लघुवायुस्तुतिः (2) Laghuvayustutih By Kalyanidevi

वासुदेवं सदानन्दतीर्थं नन्दसन्दोहसन्दानशीलम् ।स्वामिनं सच्चिदानन्दरूपं नन्दयामो वयं नन्दसूनुम् ॥ १॥

vāsudevaṃ sadānandatīrthaṃ nandasandohasandānaśīlam |svāminaṃ saccidānandarūpaṃ nandayāmo vayaṃ nandasūnum || 1||

श्रीहनूमन्तमेकान्तभाजं राघवश्रीपदाम्भोजभृङ्गम् ।मारुतिं प्राणिनां प्राणभूतं नन्दयामो वयं नन्दतीर्थम् ॥ २॥

śrīhanūmantamekāntabhājaṃ rāghavaśrīpadāmbhojabhṛṅgam |mārutiṃ prāṇināṃ prāṇabhūtaṃ nandayāmo vayaṃ nandatīrtham || 2||

भीमरूपं परं पीवरांसं भारतं भारतश्रीललामम् ।भूभरध्वंसनं भारतीशं नन्दयामो वयं नन्दतीर्थम् ॥ ३॥

bhīmarūpaṃ paraṃ pīvarāṃsaṃ bhārataṃ bhārataśrīlalāmam |bhūbharadhvaṃsanaṃ bhāratīśaṃ nandayāmo vayaṃ nandatīrtham || 3||

देवचूडामणिं पूर्णबोधं कृष्णपादारविन्दैकदासम् ।तत्त्वचिन्तामणिं पूर्णरूपं नन्दयामो वयं नन्दितीर्थम् ॥ ४॥

devacūḍāmaṇiṃ pūrṇabodhaṃ kṛṣṇapādāravindaikadāsam |tattvacintāmaṇiṃ pūrṇarūpaṃ nandayāmo vayaṃ nanditīrtham || 4||

मायिगोमायुमायान्धकारध्वंसमार्ताण्डमूर्तीयमानम् ।सज्जनानन्दसन्दोहधेनुं नन्दयामो वयं नन्दितीर्थम् ॥ ५॥

māyigomāyumāyāndhakāradhvaṃsamārtāṇḍamūrtīyamānam |sajjanānandasandohadhenuṃ nandayāmo vayaṃ nanditīrtham || 5||

इन्दिरानन्दमानन्दमूर्तिं सुन्दरीमिन्दिरामिन्दुकान्तिम् ।नन्दितीर्थं च वन्दे तदिष्टं दासमेकं तथा तत्त्वदीपम् ॥ ६॥

indirānandamānandamūrtiṃ sundarīmindirāmindukāntim |nanditīrthaṃ ca vande tadiṣṭaṃ dāsamekaṃ tathā tattvadīpam || 6||

॥ इति श्रीकल्याणीदेविविरचिता लघुवायुस्तुतिः समाप्ता ॥

|| iti śrīkalyāṇīdeviviracitā laghuvāyustutiḥ samāptā ||