दुर्गाकवचम् २ Brahmandamohanakhyam Durgakavacham

श्रीगणेशाय नमः ।नारद उवाच ।भगवन्सर्वधर्मज्ञ सर्वज्ञानविशारद ।ब्रह्माण्डमोहनं नाम प्रकृते कवचं वद ॥ १॥

śrīgaṇeśāya namaḥ |nārada uvāca |bhagavansarvadharmajña sarvajñānaviśārada |brahmāṇḍamohanaṃ nāma prakṛte kavacaṃ vada || 1||

नारायण उवाच ।शृणु वक्ष्यामि हे वत्स कवचं च सुदुर्लभम् ।श्रीकृष्णेनैव कथितं कृपया ब्रह्मणे पुरा ॥ २॥

nārāyaṇa uvāca |śṛṇu vakṣyāmi he vatsa kavacaṃ ca sudurlabham |śrīkṛṣṇenaiva kathitaṃ kṛpayā brahmaṇe purā || 2||

ब्रह्मणा कथितं पूर्वं धर्माय जाह्नवीतटे ।धर्मेण दत्तं मह्यं च कृपया पुष्करे पुरा ॥ ३॥

brahmaṇā kathitaṃ pūrvaṃ dharmāya jāhnavītaṭe |dharmeṇa dattaṃ mahyaṃ ca kṛpayā puṣkare purā || 3||

त्रिपुरारिश्च यद्धृत्वा जघान त्रिपुरं पुरा ।ममोच ब्रह्मा यद्धृत्वा मधुकैटभयोर्भयात् ॥ ४॥

tripurāriśca yaddhṛtvā jaghāna tripuraṃ purā |mamoca brahmā yaddhṛtvā madhukaiṭabhayorbhayāt || 4||

सञ्जहार रक्तबीजं यद्धृत्वा भद्रकालिका ।यद्धृत्वा हि महेन्द्रश्च सम्प्राप कमलालयाम् ॥ ५॥

sañjahāra raktabījaṃ yaddhṛtvā bhadrakālikā |yaddhṛtvā hi mahendraśca samprāpa kamalālayām || 5||

यद्धृत्वा च महायोद्धा बाणः शत्रुभयङ्करः ।यद्धृत्वा शिवतुल्यश्च दुर्वासा ज्ञानिनां वरः ॥ ६॥

yaddhṛtvā ca mahāyoddhā bāṇaḥ śatrubhayaṅkaraḥ |yaddhṛtvā śivatulyaśca durvāsā jñānināṃ varaḥ || 6||

ॐ दुर्गेति चतुर्थ्यन्तः स्वाहान्तो मे शिरोऽवतु ।मन्त्रः षडक्षरोऽयं च भक्तानां कल्पपादपः ॥ ७॥

oṃ durgeti caturthyantaḥ svāhānto me śiro'vatu |mantraḥ ṣaḍakṣaro'yaṃ ca bhaktānāṃ kalpapādapaḥ || 7||

विचारो नास्ति वेदे च ग्रहणेऽस्य मनोर्मुने ।मन्त्रग्रहणमात्रेण विष्णुतुल्यो भवेन्नरः ॥ ८॥

vicāro nāsti vede ca grahaṇe'sya manormune |mantragrahaṇamātreṇa viṣṇutulyo bhavennaraḥ || 8||

मम वक्त्रं सदा पातु ॐ दुर्गायै नमोऽन्तकः ।ॐ दुर्गे इति कण्ठं तु मन्त्रः पातु सदा मम ॥ ९॥

mama vaktraṃ sadā pātu oṃ durgāyai namo'ntakaḥ |oṃ durge iti kaṇṭhaṃ tu mantraḥ pātu sadā mama || 9||

ॐ ह्रीं श्रीमिति मन्त्रोऽयं स्कन्धं पातु निरन्तरम् ।ह्रीं श्रीं क्लीमिति पृष्ठं च पातु मे सर्वतः सदा ॥ १०॥

oṃ hrīṃ śrīmiti mantro'yaṃ skandhaṃ pātu nirantaram |hrīṃ śrīṃ klīmiti pṛṣṭhaṃ ca pātu me sarvataḥ sadā || 10||

ह्रीं मे वक्षस्थले पातु हं सं श्रीमिति सन्ततम् ।ऐं श्रीं ह्रीं पातु सर्वाङ्गं स्वप्ने जागरणे सदा ॥ ११॥

hrīṃ me vakṣasthale pātu haṃ saṃ śrīmiti santatam |aiṃ śrīṃ hrīṃ pātu sarvāṅgaṃ svapne jāgaraṇe sadā || 11||

प्राच्यां मां पातु प्रकृतिः पातु वह्नौ च चण्डिका ।दक्षिणे भद्रकाली च नैरृत्यां च महेश्वरी ॥ १२॥

prācyāṃ māṃ pātu prakṛtiḥ pātu vahnau ca caṇḍikā |dakṣiṇe bhadrakālī ca nairṛtyāṃ ca maheśvarī || 12||

वारुण्यां पातु वाराही वायव्यां सर्वमङ्गला ।उत्तरे वैष्णवी पातु तथैशान्यां शिवप्रिया ॥ १३॥

vāruṇyāṃ pātu vārāhī vāyavyāṃ sarvamaṅgalā |uttare vaiṣṇavī pātu tathaiśānyāṃ śivapriyā || 13||

जले स्थले चान्तरिक्षे पातु मां जगदम्बिका ।इति ते कथितं वत्स कवचं च सुदुर्लभम् ॥ १४॥

jale sthale cāntarikṣe pātu māṃ jagadambikā |iti te kathitaṃ vatsa kavacaṃ ca sudurlabham || 14||

यस्मै कस्मै न दातव्यं प्रवक्तव्यं न कस्यचित् ।गुरुमभ्यर्च्य विधिवद्वस्त्रालङ्कारचन्दनैः ॥ १५॥

yasmai kasmai na dātavyaṃ pravaktavyaṃ na kasyacit |gurumabhyarcya vidhivadvastrālaṅkāracandanaiḥ || 15||

कवचं धारयेद्यस्तु सोऽपि विष्णुर्न संशयः ।स्नाने च सर्वतीर्थानां पृथिव्याश्च प्रदक्षिणे ॥ १६॥

kavacaṃ dhārayedyastu so'pi viṣṇurna saṃśayaḥ |snāne ca sarvatīrthānāṃ pṛthivyāśca pradakṣiṇe || 16||

यत्फलं लभते लोकस्तदेतद्धारणे मुने ।पञ्चलक्षजपेनैव सिद्धमेतद्भवेद्ध्रुवम् ॥ १७॥

yatphalaṃ labhate lokastadetaddhāraṇe mune |pañcalakṣajapenaiva siddhametadbhaveddhruvam || 17||

लोके च सिद्धकवचो नावसीदति सङ्कटे ।न तस्य मृत्युर्भवति जले वह्नौ विषे ज्वरे ॥ १८॥

loke ca siddhakavaco nāvasīdati saṅkaṭe |na tasya mṛtyurbhavati jale vahnau viṣe jvare || 18||

जीवन्मुक्तो भवेत्सोऽपि सर्वसिद्धीश्वरीश्वरि ।यदि स्यात्सिद्धकवचो विष्णुतुल्यो भवेद्ध्रुवम् ॥ १९॥

jīvanmukto bhavetso'pi sarvasiddhīśvarīśvari |yadi syātsiddhakavaco viṣṇutulyo bhaveddhruvam || 19||

॥ इति श्रीब्रह्मवैवर्ते प्रकृतिखण्डान्तर्गतदुर्गाकवचं सम्पूर्णम् ॥

|| iti śrībrahmavaivarte prakṛtikhaṇḍāntargatadurgākavacaṃ sampūrṇam ||