चाटुपुष्पाञ्जलिः Chatupushpanjalih

श्रीराधिकायै नमः ।नवगोरोचनागौरी प्रवरेन्द्रीवराम्बराम् ।मणिस्तवकविद्योतिवेणीव्यालाङ्गणाफणाम् ॥ १॥

śrīrādhikāyai namaḥ |navagorocanāgaurī pravarendrīvarāmbarām |maṇistavakavidyotiveṇīvyālāṅgaṇāphaṇām || 1||

उपमानघटमानप्रहारिमुखमण्डलाम् ।नवेन्दुनिन्दिभालोद्यत्कस्तुरीतिलकश्रियम् ॥ २॥

upamānaghaṭamānaprahārimukhamaṇḍalām |navendunindibhālodyatkasturītilakaśriyam || 2||

भ्रूजितानङ्गकोदण्डां लोलनीलालकावलिम् ।कज्जलोज्ज्वलताराजच्चकोरीचारुलोचनाम् ॥ ३॥

bhrūjitānaṅgakodaṇḍāṃ lolanīlālakāvalim |kajjalojjvalatārājaccakorīcārulocanām || 3||

तिलपुष्पाभनासाग्रविराजद्वरमौलिकाम् ।अधरोद्भूतबन्धूकां कुन्दालीबन्धुरद्विजाम् ॥ ४॥

tilapuṣpābhanāsāgravirājadvaramaulikām |adharodbhūtabandhūkāṃ kundālībandhuradvijām || 4||

सरत्नस्वर्णराजीवकर्णिकाकृतकर्णिकाम् ।कस्तूरीबिन्दुचिबुकां रत्नग्रैवेयकोज्ज्वलाम् ॥ ५॥

saratnasvarṇarājīvakarṇikākṛtakarṇikām |kastūrībinducibukāṃ ratnagraiveyakojjvalām || 5||

दिव्याङ्गदपरिष्वङ्गलसद्भुजमृणालिकाम् ।बलारिरत्नवलयकलालम्बिकलाविकाम् ॥ ६॥

divyāṅgadapariṣvaṅgalasadbhujamṛṇālikām |balāriratnavalayakalālambikalāvikām || 6||

रत्नाङ्गुरीयकोल्लासिवराङ्गुलिकराम्बुजाम् ।मनोहरमहाहारविहारिकुचकुट्मलाम् ॥ ७॥

ratnāṅgurīyakollāsivarāṅgulikarāmbujām |manoharamahāhāravihārikucakuṭmalām || 7||

रोमालिभुजगीमूर्धरत्नाभतरलाञ्चिताम् ।वलित्रयीलताबद्धक्षीणभङ्गुरमध्यमाम् ॥ ८॥

romālibhujagīmūrdharatnābhataralāñcitām |valitrayīlatābaddhakṣīṇabhaṅguramadhyamām || 8||

मणिसारसनाधारविस्फारश्रोणिरोधसम् ।हेमरम्भामदारम्भस्तम्भनोरुयुगाकृतिम् ॥ ९॥

maṇisārasanādhāravisphāraśroṇirodhasam |hemarambhāmadārambhastambhanoruyugākṛtim || 9||

जानुद्युतिजितक्षुल्लपीतरत्नसमुद्रकाम् ।शरन्नीरजनीराज्यमञ्जीरविरणत्पदाम् ॥ १०॥

jānudyutijitakṣullapītaratnasamudrakām |śarannīrajanīrājyamañjīraviraṇatpadām || 10||

राकेन्दुकोटिसौन्दर्यजैत्रपादनखद्युतिम् ।अष्टाभिः सात्त्विकैर्भावैराकुलीकृतविग्रहाम् ॥ ११॥

rākendukoṭisaundaryajaitrapādanakhadyutim |aṣṭābhiḥ sāttvikairbhāvairākulīkṛtavigrahām || 11||

मुकुन्दाङ्गकृपापाङ्गामनङ्गोर्मितरङ्गिताम् ।त्वामारब्धश्रियानन्दां वन्दे वृन्दावनेश्वरि ॥ १२॥

mukundāṅgakṛpāpāṅgāmanaṅgormitaraṅgitām |tvāmārabdhaśriyānandāṃ vande vṛndāvaneśvari || 12||

अयि प्रोद्यन्महाभावमाधुरीविह्वलान्तरे ।अशेषनायिकावस्थाप्राकट्याद्भुतचेष्टिते ॥ १३॥

ayi prodyanmahābhāvamādhurīvihvalāntare |aśeṣanāyikāvasthāprākaṭyādbhutaceṣṭite || 13||

सर्वमाधुर्यविञ्जोलीनिर्माञ्छितपदाम्बुजे ।इन्दिरामृग्यसौन्दर्यस्फुरदङ्घ्रिनखाञ्चले ॥ १४॥

sarvamādhuryaviñjolīnirmāñchitapadāmbuje |indirāmṛgyasaundaryasphuradaṅghrinakhāñcale || 14||

गोकुलेन्दुमुखीवृन्दसीमन्तोत्तंसमञ्जरि ।ललितादिसखीयूथजीवातुस्मितकोरके ॥ १५॥

gokulendumukhīvṛndasīmantottaṃsamañjari |lalitādisakhīyūthajīvātusmitakorake || 15||

चटुलापाङ्गमाधुर्यबिन्दून्मादितमाधवे ।तातपादयशःस्तोमकैरवानन्दचन्द्रिके ॥ १६॥

caṭulāpāṅgamādhuryabindūnmāditamādhave |tātapādayaśaḥstomakairavānandacandrike || 16||

अपारकरुणापूरपूरितान्तर्मनोह्रदे ।प्रसीदास्मिन् जने देवि निजदास्यस्पृहाजुषि ॥ १७॥

apārakaruṇāpūrapūritāntarmanohrade |prasīdāsmin jane devi nijadāsyaspṛhājuṣi || 17||

कच्चित् त्वं चाटुपटुना तेन गोष्ठेन्द्रसूनुना ।प्रार्थ्यमानचपालाङ्गप्रसादा द्रक्ष्यसे मया ॥ १८॥

kaccit tvaṃ cāṭupaṭunā tena goṣṭhendrasūnunā |prārthyamānacapālāṅgaprasādā drakṣyase mayā || 18||

त्वां साधु माधवीपुष्पैर्माधवेन कलाविदा ।प्रसाध्यमानां स्विद्यन्तीं बीजयिष्याम्यहं कदा ॥ १९॥

tvāṃ sādhu mādhavīpuṣpairmādhavena kalāvidā |prasādhyamānāṃ svidyantīṃ bījayiṣyāmyahaṃ kadā || 19||

केलिविस्रंसिनो बककेशवृन्दस्य सुन्दरि ।संस्काराय कदा देवि जनमेतं निदेक्ष्यसि ॥ २०॥

kelivisraṃsino bakakeśavṛndasya sundari |saṃskārāya kadā devi janametaṃ nidekṣyasi || 20||

कदा बिम्बोष्ठि ताम्बूलं मया तव मुखाम्बुजे ।अर्प्यमाणं व्रजाधीशसूनुराच्छिद्य भोक्ष्यते ॥ २१॥

kadā bimboṣṭhi tāmbūlaṃ mayā tava mukhāmbuje |arpyamāṇaṃ vrajādhīśasūnurācchidya bhokṣyate || 21||

व्रजराजकुमारवल्लभाकुलसीमन्तमणि प्रसीद मे ।परिवारगणस्य ते यथा पदवी मे न दवीयसी भवेत् ॥ २२॥

vrajarājakumāravallabhākulasīmantamaṇi prasīda me |parivāragaṇasya te yathā padavī me na davīyasī bhavet || 22||

करुणां मुहुरर्थये परं तव वृन्दावनचक्रवर्तिनि ।अपि केशरिपोर्यथा भवेत् स चटुप्रार्थनभाजनं जनः ॥ २३॥

karuṇāṃ muhurarthaye paraṃ tava vṛndāvanacakravartini |api keśariporyathā bhavet sa caṭuprārthanabhājanaṃ janaḥ || 23||

इमं वृन्दावनेश्वर्या जनो यः पठति स्तवम् ।चाटुपुष्पाञ्जलिं नाम स स्यादस्याः कृपास्पदम् ॥ २४॥

imaṃ vṛndāvaneśvaryā jano yaḥ paṭhati stavam |cāṭupuṣpāñjaliṃ nāma sa syādasyāḥ kṛpāspadam || 24||

इति श्रीरूपगोस्वामिविरचितस्तवमालायां श्रीचाटुपुष्पाञ्जलिः समाप्ता ।

iti śrīrūpagosvāmiviracitastavamālāyāṃ śrīcāṭupuṣpāñjaliḥ samāptā |