नर्मदास्तोत्रम् Rishibhih Kritam Narmada Stotram

श्रीमार्कण्डेय उवाच ।एतच्छ्रुत्वा वचो राजन्संहृष्टा ऋषयोऽभवन् ।नर्मदां स्तोतुमारब्धाः कृताञ्जलिपुटा द्विजाः ॥ १॥

śrīmārkaṇḍeya uvāca |etacchrutvā vaco rājansaṃhṛṣṭā ṛṣayo'bhavan |narmadāṃ stotumārabdhāḥ kṛtāñjalipuṭā dvijāḥ || 1||

नमोऽस्तु ते पुण्यजले नमो मकरगामिनि ।नमस्ते पापमोचिन्यै नमो देवि वरानने ॥ २॥

namo'stu te puṇyajale namo makaragāmini |namaste pāpamocinyai namo devi varānane || 2||

नमोऽस्तु ते पुण्यजलाश्रये शुभेविशुद्धसत्त्वं सुरसिद्धसेविते ।नमोऽस्तु ते तीर्थगणैर्निषेवितेनमोऽस्तु रुद्राङ्गसमुद्भवे वरे ॥ ३॥

namo'stu te puṇyajalāśraye śubheviśuddhasattvaṃ surasiddhasevite |namo'stu te tīrthagaṇairniṣevitenamo'stu rudrāṅgasamudbhave vare || 3||

नमोऽस्तु ते देवि समुद्रगामिनिनमोऽस्तु ते देवि वरप्रदे शिवे ।नमोऽस्तु लोकद्वयसौख्यदायिनिह्यनेकभूतौघसमाश्रितेऽनघे ॥ ४॥

namo'stu te devi samudragāmininamo'stu te devi varaprade śive |namo'stu lokadvayasaukhyadāyinihyanekabhūtaughasamāśrite'naghe || 4||

सरिद्वरे पापहरे विचित्रितेगन्धर्वयक्षोरगसेविताङ्गे ।सनातनि प्राणिगणानुकम्पिनिमोक्षप्रदे देवि विधेहि शं नः ॥ ५॥

saridvare pāpahare vicitritegandharvayakṣoragasevitāṅge |sanātani prāṇigaṇānukampinimokṣaprade devi vidhehi śaṃ naḥ || 5||

महागजौघैर्महिषैर्वराहैः संसेविते देवि महोर्मिमाले ।नताः स्म सर्वे वरदे सुखप्रदे विमोचयास्मान्पशुपाशबन्धात् ॥ ६॥

mahāgajaughairmahiṣairvarāhaiḥ saṃsevite devi mahormimāle |natāḥ sma sarve varade sukhaprade vimocayāsmānpaśupāśabandhāt || 6||

पापैरनेकैरशुभैर्विबद्धा भ्रमन्ति तावन्नरकेषु मर्त्याः ।महानिलोद्भूततरङ्गभूतं यावत्तवाम्भो हि न संस्पृशन्ति ॥ ७॥

pāpairanekairaśubhairvibaddhā bhramanti tāvannarakeṣu martyāḥ |mahānilodbhūtataraṅgabhūtaṃ yāvattavāmbho hi na saṃspṛśanti || 7||

अनेकदुःखौघभयार्दितानां पापैरनेकैरभिवेष्टितानाम् ।गतिस्त्वमम्भोजसमानवक्रे द्वन्द्वैरनेकैरपि संवृतानाम् ॥ ८॥

anekaduḥkhaughabhayārditānāṃ pāpairanekairabhiveṣṭitānām |gatistvamambhojasamānavakre dvandvairanekairapi saṃvṛtānām || 8||

नद्यश्च पूता विमला भवन्ति त्वां देवि सम्प्राप्य न संशयोऽत्र ।दुःखातुराणामभयं ददासि शिष्टैरनेकैरभिपूजितासि ॥ ९॥

nadyaśca pūtā vimalā bhavanti tvāṃ devi samprāpya na saṃśayo'tra |duḥkhāturāṇāmabhayaṃ dadāsi śiṣṭairanekairabhipūjitāsi || 9||

स्पृष्टं करैश्चन्द्रमसो रवेश्च तदैव दद्यात्परमं पदं तु ।यत्रोपलाः पुण्यजलाप्लुतास्ते शिवत्वमायान्ति किमत्र चित्रम् ॥ १०॥

spṛṣṭaṃ karaiścandramaso raveśca tadaiva dadyātparamaṃ padaṃ tu |yatropalāḥ puṇyajalāplutāste śivatvamāyānti kimatra citram || 10||

भ्रमन्ति तावन्नरकेषु मर्त्या दुःखातुराः पापपरीतदेहाः ।महानिलोद्भूततरङ्गभङ्गं यावत्तवाम्भो न हि संश्रयन्ति ॥ ११॥

bhramanti tāvannarakeṣu martyā duḥkhāturāḥ pāpaparītadehāḥ |mahānilodbhūtataraṅgabhaṅgaṃ yāvattavāmbho na hi saṃśrayanti || 11||

म्लेच्छाः पुलिन्दास्त्वथ यातुधानाः पिबन्ति येऽम्भस्तव देवि पुण्यम् ।मुक्ता भवन्तीह भयात्तु घोरान्निःसंशयं तेऽपि किमत्र चित्रम् ॥ १२॥

mlecchāḥ pulindāstvatha yātudhānāḥ pibanti ye'mbhastava devi puṇyam |muktā bhavantīha bhayāttu ghorānniḥsaṃśayaṃ te'pi kimatra citram || 12||

सरांसि नद्यः क्षयमभ्युपेता घोरे युगेऽस्मिन् हि कलौ प्रदूषिते ।त्वं भ्राजसे देवि जलौघपूर्णा दिवीव नक्षत्रपथे च गङ्गा ॥ १३॥

sarāṃsi nadyaḥ kṣayamabhyupetā ghore yuge'smin hi kalau pradūṣite |tvaṃ bhrājase devi jalaughapūrṇā divīva nakṣatrapathe ca gaṅgā || 13||

तव प्रसादाद्वरदे वरिष्ठे कालं यथेमं परिपालयित्वा ।यामोऽथ रुद्रं तव सुप्रसादाद्वयं तथा त्वं कुरु वै प्रसादम् ॥ १४॥

tava prasādādvarade variṣṭhe kālaṃ yathemaṃ paripālayitvā |yāmo'tha rudraṃ tava suprasādādvayaṃ tathā tvaṃ kuru vai prasādam || 14||

गतिस्त्वमम्बेव पितेव पुत्रांस्त्वं पाहि नो यावदिमं युगान्तम् ।कालं त्वनावृष्टिहतं सुघोरं यावत्तरामस्तव सुप्रसादात् ॥ १५॥

gatistvamambeva piteva putrāṃstvaṃ pāhi no yāvadimaṃ yugāntam |kālaṃ tvanāvṛṣṭihataṃ sughoraṃ yāvattarāmastava suprasādāt || 15||

पठन्ति ये स्तोत्रमिदं द्विजेन्द्राः शृण्वन्ति ये चापि नराः प्रशान्ताः ।ते यान्ति रुद्रं वृषसंयुतेन यानेन दिव्याम्बरभूषिताश्च ॥ १६॥

paṭhanti ye stotramidaṃ dvijendrāḥ śṛṇvanti ye cāpi narāḥ praśāntāḥ |te yānti rudraṃ vṛṣasaṃyutena yānena divyāmbarabhūṣitāśca || 16||

ये स्तोत्रमेतत्सततं पठन्ति स्नात्वा तु तोये खलु नर्मदायाः ।अन्ते हि तेषां सरिदुत्तमेयं गतिं विशुद्धामचिराद्ददाति ॥ १७॥

ye stotrametatsatataṃ paṭhanti snātvā tu toye khalu narmadāyāḥ |ante hi teṣāṃ sariduttameyaṃ gatiṃ viśuddhāmacirāddadāti || 17||

प्रातः समुत्थाय तथा शयानो यः कीर्तयेतानुदिनं स्तवं च ।स मुक्तपापः सुविशुद्धदेहः समाश्रयं याति महेश्वरस्य ॥ १८॥

prātaḥ samutthāya tathā śayāno yaḥ kīrtayetānudinaṃ stavaṃ ca |sa muktapāpaḥ suviśuddhadehaḥ samāśrayaṃ yāti maheśvarasya || 18||

इति श्रीस्कन्दपुराणे आवन्त्यखण्डे रेवाखण्डेश्रीनर्मदामाहात्म्ये नर्मदास्तोत्रकथनं नाम द्वादशोऽध्यायः ॥स्कन्दपुराण । आवन्त्यखण्ड । रेवाखण्ड । अध्याय १२/२१८॥स्कन्दपुराण । आवन्त्यखण्ड । रेवाखण्ड । अध्याय १२/२-१८॥

iti śrīskandapurāṇe āvantyakhaṇḍe revākhaṇḍeśrīnarmadāmāhātmye narmadāstotrakathanaṃ nāma dvādaśo'dhyāyaḥ ||skandapurāṇa | āvantyakhaṇḍa | revākhaṇḍa | adhyāya 12/218||skandapurāṇa | āvantyakhaṇḍa | revākhaṇḍa | adhyāya 12/2-18||