पूर्वदिनचर्या Purvadinacharya

श्रीदेवराजगुरुभिरनुगृहीताश्रीरस्तु ।श्रीमते हयग्रीवाय नमः ।श्रीमते रामानुजाय नमः ॥सौम्यजामातृयोगीन्द्रचरणाम्बुजषट्पदम् ।देवराजगुरुं वन्दे दिव्यज्ञानप्रदं शुभम् ॥अङ्के कवेरकन्यायास्तुङ्गे भुवनमङ्गले ।रङ्गे धाम्नि सुखासीनं वन्दे वरवरं मुनिम् ॥ १॥

śrīdevarājagurubhiranugṛhītāśrīrastu |śrīmate hayagrīvāya namaḥ |śrīmate rāmānujāya namaḥ ||saumyajāmātṛyogīndracaraṇāmbujaṣaṭpadam |devarājaguruṃ vande divyajñānapradaṃ śubham ||aṅke kaverakanyāyāstuṅge bhuvanamaṅgale |raṅge dhāmni sukhāsīnaṃ vande varavaraṃ munim || 1||

मयि प्रविशति श्रीमन्मन्दिरं रङ्गशायिनः ।पत्युः पदाम्बुजं द्रष्टुमायान्तमविदूरतः ॥ २॥

mayi praviśati śrīmanmandiraṃ raṅgaśāyinaḥ |patyuḥ padāmbujaṃ draṣṭumāyāntamavidūrataḥ || 2||

सुधानिधिमिव स्वैरस्वीकृतोदग्रविग्रहम् ।प्रसन्नार्कप्रतीकाशप्रकाशपरिवेष्टितम् ॥ ३॥

sudhānidhimiva svairasvīkṛtodagravigraham |prasannārkapratīkāśaprakāśapariveṣṭitam || 3||

पार्श्वतः पाणिपद्माभ्यां परिगृह्य भवत्प्रियौ ।विन्यस्यन्तं शनैरङ्घ्री मृदुलौ मेदिनीतले ॥ ४॥

pārśvataḥ pāṇipadmābhyāṃ parigṛhya bhavatpriyau |vinyasyantaṃ śanairaṅghrī mṛdulau medinītale || 4||

आम्लानकोमलाकारमाताम्रविमलाम्बरम् ।आपीनविपुलोरस्कमाजानुभुजभूषणम् ॥ ५॥

āmlānakomalākāramātāmravimalāmbaram |āpīnavipuloraskamājānubhujabhūṣaṇam || 5||

मृणालतन्तुसन्तानसंस्थानधवलत्विषा ।शोभितं यज्ञसूत्रेण नाभिबिम्बसनाभिना ॥ ६॥

mṛṇālatantusantānasaṃsthānadhavalatviṣā |śobhitaṃ yajñasūtreṇa nābhibimbasanābhinā || 6||

अम्भोजबीजमालाभिरभिजातभुजान्तरम् ।ऊर्ध्वपुण्ड्रैरुपश्लिष्टमुचितस्थानलक्षणैः ॥ ७॥

ambhojabījamālābhirabhijātabhujāntaram |ūrdhvapuṇḍrairupaśliṣṭamucitasthānalakṣaṇaiḥ || 7||

काश्मीरकेसरस्तोमकडारस्निग्धरोचिषा ।कौशेयेन समिन्धानं स्कन्धमूलावलम्बिना ॥ ८॥

kāśmīrakesarastomakaḍārasnigdharociṣā |kauśeyena samindhānaṃ skandhamūlāvalambinā || 8||

मन्त्ररत्नानुसन्धानसन्ततस्फुरिताधरम् ।तदर्थतत्वनिध्यानसन्नद्धपुलकोद्गमम् ॥ ९॥

mantraratnānusandhānasantatasphuritādharam |tadarthatatvanidhyānasannaddhapulakodgamam || 9||

स्मयमानमुखाम्भोजं दयमानदृगञ्चलम् ।मयि प्रसादप्रवणं मधुरोदारभाषणम् ॥ १०॥

smayamānamukhāmbhojaṃ dayamānadṛgañcalam |mayi prasādapravaṇaṃ madhurodārabhāṣaṇam || 10||

आत्मलाभात्परं किञ्चिदन्यन्नास्तीति निश्चयात् ।अङ्गीकर्तुमिव प्राप्तमकिञ्चनमिमं जनम् ॥ ११॥

ātmalābhātparaṃ kiñcidanyannāstīti niścayāt |aṅgīkartumiva prāptamakiñcanamimaṃ janam || 11||

भवन्तमेव नीरन्ध्रं पश्यन्वश्येन चेतसा ।मुने! वरवर! स्वामिन् मुहुस्त्वामेव कीर्तयन् ॥ १२॥

bhavantameva nīrandhraṃ paśyanvaśyena cetasā |mune! varavara! svāmin muhustvāmeva kīrtayan || 12||

त्वदन्यविषयस्पर्शविमुखैरखिलेन्द्रियैः ।भवेयं भवदुःखानामसह्यानामनास्पदम् ॥ १३॥

tvadanyaviṣayasparśavimukhairakhilendriyaiḥ |bhaveyaṃ bhavaduḥkhānāmasahyānāmanāspadam || 13||

परेद्युः पश्चिमे यामे यामिन्यास्समुपस्थिते ।प्रबुध्य शरणं गत्वा परां गुरुपरम्पराम् ॥ १४॥

paredyuḥ paścime yāme yāminyāssamupasthite |prabudhya śaraṇaṃ gatvā parāṃ guruparamparām || 14||

ध्यात्वा रहस्यत्रितयं तत्त्वयाथात्म्यदर्पणम् ।परव्यूहादिकान् पत्युः प्रकारान् प्रणिधाय च ॥ १५॥

dhyātvā rahasyatritayaṃ tattvayāthātmyadarpaṇam |paravyūhādikān patyuḥ prakārān praṇidhāya ca || 15||

ततः प्रत्युषसि स्नात्वा कृत्वा पौर्वाह्निकीः क्रियाः ।यतीन्द्रचरणद्वन्द्वप्रवणेनैव चेतसा ॥ १६॥

tataḥ pratyuṣasi snātvā kṛtvā paurvāhnikīḥ kriyāḥ |yatīndracaraṇadvandvapravaṇenaiva cetasā || 16||

अथ रङ्गनिधिं सम्यगभिगम्य निजं प्रभुम् ।श्रीनिधानं शनैस्तस्य शोधयित्वा पदद्वयम् ॥ १७॥

atha raṅganidhiṃ samyagabhigamya nijaṃ prabhum |śrīnidhānaṃ śanaistasya śodhayitvā padadvayam || 17||

ततस्तत्सन्निधिस्तम्भमूलभूतलभूषणम् ।प्राङ्मुखं सुखमासीनं प्रसादमधुरस्मितम् ॥ १८॥

tatastatsannidhistambhamūlabhūtalabhūṣaṇam |prāṅmukhaṃ sukhamāsīnaṃ prasādamadhurasmitam || 18||

भृत्यैः प्रियहितैकाग्रैः प्रेमपूर्वमुपासितम् ।तत्प्रार्थनानुसारेण संस्कारान् संविधाय मे ॥ १९॥

bhṛtyaiḥ priyahitaikāgraiḥ premapūrvamupāsitam |tatprārthanānusāreṇa saṃskārān saṃvidhāya me || 19||

अनुकम्पापरीवाहैरभिषेचनपूर्वकम् ।दिव्यं पदद्वयं दत्त्वा दीर्घं प्रणमतो मम ॥ २०॥

anukampāparīvāhairabhiṣecanapūrvakam |divyaṃ padadvayaṃ dattvā dīrghaṃ praṇamato mama || 20||

साक्षात्फलैकलक्ष्यत्वप्रतिपत्तिपवित्रितम् ।मन्त्ररत्नं प्रयच्छन्तं वन्दे वरवरं मुनिम् ॥ २१॥

sākṣātphalaikalakṣyatvapratipattipavitritam |mantraratnaṃ prayacchantaṃ vande varavaraṃ munim || 21||

ततस्सार्धं विनिर्गत्य भृत्यैर्नित्यानपायिभिः ।श्रीरङ्गमङ्गलं द्रष्टुं पुरुषं भुजगेशयम् ॥ २२॥

tatassārdhaṃ vinirgatya bhṛtyairnityānapāyibhiḥ |śrīraṅgamaṅgalaṃ draṣṭuṃ puruṣaṃ bhujageśayam || 22||

महतिं श्रीमति द्वारे गोपुरं चतुराननम् ।प्रणिपत्य शनैरन्तः प्रविशन्तं भजामि तम् ॥ २३॥

mahatiṃ śrīmati dvāre gopuraṃ caturānanam |praṇipatya śanairantaḥ praviśantaṃ bhajāmi tam || 23||

देवी गोदा यतिपतिशठद्वेषिणौ रङ्गशृङ्गंसेनानाथो विहगवृषभश्श्रीनिधिस्सिन्धुकन्या ।भूमानिलागुरुजनवृतः पूरुषश्चेत्यमीषामग्रेनित्यं वरवरमुनेरङ्घ्रियुग्मं प्रपद्ये ॥ २४॥

devī godā yatipatiśaṭhadveṣiṇau raṅgaśṛṅgaṃsenānātho vihagavṛṣabhaśśrīnidhissindhukanyā |bhūmānilāgurujanavṛtaḥ pūruṣaścetyamīṣāmagrenityaṃ varavaramuneraṅghriyugmaṃ prapadye || 24||

मङ्गलाशासनं कृत्वा तत्रतत्र यथोचितम् ।धाम्नस्तस्माद्विनिष्क्रम्य प्रविश्य स्वं निकेतनम् ॥ २५॥

maṅgalāśāsanaṃ kṛtvā tatratatra yathocitam |dhāmnastasmādviniṣkramya praviśya svaṃ niketanam || 25||

अथ श्रीशैलनाथार्यनाम्नि श्रीमति मण्डपे ।तदङ्घ्रिपङ्कजद्वन्द्वच्छायामध्यनिवासिनाम् ॥ २६॥

atha śrīśailanāthāryanāmni śrīmati maṇḍape |tadaṅghripaṅkajadvandvacchāyāmadhyanivāsinām || 26||

तत्त्वं दिव्यप्रबन्धानां सारं संसारवैरिणाम् ।सरसं सरहस्यानां व्याचक्षाणं नमामि तम् ॥ २७॥

tattvaṃ divyaprabandhānāṃ sāraṃ saṃsāravairiṇām |sarasaṃ sarahasyānāṃ vyācakṣāṇaṃ namāmi tam || 27||

ततः स्वचरणाम्भोजस्पर्शसम्पन्नसौरभैः ।पावनैरर्थिनस्तीर्थैर्भावयन्तं भजामि तम् ॥ २८॥

tataḥ svacaraṇāmbhojasparśasampannasaurabhaiḥ |pāvanairarthinastīrthairbhāvayantaṃ bhajāmi tam || 28||

आराध्य श्रीनिधिं पश्चादनुयागं विधाय च ।प्रसादपात्रं मां कृत्वा पश्यन्तं भावयामि तम् ॥ २९॥

ārādhya śrīnidhiṃ paścādanuyāgaṃ vidhāya ca |prasādapātraṃ māṃ kṛtvā paśyantaṃ bhāvayāmi tam || 29||

ततश्चेतस्समाधाय पुरुषे पुष्करेक्षणे ।उत्तंसितकरद्वन्द्वमुपविष्टमुपह्वरे ॥ ३०॥

tataścetassamādhāya puruṣe puṣkarekṣaṇe |uttaṃsitakaradvandvamupaviṣṭamupahvare || 30||

अब्जासनस्थमवदातसुजातमूर्तिमामीलिताक्षमनुसंहितमन्त्ररत्नम् ।आनम्रमौलिभिरुपासितमन्तरङ्गैर्नित्यं मुनिं वरवरं निभृतो भजामि ॥ ३१॥

abjāsanasthamavadātasujātamūrtimāmīlitākṣamanusaṃhitamantraratnam |ānamramaulibhirupāsitamantaraṅgairnityaṃ muniṃ varavaraṃ nibhṛto bhajāmi || 31||

ततश्शुभाश्रये तस्मिन्न्निमग्नं निभृतं मनः ।यतीन्द्रप्रवणं कर्तुं यतमानं नमामि तम् ॥ ३२॥

tataśśubhāśraye tasminnnimagnaṃ nibhṛtaṃ manaḥ |yatīndrapravaṇaṃ kartuṃ yatamānaṃ namāmi tam || 32||

इति पूर्वदिनचर्या समाप्ता ।

iti pūrvadinacaryā samāptā |