नवदुर्गास्तवः Shri Navadurga Stavah

कार्येण याऽनेकविधां श्रयन्ती, निवारयन्ती स्मरतां विपत्तीः ।अपूर्वकारुण्य रसार्द्र चित्ता, सा शैलपुत्री भवतु प्रसन्ना ॥ १॥

kāryeṇa yā'nekavidhāṃ śrayantī, nivārayantī smaratāṃ vipattīḥ |apūrvakāruṇya rasārdra cittā, sā śailaputrī bhavatu prasannā || 1||

स्वर्गोऽपवर्गो नरकोऽपि यत्र, विभाव्यते दृक्कलया विविक्तम् ।या चाऽद्वितीयाऽपि शिवद्वितीया, सा ब्रह्मचारिण्यवताद् भवेभ्यः ॥ २॥

svargo'pavargo narako'pi yatra, vibhāvyate dṛkkalayā viviktam |yā cā'dvitīyā'pi śivadvitīyā, sā brahmacāriṇyavatād bhavebhyaḥ || 2||

पादौ धरित्री कटिरन्तरिक्षं, यस्याः शिरो द्यौरुदिताऽऽगमेषु ।अन्यद्यथा योगमयोग दूरा, सा चन्द्रघण्टा घटयत्वभीष्टम् ॥ ३॥

pādau dharitrī kaṭirantarikṣaṃ, yasyāḥ śiro dyauruditā''gameṣu |anyadyathā yogamayoga dūrā, sā candraghaṇṭā ghaṭayatvabhīṣṭam || 3||

स्वराड् विराड् संसृतिराड् अखण्डब्रह्माण्डभाण्डाकलनैकवीरा ।सा पापविध्वंसनसद्म कूष्माण्डाऽव्याद् अपायादयदानशौण्डा ॥ ४॥

svarāḍ virāḍ saṃsṛtirāḍ akhaṇḍabrahmāṇḍabhāṇḍākalanaikavīrā |sā pāpavidhvaṃsanasadma kūṣmāṇḍā'vyād apāyādayadānaśauṇḍā || 4||

द्वैमातुरत्वे द्विरदाननस्य, षाण्मातुरत्वे च कुमारकस्य ।एकैव माता परमा मता या, सा स्कन्दमाता मुदमादधातु ॥ ५॥

dvaimāturatve dviradānanasya, ṣāṇmāturatve ca kumārakasya |ekaiva mātā paramā matā yā, sā skandamātā mudamādadhātu || 5||

कतस्य गोत्रादथवाऽपरस्मात्, किं वेतरस्मात् कथमेकिकैव ।जातेति माताह्वयतां इता या, कात्यायनी सा ममतां हिनस्तु ॥ ६॥

katasya gotrādathavā'parasmāt, kiṃ vetarasmāt kathamekikaiva |jāteti mātāhvayatāṃ itā yā, kātyāyanī sā mamatāṃ hinastu || 6||

कालोऽपि विश्रान्तिमुपैति यस्यां, काऽन्या कथा भौतिकविग्रहाणाम् ।प्रपञ्च पञ्चीकरणैकधात्री, सा कालरात्री निहताद् भयानि ॥ ७॥

kālo'pi viśrāntimupaiti yasyāṃ, kā'nyā kathā bhautikavigrahāṇām |prapañca pañcīkaraṇaikadhātrī, sā kālarātrī nihatād bhayāni || 7||

कालीकुलं श्रीकुलमप्यपारं, कृष्णाद्युपासा प्रवणं यतश्च ।साऽनन्तविद्या विततावदाना, गौरी विदध्यादखिलान् पुमर्थान् ॥ ८॥

kālīkulaṃ śrīkulamapyapāraṃ, kṛṣṇādyupāsā pravaṇaṃ yataśca |sā'nantavidyā vitatāvadānā, gaurī vidadhyādakhilān pumarthān || 8||

गृणन्ति यां वेदपुराणसाङ्ख्य, योगागमादेव महर्षयश्च ।पुत्रान् प्रपौत्रान् सुधियः श्रियश्च, सा सिद्धिदा सिद्धिकरी ददातु ॥ ९॥

gṛṇanti yāṃ vedapurāṇasāṅkhya, yogāgamādeva maharṣayaśca |putrān prapautrān sudhiyaḥ śriyaśca, sā siddhidā siddhikarī dadātu || 9||

या चण्डी मधुकैटभप्रमथिनी या माहिषोन्मूलिनी,या धूम्रेक्षेणचण्डमुण्ड दलिनी या रक्तबीजाशिनी ।शक्तिः शुम्भनिशुम्भदैत्यदलिनी या सिद्धि लक्ष्मीः परासा दुर्गा नवकोटि मूर्तिसहिताऽस्मान् पातु सर्वेश्वरी ॥ १०॥

yā caṇḍī madhukaiṭabhapramathinī yā māhiṣonmūlinī,yā dhūmrekṣeṇacaṇḍamuṇḍa dalinī yā raktabījāśinī |śaktiḥ śumbhaniśumbhadaityadalinī yā siddhi lakṣmīḥ parāsā durgā navakoṭi mūrtisahitā'smān pātu sarveśvarī || 10||

इति श्रीनवदुर्गास्तवः सम्पूर्णः ।

iti śrīnavadurgāstavaḥ sampūrṇaḥ |