मध्वमुनिप्रतापाष्टकम् Madhvamunipratapa Ashtakam

क्वचित्सुरान्शास्ति सुराङ्गनाः क्वचित्क्वचिच्च गन्धर्वपतीनृषीन् क्वचित् ।क्वचित्पितॄन् क्वापि नृपान्नरान्क्वचिच्छुभानयं मध्वमुनिः प्रतापवान् ॥ १॥

kvacitsurānśāsti surāṅganāḥ kvacitkvacicca gandharvapatīnṛṣīn kvacit |kvacitpitṝn kvāpi nṛpānnarānkvacicchubhānayaṃ madhvamuniḥ pratāpavān || 1||

क्वचित्प्रभुं स्तौति समीक्षते क्वचित्क्वचित्स्मरन्नृत्यति गायति क्वचित् ।क्वचित्तमाराधयतीश्वरं क्वचिन्नमत्ययं मध्वमुनिः प्रतापवान् ॥ २॥

kvacitprabhuṃ stauti samīkṣate kvacitkvacitsmarannṛtyati gāyati kvacit |kvacittamārādhayatīśvaraṃ kvacinnamatyayaṃ madhvamuniḥ pratāpavān || 2||

क्वचिद्धरेर्जीवजडातिभिन्नतांक्वचित्प्रभोः सर्वगुणैश्च पूर्णताम् ।क्वचिच्च तस्याखिलदोषशून्यतांवदत्ययं मध्वमुनिः प्रतापवान् ॥ ३॥

kvaciddharerjīvajaḍātibhinnatāṃkvacitprabhoḥ sarvaguṇaiśca pūrṇatām |kvacicca tasyākhiladoṣaśūnyatāṃvadatyayaṃ madhvamuniḥ pratāpavān || 3||

क्वचिच्च विष्णोरुरुचित्ररूपतांक्वचिच्च मुक्ताखिलजीवयन्तृताम् ।क्वचिच्च तस्याव्ययचिन्मयाकृतिंव्यनक्त्ययं मध्वमुनिः प्रतापवान् ॥ ४॥

kvacicca viṣṇorurucitrarūpatāṃkvacicca muktākhilajīvayantṛtām |kvacicca tasyāvyayacinmayākṛtiṃvyanaktyayaṃ madhvamuniḥ pratāpavān || 4||

क्वचित्स्मृतीः क्वापि पुराणसंहिताःप्रवक्ति सूत्रं क्वचिदागमोक्तिभिः ।क्वचिच्च धर्मं चरति क्वचिच्च तंब्रवीत्ययं मध्वमुनिः प्रतापवान् ॥ ५॥

kvacitsmṛtīḥ kvāpi purāṇasaṃhitāḥpravakti sūtraṃ kvacidāgamoktibhiḥ |kvacicca dharmaṃ carati kvacicca taṃbravītyayaṃ madhvamuniḥ pratāpavān || 5||

क्वचिच्च चार्वाककणादगौतमप्रभाकराद्वैतितथागतादिकैः ।कृतं मतं युक्तिशतैर्विखण्डयन्विभात्ययं मध्वमुनिः प्रतापवान् ॥ ६॥

kvacicca cārvākakaṇādagautamaprabhākarādvaititathāgatādikaiḥ |kṛtaṃ mataṃ yuktiśatairvikhaṇḍayanvibhātyayaṃ madhvamuniḥ pratāpavān || 6||

परान्पराभावयति क्वचित्क्वचिन्निजान्कथायां कुशलीकरोत्ययम् ।क्वचिद्बुधान्वैष्णवमार्गमागतान्पुनात्ययं मध्वमुनिः प्रतापवान् ॥ ७॥

parānparābhāvayati kvacitkvacinnijānkathāyāṃ kuśalīkarotyayam |kvacidbudhānvaiṣṇavamārgamāgatānpunātyayaṃ madhvamuniḥ pratāpavān || 7||

क्वचित्समस्तागमनिर्णयोदिताःकृतीः कृता व्याकुरुते सभान्तरे ।प्रहृष्टरोमा नृहरौ क्वचिन्मनोयुनक्त्ययं मध्वमुनिः प्रतापवान् ॥ ८॥

kvacitsamastāgamanirṇayoditāḥkṛtīḥ kṛtā vyākurute sabhāntare |prahṛṣṭaromā nṛharau kvacinmanoyunaktyayaṃ madhvamuniḥ pratāpavān || 8||

इदं प्रतापाष्टकमच्युतप्रियश्रुतिप्रतीतामलमध्वयोगिनः ।यतिस्तदीयोऽकृत वादिराजउदारधीस्तस्य कृपाफलाप्तये ॥ ९॥

idaṃ pratāpāṣṭakamacyutapriyaśrutipratītāmalamadhvayoginaḥ |yatistadīyo'kṛta vādirājaudāradhīstasya kṛpāphalāptaye || 9||

इति श्रीमद्वादिराजपूज्यचरणविरचितंमध्वमुनिप्रतापाष्टकं सम्पूर्णम् ।भारतीरमणमुख्यप्राणान्तर्गत श्रीकृष्णार्पणमस्तु ।

iti śrīmadvādirājapūjyacaraṇaviracitaṃmadhvamunipratāpāṣṭakaṃ sampūrṇam |bhāratīramaṇamukhyaprāṇāntargata śrīkṛṣṇārpaṇamastu |