दासीभिःकरणीयाश्रीकृष्णस्तुतिः Dasibhih Karaniya Shri Krishna Stuti

तण्डुलैर्विष्णुपादाब्जवारिमिश्रजलैः शुभैः ।स्नायात्तथाऽर्चयेत् कामरूपं कृष्णनरायणम् ॥ ४१॥

taṇḍulairviṣṇupādābjavārimiśrajalaiḥ śubhaiḥ |snāyāttathā'rcayet kāmarūpaṃ kṛṣṇanarāyaṇam || 41||

रतिं कामं प्रतिष्ठाप्य राधां कृष्णं तु कानकम् ।लक्ष्मीं नारायणं स्वर्णं संस्थाप्य पूजयेत्तु सा ॥ ४२॥

ratiṃ kāmaṃ pratiṣṭhāpya rādhāṃ kṛṣṇaṃ tu kānakam |lakṣmīṃ nārāyaṇaṃ svarṇaṃ saṃsthāpya pūjayettu sā || 42||

कामाय पादौ सम्पूज्य जङ्घे वै मोहकारिणे ।मेढ्रं कन्दर्पनिधये कटिं प्रीतिमते नमः ॥ ४३॥

kāmāya pādau sampūjya jaṅghe vai mohakāriṇe |meḍhraṃ kandarpanidhaye kaṭiṃ prītimate namaḥ || 43||

नाभिं सौख्यसमुद्राय रामाय च तथोदरम् ।हृदयं हृदयेशाय स्तनावाह्लादकारिणे ॥ ४४॥

nābhiṃ saukhyasamudrāya rāmāya ca tathodaram |hṛdayaṃ hṛdayeśāya stanāvāhlādakāriṇe || 44||

उत्कण्ठायेति वैकुण्ठमास्यमानन्दकारिणे ।वामाङ्गं पुष्पचापाय पुष्पबाणाय दक्षिणम् ॥ ४५॥

utkaṇṭhāyeti vaikuṇṭhamāsyamānandakāriṇe |vāmāṅgaṃ puṣpacāpāya puṣpabāṇāya dakṣiṇam || 45||

मानसायेति वै मौलिं विलोलायेति मूर्धजम् ।सर्वात्मने कृष्णनारायणात्मने प्रसेविने ॥ ४६॥

mānasāyeti vai mauliṃ vilolāyeti mūrdhajam |sarvātmane kṛṣṇanārāyaṇātmane prasevine || 46||

कान्तरूपाय चक्रादिधारिणे परमात्मने ।नमो नारायणायेति कामदेवात्मने नमः ॥ ४७॥

kāntarūpāya cakrādidhāriṇe paramātmane |namo nārāyaṇāyeti kāmadevātmane namaḥ || 47||

कामपित्रे कामदेवनिवासाय च ते नमः ।काममोक्षकरायाऽर्तिहराय हरये नमः ॥ ४८॥

kāmapitre kāmadevanivāsāya ca te namaḥ |kāmamokṣakarāyā'rtiharāya haraye namaḥ || 48||

कामबन्धनकाराय कामबन्धनहारिणे ।कृष्ण कृष्ण काम कृष्ण मोक्षदाय च ते नमः ॥ ४९॥

kāmabandhanakārāya kāmabandhanahāriṇe |kṛṣṇa kṛṣṇa kāma kṛṣṇa mokṣadāya ca te namaḥ || 49||

अस्माकं त्वं पतिः कृष्ण नान्योऽस्ति त्वादृशः पतिः ।अन्ये स्वार्थाः पतयस्ते वयं स्वार्थाश्च योषितः ॥ ५०॥

asmākaṃ tvaṃ patiḥ kṛṣṇa nānyo'sti tvādṛśaḥ patiḥ |anye svārthāḥ patayaste vayaṃ svārthāśca yoṣitaḥ || 50||

त्वं परार्थः परब्रह्म गृहाणाऽस्मान्निजे करे ।पातिव्रत्यं त्वयि चास्तु नान्यत्र क्षणदेषु वै ॥ ५१॥

tvaṃ parārthaḥ parabrahma gṛhāṇā'smānnije kare |pātivratyaṃ tvayi cāstu nānyatra kṣaṇadeṣu vai || 51||

क्षणदेषु भवानास्ते भवानेव पतिः प्रभो! ।तारयाऽस्मान् भववाहात् कृष्णवाहे नय प्रभो ॥ ५२॥

kṣaṇadeṣu bhavānāste bhavāneva patiḥ prabho! |tārayā'smān bhavavāhāt kṛṣṇavāhe naya prabho || 52||

नार्यः कामकृते सृष्टाः भवान् कामरूपो हि नः ।बीजरूपो हरिः कृष्णो बालरूपो भवान् मतः ॥ ५३॥

nāryaḥ kāmakṛte sṛṣṭāḥ bhavān kāmarūpo hi naḥ |bījarūpo hariḥ kṛṣṇo bālarūpo bhavān mataḥ || 53||

प्रेमरूपो लिङ्गरूपो भवानेव मतो हि नः ।मा भक्तानां योषितां ते किङ्करीणां दुरीतकम् ॥ ५४॥

premarūpo liṅgarūpo bhavāneva mato hi naḥ |mā bhaktānāṃ yoṣitāṃ te kiṅkarīṇāṃ durītakam || 54||

पण्यत्वे च कदाचिद्वै स्पृशत्वस्माँस्तव प्रियाः ।यत्कुर्मो वामभागस्थाः शर्म कर्म सुखावहम् ॥ ५५॥

paṇyatve ca kadācidvai spṛśatvasmām̐stava priyāḥ |yatkurmo vāmabhāgasthāḥ śarma karma sukhāvaham || 55||

अर्पयामो भवत्येव निर्गुणं तन्निवर्तताम् ।एवं कृष्णार्पणं लक्ष्मि! कार्यं वारस्य योषिता ॥ ५६॥

arpayāmo bhavatyeva nirguṇaṃ tannivartatām |evaṃ kṛṣṇārpaṇaṃ lakṣmi! kāryaṃ vārasya yoṣitā || 56||

पण्यस्त्रीभिस्तथा दास्या कार्यं कृष्णार्पणं हि तत् ।अथ लक्ष्मीं राधिकां च रतिं मत्वा समर्चयेत् ॥ ५७॥

paṇyastrībhistathā dāsyā kāryaṃ kṛṣṇārpaṇaṃ hi tat |atha lakṣmīṃ rādhikāṃ ca ratiṃ matvā samarcayet || 57||

नमः पुष्ट्यै नमस्तुष्ट्यै नमः सर्वार्थसम्पदे ।अनङ्गजननीं वन्दे कामपत्न्यै नमो नमः ॥ ५८॥

namaḥ puṣṭyai namastuṣṭyai namaḥ sarvārthasampade |anaṅgajananīṃ vande kāmapatnyai namo namaḥ || 58||

कामात्मिकायै सुन्दर्यै कृष्णकान्त्यै च ते नमः ।आनन्दात्मकरूपिण्यै तारिण्यै ते नमो नमः ॥ ५९॥

kāmātmikāyai sundaryai kṛṣṇakāntyai ca te namaḥ |ānandātmakarūpiṇyai tāriṇyai te namo namaḥ || 59||

एवं प्रातः सदा पण्यप्रमदा श्रीहरिं पतिम् ।श्रीपतिं पूजयेत् स्वामिभावेन मोक्षणं व्रजेत् ॥ ६०॥

evaṃ prātaḥ sadā paṇyapramadā śrīhariṃ patim |śrīpatiṃ pūjayet svāmibhāvena mokṣaṇaṃ vrajet || 60||

गन्धैर्माल्यैस्तथा धूपैर्नैवैद्यैर्जलदीपनैः ।कामिनी चाप्सरसश्च पूजयेच्छ्रीजनार्दनम् ॥ ६१॥

gandhairmālyaistathā dhūpairnaivaidyairjaladīpanaiḥ |kāminī cāpsarasaśca pūjayecchrījanārdanam || 61||

अन्नदानं वस्त्रदानं द्रव्यदानं द्विजातये ।साधवे ब्रह्मशीलाय दद्याच्च ब्रह्मचारिणे ॥ ६२॥

annadānaṃ vastradānaṃ dravyadānaṃ dvijātaye |sādhave brahmaśīlāya dadyācca brahmacāriṇe || 62||

तस्मै कृष्णायाऽर्पयामि श्रीकृष्णः प्रीयतां मम ।इति पूजां कारयेद्वा कुर्यात् पुण्यप्रदां सती ॥ ६३॥

tasmai kṛṣṇāyā'rpayāmi śrīkṛṣṇaḥ prīyatāṃ mama |iti pūjāṃ kārayedvā kuryāt puṇyapradāṃ satī || 63||

इति श्रीलक्ष्मीनारायणीयसंहितायां प्रथमे कृतयुगसन्ताने ४१३अध्यायान्तर्गतंदासीभिः करणीया श्रीकृष्णस्तुतिः ।लक्ष्मीनारायणीयसंहिता । खण्ड १। अध्याय ४१३/४१६३॥लक्ष्मीनारायणीयसंहिता । खण्ड १। अध्याय ४१३/४१-६३॥

iti śrīlakṣmīnārāyaṇīyasaṃhitāyāṃ prathame kṛtayugasantāne 413adhyāyāntargataṃdāsībhiḥ karaṇīyā śrīkṛṣṇastutiḥ |lakṣmīnārāyaṇīyasaṃhitā | khaṇḍa 1| adhyāya 413/4163||lakṣmīnārāyaṇīyasaṃhitā | khaṇḍa 1| adhyāya 413/41-63||