गजाननस्तोत्रम् (शङ्करादिकृतम्) Shamkaradikritam Gajananastotram

श्री गणेशाय नमः ।देवा ऊचुः ।गजाननाय पूर्णाय सांख्यरूपमयाय ते ।विदेहेन च सर्वत्र संस्थिताय नमो नमः ॥ १॥

śrī gaṇeśāya namaḥ |devā ūcuḥ |gajānanāya pūrṇāya sāṃkhyarūpamayāya te |videhena ca sarvatra saṃsthitāya namo namaḥ || 1||

अमेयाय च हेरम्ब परशुधारकाय ते ।मूषकवाहनायैव विश्वेशाय नमो नमः ॥ २॥

ameyāya ca heramba paraśudhārakāya te |mūṣakavāhanāyaiva viśveśāya namo namaḥ || 2||

अनन्तविभवायैव परेशां पररूपिणे ।शिवपुत्राय देवाय गुहाग्रजाय ते नमः ॥ ३॥

anantavibhavāyaiva pareśāṃ pararūpiṇe |śivaputrāya devāya guhāgrajāya te namaḥ || 3||

पार्वतीनन्दनायैव देवानां पालकाय ते ।सर्वेषां पूज्यदेहाय गणेशाय नमो नमः ॥ ४॥

pārvatīnandanāyaiva devānāṃ pālakāya te |sarveṣāṃ pūjyadehāya gaṇeśāya namo namaḥ || 4||

स्वानन्दवासिने तुभ्यं शिवस्य कुलदैवत ।विष्ण्वादीनां विशेषेण कुलदेवाय ते नमः ॥ ५॥

svānandavāsine tubhyaṃ śivasya kuladaivata |viṣṇvādīnāṃ viśeṣeṇa kuladevāya te namaḥ || 5||

योगाकाराय सर्वेषां योगशान्तिप्रदाय च ।ब्रह्मेशाय नमस्तुभ्यं ब्रह्मभूतप्रदाय ते ॥ ६॥

yogākārāya sarveṣāṃ yogaśāntipradāya ca |brahmeśāya namastubhyaṃ brahmabhūtapradāya te || 6||

सिद्धिबुद्धिपते नाथ! सिद्धिबुद्धिप्रदायिने ।मायिने मायिकेभ्यश्च मोहदाय नमो नमः ॥ ७॥

siddhibuddhipate nātha! siddhibuddhipradāyine |māyine māyikebhyaśca mohadāya namo namaḥ || 7||

लम्बोदराय वै तुभ्यं सर्वोदरगताय च ।अमायिने च मायाया आधाराय नमो नमः ॥ ८॥

lambodarāya vai tubhyaṃ sarvodaragatāya ca |amāyine ca māyāyā ādhārāya namo namaḥ || 8||

गजः सर्वस्य बीजं यत्तेन चिह्नेन विघ्नप!।योगिनस्त्वां प्रजानन्ति तदाकारा भवन्ति ते ॥ ९॥

gajaḥ sarvasya bījaṃ yattena cihnena vighnapa!|yoginastvāṃ prajānanti tadākārā bhavanti te || 9||

तेन त्वं गजवक्त्रश्च किं स्तुमस्तवां गजानन ।वेदादयो विकुण्ठाश्च शंकराद्याश्च देवपाः ॥ १०॥

tena tvaṃ gajavaktraśca kiṃ stumastavāṃ gajānana |vedādayo vikuṇṭhāśca śaṃkarādyāśca devapāḥ || 10||

शुक्रादयश्च शेषाद्याः स्तोतुं शक्ता भवन्ति नः ।तथापि संस्तुतोऽसि त्वं स्फूर्त्या त्वद्दर्शनात्मना ॥ ११॥

śukrādayaśca śeṣādyāḥ stotuṃ śaktā bhavanti naḥ |tathāpi saṃstuto'si tvaṃ sphūrtyā tvaddarśanātmanā || 11||

एवमुक्त्वा प्रणेमुस्तं गजाननं शिवादयः ।स तानुवाच प्रीतात्मा भक्तिभावेन तोषितः ॥ १२॥

evamuktvā praṇemustaṃ gajānanaṃ śivādayaḥ |sa tānuvāca prītātmā bhaktibhāvena toṣitaḥ || 12||

गजानन उवाच ।भवत्कृतमिदं स्तोत्रं मदीयं सर्वदं भवेत् ।पठते शृण्वते चैव ब्रह्मभूतप्रदायकम् ॥ १३॥

gajānana uvāca |bhavatkṛtamidaṃ stotraṃ madīyaṃ sarvadaṃ bhavet |paṭhate śṛṇvate caiva brahmabhūtapradāyakam || 13||

इति मौद्गलोक्तं गजाननस्तोत्रं समाप्तम् ॥

iti maudgaloktaṃ gajānanastotraṃ samāptam ||