अघनाशकगायत्रीस्तोत्रम् Aghanashaka Gayatri Stotram

नारद उवाचभक्तानुकम्पिन्सर्वज्ञ हृदयं पापनाशनम् ।गायत्र्याः कथितं तस्माद्गायत्र्याः स्तोत्रमीरय ॥ १॥

nārada uvācabhaktānukampinsarvajña hṛdayaṃ pāpanāśanam |gāyatryāḥ kathitaṃ tasmādgāyatryāḥ stotramīraya || 1||

आदिशक्ते जगन्मातर्भक्तानुग्रहकारिणि ।सर्वत्र व्यापिकेऽनन्ते श्रीसन्ध्ये ते नमोऽस्तु ते ॥ २॥

ādiśakte jaganmātarbhaktānugrahakāriṇi |sarvatra vyāpike'nante śrīsandhye te namo'stu te || 2||

त्वमेव सन्ध्या गायत्री सावित्री च सरस्वती ।ब्राह्मी च वैष्णवी रौद्री रक्ता श्वेता सितेतरा ॥ ३॥

tvameva sandhyā gāyatrī sāvitrī ca sarasvatī |brāhmī ca vaiṣṇavī raudrī raktā śvetā sitetarā || 3||

प्रातर्बाला च मध्याह्ने यौवनस्था भवेत्पुनः ।ब्रह्मा सायं भगवती चिन्त्यते मुनिभिः सदा ॥ ४॥ वृद्धा सायं

prātarbālā ca madhyāhne yauvanasthā bhavetpunaḥ |brahmā sāyaṃ bhagavatī cintyate munibhiḥ sadā || 4|| vṛddhā sāyaṃ

हंसस्था गरुडारूढा तथा वृषभवाहिनी ।ऋग्वेदाध्यायिनी भूमौ दृश्यते या तपस्विभिः ॥ ५॥

haṃsasthā garuḍārūḍhā tathā vṛṣabhavāhinī |ṛgvedādhyāyinī bhūmau dṛśyate yā tapasvibhiḥ || 5||

यजुर्वेदं पठन्ती च अन्तरिक्षे विराजते ।सा सामगापि सर्वेषु भ्राम्यमाणा तथा भुवि ॥ ६॥

yajurvedaṃ paṭhantī ca antarikṣe virājate |sā sāmagāpi sarveṣu bhrāmyamāṇā tathā bhuvi || 6||

रुद्रलोकं गता त्वं हि विष्णुलोकनिवासिनी ।त्वमेव ब्रह्मणो लोकेऽमर्त्यानुग्रहकारिणी ॥ ७॥

rudralokaṃ gatā tvaṃ hi viṣṇulokanivāsinī |tvameva brahmaṇo loke'martyānugrahakāriṇī || 7||

सप्तर्षिप्रीतिजननी माया बहुवरप्रदा ।शिवयोः करनेत्रोत्था ह्यश्रुस्वेदसमुद्भवा ॥ ८॥

saptarṣiprītijananī māyā bahuvarapradā |śivayoḥ karanetrotthā hyaśrusvedasamudbhavā || 8||

आनन्दजननी दुर्गा दशधा परिपठ्यते ।वरेण्या वरदा चैव वरिष्ठा वरवर्णिनी ॥ ९॥

ānandajananī durgā daśadhā paripaṭhyate |vareṇyā varadā caiva variṣṭhā varavarṇinī || 9||

गरिष्ठा च वरार्हा च वरारोहा च सप्तमी ।नीलगङ्गा तथा सन्ध्या सर्वदा भोगमोक्षदा ॥ १०॥

gariṣṭhā ca varārhā ca varārohā ca saptamī |nīlagaṅgā tathā sandhyā sarvadā bhogamokṣadā || 10||

भागीरथी मर्त्यलोके पाताले भोगवत्यपि ।त्रिलोकवाहिनी देवी स्थानत्रयनिवासिनी ॥ ११॥

bhāgīrathī martyaloke pātāle bhogavatyapi |trilokavāhinī devī sthānatrayanivāsinī || 11||

भूर्लोकस्था त्वमेवासि धरित्री लोकधारिणी ।भुवो लोके वायुशक्तिः स्वर्लोके तेजसां निधिः ॥ १२॥

bhūrlokasthā tvamevāsi dharitrī lokadhāriṇī |bhuvo loke vāyuśaktiḥ svarloke tejasāṃ nidhiḥ || 12||

महर्लोके महासिद्धिर्जनलोके जनेत्यपि ।तपस्विनी तपोलोके सत्यलोके तु सत्यवाक् ॥ १३॥

maharloke mahāsiddhirjanaloke janetyapi |tapasvinī tapoloke satyaloke tu satyavāk || 13||

कमला विष्णुलोके च गायत्री ब्रह्मलोकगा । ब्रह्मलोकदारुद्रलोके स्थिता गौरी हरार्धाङ्गनिवासिनी ॥ १४॥

kamalā viṣṇuloke ca gāyatrī brahmalokagā | brahmalokadārudraloke sthitā gaurī harārdhāṅganivāsinī || 14||

अहमो महतश्चैव प्रकृतिस्त्वं हि गीयसे ।साम्यावस्थात्मिका त्वं हि शबलब्रह्मरूपिणी ॥ १५॥

ahamo mahataścaiva prakṛtistvaṃ hi gīyase |sāmyāvasthātmikā tvaṃ hi śabalabrahmarūpiṇī || 15||

ततः परापरा शक्तिः परमा त्वं हि गीयसे ।इच्छाशक्तिः क्रियाशक्तिर्ज्ञानशक्तिस्त्रिशक्तिदा ॥ १६॥

tataḥ parāparā śaktiḥ paramā tvaṃ hi gīyase |icchāśaktiḥ kriyāśaktirjñānaśaktistriśaktidā || 16||

गङ्गा च यमुना चैव विपाशा च सरस्वती ।सरयूर्देविका सिन्धुर्नर्मदेरावती तथा ॥ १७॥

gaṅgā ca yamunā caiva vipāśā ca sarasvatī |sarayūrdevikā sindhurnarmaderāvatī tathā || 17||

गोदावरी शतद्रुश्च कावेरी देवलोकगा ।कौशिकी चन्द्रभागा च वितस्ता च सरस्वती ॥ १८॥

godāvarī śatadruśca kāverī devalokagā |kauśikī candrabhāgā ca vitastā ca sarasvatī || 18||

गण्डकी तापिनी तोया गोमती वेत्रवत्यपि ।इडा च पिङ्गला चैव सुषुम्णा च तृतीयका ॥ १९॥

gaṇḍakī tāpinī toyā gomatī vetravatyapi |iḍā ca piṅgalā caiva suṣumṇā ca tṛtīyakā || 19||

गान्धारी हस्तिजिह्वा च पूषापूषा तथैव च ।अलम्बुषा कुहूश्चैव शङ्खिनी प्राणवाहिनी ॥ २०॥

gāndhārī hastijihvā ca pūṣāpūṣā tathaiva ca |alambuṣā kuhūścaiva śaṅkhinī prāṇavāhinī || 20||

नाडी च त्वं शरीरस्था गीयसे प्राक्तनैर्बुधैः ।हृतपद्मस्था प्राणशक्तिः कण्ठस्था स्वप्ननायिका ॥ २१॥

nāḍī ca tvaṃ śarīrasthā gīyase prāktanairbudhaiḥ |hṛtapadmasthā prāṇaśaktiḥ kaṇṭhasthā svapnanāyikā || 21||

तालुस्था त्वं सदाधारा बिन्दुस्था बिन्दुमालिनी ।मूले तु कुण्डली शक्तिर्व्यापिनी केशमूलगा ॥ २२॥

tālusthā tvaṃ sadādhārā bindusthā bindumālinī |mūle tu kuṇḍalī śaktirvyāpinī keśamūlagā || 22||

शिखामध्यासना त्वं हि शिखाग्रे तु मनोन्मनी ।किमन्यद् बहुनोक्तेन यत्किञ्चिज्जगतीत्रये ॥ २३॥

śikhāmadhyāsanā tvaṃ hi śikhāgre tu manonmanī |kimanyad bahunoktena yatkiñcijjagatītraye || 23||

तत्सर्वं त्वं महादेवि श्रिये सन्ध्ये नमोऽस्तु ते ।इतीदं कीर्तितं स्तोत्रं सन्ध्यायां बहुपुण्यदम् ॥ २४॥

tatsarvaṃ tvaṃ mahādevi śriye sandhye namo'stu te |itīdaṃ kīrtitaṃ stotraṃ sandhyāyāṃ bahupuṇyadam || 24||

महापापप्रशमनं महासिद्धिविधायकम् ।य इदं कीर्तयेत् स्तोत्रं सन्ध्याकाले समाहितः ॥ २५॥

mahāpāpapraśamanaṃ mahāsiddhividhāyakam |ya idaṃ kīrtayet stotraṃ sandhyākāle samāhitaḥ || 25||

अपुत्रः प्राप्नुयात् पुत्रं धनार्थी धनमाप्नुयात् ।सर्वतीर्थतपोदानयज्ञयोगफलं लभेत् ॥ २६॥

aputraḥ prāpnuyāt putraṃ dhanārthī dhanamāpnuyāt |sarvatīrthatapodānayajñayogaphalaṃ labhet || 26||

भोगान् भुक्त्वा चिरं कालमन्ते मोक्षमवाप्नुयात् ।तपस्विभिः कृतं स्तोत्रं स्नानकाले तु यः पठेत् ॥ २७॥

bhogān bhuktvā ciraṃ kālamante mokṣamavāpnuyāt |tapasvibhiḥ kṛtaṃ stotraṃ snānakāle tu yaḥ paṭhet || 27||

यत्र कुत्र जले मग्नः सन्ध्यामज्जनजं फलम् ।लभते नात्र सन्देहः सत्यं च नारद ॥ २८॥

yatra kutra jale magnaḥ sandhyāmajjanajaṃ phalam |labhate nātra sandehaḥ satyaṃ ca nārada || 28||

शृणुयाद्योऽपि तद्भक्त्या स तु पापात् प्रमुच्यते ।पीयूषसदृशं वाक्यं सन्ध्योक्तं नारदेरितम् ॥ २९॥

śṛṇuyādyo'pi tadbhaktyā sa tu pāpāt pramucyate |pīyūṣasadṛśaṃ vākyaṃ sandhyoktaṃ nāraderitam || 29||

॥ इति श्रीदेवीभागवते महापुराणे द्वादशस्कन्धेपञ्चमोऽध्याये श्रीअघनाशकगायत्रीस्तोत्रं सम्पूर्णम् ॥

|| iti śrīdevībhāgavate mahāpurāṇe dvādaśaskandhepañcamo'dhyāye śrīaghanāśakagāyatrīstotraṃ sampūrṇam ||