रामकृष्णस्मरणम् Shri Ramakrishna Smaranam

नमः श्रीरामकृष्णाय सर्वमङ्गलहेतवे ।सर्वसिद्धिप्रदात्रे च मूर्तये ब्रह्मणे नमः ॥ १॥

namaḥ śrīrāmakṛṣṇāya sarvamaṅgalahetave |sarvasiddhipradātre ca mūrtaye brahmaṇe namaḥ || 1||

लीलावतारः श्रीरामकृष्णः शेषयुगे हरिः ।कलेर्जीवान्समुद्धर्तुं वैकुण्ठाद्वसुधातले ॥ २॥

līlāvatāraḥ śrīrāmakṛṣṇaḥ śeṣayuge hariḥ |kalerjīvānsamuddhartuṃ vaikuṇṭhādvasudhātale || 2||

एष मातरि चन्द्रायां ब्राह्मण्यां भगवान् स्वयम् ।ब्रह्मज्ञस्य ब्राह्मणस्य पितुः श्रीक्षुदिरामतः ॥ ३॥

eṣa mātari candrāyāṃ brāhmaṇyāṃ bhagavān svayam |brahmajñasya brāhmaṇasya pituḥ śrīkṣudirāmataḥ || 3||

प्रादुर्भूतः कर्मकार पुष्करिण्यां सनातनः ।स्वर्णगौरः शुभ्रवस्त्रो भूषणादिविवर्जितः ॥ ४॥

prādurbhūtaḥ karmakāra puṣkariṇyāṃ sanātanaḥ |svarṇagauraḥ śubhravastro bhūṣaṇādivivarjitaḥ || 4||

कामिनीकाञ्चनत्यागी कालिकासाधने रतः ।पृथिव्यां सन्ति ये धर्मांस्तेषां ये धर्मयाजकाः ॥ ५॥

kāminīkāñcanatyāgī kālikāsādhane rataḥ |pṛthivyāṃ santi ye dharmāṃsteṣāṃ ye dharmayājakāḥ || 5||

तत्सर्वमतमाश्रित्य तत्तत्सिद्धिमवाप्तवान् ।कालिकापुत्ररूपोऽसौ निर्विकल्पसमाधिमान् ॥ ६॥

tatsarvamatamāśritya tattatsiddhimavāptavān |kālikāputrarūpo'sau nirvikalpasamādhimān || 6||

जगदम्बा स्तन्यपायी स्वसुतं जननी यथा ।कृपया कालिकादेव्याः स्वस्य साधन शक्तितः ॥ ७॥

jagadambā stanyapāyī svasutaṃ jananī yathā |kṛpayā kālikādevyāḥ svasya sādhana śaktitaḥ || 7||

साधारणकन्यकेव काली प्रत्यक्षतां गता ।प्रायेनैवं साधनायां गता द्वादशवत्सराः ॥ ८॥

sādhāraṇakanyakeva kālī pratyakṣatāṃ gatā |prāyenaivaṃ sādhanāyāṃ gatā dvādaśavatsarāḥ || 8||

ततः सिद्धस्वरूपेण स्वधाम्नि दक्षिणेश्वरे ।विराजितः स्वीयां लीलां पार्षदानामदर्शयत् ॥ ९॥

tataḥ siddhasvarūpeṇa svadhāmni dakṣiṇeśvare |virājitaḥ svīyāṃ līlāṃ pārṣadānāmadarśayat || 9||

उक्तं श्रीरामकृष्णेन यत्कथामृतमुत्तमम् ।भूर्लोकस्या जनास्तेन जानन्ति मधुसूदनम् ॥ १०॥

uktaṃ śrīrāmakṛṣṇena yatkathāmṛtamuttamam |bhūrlokasyā janāstena jānanti madhusūdanam || 10||

ईदृग्युगावतारेषु नैकस्मिन्नपि दृश्यते ।केवलं श्रीरामकृष्णे सर्वकारणकारणे ॥ ११॥

īdṛgyugāvatāreṣu naikasminnapi dṛśyate |kevalaṃ śrīrāmakṛṣṇe sarvakāraṇakāraṇe || 11||

दृश्यते श्रीरासमण्या मन्दिराभ्यन्तरे तदा ।स्त्रीबालबालिशानाञ्च यद्वाक्यममृतायते ॥ १२॥

dṛśyate śrīrāsamaṇyā mandirābhyantare tadā |strībālabāliśānāñca yadvākyamamṛtāyate || 12||

अत्यन्तासज्जनेभ्योऽपि यद्दत्तं ठाकुरेण हि ।तेनानुभूतं तैः सर्वैस्तद्विष्णोः परमं पदम् ॥ १३॥

atyantāsajjanebhyo'pi yaddattaṃ ṭhākureṇa hi |tenānubhūtaṃ taiḥ sarvaistadviṣṇoḥ paramaṃ padam || 13||

सर्वत्र सर्वभावेन सर्वजातिषु सर्वदा ।साधुसज्जनसंन्यासी संसारीब्रह्मचारिभिः ॥ १४॥

sarvatra sarvabhāvena sarvajātiṣu sarvadā |sādhusajjanasaṃnyāsī saṃsārībrahmacāribhiḥ || 14||

सुपूजितो रामकृष्णः पृथिव्यां सर्वमानवैः ।तेन सर्वयुगश्रेष्ठाऽवतारोऽयं भवेद्ध्रुवम् ॥ १५॥

supūjito rāmakṛṣṇaḥ pṛthivyāṃ sarvamānavaiḥ |tena sarvayugaśreṣṭhā'vatāro'yaṃ bhaveddhruvam || 15||

दन्ते विधृत्य तृणकं पदयोर्निपत्यकृत्वोत्तमाङ्गनतमेतदहं ब्रवीमि ।भो भ्रातरः सकलमेव विहाय दुरात्श्रीरामकृष्ण चरणे कुरुतानुरागम् ॥ १६॥

dante vidhṛtya tṛṇakaṃ padayornipatyakṛtvottamāṅganatametadahaṃ bravīmi |bho bhrātaraḥ sakalameva vihāya durātśrīrāmakṛṣṇa caraṇe kurutānurāgam || 16||

श्रीरामकृष्ण चरणानुरागात् प्राप्नुवन्ति यत् ।सर्वे भवन्तः शृण्वन्तु सावधानमिदं वचः ॥ १७॥

śrīrāmakṛṣṇa caraṇānurāgāt prāpnuvanti yat |sarve bhavantaḥ śṛṇvantu sāvadhānamidaṃ vacaḥ || 17||

मुक्तिर्नापि सुखायते विबुधपूराकाशपुष्पायतेदुर्दान्तेन्द्रिय कालकुण्डलिचयः प्रोत्खातदन्तायते ।पृथ्वी पूर्णसुखायते विधिसुरेशादिश्च कीटायतेयत्कारुण्य कटाक्षवैभववतस्तं रामकृष्णं भज ॥ १८॥

muktirnāpi sukhāyate vibudhapūrākāśapuṣpāyatedurdāntendriya kālakuṇḍalicayaḥ protkhātadantāyate |pṛthvī pūrṇasukhāyate vidhisureśādiśca kīṭāyateyatkāruṇya kaṭākṣavaibhavavatastaṃ rāmakṛṣṇaṃ bhaja || 18||

सम्पूज्य तद्भक्तवर्गान् पृथिव्यां सर्वसज्जनाः ।भजन्तु भक्तिभावेन रामकृष्णपदाम्बुजम् ॥ १९॥

sampūjya tadbhaktavargān pṛthivyāṃ sarvasajjanāḥ |bhajantu bhaktibhāvena rāmakṛṣṇapadāmbujam || 19||

नरनारीसमीपे मे गलवस्त्रकृताञ्जलेः ।श्रीरामेन्द्रसुन्दरस्य द्विजस्येदं निवेदनम् ॥ २०॥

naranārīsamīpe me galavastrakṛtāñjaleḥ |śrīrāmendrasundarasya dvijasyedaṃ nivedanam || 20||

इति श्रीरामेन्द्रसुन्दरभक्तितीर्थ विरचितंश्रीश्रीरामकृष्णस्मरणम् सम्पूर्णम् ।

iti śrīrāmendrasundarabhaktitīrtha viracitaṃśrīśrīrāmakṛṣṇasmaraṇam sampūrṇam |