गायत्र्यष्टकम् १ Gayatri Ashtakam (2)

विश्वामित्रपःफलां प्रियतरां विप्रालिसंसेवितांनित्यानित्यविवेकदां स्मितमुखीं खण्डेन्दुभूषोज्ज्वलाम् ।ताम्बूलारुणभासमानवदनां मार्ताण्डमध्यस्थितांगायत्रीं हरिवल्लभां त्रिनयनां ध्यायामि पञ्चाननाम् ॥ १ ॥

viśvāmitrapaḥphalāṃ priyatarāṃ viprālisaṃsevitāṃnityānityavivekadāṃ smitamukhīṃ khaṇḍendubhūṣojjvalām |tāmbūlāruṇabhāsamānavadanāṃ mārtāṇḍamadhyasthitāṃgāyatrīṃ harivallabhāṃ trinayanāṃ dhyāyāmi pañcānanām || 1 ||

जातीपङ्कजकेतकीकुवलयैः संपूजिताङ्घ्रिद्वयांतत्त्वार्थात्मिकवर्णपङ्क्तिसहितां तत्त्वार्थबुद्धिप्रदाम् ।प्राणायामपरायणैर्बुधजनैः संसेव्यमानां शिवांगायत्रीं हरिवल्लभां त्रिनयनां ध्यायामि पञ्चाननाम् ॥ २ ॥

jātīpaṅkajaketakīkuvalayaiḥ saṃpūjitāṅghridvayāṃtattvārthātmikavarṇapaṅktisahitāṃ tattvārthabuddhipradām |prāṇāyāmaparāyaṇairbudhajanaiḥ saṃsevyamānāṃ śivāṃgāyatrīṃ harivallabhāṃ trinayanāṃ dhyāyāmi pañcānanām || 2 ||

मञ्जीरध्वनिभिः समस्तजगतां मञ्जुत्वसंवर्धनींविप्रप्रेङ्खितवारिवारितमहारक्षोगणां मृण्मयीम् ।जप्तुः पापहरां जपासुमनिभां हंसेन संशोभितांगायत्रीं हरिवल्लभां त्रिनयनां ध्यायामि पञ्चाननाम् ॥ ३ ॥

mañjīradhvanibhiḥ samastajagatāṃ mañjutvasaṃvardhanīṃviprapreṅkhitavārivāritamahārakṣogaṇāṃ mṛṇmayīm |japtuḥ pāpaharāṃ japāsumanibhāṃ haṃsena saṃśobhitāṃgāyatrīṃ harivallabhāṃ trinayanāṃ dhyāyāmi pañcānanām || 3 ||

काञ्चीचेलविभूषितां शिवमयीं मालार्धमालादिकान्बिभ्राणां परमेश्वरीं शरणदां मोहान्धबुद्धिच्छिदाम् ।भूरादित्रिपुरां त्रिलोकजननीमध्यात्मशाखानुतांगायत्रीं हरिवल्लभां त्रिनयनां ध्यायामि पञ्चाननाम् ॥ ४ ॥

kāñcīcelavibhūṣitāṃ śivamayīṃ mālārdhamālādikānbibhrāṇāṃ parameśvarīṃ śaraṇadāṃ mohāndhabuddhicchidām |bhūrāditripurāṃ trilokajananīmadhyātmaśākhānutāṃgāyatrīṃ harivallabhāṃ trinayanāṃ dhyāyāmi pañcānanām || 4 ||

ध्यातुर्गर्भकृशानुतापहरणां सामात्मिकां सामगांसायंकालसुसेवितां स्वरमयीं दूर्वादलश्यामलाम् ।मातुर्दास्यविलोचनैकमतिमत्खेटीन्द्रसंराजितांगायत्रीं हरिवल्लभां त्रिनयनां ध्यायामि पञ्चाननाम् ॥ ५ ॥

dhyāturgarbhakṛśānutāpaharaṇāṃ sāmātmikāṃ sāmagāṃsāyaṃkālasusevitāṃ svaramayīṃ dūrvādalaśyāmalām |māturdāsyavilocanaikamatimatkheṭīndrasaṃrājitāṃgāyatrīṃ harivallabhāṃ trinayanāṃ dhyāyāmi pañcānanām || 5 ||

सन्ध्यारागविचित्रवस्त्रविलसद्विप्रोत्तमैः सेवितांताराहीरसुमालिकां सुविलसद्रत्नेन्दुकुम्भान्तराम् ।राकाचन्द्रमुखीं रमापतिनुतां शङ्खादिभास्वत्करांगायत्रीं हरिवल्लभां त्रिनयनां ध्यायामि पञ्चाननाम् ॥ ६ ॥

sandhyārāgavicitravastravilasadviprottamaiḥ sevitāṃtārāhīrasumālikāṃ suvilasadratnendukumbhāntarām |rākācandramukhīṃ ramāpatinutāṃ śaṅkhādibhāsvatkarāṃgāyatrīṃ harivallabhāṃ trinayanāṃ dhyāyāmi pañcānanām || 6 ||

वेणीभूशितमालकध्वनिकरैर्भृङ्गैः सदा शोभितांतत्त्वज्ञानरसायनज्ञरसनासौधभ्रमद्भ्रामरीम् ।नासालंकृतमौक्तिकेन्दुकिरणैः सायन्तमश्छेदिनींगायत्रीं हरिवल्लभां त्रिनयनां ध्यायामि पञ्चाननाम् ॥ ७ ॥

veṇībhūśitamālakadhvanikarairbhṛṅgaiḥ sadā śobhitāṃtattvajñānarasāyanajñarasanāsaudhabhramadbhrāmarīm |nāsālaṃkṛtamauktikendukiraṇaiḥ sāyantamaśchedinīṃgāyatrīṃ harivallabhāṃ trinayanāṃ dhyāyāmi pañcānanām || 7 ||

पादाब्जान्तररेणुकुङ्कुमलसत्फालद्युरामावृतांरम्भानाट्यविलोकनैकरसिकां वेदान्तबुद्धिप्रदाम् ।वीणावेणुमृदङ्गकाहलरवान् देवैः कृताञ्छृण्वतींगायत्रीं हरिवल्लभां त्रिनयनां ध्यायामि पञ्चाननाम् ॥ ८ ॥

pādābjāntarareṇukuṅkumalasatphāladyurāmāvṛtāṃrambhānāṭyavilokanaikarasikāṃ vedāntabuddhipradām |vīṇāveṇumṛdaṅgakāhalaravān devaiḥ kṛtāñchṛṇvatīṃgāyatrīṃ harivallabhāṃ trinayanāṃ dhyāyāmi pañcānanām || 8 ||

हत्यापानसुवर्णतस्करमहागुर्वङ्गनासङ्गमान्दोषाञ्छैलसमान् पुरन्दरसमाः सञ्च्छिद्य सूर्योपमाः ।गायत्रीं श्रुतिमातुरेकमनसा सन्ध्यासु ये भूसुराजप्त्वा यान्ति परां गतिं मनुमिमं देव्याः परं वैदिकाः ॥ ९ ॥

hatyāpānasuvarṇataskaramahāgurvaṅganāsaṅgamāndoṣāñchailasamān purandarasamāḥ sañcchidya sūryopamāḥ |gāyatrīṃ śrutimāturekamanasā sandhyāsu ye bhūsurājaptvā yānti parāṃ gatiṃ manumimaṃ devyāḥ paraṃ vaidikāḥ || 9 ||

इति श्रीमत्परमहंसपरिव्राजकाचार्यश्रीमच्छङ्कराचार्यविरचितं गायत्र्यष्टकं सम्पूर्णम् ।

iti śrīmatparamahaṃsaparivrājakācāryaśrīmacchaṅkarācāryaviracitaṃ gāyatryaṣṭakaṃ sampūrṇam |