गणाध्यक्षस्तोत्रम् Shriganadhyaksha Shtotram By Ikshvaku

भरद्वाज उवाचकथं स्तुतो गणाध्यक्षस्तेन राज्ञा महात्मना ।यथा तेन तपस्तप्तं तन्मे वद महामते ॥ १॥

bharadvāja uvācakathaṃ stuto gaṇādhyakṣastena rājñā mahātmanā |yathā tena tapastaptaṃ tanme vada mahāmate || 1||

सूत उवाचचतुर्थीदिवसे राजा स्नात्वा त्रिषवणं द्विज ।रक्ताम्बरधरो भूत्वा रक्तगन्धानुलेपनः ॥ २॥

sūta uvācacaturthīdivase rājā snātvā triṣavaṇaṃ dvija |raktāmbaradharo bhūtvā raktagandhānulepanaḥ || 2||

सुरक्तकुसुमैर्हृद्यैर्विनायकमथार्चयत् ।रक्तचन्दनतोयेन स्नानपूर्वं यथाविधि ॥ ३॥

suraktakusumairhṛdyairvināyakamathārcayat |raktacandanatoyena snānapūrvaṃ yathāvidhi || 3||

विलिप्य रक्तगन्धेन रक्तपुष्पैः प्रपूजयत् ।ततोऽसौ दत्तवान् धूपमाज्ययुक्तं सचन्दनम् ।नैवेद्यं चैव हारिद्रं गुडखण्डघृतप्लुतम् ॥ ४॥

vilipya raktagandhena raktapuṣpaiḥ prapūjayat |tato'sau dattavān dhūpamājyayuktaṃ sacandanam |naivedyaṃ caiva hāridraṃ guḍakhaṇḍaghṛtaplutam || 4||

एवं सुविधिना पूज्य विनायकमथास्तवीत् ।इक्ष्वाकुरुवाचनमस्कृत्य महादेवं स्तोष्येऽहं तं विनायकम् ॥ ५॥

evaṃ suvidhinā pūjya vināyakamathāstavīt |ikṣvākuruvācanamaskṛtya mahādevaṃ stoṣye'haṃ taṃ vināyakam || 5||

महागणपतिं शूरमजितं ज्ञानवर्धनम् ।एकदन्तं द्विदन्तं च चतुर्दन्तं चतुर्भुजम् ॥ ६॥

mahāgaṇapatiṃ śūramajitaṃ jñānavardhanam |ekadantaṃ dvidantaṃ ca caturdantaṃ caturbhujam || 6||

त्र्यक्षं त्रिशूलहस्तं च रक्तनेत्रं वरप्रदम् ।आम्बिकेयं शूर्पकर्णं प्रचण्डं च विनायकम् ॥ ७॥

tryakṣaṃ triśūlahastaṃ ca raktanetraṃ varapradam |āmbikeyaṃ śūrpakarṇaṃ pracaṇḍaṃ ca vināyakam || 7||

आरक्तं दण्डिनं चैव वह्निवक्त्रं हुतप्रियम् ।अनर्चितो विघ्नकरः सर्वकार्येषु यो नृणाम् ॥ ८॥

āraktaṃ daṇḍinaṃ caiva vahnivaktraṃ hutapriyam |anarcito vighnakaraḥ sarvakāryeṣu yo nṛṇām || 8||

तं नमामि गणाध्यक्षं भीममुग्रमुमासुतम् ।मदमत्तं विरूपाक्षं भक्तिविघ्ननिवारकम् ॥ ९॥

taṃ namāmi gaṇādhyakṣaṃ bhīmamugramumāsutam |madamattaṃ virūpākṣaṃ bhaktivighnanivārakam || 9||

सूर्यकोटिप्रतीकाशं भिन्नाञ्जनसमप्रभम् ।बुद्धं सुनिर्मलं शान्तं नमस्यामि विनायकम् ॥ १०॥

sūryakoṭipratīkāśaṃ bhinnāñjanasamaprabham |buddhaṃ sunirmalaṃ śāntaṃ namasyāmi vināyakam || 10||

नमोऽस्तु गजवक्त्राय गणानां पतये नमः ।मेरुमन्दररूपाय नमः कैलासवासिने ॥ ११॥

namo'stu gajavaktrāya gaṇānāṃ pataye namaḥ |merumandararūpāya namaḥ kailāsavāsine || 11||

विरूपाय नमस्तेऽस्तु नमस्ते ब्रह्मचारिणे ।भक्तस्तुताय देवाय नमस्तुभ्यं विनायक ॥ १२॥

virūpāya namaste'stu namaste brahmacāriṇe |bhaktastutāya devāya namastubhyaṃ vināyaka || 12||

त्वया पुराण पूर्वेषां देवानां कार्यसिद्धये ।गजरूपं समास्थाय त्रासिताः सर्वदानवाः ॥ १३॥

tvayā purāṇa pūrveṣāṃ devānāṃ kāryasiddhaye |gajarūpaṃ samāsthāya trāsitāḥ sarvadānavāḥ || 13||

ऋषीणां देवतानां च नायकत्वं प्रकाशितम् ।यतस्ततः सुरैरग्रे पूज्यसे त्वं भवात्मज ॥ १४॥

ṛṣīṇāṃ devatānāṃ ca nāyakatvaṃ prakāśitam |yatastataḥ surairagre pūjyase tvaṃ bhavātmaja || 14||

त्वामाराध्य गणाध्यक्षं सर्वज्ञं कामरूपिणम् ।कार्यार्थं रक्तकुसुमै रक्तचन्दनवारिभिः ॥ १५॥

tvāmārādhya gaṇādhyakṣaṃ sarvajñaṃ kāmarūpiṇam |kāryārthaṃ raktakusumai raktacandanavāribhiḥ || 15||

रक्ताम्बरधरो भूत्वा चतुर्थ्यामर्चयेज्जपेत् ।त्रिकालमेककालं वा पूजयेन्नियताशनः ॥ १६॥

raktāmbaradharo bhūtvā caturthyāmarcayejjapet |trikālamekakālaṃ vā pūjayenniyatāśanaḥ || 16||

राजानं राजपुत्रं वा राजमन्त्रिणमेव वा ।राज्यं च सर्वविघ्नेश वशं कुर्यात् सराष्ट्रकम् ॥ १७॥

rājānaṃ rājaputraṃ vā rājamantriṇameva vā |rājyaṃ ca sarvavighneśa vaśaṃ kuryāt sarāṣṭrakam || 17||

अविघ्नं तपसो मह्यं कुरु नौमि विनायक ।मयेत्थं संस्तुतो भक्त्या पूजितश्च विशेषतः ॥ १८॥

avighnaṃ tapaso mahyaṃ kuru naumi vināyaka |mayetthaṃ saṃstuto bhaktyā pūjitaśca viśeṣataḥ || 18||

यत्फलं सर्वतीर्थेषु सर्वयज्ञेषु यत्फलम् ।तत्फलं पूर्णमाप्नोति स्तुत्वा देवं विनायकम् ॥ १९॥

yatphalaṃ sarvatīrtheṣu sarvayajñeṣu yatphalam |tatphalaṃ pūrṇamāpnoti stutvā devaṃ vināyakam || 19||

विषमं न भवेत् तस्य न च गच्छेत् पराभवम् ।न च विघ्नो भवेत् तस्य जातो जातिस्मरो भवेत् ॥ २०॥

viṣamaṃ na bhavet tasya na ca gacchet parābhavam |na ca vighno bhavet tasya jāto jātismaro bhavet || 20||

य इदं पठते स्तोत्रं षड्भिर्मासैर्वरं लभेत् ।संवत्सरेण सिद्धिं च लभते नात्र संशयः ॥ २१॥

ya idaṃ paṭhate stotraṃ ṣaḍbhirmāsairvaraṃ labhet |saṃvatsareṇa siddhiṃ ca labhate nātra saṃśayaḥ || 21||

सूत उवाचएवं स्तुत्वा पुरा राजा गणाध्यक्षं द्विजोत्तम ।तापसं वेषमास्थाय तपश्चर्तुं गतो वनम् ॥ २२॥

sūta uvācaevaṃ stutvā purā rājā gaṇādhyakṣaṃ dvijottama |tāpasaṃ veṣamāsthāya tapaścartuṃ gato vanam || 22||

उत्सृज्य वस्त्रं नागत्वक्सदृशं बहुमूल्यकम् ।कठिनां तु त्वचं वाक्षीं कट्यां धत्ते नृपोत्तमः ॥ २३॥

utsṛjya vastraṃ nāgatvaksadṛśaṃ bahumūlyakam |kaṭhināṃ tu tvacaṃ vākṣīṃ kaṭyāṃ dhatte nṛpottamaḥ || 23||

तथा रत्नानि दिव्यानि वलयानि निरस्य तु ।अक्षसूत्रमलङ्कारं फलैः पद्मस्य शोभनम् ॥ २४॥

tathā ratnāni divyāni valayāni nirasya tu |akṣasūtramalaṅkāraṃ phalaiḥ padmasya śobhanam || 24||

तथोत्तमाङ्गे मुकुटं रत्नहाटकशोभितम् ।त्यक्त्वा जटाकलापं तु तपोऽर्थे विभृयान्नृपः ॥ २५॥

tathottamāṅge mukuṭaṃ ratnahāṭakaśobhitam |tyaktvā jaṭākalāpaṃ tu tapo'rthe vibhṛyānnṛpaḥ || 25||

इति ।नरसिंहपुराण अध्याय २५ श्लोकसंख्या ७२श्रीनरसिंहपुराणे इक्ष्वाकुचरिते पञ्चविंशोऽध्यायः ॥ २५॥

iti |narasiṃhapurāṇa adhyāya 25 ślokasaṃkhyā 72śrīnarasiṃhapurāṇe ikṣvākucarite pañcaviṃśo'dhyāyaḥ || 25||