पतितपावनाष्टकम् Patitapavana Ashtakam

सचिन्त इव लक्ष्यसे सपदि मे चरित्रं स्मरन्परं कलितसाहसः पतितपावनत्वव्रतात् ।न मामगणयः पुरा न हि विचारकालोऽधुनाव्रतं विसृज वाथवा वरद पावयैनं जनम् ॥ १॥

sacinta iva lakṣyase sapadi me caritraṃ smaranparaṃ kalitasāhasaḥ patitapāvanatvavratāt |na māmagaṇayaḥ purā na hi vicārakālo'dhunāvrataṃ visṛja vāthavā varada pāvayainaṃ janam || 1||

न राघव न वायसो न खलु कृष्ण चैद्योऽस्म्यहम्न खल्वहमजामिलो नरकनाश नारायण ।प्रधानमपराधिनां परिवृढं च मां पापिनंक्षमाजलनिधे विदन् सपदि सावधानो भव ॥ २॥

na rāghava na vāyaso na khalu kṛṣṇa caidyo'smyahamna khalvahamajāmilo narakanāśa nārāyaṇa |pradhānamaparādhināṃ parivṛḍhaṃ ca māṃ pāpinaṃkṣamājalanidhe vidan sapadi sāvadhāno bhava || 2||

यद्युद्यदघलेखनाकलनजाग्रदग्राङ्गुलिमिलत्प्रखरलेखनीमुखविघातवीतोद्यमः ।अलं किल ललज्जिरे सपदि चित्रगुप्तादयःस एष पतिताग्रणी सदय रक्ष दक्षोऽसि चेत् ॥ ३॥

yadyudyadaghalekhanākalanajāgradagrāṅgulimilatprakharalekhanīmukhavighātavītodyamaḥ |alaṃ kila lalajjire sapadi citraguptādayaḥsa eṣa patitāgraṇī sadaya rakṣa dakṣo'si cet || 3||

विदन्न् अपि हृदन्तरे प्रतिपदं यदंहःकृतेयते यदुपते न ते विफलता व्रते स्यादिति ।यतोऽसि जगतो गुरु स्मृतिनिषेधतस्ते ततोन नाम च भजामि यद्यथ वृथा क्रुधं मा कृथाः ॥ ४॥

vidann api hṛdantare pratipadaṃ yadaṃhaḥkṛteyate yadupate na te viphalatā vrate syāditi |yato'si jagato guru smṛtiniṣedhataste tatona nāma ca bhajāmi yadyatha vṛthā krudhaṃ mā kṛthāḥ || 4||

अनन्त यदघावलीमननसावधानात्मकैर्निजे दुरितमण्डले निखिलसाक्षिभिर्नेक्षिते ।जना जगति निर्भया जय जयेति जल्पन्त्यमुंप्रभो खलधुरन्धरं पतितपावनश्चेदव ॥ ५॥

ananta yadaghāvalīmananasāvadhānātmakairnije duritamaṇḍale nikhilasākṣibhirnekṣite |janā jagati nirbhayā jaya jayeti jalpantyamuṃprabho khaladhurandharaṃ patitapāvanaścedava || 5||

अनेकपतिताधिपान् अवति चक्रवर्ती यथानृपान् अयमसज्जनः पतितपावनत्वेन नु ।इति प्रतिदिशं खलाः पतितपावनं मां विदुर्न पावयसि चेत् फलं ननु भवेदिदं केवलम् ॥ ६॥

anekapatitādhipān avati cakravartī yathānṛpān ayamasajjanaḥ patitapāvanatvena nu |iti pratidiśaṃ khalāḥ patitapāvanaṃ māṃ vidurna pāvayasi cet phalaṃ nanu bhavedidaṃ kevalam || 6||

कदापि हि पदामृतं तव मयापि नास्वादितंवृथा भवकथाभरैरपि च नाथ नीतं वयः ।त्वया यदपि हेलया मयि न चेद्विधेया दयातवैव महती क्षतिः पतितपावनत्वं यतः ॥ ७॥

kadāpi hi padāmṛtaṃ tava mayāpi nāsvāditaṃvṛthā bhavakathābharairapi ca nātha nītaṃ vayaḥ |tvayā yadapi helayā mayi na cedvidheyā dayātavaiva mahatī kṣatiḥ patitapāvanatvaṃ yataḥ || 7||

भवान् परमधार्मिकः प्रकटितातिकारुण्यकःस्वतन्त्रचरितो यदि स्वयमयं च किं नेदृशः ।अलं किमपि चेत् स्वकं पतितपावनत्वादिकंप्रदर्शयतु नान्यथा भवतु ते यशः सर्वथा ॥ ८॥

bhavān paramadhārmikaḥ prakaṭitātikāruṇyakaḥsvatantracarito yadi svayamayaṃ ca kiṃ nedṛśaḥ |alaṃ kimapi cet svakaṃ patitapāvanatvādikaṃpradarśayatu nānyathā bhavatu te yaśaḥ sarvathā || 8||

वदन्ति यदि पाविताः पतितपावनत्वव्रतंभवन्तमधिकं न तत् परमदुर्विनीतोऽप्यहम् ।पुनातु न पुनातु वा भुवि यथा तथैव ब्रुवेगृहाण गुणमेव मे कुरु कृपां सदोषा न के ॥ ९॥

vadanti yadi pāvitāḥ patitapāvanatvavrataṃbhavantamadhikaṃ na tat paramadurvinīto'pyaham |punātu na punātu vā bhuvi yathā tathaiva bruvegṛhāṇa guṇameva me kuru kṛpāṃ sadoṣā na ke || 9||

इति पतितपावनाष्टकं सम्पूर्णम् ।

iti patitapāvanāṣṭakaṃ sampūrṇam |