जगन्नाथस्तोत्रम् (इन्दरद्युम्नेनकृतं स्कन्दपुराणान्तर्गतम् नमो ब्रह्मण्यदेवाय गोब्राह्मणहिताय) Indaradyumnena Kritam Jagannatha Stotram

इन्द्रद्युम्न उवाच ।नमो ब्रह्मण्यदेवाय गोब्राह्मणहिताय च ।प्रणतार्तिविनाशाय चतुर्वर्गैकहेतवे ॥ २॥

indradyumna uvāca |namo brahmaṇyadevāya gobrāhmaṇahitāya ca |praṇatārtivināśāya caturvargaikahetave || 2||

हिरण्यगर्भपुरुषप्रधानव्यक्तरूपिणे ।ॐ नमो वासुदेवाय शुद्धज्ञानस्वरूपिणे ॥ ३॥

hiraṇyagarbhapuruṣapradhānavyaktarūpiṇe |oṃ namo vāsudevāya śuddhajñānasvarūpiṇe || 3||

इत्युच्चरन्स्तुतिं भूपः सानन्दाश्रुविलोचनः ।प्रदक्षिणं पुनः कुर्वन्ननाम च पुनः पुनः ॥ ४॥

ityuccaranstutiṃ bhūpaḥ sānandāśruvilocanaḥ |pradakṣiṇaṃ punaḥ kurvannanāma ca punaḥ punaḥ || 4||

ततोऽन्या देवता या वै तत्रागच्छन्मुदान्विताः ।तुष्टुवुः प्रणता देवं कृताञ्जलिपुटा मुदा ॥ ५॥

tato'nyā devatā yā vai tatrāgacchanmudānvitāḥ |tuṣṭuvuḥ praṇatā devaṃ kṛtāñjalipuṭā mudā || 5||

देवा ऊचुः ।सहस्रशीर्षा पुरुषः सहस्राक्षः सहस्रपात् ।स भूमिं सर्वतो व्याप्य अत्यतिष्ठद्दशाङ्गुलम् ॥ ६॥

devā ūcuḥ |sahasraśīrṣā puruṣaḥ sahasrākṣaḥ sahasrapāt |sa bhūmiṃ sarvato vyāpya atyatiṣṭhaddaśāṅgulam || 6||

यः पुमान्परमं ब्रह्म परमात्मेति गीयते ।भूतं भव्यं भविष्यं च सर्वं पुरुष एव तत् ॥ ७॥

yaḥ pumānparamaṃ brahma paramātmeti gīyate |bhūtaṃ bhavyaṃ bhaviṣyaṃ ca sarvaṃ puruṣa eva tat || 7||

एतावानस्य महिमा ज्यायानेष पुमान्प्रभुः ।पादोऽस्य विश्वा भूतानि त्रिपादस्यामृतं दिवि ॥ ८॥

etāvānasya mahimā jyāyāneṣa pumānprabhuḥ |pādo'sya viśvā bhūtāni tripādasyāmṛtaṃ divi || 8||

छन्दांसि जज्ञिरे त्वत्तस्त्वत्तो यज्ञपुमानपि ।त्वत्तोऽश्वाश्च व्यजायन्त गावो मेषादयस्तथा ॥ ९॥

chandāṃsi jajñire tvattastvatto yajñapumānapi |tvatto'śvāśca vyajāyanta gāvo meṣādayastathā || 9||

ब्राह्मणा मुखतो जाता बाहुजाः क्षत्रियास्तव ।विशस्तवोरुजा पद्भ्यां तथा शूद्राः समागताः ॥ २\।२४\।१०॥मनसश्चन्द्रमा जातश्चक्षुषस्ते दिवाकरः ।कर्णाभ्यां श्वसनः प्राणैर्जिह्वाया हव्यवाडपि ॥ ११॥

brāhmaṇā mukhato jātā bāhujāḥ kṣatriyāstava |viśastavorujā padbhyāṃ tathā śūdrāḥ samāgatāḥ || 2\|24\|10||manasaścandramā jātaścakṣuṣaste divākaraḥ |karṇābhyāṃ śvasanaḥ prāṇairjihvāyā havyavāḍapi || 11||

नाभितो गगनं द्यौश्च मूर्ध्नस्ते समवर्त्तत ।पादाभ्यां ते धरा जाता दिशश्चाष्टौ श्रुतेर्गताः ॥ १२॥

nābhito gaganaṃ dyauśca mūrdhnaste samavarttata |pādābhyāṃ te dharā jātā diśaścāṣṭau śrutergatāḥ || 12||

सप्तासन्परिधयस्त्वत्त एकविंशत्समिच्च वै ।चराचराः सर्वभावास्त्वत्त एव हि जज्ञिरे ॥ १३॥

saptāsanparidhayastvatta ekaviṃśatsamicca vai |carācarāḥ sarvabhāvāstvatta eva hi jajñire || 13||

त्वमेव जगतां नाथस्त्वमेव परिपालकः ।उग्ररूपश्च संहर्ता त्वमेव परमेश्वर ॥ १४॥

tvameva jagatāṃ nāthastvameva paripālakaḥ |ugrarūpaśca saṃhartā tvameva parameśvara || 14||

त्वमेव यज्ञो यज्ञांशस्त्वं यज्ञेशः परात्परः ।शब्दब्रह्मपरं त्वं हि शब्दब्रह्मासि विश्वराट् ॥ १५॥

tvameva yajño yajñāṃśastvaṃ yajñeśaḥ parātparaḥ |śabdabrahmaparaṃ tvaṃ hi śabdabrahmāsi viśvarāṭ || 15||

स्वराट् संराड्जगन्नाथ विराडसि जगत्पते ।अधश्चोर्ध्वं च तिर्यक्त्वं त्वया व्याप्तं जगन्मय ॥ १६॥

svarāṭ saṃrāḍjagannātha virāḍasi jagatpate |adhaścordhvaṃ ca tiryaktvaṃ tvayā vyāptaṃ jaganmaya || 16||

प्राप्नुवन्ति परं स्थानं त्वां यजन्तश्च याज्ञिकाः ।भोज्यं भोक्ता हविर्होता हवनं त्वं फलप्रदः ॥ १७॥

prāpnuvanti paraṃ sthānaṃ tvāṃ yajantaśca yājñikāḥ |bhojyaṃ bhoktā havirhotā havanaṃ tvaṃ phalapradaḥ || 17||

समस्तकर्मभोक्ता त्वं सर्वकर्मात्मकः प्रभो ।सर्वकर्मोपकरणं सर्वकर्मफलप्रदः ॥ १८॥

samastakarmabhoktā tvaṃ sarvakarmātmakaḥ prabho |sarvakarmopakaraṇaṃ sarvakarmaphalapradaḥ || 18||

कर्मप्रेरयिता त्वं हि धर्मकामार्थसिद्धिदः ।त्वामृते मुक्तिदः कोऽन्यो हृषीकेश नमोऽस्तु ते ॥ १९॥

karmaprerayitā tvaṃ hi dharmakāmārthasiddhidaḥ |tvāmṛte muktidaḥ ko'nyo hṛṣīkeśa namo'stu te || 19||

नमोऽस्त्वनन्ताय सहस्रमूर्त्तये सहस्रपादाक्षिशिरोरुबाहवे ।सहस्रनाम्ने पुरुषाय शाश्वते सहस्रकोटीयुगधारिणे नमः ॥ २\।२४\।२०॥वयं च्युताधिकारास्त्वां प्रपन्नाः शरणं प्रभो ।त्राहि नः पुण्डरीकाक्ष अगतीनां गतिर्भव ॥ २१॥

namo'stvanantāya sahasramūrttaye sahasrapādākṣiśirorubāhave |sahasranāmne puruṣāya śāśvate sahasrakoṭīyugadhāriṇe namaḥ || 2\|24\|20||vayaṃ cyutādhikārāstvāṃ prapannāḥ śaraṇaṃ prabho |trāhi naḥ puṇḍarīkākṣa agatīnāṃ gatirbhava || 21||

संसारपतितस्यैको जन्तोस्त्वं शरणं प्रभो ।त्वत्सृष्टौ त्वादृशो नास्ति यो दीनपरिपालकः ॥ २२॥

saṃsārapatitasyaiko jantostvaṃ śaraṇaṃ prabho |tvatsṛṣṭau tvādṛśo nāsti yo dīnaparipālakaḥ || 22||

दीनानाथैकशरणं पिता त्वं जगतः प्रभो ।पाता पोष्टा त्वमेवेश सर्वापद्विनिवारकः ॥ २३॥

dīnānāthaikaśaraṇaṃ pitā tvaṃ jagataḥ prabho |pātā poṣṭā tvameveśa sarvāpadvinivārakaḥ || 23||

त्राहि विष्णो जगन्नाथ त्राहि नः परमेश्वर ।त्वामृते कमलाकान्त कः शक्तः परिरक्षणे ॥ २४॥

trāhi viṣṇo jagannātha trāhi naḥ parameśvara |tvāmṛte kamalākānta kaḥ śaktaḥ parirakṣaṇe || 24||

अन्तर्यामिन्नमस्तेऽस्तु सर्वतेजोनिधे नमः ॥ २५॥

antaryāminnamaste'stu sarvatejonidhe namaḥ || 25||

इति स्तुवन्तस्ते देवाः प्रणिपत्य पुनःपुनः ।इन्द्रद्युम्नेन सहिता बहिर्भूय द्विजोत्तमाः ॥ २६॥

iti stuvantaste devāḥ praṇipatya punaḥpunaḥ |indradyumnena sahitā bahirbhūya dvijottamāḥ || 26||

इति श्रीस्कन्दपुराणे वैष्णवखण्डे पुरुषोत्तमजगन्नाथमाहात्म्येचतुर्विंशाध्यायान्तर्गतं इन्द्रद्युमानादिकृतं जगन्नाथस्तोत्रंसमाप्तम् ।(देवैः कृतं जगन्नाथस्तोत्रम्)स्कन्दपुराण । वैष्णवखण्ड । पुरुषोत्तमखण्ड । अध्याय २४/२२६॥स्कन्दपुराण । वैष्णवखण्ड । पुरुषोत्तमखण्ड । अध्याय २४/२-२६॥

iti śrīskandapurāṇe vaiṣṇavakhaṇḍe puruṣottamajagannāthamāhātmyecaturviṃśādhyāyāntargataṃ indradyumānādikṛtaṃ jagannāthastotraṃsamāptam |(devaiḥ kṛtaṃ jagannāthastotram)skandapurāṇa | vaiṣṇavakhaṇḍa | puruṣottamakhaṇḍa | adhyāya 24/226||skandapurāṇa | vaiṣṇavakhaṇḍa | puruṣottamakhaṇḍa | adhyāya 24/2-26||