ग्रन्थमालिकास्तोत्रम् Grantha Malika Stotram

कृष्णं विद्यापतिं नत्वा पूर्णबोधादिसद्गुरून् ।जयतीर्थमुनीन् नत्वा वक्ष्येशं ग्रन्थमालिकाम् ॥ १॥

kṛṣṇaṃ vidyāpatiṃ natvā pūrṇabodhādisadgurūn |jayatīrthamunīn natvā vakṣyeśaṃ granthamālikām || 1||

नारायणेन व्यासेन प्रेरितस्तत्त्वसंविदे ।ग्रन्थान् मध्वश्चकारासौ सप्तत्रिंशदमन्दधीः ॥ २॥

nārāyaṇena vyāsena preritastattvasaṃvide |granthān madhvaścakārāsau saptatriṃśadamandadhīḥ || 2||

गीताभाष्यं विधायादौ प्रथमं तुष्टिदं हरेः ।भाष्याणुभाष्ये चक्रेस्थ ह्यनुव्याख्यानमुत्तमम् ॥ ३॥

gītābhāṣyaṃ vidhāyādau prathamaṃ tuṣṭidaṃ hareḥ |bhāṣyāṇubhāṣye cakrestha hyanuvyākhyānamuttamam || 3||

प्रमाणलक्षणं नाम कथालक्षणसंज्ञिकम् ।उपाधिखण्डनं चक्रे मायावादस्य खण्डनम् ॥ ४॥

pramāṇalakṣaṇaṃ nāma kathālakṣaṇasaṃjñikam |upādhikhaṇḍanaṃ cakre māyāvādasya khaṇḍanam || 4||

चक्रे प्रपञ्चमिथ्यात्वमानखण्डन मुच्चधीः ।चकार तत्त्वसङ्ख्यानं साधनं विष्णुदर्शने ॥ ५॥

cakre prapañcamithyātvamānakhaṇḍana muccadhīḥ |cakāra tattvasaṅkhyānaṃ sādhanaṃ viṣṇudarśane || 5||

ग्रन्थं तत्त्वविवेकआख्यं तत्त्वोद्योतं हरेः प्रियम् ।कर्मनिर्णयनामानं ग्रन्थं न्यायार्थबृंहितम् ॥ ६॥

granthaṃ tattvavivekaākhyaṃ tattvodyotaṃ hareḥ priyam |karmanirṇayanāmānaṃ granthaṃ nyāyārthabṛṃhitam || 6||

सुखतीर्थयतिश्चक्रे विष्णुतत्त्वनिर्णयम् ।ऋग्भाष्यं च चकारासौ सर्ववेदार्थनिर्णयम् ॥ ७॥

sukhatīrthayatiścakre viṣṇutattvanirṇayam |ṛgbhāṣyaṃ ca cakārāsau sarvavedārthanirṇayam || 7||

ऐतरेयं तैत्तिरीयं बृहदारण्यक मेव च ।ईशावास्यं काठकं च छान्दोग्याअथर्वणे तथा ॥ ८॥

aitareyaṃ taittirīyaṃ bṛhadāraṇyaka meva ca |īśāvāsyaṃ kāṭhakaṃ ca chāndogyāatharvaṇe tathā || 8||

माण्डूक्यं नाम षट्प्रश्नं तथा तलवकारकम् ।चक्रे भाष्याणि दिव्यानि दशोपनिषदां गुरुः ॥ ९॥

māṇḍūkyaṃ nāma ṣaṭpraśnaṃ tathā talavakārakam |cakre bhāṣyāṇi divyāni daśopaniṣadāṃ guruḥ || 9||

निर्णयं सर्वशास्त्राणां गीतातात्पर्य संज्ञकम् ।संन्यायविवृतिं नाम न्यायशास्त्रनिकृन्तनम् ॥ १०॥

nirṇayaṃ sarvaśāstrāṇāṃ gītātātparya saṃjñakam |saṃnyāyavivṛtiṃ nāma nyāyaśāstranikṛntanam || 10||

नरसिंहनखस्तोत्रं चक्रे यमकभारतम् ।द्वादशस्तोत्रमकरोत् कृष्णामृतमहार्णवम् ॥ ११॥

narasiṃhanakhastotraṃ cakre yamakabhāratam |dvādaśastotramakarot kṛṣṇāmṛtamahārṇavam || 11||

तन्त्रसारं चकारासौ सदाचारस्मृतिं सुधीः ।श्रीमद्भागवतस्यापि तात्पर्यं ज्ञानसाधनम् ॥ १२॥

tantrasāraṃ cakārāsau sadācārasmṛtiṃ sudhīḥ |śrīmadbhāgavatasyāpi tātparyaṃ jñānasādhanam || 12||

महाभारततात्पर्यनिर्णयं संशयच्छिदम् ।यतिप्रणवकल्पं च प्रणवार्थप्रकाशकम् ॥ १३॥

mahābhāratatātparyanirṇayaṃ saṃśayacchidam |yatipraṇavakalpaṃ ca praṇavārthaprakāśakam || 13||

जयन्तीनिर्णयं चक्रे देवकीगर्भजन्मनः ।कृष्णस्य कृष्णभक्तोऽयं द्वैपायनकराब्जभूः ॥ १४॥

jayantīnirṇayaṃ cakre devakīgarbhajanmanaḥ |kṛṣṇasya kṛṣṇabhakto'yaṃ dvaipāyanakarābjabhūḥ || 14||

त्रिंशत्सहस्रसङ्ख्याकं द्व्यधिकं तुष्टिदं हरेः ।एतेषां पाठमात्रेण मध्वेशः प्रीयते हरिः ॥ १५॥

triṃśatsahasrasaṅkhyākaṃ dvyadhikaṃ tuṣṭidaṃ hareḥ |eteṣāṃ pāṭhamātreṇa madhveśaḥ prīyate hariḥ || 15||

व्यासतीर्थयतिर्नाम मध्वग्रन्थानुकीर्तनम् ।कृतवान् ज्ञानमात्रेण प्रीयते कमलापतिः ॥ १६॥

vyāsatīrthayatirnāma madhvagranthānukīrtanam |kṛtavān jñānamātreṇa prīyate kamalāpatiḥ || 16||

॥ इति श्रीव्यासराजतीर्थकृतं श्रीग्रन्थमालिकास्तोत्रं सम्पूर्णम् ॥

|| iti śrīvyāsarājatīrthakṛtaṃ śrīgranthamālikāstotraṃ sampūrṇam ||