श्रीपादस्तवः Shri Pada Stava

भूमेरामोदनाथ प्रदिशति निभृतस्मेरमीक्षाविशेषंशेषोपान्तस्थितायाः कमितरि भगवत्यन्तरुज्जृम्भमाणंकोपं सापत्न्यलभ्यं विगमयितुमुपादाय हस्तैश्चतुर्भिर्नीन्तं तेन स्वमूर्ध्नि प्रदिशतु कुशलं पादपद्मं रमायाः ॥ १॥

bhūmerāmodanātha pradiśati nibhṛtasmeramīkṣāviśeṣaṃśeṣopāntasthitāyāḥ kamitari bhagavatyantarujjṛmbhamāṇaṃkopaṃ sāpatnyalabhyaṃ vigamayitumupādāya hastaiścaturbhirnīntaṃ tena svamūrdhni pradiśatu kuśalaṃ pādapadmaṃ ramāyāḥ || 1||

रेखाभिर्यत् सिराभिः किसलयमिव कल्पद्रुमस्योपगूढंलेखानां शेखरत्वं गतमत इव यद्यच्च शोणप्रकाशम् ।पादद्वन्द्वं रमायाः प्रणतजनमनः कामितार्थप्रदं तद्दारिद्र्यं दारयेन्नः कुसुमसमरुचा भासमानं नखाल्या ॥ २॥

rekhābhiryat sirābhiḥ kisalayamiva kalpadrumasyopagūḍhaṃlekhānāṃ śekharatvaṃ gatamata iva yadyacca śoṇaprakāśam |pādadvandvaṃ ramāyāḥ praṇatajanamanaḥ kāmitārthapradaṃ taddāridryaṃ dārayennaḥ kusumasamarucā bhāsamānaṃ nakhālyā || 2||

सिक्तं रक्तैरिव स्वैर्वपुरुरगपतेर्विश्वरूपस्य विष्णोरध्यासोद्भूतसम्मर्दनदलितकृतच्छिद्रचर्मान्तवान्तैः ।शोणीकुर्वन्ति भासः शशरुधिरनिभा यत्प्रसूताः प्रसूत्यैभूयाद् भूयः समृद्धेर्जलनिधिजनुषः पादपङ्केरुहं नः ॥ ३॥

siktaṃ raktairiva svairvapururagapaterviśvarūpasya viṣṇoradhyāsodbhūtasammardanadalitakṛtacchidracarmāntavāntaiḥ |śoṇīkurvanti bhāsaḥ śaśarudhiranibhā yatprasūtāḥ prasūtyaibhūyād bhūyaḥ samṛddherjalanidhijanuṣaḥ pādapaṅkeruhaṃ naḥ || 3||

आदावामृश्यमानं किसलयरुचिभिः केशवस्याङ्गुलीभिःपश्चादाचुम्ब्यमानं मृदु मृदुमुखपद्मेन शोणाघरेण ।भूयश्चालिङ्ग्यमानं दृढतरमुरसि प्रापयद्भ्यां कराभ्यांभूयाद् भूत्यै चिरं नः शिरसि विनिहितं पादपद्मं रमायाः ॥ ४॥

ādāvāmṛśyamānaṃ kisalayarucibhiḥ keśavasyāṅgulībhiḥpaścādācumbyamānaṃ mṛdu mṛdumukhapadmena śoṇāghareṇa |bhūyaścāliṅgyamānaṃ dṛḍhataramurasi prāpayadbhyāṃ karābhyāṃbhūyād bhūtyai ciraṃ naḥ śirasi vinihitaṃ pādapadmaṃ ramāyāḥ || 4||

क्षिप्तं क्षीराम्बुराशेस्तटभुवि पयसां फेनपुञ्जावृतायांकेलीसञ्चारकाले भसितपरिवृताङ्गारवद् यद् विभाति ।तन्नः सम्मृज्यमानं नमदमरवधूमौलिभिः पादपद्मंश्रीदेव्याः श्रेयसे स्तात् प्रणतिगतिभयापद्रवत्कान्तहस्तम् ॥ ५॥

kṣiptaṃ kṣīrāmburāśestaṭabhuvi payasāṃ phenapuñjāvṛtāyāṃkelīsañcārakāle bhasitaparivṛtāṅgāravad yad vibhāti |tannaḥ sammṛjyamānaṃ namadamaravadhūmaulibhiḥ pādapadmaṃśrīdevyāḥ śreyase stāt praṇatigatibhayāpadravatkāntahastam || 5||

वक्षस्यक्षीणरागं निदधति दयिते कुङ्कुमेनेव लिप्तंकुर्वन्ती कान्तिरेतत् सुभगयतितरां यत्प्रसूता नितान्तम् ।मूर्धन्येनं च रत्नाम्बररचितशिरश्छादनेनेव गुप्तंभार्गव्या भर्गमुख्यैः परिणुतमवतात् पादपद्मं सदा नः ॥ ६॥

vakṣasyakṣīṇarāgaṃ nidadhati dayite kuṅkumeneva liptaṃkurvantī kāntiretat subhagayatitarāṃ yatprasūtā nitāntam |mūrdhanyenaṃ ca ratnāmbararacitaśiraśchādaneneva guptaṃbhārgavyā bhargamukhyaiḥ pariṇutamavatāt pādapadmaṃ sadā naḥ || 6||

अब्धेर्जाता प्रवालावलिरिति मुनिभिर्दैवतैस्तत्र संस्थादुत्पन्ना कल्पवृक्षादिति दितितनयैर्बाडवाग्नेः शिखेति ।नानानद्यागमासादितमरुणपयोजन्यमित्यन्यलोकैरव्यादुत्प्रेक्ष्यमाणं पदकमलयुगं पद्मजायाश्चिरं नः ॥ ७॥

abdherjātā pravālāvaliriti munibhirdaivataistatra saṃsthādutpannā kalpavṛkṣāditi dititanayairbāḍavāgneḥ śikheti |nānānadyāgamāsāditamaruṇapayojanyamityanyalokairavyādutprekṣyamāṇaṃ padakamalayugaṃ padmajāyāściraṃ naḥ || 7||

श्रीपादस्तवमेतद् ये पठन्ति प्रातरुत्थिताः ।अष्टैश्वर्यं भवेत् तेषामाश्चैव हि न संशयः ॥ ८॥

śrīpādastavametad ye paṭhanti prātarutthitāḥ |aṣṭaiśvaryaṃ bhavet teṣāmāścaiva hi na saṃśayaḥ || 8||

इति श्रीश्रीपादस्तवः समाप्तः ।स्तोत्रसमुच्चयः २ (८८)

iti śrīśrīpādastavaḥ samāptaḥ |stotrasamuccayaḥ 2 (88)