गणपतिस्तोत्रम् ४ Ganapati Stotram 4

जेतुं यस्त्रिपुरं हरेण हरिणा व्याजाद्वलिं बध्नतास्त्रष्टुं वारिभवोद्भवेन भुवनं शेषेण धर्तुं धरम् ।पार्वत्या महिषासुरप्रमथने सिद्धाधिपैः सिद्धयेध्यातः पञ्चशरेण विश्वजितये पायात् स नागाननः ॥ १॥

jetuṃ yastripuraṃ hareṇa hariṇā vyājādvaliṃ badhnatāstraṣṭuṃ vāribhavodbhavena bhuvanaṃ śeṣeṇa dhartuṃ dharam |pārvatyā mahiṣāsurapramathane siddhādhipaiḥ siddhayedhyātaḥ pañcaśareṇa viśvajitaye pāyāt sa nāgānanaḥ || 1||

विघ्नध्वान्तनिवारणैकतरणिर्विघ्नाटवीहव्यवाड्विघ्नव्यालकुलाभिमानगरुडो विघ्नेभपञ्चाननः ।विघ्नोत्तुङ्गगिरिप्रभेदनपविर्विघ्नाम्बुधेर्वाडवोविघ्नाघौधघनप्रचण्डपवनो विघ्नेश्वरः पातु नः ॥ २॥

vighnadhvāntanivāraṇaikataraṇirvighnāṭavīhavyavāḍvighnavyālakulābhimānagaruḍo vighnebhapañcānanaḥ |vighnottuṅgagiriprabhedanapavirvighnāmbudhervāḍavovighnāghaudhaghanapracaṇḍapavano vighneśvaraḥ pātu naḥ || 2||

खर्वं स्थूलतनुं गजेन्द्रवदनं लम्बोदरं सुन्दरंप्रस्यन्दन्मदगन्धलुब्धमधुपव्यालोलगण्डस्थलम् ।दन्ताघातविदारितारिरुधिरैः सिन्दूरशोभाकरवन्दे शैलसुतासुतं गणपतिं सिद्धिप्रदं कामदम् ॥ ३॥

kharvaṃ sthūlatanuṃ gajendravadanaṃ lambodaraṃ sundaraṃprasyandanmadagandhalubdhamadhupavyālolagaṇḍasthalam |dantāghātavidāritārirudhiraiḥ sindūraśobhākaravande śailasutāsutaṃ gaṇapatiṃ siddhipradaṃ kāmadam || 3||

गजाननाय महसे प्रत्यूहतिमिरच्छिदे ।अपारकरुणापूरतरङ्गितदृशे नमः ॥ ४॥

gajānanāya mahase pratyūhatimiracchide |apārakaruṇāpūrataraṅgitadṛśe namaḥ || 4||

अगजाननपद्मार्कं गजाननमहर्निशम् ।अनेकदन्तं भक्तानामेकदन्तमुपास्महे ॥ ५॥

agajānanapadmārkaṃ gajānanamaharniśam |anekadantaṃ bhaktānāmekadantamupāsmahe || 5||

श्वेताङ्गं श्वेतवस्त्रं सितकुसुमगणैः पूजितं श्वेतगन्धैःक्षीराब्धौ रत्नदीपैः सुरनरतिलकं रत्नसिंहासनस्थम् ।दोर्भिः पाशाङ्कुशाब्जाभयवरमनसं चन्द्रमौलिं त्रिनेत्रंध्यायेच्छान्त्यर्थमीशं गणपतिममलं श्रीसमेतं प्रसन्नम् ॥ ६॥

śvetāṅgaṃ śvetavastraṃ sitakusumagaṇaiḥ pūjitaṃ śvetagandhaiḥkṣīrābdhau ratnadīpaiḥ suranaratilakaṃ ratnasiṃhāsanastham |dorbhiḥ pāśāṅkuśābjābhayavaramanasaṃ candramauliṃ trinetraṃdhyāyecchāntyarthamīśaṃ gaṇapatimamalaṃ śrīsametaṃ prasannam || 6||

आवाहये तं गणराजदेवं रक्तोत्पलाभासमशेषवन्द्यम् ।विघ्नान्तकं विघ्नहरं गणेशं भजामि रौद्रं सहितं च सिद्।ह्ध्या ॥ ७॥

āvāhaye taṃ gaṇarājadevaṃ raktotpalābhāsamaśeṣavandyam |vighnāntakaṃ vighnaharaṃ gaṇeśaṃ bhajāmi raudraṃ sahitaṃ ca sid|hdhyā || 7||

यं ब्रह्म वेदान्तविदो वदन्ति परं प्रधानं पुरुषं तथाऽन्ये ।विश्वोद्गतेः कारणमीश्वरं वा तस्मै नमो विजविनाशनाय ॥ ८॥

yaṃ brahma vedāntavido vadanti paraṃ pradhānaṃ puruṣaṃ tathā'nye |viśvodgateḥ kāraṇamīśvaraṃ vā tasmai namo vijavināśanāya || 8||

विघ्नेश वीर्याणि विचित्रकाणि वन्दीजनैर्मागधकैः स्मृतानि ।श्रुत्वा समुत्तिष्ठ गजानन त्वं ब्राह्मे जगन्मङ्गलकं कुरुष्व ॥ ९॥

vighneśa vīryāṇi vicitrakāṇi vandījanairmāgadhakaiḥ smṛtāni |śrutvā samuttiṣṭha gajānana tvaṃ brāhme jaganmaṅgalakaṃ kuruṣva || 9||

गणेश हेरम्ब गजाननेति महोदर स्वानुभवप्रकाशिन् ।वरिष्ठ सिद्धिप्रिय बुद्धिनाथ वदन्त एवं त्यजत प्रभीतीः ॥ १०॥

gaṇeśa heramba gajānaneti mahodara svānubhavaprakāśin |variṣṭha siddhipriya buddhinātha vadanta evaṃ tyajata prabhītīḥ || 10||

अनेकविघ्नान्तक वक्रतुण्ड स्वसंज्ञवासिंश्च चतुर्भुजेति ।कवीश देवान्तकनाशकारिन् वदन्त एवं त्यजत प्रभीतीः ॥ ११॥

anekavighnāntaka vakratuṇḍa svasaṃjñavāsiṃśca caturbhujeti |kavīśa devāntakanāśakārin vadanta evaṃ tyajata prabhītīḥ || 11||

अनन्तचिद्रूपमयं गणेशं ह्यभेदभेदादिविहीनमाद्यम् ।हृदि प्रकाशस्य धरं स्वधीस्थं तमेकदन्तं शरणं व्रजामः ॥ १२॥

anantacidrūpamayaṃ gaṇeśaṃ hyabhedabhedādivihīnamādyam |hṛdi prakāśasya dharaṃ svadhīsthaṃ tamekadantaṃ śaraṇaṃ vrajāmaḥ || 12||

विश्वादिभूतं हृदि योगिनां वै प्रत्यक्षरूपेण विभान्तमेकम् ।सदा निरालम्बसमाधिगम्यं तमेकदन्तं शरणं व्रजामः ॥ १३॥

viśvādibhūtaṃ hṛdi yogināṃ vai pratyakṣarūpeṇa vibhāntamekam |sadā nirālambasamādhigamyaṃ tamekadantaṃ śaraṇaṃ vrajāmaḥ || 13||

यदीयवीर्येण समर्थभूता माया तया संरचितं च विश्वम् ।नागात्मकं ह्यात्मतया प्रतीतं तमेकदन्तं शरणं व्रजामः ॥ १४॥

yadīyavīryeṇa samarthabhūtā māyā tayā saṃracitaṃ ca viśvam |nāgātmakaṃ hyātmatayā pratītaṃ tamekadantaṃ śaraṇaṃ vrajāmaḥ || 14||

सर्वान्तरे संस्थितमेकमूढं यदाज्ञया सर्वमिदं विभाति ।अनन्तरूपं हृदि बोधकं वै तमेकदन्तं शरणं व्रजामः ॥ १५॥

sarvāntare saṃsthitamekamūḍhaṃ yadājñayā sarvamidaṃ vibhāti |anantarūpaṃ hṛdi bodhakaṃ vai tamekadantaṃ śaraṇaṃ vrajāmaḥ || 15||

यं योगिनो योगबलेन साध्यं कुर्वन्ति तं कः स्तवनेन नौति ।अतः प्रणामेन सुसिद्धिदोऽस्तु तमेकदन्तं शरणं व्रजामः ॥ १६॥

yaṃ yogino yogabalena sādhyaṃ kurvanti taṃ kaḥ stavanena nauti |ataḥ praṇāmena susiddhido'stu tamekadantaṃ śaraṇaṃ vrajāmaḥ || 16||

देवेन्द्रमौलिमन्दारमकरन्दकणारुणाः ।विघ्नान् हरन्तु हेरम्बचरणाम्बुजरेणवः ॥ १७॥

devendramaulimandāramakarandakaṇāruṇāḥ |vighnān harantu herambacaraṇāmbujareṇavaḥ || 17||

एकदन्तं महाकायं लम्बोदरगजाननम् ।विघ्ननाशकरं देवं हेरम्बं प्रणमाम्यहम् ॥ १८॥

ekadantaṃ mahākāyaṃ lambodaragajānanam |vighnanāśakaraṃ devaṃ herambaṃ praṇamāmyaham || 18||

यदक्षरं पदं भ्रष्टं मात्राहीनं च यद्भवेत् ।तत्सर्वं क्षम्यतां देव प्रसीद परमेश्वर ॥ १९॥

yadakṣaraṃ padaṃ bhraṣṭaṃ mātrāhīnaṃ ca yadbhavet |tatsarvaṃ kṣamyatāṃ deva prasīda parameśvara || 19||

इति श्रीगणपतिस्तोत्रं सम्पूर्णम् ।

iti śrīgaṇapatistotraṃ sampūrṇam |