गोपीजनवल्लभाष्टकम् २ Shrigopijanavallabhashtakam 2

नवाम्बुदानीकमनोहराय प्रफुल्लराजीवविलोचनायवेणुस्वनैर्मोदितगोकुलाय नमोऽस्तु गोपीजनवल्लभाय ॥ १॥

navāmbudānīkamanoharāya praphullarājīvavilocanāyaveṇusvanairmoditagokulāya namo'stu gopījanavallabhāya || 1||

किरीटकेयूरविभूषिताय ग्रैवेयमालामणिरञ्जिताय ।स्फुरच्चलत्काञ्चनकुण्डलाय नमोऽस्तु गोपीजनवल्लभाय ॥ २॥

kirīṭakeyūravibhūṣitāya graiveyamālāmaṇirañjitāya |sphuraccalatkāñcanakuṇḍalāya namo'stu gopījanavallabhāya || 2||

दिव्याङ्गनावृन्दनिषेविताय स्मितप्रभाचारुमुखाम्बुजाय ।त्रैलोक्यसम्मोहनसुन्दराय नमोऽस्तु गोपीजनवल्लभाय ॥ ३॥

divyāṅganāvṛndaniṣevitāya smitaprabhācārumukhāmbujāya |trailokyasammohanasundarāya namo'stu gopījanavallabhāya || 3||

रत्नादिमूलालयमाश्रिताय कल्पद्रुमच्छायसमाश्रिताय ।हेमस्फुरन्मण्डलमध्यगाय नमोऽस्तु गोपीजनवल्लभाय ॥ ४॥

ratnādimūlālayamāśritāya kalpadrumacchāyasamāśritāya |hemasphuranmaṇḍalamadhyagāya namo'stu gopījanavallabhāya || 4||

श्रीवत्सरोमावलिरञ्जिताय वक्षःस्थले कौस्तुभभूषिताय ।सरोजकिञ्जल्कनिभांशुकाय नमोऽस्तु गोपीजनवल्लभाय ॥ ५॥

śrīvatsaromāvalirañjitāya vakṣaḥsthale kaustubhabhūṣitāya |sarojakiñjalkanibhāṃśukāya namo'stu gopījanavallabhāya || 5||

दिव्याङ्गुलीयाङ्गुलिरञ्जिताय मयूरपिच्छच्छविशोभिताय ।वन्यस्रजालङ्कृतविग्रहाय नमोऽस्तु गोपीजनवल्लभाय ॥ ६॥

divyāṅgulīyāṅgulirañjitāya mayūrapicchacchaviśobhitāya |vanyasrajālaṅkṛtavigrahāya namo'stu gopījanavallabhāya || 6||

मुनीन्द्रवृन्दैरभिसंस्तुताय क्षरत्पयोगोकुलगोकुलाय ।धर्मार्थकामामृतसाधकाय नमोऽस्तु गोपीजनवल्लभाय ॥ ७॥

munīndravṛndairabhisaṃstutāya kṣaratpayogokulagokulāya |dharmārthakāmāmṛtasādhakāya namo'stu gopījanavallabhāya || 7||

एनस्तमःस्तोमदिवाकराय भक्तस्य चिन्तामणिसाधकाय ।अशेषदुःखामयभेषजाय नमोऽस्तु गोपीजनवल्लभाय ॥ ८॥

enastamaḥstomadivākarāya bhaktasya cintāmaṇisādhakāya |aśeṣaduḥkhāmayabheṣajāya namo'stu gopījanavallabhāya || 8||

इति श्रीवह्निसूनुविरचितं श्रीगोपीजनवल्लभाष्टकं समाप्तम् ।

iti śrīvahnisūnuviracitaṃ śrīgopījanavallabhāṣṭakaṃ samāptam |