रामसुकुञ्जगामिनी Ramasukunjagamini

स्मारं स्मारं जनिमृतिभयं जातनिर्वेदवृतिर्ध्यायं ध्यायं पशुपतिमुमाकान्तमन्तर्निषन्नम् ।पायं पायं सपदि परमानन्दपीयूषधारांभूयो भूयो निजगुरुपदाम्बोजयुग्मं नमामि ॥ १॥

smāraṃ smāraṃ janimṛtibhayaṃ jātanirvedavṛtirdhyāyaṃ dhyāyaṃ paśupatimumākāntamantarniṣannam |pāyaṃ pāyaṃ sapadi paramānandapīyūṣadhārāṃbhūyo bhūyo nijagurupadāmbojayugmaṃ namāmi || 1||

गङ्गापूरप्रचलितजटासृस्त भोगेन्द्रभीतामालिङ्गन्तीमचलतनयां सस्मितवीक्षमानः ।लोलापाङ्गैः प्रणतजनता नन्दयञ्चन्द्रमौलिर्मोहध्वान्तं हरतु परमानन्दमूर्तिश्शिवो नः ॥ २॥

gaṅgāpūrapracalitajaṭāsṛsta bhogendrabhītāmāliṅgantīmacalatanayāṃ sasmitavīkṣamānaḥ |lolāpāṅgaiḥ praṇatajanatā nandayañcandramaulirmohadhvāntaṃ haratu paramānandamūrtiśśivo naḥ || 2||

कमण्डलौ या कमलासनेन समानिता पूर्वमपूर्वतोया ।त्रिविक्रमे विष्णुपदारविन्द सम्पूज्य याता हरमौलिभागम् ॥ ३॥

kamaṇḍalau yā kamalāsanena samānitā pūrvamapūrvatoyā |trivikrame viṣṇupadāravinda sampūjya yātā haramaulibhāgam || 3||

भगीरथः सागरगान्स्वपितृनुद्धर्तुं कामश्शिव सन्निधौ सः ।आराधयामास सरिद्वरां तां हिमाद्रिदेशे पितृमुक्तिमत्यै ॥ ४॥

bhagīrathaḥ sāgaragānsvapitṛnuddhartuṃ kāmaśśiva sannidhau saḥ |ārādhayāmāsa saridvarāṃ tāṃ himādrideśe pitṛmuktimatyai || 4||

सन्तुष्टचित्तस्य शिवस्यमौलेर्विनिर्गता पुण्यजला त्रिमार्गैः ।मन्दाकिनी स्वर्गपथानुगामिनी भागीरथी भारतपावनी सदा ॥ ५॥

santuṣṭacittasya śivasyamaulervinirgatā puṇyajalā trimārgaiḥ |mandākinī svargapathānugāminī bhāgīrathī bhāratapāvanī sadā || 5||

पातालगा भोगवती यशस्विनी या सप्तधा सप्तसरोवरे स्थिता ।सम्पूजिताभूदृषिभिस्तुसप्तभिः सापातु नो रामसुकुञ्जगामिनी ॥ ६॥

pātālagā bhogavatī yaśasvinī yā saptadhā saptasarovare sthitā |sampūjitābhūdṛṣibhistusaptabhiḥ sāpātu no rāmasukuñjagāminī || 6||

कूर्मासनस्था मृगशावकाक्षी, चतुर्भुजा शोभितश्वेतवस्त्रा ।धृताक्षमाला घटपद्ममुद्रा, दृष्टा मया रामसुकुञ्जगा सा ॥ ७॥

kūrmāsanasthā mṛgaśāvakākṣī, caturbhujā śobhitaśvetavastrā |dhṛtākṣamālā ghaṭapadmamudrā, dṛṣṭā mayā rāmasukuñjagā sā || 7||

भागीरथी पूतजला त्रितापहा, या भारतेभ्यो जयदायिनी सदा ।सम्पूजिता भारतवासिभिर्मुदा, सा मेऽस्तु चान्ते शिवधाम दायिनी ॥ ८॥

bhāgīrathī pūtajalā tritāpahā, yā bhāratebhyo jayadāyinī sadā |sampūjitā bhāratavāsibhirmudā, sā me'stu cānte śivadhāma dāyinī || 8||

सदा पूता गङ्गा वितरति मुहुर्दर्शनसुखंहिमाद्रेः सञ्जाता भरतविपिने सिञ्चति तरून् ।मयादृष्टा सैषा प्रवहति सदा खण्डितगतिःस्वदेशस्य स्नेहं प्रकटयति मुदा स्नेहपयसा ॥ ९॥

sadā pūtā gaṅgā vitarati muhurdarśanasukhaṃhimādreḥ sañjātā bharatavipine siñcati tarūn |mayādṛṣṭā saiṣā pravahati sadā khaṇḍitagatiḥsvadeśasya snehaṃ prakaṭayati mudā snehapayasā || 9||

हिमाद्रेर्निर्गत्य प्रविशति बनं तर्पणपराजनस्थाने लोकान्विविधबहुलाभं प्रकुरुते ।त्रिवेणी तीर्थेऽस्मिन् हसति कुरुते नर्तनमपिजलोर्मीणां नृत्यं सुखकरमहो सागरजले ॥ १०॥

himādrernirgatya praviśati banaṃ tarpaṇaparājanasthāne lokānvividhabahulābhaṃ prakurute |triveṇī tīrthe'smin hasati kurute nartanamapijalormīṇāṃ nṛtyaṃ sukhakaramaho sāgarajale || 10||

कृतः कुञ्जे वासः परमसुखदो रामकृपयाप्रवद्धोऽस्यां स्नेहः सुरसरिति मे रामदयया ।इयं गङ्गा मातुः प्रकटयति रागं मयि सदाचिताभस्म त्याज्यं सुरसरिति मेऽतो मृतिपरम् ॥ ११॥

kṛtaḥ kuñje vāsaḥ paramasukhado rāmakṛpayāpravaddho'syāṃ snehaḥ surasariti me rāmadayayā |iyaṃ gaṅgā mātuḥ prakaṭayati rāgaṃ mayi sadācitābhasma tyājyaṃ surasariti me'to mṛtiparam || 11||

विरिञ्चिपाण्यब्जविनिर्गता सा, पदब्जपूता गरुडासनस्य ।अलङ्कृता मूर्घ्निं सदाशिवेन, पुण्या पताका सगरात्मजानाम् ॥ १२॥

viriñcipāṇyabjavinirgatā sā, padabjapūtā garuḍāsanasya |alaṅkṛtā mūrghniṃ sadāśivena, puṇyā patākā sagarātmajānām || 12||

गङ्गा नदी पूतजला त्रिमार्गगा, मन्दाकिनी भोगवती च जाह्नवी ।विरिञ्चिनारायणरुद्रपूजिता, स्वर्गापवर्गाभयदा सुधा स्रवा ॥ १३॥

gaṅgā nadī pūtajalā trimārgagā, mandākinī bhogavatī ca jāhnavī |viriñcinārāyaṇarudrapūjitā, svargāpavargābhayadā sudhā sravā || 13||

सत्सङ्गलाभं शिवपादपूजां, माघेऽसिते धर्मतिथौ समाप्य ।द्विजो जगन्नाथसुनामधन्यस्तृप्तिं परामाप सुकुञ्ज भृङ्गः ॥ १४॥

satsaṅgalābhaṃ śivapādapūjāṃ, māghe'site dharmatithau samāpya |dvijo jagannāthasunāmadhanyastṛptiṃ parāmāpa sukuñja bhṛṅgaḥ || 14||

गङ्गा गीता च गायत्री, त्रिवर्गफलदायिनी ।तनौ वाण्यां हृदि स्फीता, जगदानन्ददा भवेत् ॥ १५॥

gaṅgā gītā ca gāyatrī, trivargaphaladāyinī |tanau vāṇyāṃ hṛdi sphītā, jagadānandadā bhavet || 15||

त्रिसप्तनन्दैकदिने च क्रिस्तोर्माघेऽसिते धर्मतिथौस्वपितृन्द्विजो जगन्नाथ सुनामधन्यस्तृप्तिं च कृत्वा गृहमाजगाम ॥ १६॥

trisaptanandaikadine ca kristormāghe'site dharmatithausvapitṛndvijo jagannātha sunāmadhanyastṛptiṃ ca kṛtvā gṛhamājagāma || 16||

धूम्रपान परित्यज्य बलभद्रप्रचोदितः ।जीवन्मुक्तो जगन्नाथो रामकुञ्जे बभूव ह ॥ १७॥

dhūmrapāna parityajya balabhadrapracoditaḥ |jīvanmukto jagannātho rāmakuñje babhūva ha || 17||

राधाकान्त सुदर्शनात्मजजगन्नाथेन सम्पादितोनानाछन्दमयः सुरागभरितो गङ्गावतारस्तवः ।सोऽयं सज्जनमानसेषु नितरां शर्मप्रदो मोक्षदःभूथान्नो जयदः सदा शिवमयः कामप्रदो भारते ॥ १८॥

rādhākānta sudarśanātmajajagannāthena sampāditonānāchandamayaḥ surāgabharito gaṅgāvatārastavaḥ |so'yaṃ sajjanamānaseṣu nitarāṃ śarmaprado mokṣadaḥbhūthānno jayadaḥ sadā śivamayaḥ kāmaprado bhārate || 18||

इति गङ्गावतारान्तर्गता श्रीरामसुकुञ्जगामिनी समाप्ता ।। श्री शिवार्पणमस्तु ।

iti gaṅgāvatārāntargatā śrīrāmasukuñjagāminī samāptā || śrī śivārpaṇamastu |