काश्मीरगणनायकादिपूजनमहत्त्ववर्णनम् काशीप्रविष्टुम् Kashipravishtum Kashmiragananayakadipujanamahattvavarnanam

गौरीशृङ्गमितिख्यातमेकशृङ्गं वरं मुने ।तत्रास्त्येकं सरो रम्यं दिव्योदकविराजितम् ॥ ७९॥

gaurīśṛṅgamitikhyātamekaśṛṅgaṃ varaṃ mune |tatrāstyekaṃ saro ramyaṃ divyodakavirājitam || 79||

तत्तीरे विमलं लिङ्गमेकं गौर्या विनिर्मितम् ।तत्र काश्मीरगणपः कश्चिद्गौर्यां विनिर्मितः ॥ ८०॥

tattīre vimalaṃ liṅgamekaṃ gauryā vinirmitam |tatra kāśmīragaṇapaḥ kaścidgauryāṃ vinirmitaḥ || 80||

तत्र गौर्यास्सरस्तीरे स्नानं कृत्वा विधानतः ।लिङ्गं सम्पूज्य यत्नेन यथाशास्त्रं ततः परम् ॥ ८१॥

tatra gauryāssarastīre snānaṃ kṛtvā vidhānataḥ |liṅgaṃ sampūjya yatnena yathāśāstraṃ tataḥ param || 81||

यथाशास्त्रं विधानेन काश्मीरगणनायकम् ।पूजयस्वातियत्नेन गणानां त्वेति मन्त्रतः ॥ ८२॥

yathāśāstraṃ vidhānena kāśmīragaṇanāyakam |pūjayasvātiyatnena gaṇānāṃ tveti mantrataḥ || 82||

तत्प्रीत्यर्थं तपश्चर्या तत्र कार्या निरन्तरम् ।पञ्चाग्नि मध्य(ध्ये)पञ्चास्यपुत्रध्यानपुरःसरम् ॥ ८३॥

tatprītyarthaṃ tapaścaryā tatra kāryā nirantaram |pañcāgni madhya(dhye)pañcāsyaputradhyānapuraḥsaram || 83||

गणानां त्वेति मन्त्रोऽयं सर्वविघ्नविनाशकः ।जपनीयः प्रयत्नेन सर्वविघ्नोपशान्तये ॥ ८४॥

gaṇānāṃ tveti mantro'yaṃ sarvavighnavināśakaḥ |japanīyaḥ prayatnena sarvavighnopaśāntaye || 84||

इत्युक्तस्तदनुज्ञातः सन्तुष्टः शैवपुङ्गवः ।मत्वाकृतार्थमात्मानं गौरीशृङ्गं जगाम च ॥ ८५॥

ityuktastadanujñātaḥ santuṣṭaḥ śaivapuṅgavaḥ |matvākṛtārthamātmānaṃ gaurīśṛṅgaṃ jagāma ca || 85||

तस्मिन्सरोवरे रम्ये स्नानार्थं विधिपूर्वकम् ।गौरीलिङ्गमितिख्यातं तल्लिङ्गमतिशोभनम् ॥ ८६॥

tasminsarovare ramye snānārthaṃ vidhipūrvakam |gaurīliṅgamitikhyātaṃ talliṅgamatiśobhanam || 86||

ततो बिल्वदलैः शुद्धैस्तत्सरोविमलैर्जलैः ।पूजयामास पूतात्मा गौरीलिङ्गमघापहम् ॥ ८७॥

tato bilvadalaiḥ śuddhaistatsarovimalairjalaiḥ |pūjayāmāsa pūtātmā gaurīliṅgamaghāpaham || 87||

ततो गणाधिपं सम्यगभिषिच्य यथाविधि ।चकार पूजां विमलैर्बिल्वदूर्वाङ्कुरैरपि ॥ ८९॥

tato gaṇādhipaṃ samyagabhiṣicya yathāvidhi |cakāra pūjāṃ vimalairbilvadūrvāṅkurairapi || 89||

प्रणम्य बहुधा स्तुत्वा मनुं विघ्नहरं जपन् ।पञ्चाग्निमध्ये संविश्य तपश्चक्रे दृढव्रतः ॥ ९०॥

praṇamya bahudhā stutvā manuṃ vighnaharaṃ japan |pañcāgnimadhye saṃviśya tapaścakre dṛḍhavrataḥ || 90||

शैवमुग्रतपोनिष्ठं विलोक्येन्द्रादयः सुराः ।कम्पायमानास्तिष्ठन्ति कृताञ्जलिपुटः सदा ॥ ९१॥

śaivamugrataponiṣṭhaṃ vilokyendrādayaḥ surāḥ |kampāyamānāstiṣṭhanti kṛtāñjalipuṭaḥ sadā || 91||

एवमेव स शैवेन्द्रस्त्रिपञ्चाशद्युगावधि ।चक्रारोग्रं तपः सम्यक् त्यक्ताहारो भृशं मुदा ॥ ९२॥

evameva sa śaivendrastripañcāśadyugāvadhi |cakrārograṃ tapaḥ samyak tyaktāhāro bhṛśaṃ mudā || 92||

ततः प्रसादितस्तेन गणेशो विघ्ननाशकः ।विघ्नान्धकारमार्ताण्डशुण्डदण्डविराजितः ॥ ९३॥

tataḥ prasāditastena gaṇeśo vighnanāśakaḥ |vighnāndhakāramārtāṇḍaśuṇḍadaṇḍavirājitaḥ || 93||

प्रसन्ने सति विघ्नेशे स्तुत्वा नत्वा मुहुर्मुहुः ।ययाचे स वरं स्वेष्टं सर्वविघ्नौघनाशकम् ॥ ९४॥

prasanne sati vighneśe stutvā natvā muhurmuhuḥ |yayāce sa varaṃ sveṣṭaṃ sarvavighnaughanāśakam || 94||

गौरीसुत गणाधीश गजवक्र शिवप्रिय ।विष्णुपूजितपादाब्ज प्रसीद वरदो भव ॥ ९५॥

gaurīsuta gaṇādhīśa gajavakra śivapriya |viṣṇupūjitapādābja prasīda varado bhava || 95||

गणेश सर्वविघ्नेश विघ्नान् संहर संहर ।काशीप्राप्तिर्यथा भूयात्तथा कुरु ममानघ ॥ ९६॥

gaṇeśa sarvavighneśa vighnān saṃhara saṃhara |kāśīprāptiryathā bhūyāttathā kuru mamānagha || 96||

काशीप्राप्त्यर्थमुद्युक्तं यथा मां विघ्नराशयः ।न बाधन्ते सदा सम्यक् तथा कुरु गणेश्वर ॥ ९६॥

kāśīprāptyarthamudyuktaṃ yathā māṃ vighnarāśayaḥ |na bādhante sadā samyak tathā kuru gaṇeśvara || 96||

इति सम्प्रार्थितस्तेन विघ्नेशो विघ्ननाशकः ।स प्रीतो वरदस्तस्मै ददौ वरमनुत्तमम् ॥ ९७॥

iti samprārthitastena vighneśo vighnanāśakaḥ |sa prīto varadastasmai dadau varamanuttamam || 97||

ततस्तदाज्ञया शैवः सन्तुष्टः सम्प्रणम्य च ।काशीं शिवपुरीं रम्यामाजगाम महामतिः ॥ ९८॥

tatastadājñayā śaivaḥ santuṣṭaḥ sampraṇamya ca |kāśīṃ śivapurīṃ ramyāmājagāma mahāmatiḥ || 98||

ततः काशीरक्षकांश्च सम्प्रसाद्य द्विजोत्तमः ।स्नात्वा च शिवगङ्गायामाग्नीध्रेशं प्रणम्य च ॥ ९९॥

tataḥ kāśīrakṣakāṃśca samprasādya dvijottamaḥ |snātvā ca śivagaṅgāyāmāgnīdhreśaṃ praṇamya ca || 99||

वक्रतुण्डेशमभ्यर्च्य नत्वा श्रीकालभैरवम् ।वीरेशमभिवाद्यैव नत्वा पशुपतीश्वरम् ॥ १००॥

vakratuṇḍeśamabhyarcya natvā śrīkālabhairavam |vīreśamabhivādyaiva natvā paśupatīśvaram || 100||

दण्डपाणिप्रसादेन ज्ञानवापीजलेऽमले ।स्नात्वा ज्ञानेशमभ्यर्च्यं नत्वा पञ्चविनायकान् ॥ १०१॥

daṇḍapāṇiprasādena jñānavāpījale'male |snātvā jñāneśamabhyarcyaṃ natvā pañcavināyakān || 101||

ढुण्ठिराजं समभ्यर्च्य सर्वविघ्नौघनाशकम् ।ततो विवेश धर्मात्मा महाशैवाश्रयं सदा ॥ १०२॥

ḍhuṇṭhirājaṃ samabhyarcya sarvavighnaughanāśakam |tato viveśa dharmātmā mahāśaivāśrayaṃ sadā || 102||

॥ इति शिवरहस्यान्तर्गते हिमवान्प्रोक्तं काशीप्रविष्टुं काश्मीरगणनायकादिपूजनमहत्त्ववर्णनं सम्पूर्णम् ॥॥ श्रीशिवरहस्यम् । उग्राख्यः सप्तमांशः । अध्यायः ७ । ७९१०२॥

|| iti śivarahasyāntargate himavānproktaṃ kāśīpraviṣṭuṃ kāśmīragaṇanāyakādipūjanamahattvavarṇanaṃ sampūrṇam |||| śrīśivarahasyam | ugrākhyaḥ saptamāṃśaḥ | adhyāyaḥ 7 | 79102||

– ॥ श्रीशिवरहस्यम् ।उग्राख्यः सप्तमांशः ।अध्यायः ७ ।७९-१०२॥

– || śrīśivarahasyam |ugrākhyaḥ saptamāṃśaḥ |adhyāyaḥ 7 | 79-102||