सरस्वतीध्यानम् Shrisarasvatidhyanam

वाणीं पूर्णनिशाकरोज्ज्वलमुखीं कर्पूरकुन्दप्रभांचन्द्रार्काङ्कितमस्तकां निजकरैः सम्बिभ्रतीमादरात् ।वीणामक्षगुणां सुधाढ्यकलशं विद्यां च तुङ्गस्तनींदिव्यैराभरणैर्विभूषिततनुं हंसाधिरूढां भजे ॥ १॥

vāṇīṃ pūrṇaniśākarojjvalamukhīṃ karpūrakundaprabhāṃcandrārkāṅkitamastakāṃ nijakaraiḥ sambibhratīmādarāt |vīṇāmakṣaguṇāṃ sudhāḍhyakalaśaṃ vidyāṃ ca tuṅgastanīṃdivyairābharaṇairvibhūṣitatanuṃ haṃsādhirūḍhāṃ bhaje || 1||

आसीना कमले करैर्जपवटीं पद्मद्वयं पुस्तकंबिभ्राणा तरुणेन्दुबद्धमकुटा मुक्तेन्दुकुन्दप्रभा ।भालोन्मीलितलोचना कुचभराक्रान्ता भवद्भूतये ।भूयाद्वागधिदेवता मुनिगणैरासेव्यमानाऽनिशम् ॥ २॥

āsīnā kamale karairjapavaṭīṃ padmadvayaṃ pustakaṃbibhrāṇā taruṇendubaddhamakuṭā muktendukundaprabhā |bhālonmīlitalocanā kucabharākrāntā bhavadbhūtaye |bhūyādvāgadhidevatā munigaṇairāsevyamānā'niśam || 2||

या कुन्देन्दुतुषारहारधवला या शुभ्रवस्त्रावृताया वीणावरदण्डमण्डितकरा या श्वेतपद्मासना ।या ब्रह्माच्युतशङ्करप्रभृतिभिर्देवैस्सदा पूजितासा मां पातु सरस्वती भगवती निश्शेषजाड्यापहा ॥ ३॥

yā kundendutuṣārahāradhavalā yā śubhravastrāvṛtāyā vīṇāvaradaṇḍamaṇḍitakarā yā śvetapadmāsanā |yā brahmācyutaśaṅkaraprabhṛtibhirdevaissadā pūjitāsā māṃ pātu sarasvatī bhagavatī niśśeṣajāḍyāpahā || 3||

दोर्भिर्युक्ता चतुर्भिः स्फटिकमणिनिभैरक्षमालां दधानाहस्तेनैकेन पद्मं सितमपि च शुकं पुस्तकं चापरेण ।भासा कुन्देन्दुशङ्खस्फटिकमणिनिभा भासमानाऽसमाना ।सा मे वाग्देवतेयं निवसतु वदने सर्वदा सुप्रसन्ना ॥ ४॥

dorbhiryuktā caturbhiḥ sphaṭikamaṇinibhairakṣamālāṃ dadhānāhastenaikena padmaṃ sitamapi ca śukaṃ pustakaṃ cāpareṇa |bhāsā kundenduśaṅkhasphaṭikamaṇinibhā bhāsamānā'samānā |sā me vāgdevateyaṃ nivasatu vadane sarvadā suprasannā || 4||

सुरासुरासेवितपादपङ्कजा करे विराजत्कमनीयपुस्तकाविरिञ्चिपत्नी कमलासनस्थिता सरस्वती नृत्यतु वाचि मे सदा ॥ ५॥

surāsurāsevitapādapaṅkajā kare virājatkamanīyapustakāviriñcipatnī kamalāsanasthitā sarasvatī nṛtyatu vāci me sadā || 5||

सरस्वती सरसिजकेसरप्रभा तपस्विनी सितकमलासनप्रिया ।घनस्तनी कमलविलोललोचना मनस्विनी भवतु वरप्रसादिनी ॥ ६॥

sarasvatī sarasijakesaraprabhā tapasvinī sitakamalāsanapriyā |ghanastanī kamalavilolalocanā manasvinī bhavatu varaprasādinī || 6||

सरस्वति नमस्तुभ्यं वरदे कामरूपिणि ।विद्यारम्भं करिष्यामि सिद्धिर्भवतु मे सदा ॥ ७॥

sarasvati namastubhyaṃ varade kāmarūpiṇi |vidyārambhaṃ kariṣyāmi siddhirbhavatu me sadā || 7||

श्रीमच्चन्दनचर्चितोज्ज्वलवपुः शुक्लाम्बरा मल्लिकामालालालितकुन्तला प्रविलसन्मुक्तावलीशोभना ॥सर्वज्ञाननिधानपुस्तकधरा रुद्राक्षमालाङ्किता ।वाग्देवी वदनाम्बुजे वसतु मे त्रैलोक्यमाता शुभा ॥ ८॥

śrīmaccandanacarcitojjvalavapuḥ śuklāmbarā mallikāmālālālitakuntalā pravilasanmuktāvalīśobhanā ||sarvajñānanidhānapustakadharā rudrākṣamālāṅkitā |vāgdevī vadanāmbuje vasatu me trailokyamātā śubhā || 8||

॥ श्रीरस्तु ॥इति श्रीसरस्वतीध्यानम् ॥

|| śrīrastu ||iti śrīsarasvatīdhyānam ||