanāya |haṃsāya kaṃsāsuramardanāya namo'stu gopījanavallabhāya || 7||

श्रीदेवकीसूनुविमोक्षणाय क्षत्तोद्धवाक्रूरवरप्रदाय ।गदारिशङ्खाब्जचतुर्भुजाय नमोऽस्तु गोपीजनवल्लभाय ॥ ८॥

śrīdevakīsūnuvimokṣaṇāya kṣattoddhavākrūravarapradāya |gadāriśaṅkhābjacaturbhujāya namo'stu gopījanavallabhāya || 8||

॥ इति श्रीवल्लभाचार्यविरचितं श्रीगोपीजनवल्लभाष्टकं सम्पूर्णम् ॥

|| iti śrīvallabhācāryaviracitaṃ śrīgopījanavallabhāṣṭakaṃ sampūrṇam ||