दुर्गास्तोत्रम् ०६ Durga Stotram (2)

दुर्गसंतारिणीं दुर्गा तदा स शरणं गतः ।महेन्द्रोपेन्द्रभगिनीं दिव्यैस्तुष्टाव नामभिः ॥ १॥

durgasaṃtāriṇīṃ durgā tadā sa śaraṇaṃ gataḥ |mahendropendrabhaginīṃ divyaistuṣṭāva nāmabhiḥ || 1||

नौमि कंसासुरैश्वर्यतमःपटलचन्द्रिकाम् ।पूर्णचन्द्राननां देवीं दुष्टसंमोहनक्षमाम् ॥ २॥

naumi kaṃsāsuraiśvaryatamaḥpaṭalacandrikām |pūrṇacandrānanāṃ devīṃ duṣṭasaṃmohanakṣamām || 2||

दीप्तशूलप्रभाजालभीषणां ललिताकृतिम् ।वेल्लद्विषोल्बणव्यालामिव चन्दनवल्लरीम् ॥ ३॥

dīptaśūlaprabhājālabhīṣaṇāṃ lalitākṛtim |velladviṣolbaṇavyālāmiva candanavallarīm || 3||

महिषन्यस्तचरणां श्यामां हारविभूषिताम् ।सकालियहृदां फेनहासिनी यमुनामिव ॥ ४॥

mahiṣanyastacaraṇāṃ śyāmāṃ hāravibhūṣitām |sakāliyahṛdāṃ phenahāsinī yamunāmiva || 4||

पाणिसंसक्तभुजगाभोगनीलासिवल्लरीम् ।एकपद्मोदरोद्गच्छदलिमालामिवाजिनीम् ॥ ५॥

pāṇisaṃsaktabhujagābhoganīlāsivallarīm |ekapadmodarodgacchadalimālāmivājinīm || 5||

मयूरपक्षाभरणैः शबलैर्मेचकप्रभैः।सेवितां प्रावृषमिव स्फुरदिन्द्रायुधैर्घनैः ॥ ६॥

mayūrapakṣābharaṇaiḥ śabalairmecakaprabhaiḥ|sevitāṃ prāvṛṣamiva sphuradindrāyudhairghanaiḥ || 6||

करालकेशविस्फारशुद्धसंचारलालसाम् ।हिमाद्रिशिखरोद्भूतां कालागुरुलतामिव ॥ ७॥

karālakeśavisphāraśuddhasaṃcāralālasām |himādriśikharodbhūtāṃ kālāgurulatāmiva || 7||

कवीन्द्रमानसावासराजहंसीं सरस्वतीम् ।विचित्रमधुरोदारशब्दां चारुपदक्रमाम् ॥ ८॥

kavīndramānasāvāsarājahaṃsīṃ sarasvatīm |vicitramadhurodāraśabdāṃ cārupadakramām || 8||

संसारमरुसंतापनिर्वापणसमुद्यताम् ।संवित्समरसानन्दसुधास्यन्दतरङ्गिणीम् ॥ ९॥

saṃsāramarusaṃtāpanirvāpaṇasamudyatām |saṃvitsamarasānandasudhāsyandataraṅgiṇīm || 9||

रणसंरम्भसंभारगम्भीरारम्भविभ्रमाम् ।निशुम्भशुम्भावष्टम्भभीतसंभावितामराम् ॥ १०॥

raṇasaṃrambhasaṃbhāragambhīrārambhavibhramām |niśumbhaśumbhāvaṣṭambhabhītasaṃbhāvitāmarām || 10||

संध्यामवन्ध्यां विन्ध्याद्रिवासिनीं वासवानुजाम् ।शशिखण्डशिखण्डाङ्कां मुण्डमण्डलमण्डिताम् ॥ ११॥

saṃdhyāmavandhyāṃ vindhyādrivāsinīṃ vāsavānujām |śaśikhaṇḍaśikhaṇḍāṅkāṃ muṇḍamaṇḍalamaṇḍitām || 11||

फुल्लोत्पलवनश्यामां फुल्लोत्पलविलोचनाम् ।गम्भीरनाभिकुहरामिभकुम्भनिभस्तनीम् ॥ १२॥

phullotpalavanaśyāmāṃ phullotpalavilocanām |gambhīranābhikuharāmibhakumbhanibhastanīm || 12||

धन्यां कात्यायनी चण्डां चामुण्डां खण्डिताहिताम् ।शर्वाणी शर्वरीं शर्वा सिद्धगन्धर्वसेविताम् ॥ १३॥

dhanyāṃ kātyāyanī caṇḍāṃ cāmuṇḍāṃ khaṇḍitāhitām |śarvāṇī śarvarīṃ śarvā siddhagandharvasevitām || 13||

कालसंकर्षिणीं घोरां त्रिजगरामलालसाम् ।कमलासनकङ्कालमालाकलितशेखराम् ॥ १४॥

kālasaṃkarṣiṇīṃ ghorāṃ trijagarāmalālasām |kamalāsanakaṅkālamālākalitaśekharām || 14||

शिवां शिवप्रदां शान्तां शिवकान्तां शताननाम् ।त्रिनेत्रां सौम्यवदनां मदनारिमदप्रभाम् ॥ १५॥

śivāṃ śivapradāṃ śāntāṃ śivakāntāṃ śatānanām |trinetrāṃ saumyavadanāṃ madanārimadaprabhām || 15||

स्फीतफेनसुधाम्भोधिदुकूलां रत्नमेखलाम् ।कराकलितहेमाद्रिमातुलङ्गांशुपिङ्गलाम् ॥ १६॥

sphītaphenasudhāmbhodhidukūlāṃ ratnamekhalām |karākalitahemādrimātulaṅgāṃśupiṅgalām || 16||

अक्षसूत्रीकृतावृत्तनक्षत्रमणिमालिकाम् ।पाणिसक्तसुधाम्भोधिपूर्णब्रह्माण्डकपराम् ॥ १७॥

akṣasūtrīkṛtāvṛttanakṣatramaṇimālikām |pāṇisaktasudhāmbhodhipūrṇabrahmāṇḍakaparām || 17||

संवित्प्रकाशविषदव्याकोशाकाशदर्पणाम् ।शेषादिकुलभोगीन्द्रहारकेयूरकङ्कणाम् ॥ १८॥

saṃvitprakāśaviṣadavyākośākāśadarpaṇām |śeṣādikulabhogīndrahārakeyūrakaṅkaṇām || 18||

तारकामौक्तिकस्मेरशशिमार्तण्डमण्डलाम् ।त्रिशृङ्गरत्नशैलेन्द्रविटङ्कमुकुटोज्ज्वलाम् ॥ १९॥

tārakāmauktikasmeraśaśimārtaṇḍamaṇḍalām |triśṛṅgaratnaśailendraviṭaṅkamukuṭojjvalām || 19||

कल्लोललोलखःसिन्धुधवलोष्णीषभूषिताम् ।सेन्द्रायुधक्षयाम्भोदमायूरच्छत्रविभ्रमाम् ॥ २०॥

kallolalolakhaḥsindhudhavaloṣṇīṣabhūṣitām |sendrāyudhakṣayāmbhodamāyūracchatravibhramām || 20||

कन्दाग्रकुण्डलितनाभिमृणालदण्डहृत्पुण्डरीकनिबिडामृतपानशौण्डाम् ।भृङ्गाङ्गनामिव सदोदितनादशक्तिसंवेद्यवेद्यजननी जननीं प्रपद्ये ॥ २१॥

kandāgrakuṇḍalitanābhimṛṇāladaṇḍahṛtpuṇḍarīkanibiḍāmṛtapānaśauṇḍām |bhṛṅgāṅganāmiva sadoditanādaśaktisaṃvedyavedyajananī jananīṃ prapadye || 21||

इति भारतमञ्जर्यां क्षेमेन्द्रविरचितं दुर्गास्तोत्रं सम्पूर्णम् ।हरिवंश बाणयुद्धम् श्लोकानि १३१३१३३३

iti bhāratamañjaryāṃ kṣemendraviracitaṃ durgāstotraṃ sampūrṇam |harivaṃśa bāṇayuddham ślokāni 13131333