गणेशस्तुतिः शक्रकृता Shakrakrita Shri Ganesha Stuti

शक्र उवाच ।भूभारहरणार्थं यो जातः कश्यपनन्दनः ।अचिन्त्यो महिमा यस्य किमु वर्ण्यो भवेन्मम ॥ २६॥

śakra uvāca |bhūbhāraharaṇārthaṃ yo jātaḥ kaśyapanandanaḥ |acintyo mahimā yasya kimu varṇyo bhavenmama || 26||

निर्गमं देहि देवेश ! कुक्षेरत्यन्तविस्तरात् ।अदृष्टपाराद् वर्षाणि द्वादश भ्रमता मया ॥ २७॥

nirgamaṃ dehi deveśa ! kukṣeratyantavistarāt |adṛṣṭapārād varṣāṇi dvādaśa bhramatā mayā || 27||

तव कुक्षौ मयाऽदर्शि भुवनानि चतुर्दश ।स्थाने स्थाने विभक्तानि प्रतिरोमाञ्चमेकराट् ॥ २८॥

tava kukṣau mayā'darśi bhuvanāni caturdaśa |sthāne sthāne vibhaktāni pratiromāñcamekarāṭ || 28||

समष्टिव्यष्टिरूपाणि महाविस्तारवन्ति च ।दृष्टानि तव रूपाणि सुसौम्यानीतराणि च ॥ २९॥

samaṣṭivyaṣṭirūpāṇi mahāvistāravanti ca |dṛṣṭāni tava rūpāṇi susaumyānītarāṇi ca || 29||

अद्भुतान्यप्यसङ्ख्यानि वक्त्राणि नयनानि च ।दृष्ट्वा दुर्दर्शरूपाणि जगत्क्षोभकराणि ते ॥ ३०॥

adbhutānyapyasaṅkhyāni vaktrāṇi nayanāni ca |dṛṣṭvā durdarśarūpāṇi jagatkṣobhakarāṇi te || 30||

दैत्यदानवपूर्णानि सुरमानववन्ति च ।यक्षरक्षःपिशाचादिचतुराकरवन्ति च ॥ ३१॥

daityadānavapūrṇāni suramānavavanti ca |yakṣarakṣaḥpiśācādicaturākaravanti ca || 31||

विकरालमहोरूपमुपसंहर विश्वकृत् ! ।गतो मोहं स्मृतिर्लब्धा प्रसादान्निखिलेश्वर ॥ ३२॥

vikarālamahorūpamupasaṃhara viśvakṛt ! |gato mohaṃ smṛtirlabdhā prasādānnikhileśvara || 32||

कायेन मनसा बुद्।ह्ध्या वाचा त्वां शरणं गतः ।प्राकृतं दर्शय विभो ! रूपं ते भक्तवत्सल ॥ ३३॥

kāyena manasā bud|hdhyā vācā tvāṃ śaraṇaṃ gataḥ |prākṛtaṃ darśaya vibho ! rūpaṃ te bhaktavatsala || 33||

क उवाच ।एवं यावत् प्रार्थयते स्वात्मानं तावदेव सः ।सभामध्यगतं तं चददर्श ब्रह्मचारिणम् ॥ ३४॥

ka uvāca |evaṃ yāvat prārthayate svātmānaṃ tāvadeva saḥ |sabhāmadhyagataṃ taṃ cadadarśa brahmacāriṇam || 34||

पश्यतां सर्वलोकानां साष्टाङ्गं प्रणनाम तम् ।अतिविस्मितचित्तोऽसौ लज्जाहर्षसमन्वितः ॥ ३५॥

paśyatāṃ sarvalokānāṃ sāṣṭāṅgaṃ praṇanāma tam |ativismitacitto'sau lajjāharṣasamanvitaḥ || 35||

शृण्वस्तु सर्वदेवेषु नुनाव ब्रह्मचारिणम् ।जातं मुनिगृहे शान्तं क्रीडामानुषरूपिणम् ॥ ३६॥

śṛṇvastu sarvadeveṣu nunāva brahmacāriṇam |jātaṃ munigṛhe śāntaṃ krīḍāmānuṣarūpiṇam || 36||

शक्र उवाच ।जाने न त्वाऽनन्तशक्तिं परेशं विश्वात्मानं विश्वबीजं गुणेशम् ।विश्वाभासं विश्ववन्द्यं त्रिसत्यं त्रेधाभूतं जन्मरक्षार्तिहेतुम् ॥ ३७॥

śakra uvāca |jāne na tvā'nantaśaktiṃ pareśaṃ viśvātmānaṃ viśvabījaṃ guṇeśam |viśvābhāsaṃ viśvavandyaṃ trisatyaṃ tredhābhūtaṃ janmarakṣārtihetum || 37||

एकं नित्यं सच्चिदानन्दनरूपं सर्वाध्यक्षं कारणातीतमीशम् ।चेष्टाहेतुं स्थावरे जङ्गमे च वाञ्छापूरं सर्वगं त्वाऽभिवन्दे ॥ ३८॥

ekaṃ nityaṃ saccidānandanarūpaṃ sarvādhyakṣaṃ kāraṇātītamīśam |ceṣṭāhetuṃ sthāvare jaṅgame ca vāñchāpūraṃ sarvagaṃ tvā'bhivande || 38||

सर्वेशानं सर्वविद्यानिधानं सर्वात्मानं सर्वबोधावभासम् ।सर्वातीताऽवाङ्मनोगोचरं त्वां सर्वावासं सर्वविज्ञानमीडे ॥ ३९॥

sarveśānaṃ sarvavidyānidhānaṃ sarvātmānaṃ sarvabodhāvabhāsam |sarvātītā'vāṅmanogocaraṃ tvāṃ sarvāvāsaṃ sarvavijñānamīḍe || 39||

क उवाच ।एवं स्तुत्वा च नत्वा च सम्पूज्य स्वाङ्कुशं ददौ ।कल्पवृक्षं चदास्यौ द्वे विनायक इति स्फुटम् ॥ ४०॥

ka uvāca |evaṃ stutvā ca natvā ca sampūjya svāṅkuśaṃ dadau |kalpavṛkṣaṃ cadāsyau dve vināyaka iti sphuṭam || 40||

चकार नाम शक्रोऽथ स्मरणात् सर्वसिद्धिदम् ।जयशब्दैर्नमःशब्दैर्वाद्यशब्दैरनेकधा ॥ ४१॥

cakāra nāma śakro'tha smaraṇāt sarvasiddhidam |jayaśabdairnamaḥśabdairvādyaśabdairanekadhā || 41||

गन्धर्वगीतनिनदैरप्सरोनृत्यनिस्वनैः ।व्याप्तमासीत् पुष्पवर्षैस्तदा व्योम धरातलम् ॥ ४२॥

gandharvagītaninadairapsaronṛtyanisvanaiḥ |vyāptamāsīt puṣpavarṣaistadā vyoma dharātalam || 42||

प्रतिकूलवहा नद्य आसन् पूर्ववहाः शुभाः ।प्रसन्नमासीद् दिक्चक्रं ववुर्वाताः सुखावहाः ॥ ४३॥

pratikūlavahā nadya āsan pūrvavahāḥ śubhāḥ |prasannamāsīd dikcakraṃ vavurvātāḥ sukhāvahāḥ || 43||

प्रदक्षिणार्चिषः शान्ता आसन् सर्वत्र वह्नयः ।ततः प्रसन्नः शक्राय ददावभयमेकराट् ॥ ४४॥

pradakṣiṇārciṣaḥ śāntā āsan sarvatra vahnayaḥ |tataḥ prasannaḥ śakrāya dadāvabhayamekarāṭ || 44||

भविता न भयं क्वापि तव शक्र ! रणाजिरे ।पठस्व स्तोत्रमेतत् त्वं त्रिसन्ध्यं भक्तितत्परः ॥ ४५॥

bhavitā na bhayaṃ kvāpi tava śakra ! raṇājire |paṭhasva stotrametat tvaṃ trisandhyaṃ bhaktitatparaḥ || 45||

अन्योऽपि यः पठेद् भक्त्या श्लोकत्रयमिदं नरः ।स सर्वानाप्नुयात् कामान् सर्वत्र विजयी भवेत् ॥ ४६॥

anyo'pi yaḥ paṭhed bhaktyā ślokatrayamidaṃ naraḥ |sa sarvānāpnuyāt kāmān sarvatra vijayī bhavet || 46||

इति शक्रकृता श्रीगणेशस्तुतिः सम्पूर्णा ॥॥ श्रीगणेशपुराणं क्रीडा (उत्तर)खण्डः । अध्यायः ११ । २\।११ २६४६॥– ॥ श्रीगणेशपुराणं क्रीडा (उत्तर)खण्डः । अध्यायः ११ । २।११ २६-४६॥

iti śakrakṛtā śrīgaṇeśastutiḥ sampūrṇā |||| śrīgaṇeśapurāṇaṃ krīḍā (uttara)khaṇḍaḥ | adhyāyaḥ 11 | 2\|11 2646||– || śrīgaṇeśapurāṇaṃ krīḍā (uttara)khaṇḍaḥ | adhyāyaḥ 11 | 2|11 26-46||