कृष्णनारायणस्तोत्रम् (देवादिभिःकृतं लक्ष्मीनारायणीयसंहितान्तर्गतम्) Devadibhih Kritam Krishnanarayana Stotram

सर्वानन्दा मुक्तयश्च यस्याऽक्षिकोणके स्थिताः ।सर्वे देवाश्च ऋषय ईश्वरा यन्मनोभवाः ॥ ७२॥

sarvānandā muktayaśca yasyā'kṣikoṇake sthitāḥ |sarve devāśca ṛṣaya īśvarā yanmanobhavāḥ || 72||

तस्मायनादिश्रीकृष्णनारायणाय वै नमः ।स्वामिने बालरूपाय वल्लभाय च ते नमः ॥ ७३॥

tasmāyanādiśrīkṛṣṇanārāyaṇāya vai namaḥ |svāmine bālarūpāya vallabhāya ca te namaḥ || 73||

मुक्तानां पतये धाम्नां पतये ते नमो नमः ।अवतारवृन्दधर्त्रे ईश्वरेशाय ते नमः ॥ ७४॥

muktānāṃ pataye dhāmnāṃ pataye te namo namaḥ |avatāravṛndadhartre īśvareśāya te namaḥ || 74||

राधालक्ष्मीस्वामिने ते जयायाः पतये नमः ।ललितामाणिकीपद्मापार्वतीशाय ते नमः ॥ ७५॥

rādhālakṣmīsvāmine te jayāyāḥ pataye namaḥ |lalitāmāṇikīpadmāpārvatīśāya te namaḥ || 75||

प्रभावृन्दातुलसीश्रीपद्मावतीश ते नमः ।मञ्जुलाकान्त हंसेश योगीशेश च ते नमः ॥ ७६॥

prabhāvṛndātulasīśrīpadmāvatīśa te namaḥ |mañjulākānta haṃseśa yogīśeśa ca te namaḥ || 76||

कमलाकान्त सिद्धीश ते प्रत्यक्ष नमोनमः ।नमो हृदयवासाथ सर्वान्तर्यामिणे नमः ॥ ७७॥

kamalākānta siddhīśa te pratyakṣa namonamaḥ |namo hṛdayavāsātha sarvāntaryāmiṇe namaḥ || 77||

नमः मयूरपिच्छाढ्यमुकुटधारिणे नमः ।नमः कौस्तुभसंशोभद्वक्षःस्थलाय ते नमः ॥ ७८॥

namaḥ mayūrapicchāḍhyamukuṭadhāriṇe namaḥ |namaḥ kaustubhasaṃśobhadvakṣaḥsthalāya te namaḥ || 78||

नमः कुण्डलकर्णाय स्वर्णहाराय ते नमः ।सर्वशक्तिस्वरूपाय कामकामाय ते नमः ॥ ७९॥

namaḥ kuṇḍalakarṇāya svarṇahārāya te namaḥ |sarvaśaktisvarūpāya kāmakāmāya te namaḥ || 79||

नैकासुरविनाशाय भक्तत्राणाय ते नमः ।भक्तवाञ्च्छितदात्रे ते श्रीकृष्णाय नमो नमः ॥ ८०॥

naikāsuravināśāya bhaktatrāṇāya te namaḥ |bhaktavāñcchitadātre te śrīkṛṣṇāya namo namaḥ || 80||

धन्येयं कुङ्कुमवापी धन्योऽयं लोमशो मुनिः ।अश्वपट्टसरो धन्यं धन्यं व्याघ्रवनं शुभम् ॥ ८१॥

dhanyeyaṃ kuṅkumavāpī dhanyo'yaṃ lomaśo muniḥ |aśvapaṭṭasaro dhanyaṃ dhanyaṃ vyāghravanaṃ śubham || 81||

धन्या इमे च ऋषयो धन्या द्रुतृणभूरुहाः ।धन्याः पक्षगमा जीवा धन्या भूवासकारिणः ॥ ८२॥

dhanyā ime ca ṛṣayo dhanyā drutṛṇabhūruhāḥ |dhanyāḥ pakṣagamā jīvā dhanyā bhūvāsakāriṇaḥ || 82||

धन्या नरास्तथा नार्यो धन्यं चराचरं त्विदम् ।यत्र वै बालरूपस्त्वं वर्तसे पुरुषोत्तमः ॥ ८३॥

dhanyā narāstathā nāryo dhanyaṃ carācaraṃ tvidam |yatra vai bālarūpastvaṃ vartase puruṣottamaḥ || 83||

दृश्यसे सर्वविषयो गम्यसे ज्ञानिभिः खलु ।अद्य नः सफलं जन्म पुण्यं नः पारवर्जितम् ॥ ८४॥

dṛśyase sarvaviṣayo gamyase jñānibhiḥ khalu |adya naḥ saphalaṃ janma puṇyaṃ naḥ pāravarjitam || 84||

सृष्टिसञ्चालकैर्यो न प्राप्यते दृश्यसेऽत्र नः ।अनेकजन्मशुद्धानां दर्शनं तेऽत्र युज्यते ॥ ८५॥

sṛṣṭisañcālakairyo na prāpyate dṛśyase'tra naḥ |anekajanmaśuddhānāṃ darśanaṃ te'tra yujyate || 85||

अस्माकं चात्र सञ्जातं पुरुषार्थचतुष्टयम् ।शरण्यं यत्पदं लब्धं प्रत्यक्षं सेवनोचितम् ॥ ८६॥

asmākaṃ cātra sañjātaṃ puruṣārthacatuṣṭayam |śaraṇyaṃ yatpadaṃ labdhaṃ pratyakṣaṃ sevanocitam || 86||

इत्येवं स्तवनं कृत्वा बालवेषं पुमुत्तमम् ।पुपूजुः परया भक्त्या शृङ्गारितं जगत्प्रभुम् ॥ ८७॥

ityevaṃ stavanaṃ kṛtvā bālaveṣaṃ pumuttamam |pupūjuḥ parayā bhaktyā śṛṅgāritaṃ jagatprabhum || 87||

उपदाः प्रददुः सर्वे चक्रुश्च तिलकं शुभम् ।आरार्त्रिकं प्रचक्रुश्च नेमुस्तुष्टुवुरादरात् ॥ ८८॥

upadāḥ pradaduḥ sarve cakruśca tilakaṃ śubham |ārārtrikaṃ pracakruśca nemustuṣṭuvurādarāt || 88||

प्रदक्षिणं प्रचक्रुश्च नैवेद्यं विविधं ददुः ।देवा देव्यः पुष्पवृष्टिं चक्रुः कृष्णस्य मूर्धनि ॥ ८९॥

pradakṣiṇaṃ pracakruśca naivedyaṃ vividhaṃ daduḥ |devā devyaḥ puṣpavṛṣṭiṃ cakruḥ kṛṣṇasya mūrdhani || 89||

महोत्सवे कोटिशो वै भुवनानां निवासिनः ।समायाता जयन्त्यां श्रीकृष्णनारायणस्य ते ॥ ९०॥

mahotsave koṭiśo vai bhuvanānāṃ nivāsinaḥ |samāyātā jayantyāṃ śrīkṛṣṇanārāyaṇasya te || 90||

दर्शनं च प्रसादं च चरणामृतमित्यपि ।शुभाशिषश्च सङ्गृह्य ययुर्निजालयं मुदा ॥ ९१॥

darśanaṃ ca prasādaṃ ca caraṇāmṛtamityapi |śubhāśiṣaśca saṅgṛhya yayurnijālayaṃ mudā || 91||

अनादिश्रीकृष्णनारायणस्यैतत् स्तवं शुभम् ।परमैश्वर्यजनकं सुखदं सम्पदाप्रदम् ॥ ९२॥

anādiśrīkṛṣṇanārāyaṇasyaitat stavaṃ śubham |paramaiśvaryajanakaṃ sukhadaṃ sampadāpradam || 92||

निर्वाणमोक्षदं लक्ष्मि! हरिभक्तिप्रदं परम् ।अक्षरेशपददातृ सर्वसिद्धिप्रदं वरम् ॥ ९३॥

nirvāṇamokṣadaṃ lakṣmi! haribhaktipradaṃ param |akṣareśapadadātṛ sarvasiddhipradaṃ varam || 93||

लोभमोहकामक्रोधकर्ममूलनिकृन्तनम् ।बलबुद्धिप्रदं चैव जन्ममृत्युविनाशनम् ॥ ९४॥

lobhamohakāmakrodhakarmamūlanikṛntanam |balabuddhipradaṃ caiva janmamṛtyuvināśanam || 94||

धनपुत्रप्रियाभूमिपतिसम्पत्प्रदं नृणाम् ।शोकदुःखहरं यश्च पठेद्वा शृणुयाच्च वा ॥ ९५॥

dhanaputrapriyābhūmipatisampatpradaṃ nṛṇām |śokaduḥkhaharaṃ yaśca paṭhedvā śṛṇuyācca vā || 95||

बन्धनान्मुच्यते दुःखी भीतो मुच्येत वै भयात् ।रोगाद्विमुच्यते रोगी दरिद्रश्च धनी भवेत् ॥ ९६॥

bandhanānmucyate duḥkhī bhīto mucyeta vai bhayāt |rogādvimucyate rogī daridraśca dhanī bhavet || 96||

दस्युग्रस्तो रिपुग्रस्तो हिंस्रजन्तुसमावृतः ।स्तोत्रेणाऽनेन वै लक्ष्मि! कल्याणं लभते जनः ॥ ९७॥

dasyugrasto ripugrasto hiṃsrajantusamāvṛtaḥ |stotreṇā'nena vai lakṣmi! kalyāṇaṃ labhate janaḥ || 97||

इति श्रीलक्ष्मीनारायणीयसंहितायां प्रथमे कृतयुगसन्ताने ५३१अध्यायान्तर्गतंदेवादिभिः कृतं कृष्णनारायणस्तोत्रं सम्पूर्णम् ।लक्ष्मीनारायणीयसंहिता । खण्ड १। अध्याय ५३१/७२९७॥लक्ष्मीनारायणीयसंहिता । खण्ड १। अध्याय ५३१/७२-९७॥

iti śrīlakṣmīnārāyaṇīyasaṃhitāyāṃ prathame kṛtayugasantāne 531adhyāyāntargataṃdevādibhiḥ kṛtaṃ kṛṣṇanārāyaṇastotraṃ sampūrṇam |lakṣmīnārāyaṇīyasaṃhitā | khaṇḍa 1| adhyāya 531/7297||lakṣmīnārāyaṇīyasaṃhitā | khaṇḍa 1| adhyāya 531/72-97||