शाकिनीसदाशिवस्तवनमङ्गलाष्टोत्तरसहस्रनामस्तोत्रम् Shakinisadashivastavanamangalashtottarasahasranamastotra

श्रीगणेशाय नमः ।श्रीआनन्दभैरवी उवाच ।कैलासशिखरारूढ पञ्चवक्त्र त्रिलोचन ।अभेद्यभेदकप्राणवल्लभ श्रीसदाशिव ॥ १ ॥

śrīgaṇeśāya namaḥ |śrīānandabhairavī uvāca |kailāsaśikharārūḍha pañcavaktra trilocana |abhedyabhedakaprāṇavallabha śrīsadāśiva || 1 ||

भवप्राणप्ररक्षाय कालकूटहराय च ।प्रत्यङ्गिरापादुकाय दान्तं शब्दमयं प्रियम् ॥ २ ॥

bhavaprāṇaprarakṣāya kālakūṭaharāya ca |pratyaṅgirāpādukāya dāntaṃ śabdamayaṃ priyam || 2 ||

इच्छामि रक्षणार्थाय भक्तानां योगिनां सदाम् ।अवश्यं कथयाम्यत्र सर्वमङ्गललक्षणम् ॥ ३ ॥

icchāmi rakṣaṇārthāya bhaktānāṃ yogināṃ sadām |avaśyaṃ kathayāmyatra sarvamaṅgalalakṣaṇam || 3 ||

अष्टोत्तरसहस्राख्यं सदाशिवसमन्वितम् ।महाप्रभावजननं दमनं दुष्टचेतसाम् ॥ ४ ॥

aṣṭottarasahasrākhyaṃ sadāśivasamanvitam |mahāprabhāvajananaṃ damanaṃ duṣṭacetasām || 4 ||

सर्वरक्षाकरं लोके कण्ठपद्मप्रसिद्धये ।अकालमृत्युहरणं सर्वव्याधिनिवारणम् ॥ ५ ॥

sarvarakṣākaraṃ loke kaṇṭhapadmaprasiddhaye |akālamṛtyuharaṇaṃ sarvavyādhinivāraṇam || 5 ||

योगसिद्धिकरं साक्षाद् अमृतानन्दकारकम् ।विषज्वालादिहरणं मन्त्रसिद्धिकरं परम् ॥ ६ ॥

yogasiddhikaraṃ sākṣād amṛtānandakārakam |viṣajvālādiharaṇaṃ mantrasiddhikaraṃ param || 6 ||

नाम्नां स्मरणमात्रेण योगिनां वल्लभो भवेत् ।सदाशिवयुतां देवीं सम्पूज्य संस्मरेद् यदि ॥ ७ ॥

nāmnāṃ smaraṇamātreṇa yogināṃ vallabho bhavet |sadāśivayutāṃ devīṃ sampūjya saṃsmared yadi || 7 ||

मासान्ते सिद्धिमाप्नोति खेचरीमेलनं भवेत् ।आकाशगामिनीसिद्धिः पठित्वा लभ्यते ध्रुवम् ॥ ८ ॥

māsānte siddhimāpnoti khecarīmelanaṃ bhavet |ākāśagāminīsiddhiḥ paṭhitvā labhyate dhruvam || 8 ||

धनं रत्नं क्रियासिद्धिं विभूतिसिद्धिमां लभेत् ।पठनाद् धारणाद्योगी महादेवः सदाशिवः ॥ ९ ॥

dhanaṃ ratnaṃ kriyāsiddhiṃ vibhūtisiddhimāṃ labhet |paṭhanād dhāraṇādyogī mahādevaḥ sadāśivaḥ || 9 ||

विष्णुश्चक्रधरः साक्षाद् ब्रह्मा नित्यं तपोधनः ।योगिनः सर्वदेवाश्च मुनयश्चापि योगिनः ॥ १० ॥

viṣṇuścakradharaḥ sākṣād brahmā nityaṃ tapodhanaḥ |yoginaḥ sarvadevāśca munayaścāpi yoginaḥ || 10 ||

सिद्धाः सर्वे सञ्चरन्ति धृत्वा च पठनाद् यतः ।ये ये पठन्ति नित्यं तु ते सिद्धा विष्णुसम्भवाः ॥ ११ ॥

siddhāḥ sarve sañcaranti dhṛtvā ca paṭhanād yataḥ |ye ye paṭhanti nityaṃ tu te siddhā viṣṇusambhavāḥ || 11 ||

किमन्यत् कथनेनापि भुक्तिं मुक्तिं क्षणाल्लभेत् ॥ १२ ॥

kimanyat kathanenāpi bhuktiṃ muktiṃ kṣaṇāllabhet || 12 ||

अस्य श्रीभुवनमङ्गलमहास्तोत्राष्टोत्तरसहस्रनाम्नः \,श्रीसदाशिवऋषिः \, गायत्रीच्छन्दः \, श्रीसदाशिवशाकिनीदेवता \,पुरुषार्थाष्टसिद्धिसमययोगसमृद्धये विनियोगः ।ॐ शाकिनी पीतवस्त्रा सदाशिव उमापतिः ।शाकम्भरी महादेवी भवानी भुवनप्रियः ॥ १३ ॥

asya śrībhuvanamaṅgalamahāstotrāṣṭottarasahasranāmnaḥ \,śrīsadāśivaṛṣiḥ \, gāyatrīcchandaḥ \, śrīsadāśivaśākinīdevatā \,puruṣārthāṣṭasiddhisamayayogasamṛddhaye viniyogaḥ |oṃ śākinī pītavastrā sadāśiva umāpatiḥ |śākambharī mahādevī bhavānī bhuvanapriyaḥ || 13 ||

योगिनी योगधर्मात्मा योगात्मा श्रीसदाशिवः ।युगाद्या युगधर्मा च योगविद्या सुयोगिराट् ॥ १४ ॥

yoginī yogadharmātmā yogātmā śrīsadāśivaḥ |yugādyā yugadharmā ca yogavidyā suyogirāṭ || 14 ||

योगिनी योगजेताख्यः सुयोगा योगशङ्करः ।योगप्रिया योगविद्वान् योगदा योगषड्भुविः ॥ १५ ॥

yoginī yogajetākhyaḥ suyogā yogaśaṅkaraḥ |yogapriyā yogavidvān yogadā yogaṣaḍbhuviḥ || 15 ||

त्रियोगा जगदीशात्मा जापिका जपसिद्धिदः ।यत्नी यत्नप्रियानन्दो विधिज्ञा वेदसारवित् ॥ १६ ॥

triyogā jagadīśātmā jāpikā japasiddhidaḥ |yatnī yatnapriyānando vidhijñā vedasāravit || 16 ||

सुप्रतिष्ठा शुभकरो मदिरा मदनप्रियः ।मधुविद्या माधवीशः क्षितिः क्षोभविनाशनः ॥ १७ ॥

supratiṣṭhā śubhakaro madirā madanapriyaḥ |madhuvidyā mādhavīśaḥ kṣitiḥ kṣobhavināśanaḥ || 17 ||

वीतिज्ञा मन्मथघ्नश्च चमरी चारुलोचनः ।एकान्तरा कल्पतरुः क्षमाबुद्धो रमासवः ॥ १८ ॥

vītijñā manmathaghnaśca camarī cārulocanaḥ |ekāntarā kalpataruḥ kṣamābuddho ramāsavaḥ || 18 ||

वसुन्धरा वामदेवः श्रीविद्या मन्दरस्थितः ।अकलङ्का निरातङ्कः उतङ्का शङ्कराश्रयः ॥ १९ ॥

vasundharā vāmadevaḥ śrīvidyā mandarasthitaḥ |akalaṅkā nirātaṅkaḥ utaṅkā śaṅkarāśrayaḥ || 19 ||

निराकारा निर्विकल्पो रसदा रसिकाश्रयः ।रामा रामननाथश्च लक्ष्मी नीलेषुलोचनः ॥ २० ॥

nirākārā nirvikalpo rasadā rasikāśrayaḥ |rāmā rāmananāthaśca lakṣmī nīleṣulocanaḥ || 20 ||

विद्याधरी धरानन्दः कनका काञ्चनाङ्गधृक् ।शुभा शुभकरोन्मत्तः प्रचण्डा चण्डविक्रमः ॥ २१ ॥

vidyādharī dharānandaḥ kanakā kāñcanāṅgadhṛk |śubhā śubhakaronmattaḥ pracaṇḍā caṇḍavikramaḥ || 21 ||

सुशीला देवजनकः काकिनी कमलाननः ।कज्जलाभा कृष्णदेहः शूलिनी खड्गचर्मधृक् ॥ २२ ॥

suśīlā devajanakaḥ kākinī kamalānanaḥ |kajjalābhā kṛṣṇadehaḥ śūlinī khaḍgacarmadhṛk || 22 ||

गतिग्राह्यः प्रभागौरः क्षमा क्षुब्धः शिवा शिवः ।जवा यतिः परा हरिर्हराहरोऽक्षराक्षरः ॥ २३ ॥

gatigrāhyaḥ prabhāgauraḥ kṣamā kṣubdhaḥ śivā śivaḥ |javā yatiḥ parā harirharāharo'kṣarākṣaraḥ || 23 ||

सनातनी सनातनः श्मशानवासिनीपतिः ।जयाक्षयो धराचरः समागतिः प्रमापतिः ॥ २४ ॥

sanātanī sanātanaḥ śmaśānavāsinīpatiḥ |jayākṣayo dharācaraḥ samāgatiḥ pramāpatiḥ || 24 ||

कुलाकुलो मलाननो वलीवला मलामलः ।प्रभाधरः परापरः सरासरः कराकरः ॥ २५ ॥

kulākulo malānano valīvalā malāmalaḥ |prabhādharaḥ parāparaḥ sarāsaraḥ karākaraḥ || 25 ||

मयामयः पयापयः पलापलो दयादयः ।भयाभयो जयाजयो गयागयः फलान्वयः ॥ २६ ॥

mayāmayaḥ payāpayaḥ palāpalo dayādayaḥ |bhayābhayo jayājayo gayāgayaḥ phalānvayaḥ || 26 ||

समागमो धमाधमो रमारमो वमावमः ।वराङ्गणा धराधरः प्रभाकरो भ्रमाभ्रमः ॥ २७ ॥

samāgamo dhamādhamo ramāramo vamāvamaḥ |varāṅgaṇā dharādharaḥ prabhākaro bhramābhramaḥ || 27 ||

सती सुखी सुलक्षणा कृपाकरो दयानिधिः ।धरापतिः प्रियापतिवीरागिणी मनोन्मनः ॥ २८ ॥

satī sukhī sulakṣaṇā kṛpākaro dayānidhiḥ |dharāpatiḥ priyāpativīrāgiṇī manonmanaḥ || 28 ||

प्रधाविनी सदाचलः प्रचञ्चलातिचञ्चलः ।कटुप्रिया महाकटुः पटुप्रिया महापटुः ॥ २९ ॥

pradhāvinī sadācalaḥ pracañcalāticañcalaḥ |kaṭupriyā mahākaṭuḥ paṭupriyā mahāpaṭuḥ || 29 ||

धनावली गणागणी खराखरः फणिः क्षणः ।प्रियान्विता शिरोमणिस्तु शाकिनी सदाशिवः ॥ ३० ॥

dhanāvalī gaṇāgaṇī kharākharaḥ phaṇiḥ kṣaṇaḥ |priyānvitā śiromaṇistu śākinī sadāśivaḥ || 30 ||

रुणारुणो घनाघनो हयी हयो लयी लयः ।सुदन्तरा सुदागमः खलापहा महाशयः ॥ ३१ ॥

ruṇāruṇo ghanāghano hayī hayo layī layaḥ |sudantarā sudāgamaḥ khalāpahā mahāśayaḥ || 31 ||

चलत्कुचा जवावृतो घनान्तरा स्वरान्तकः ।प्रचण्डघर्घरध्वनिः प्रिया प्रतापवह्निगः ॥ ३२ ॥

calatkucā javāvṛto ghanāntarā svarāntakaḥ |pracaṇḍaghargharadhvaniḥ priyā pratāpavahnigaḥ || 32 ||

प्रशान्तिरुन्दुरुस्थिता महेश्वरी महेश्वरः ।महाशिवाविनी घनी रणेश्वरी रणेश्वरः ॥ ३३ ॥

praśāntirundurusthitā maheśvarī maheśvaraḥ |mahāśivāvinī ghanī raṇeśvarī raṇeśvaraḥ || 33 ||

प्रतापिनी प्रतापनः प्रमाणिका प्रमाणवित् ।विशुद्धवासिनी मुनिविशुद्धविन्मधूत्तमा ॥ ३४ ॥

pratāpinī pratāpanaḥ pramāṇikā pramāṇavit |viśuddhavāsinī muniviśuddhavinmadhūttamā || 34 ||

तिलोत्तमा महोत्तमः सदामया दयामयः ।विकारतारिणी तरुः सुरासुरोऽमरागुरुः ॥ ३५ ॥

tilottamā mahottamaḥ sadāmayā dayāmayaḥ |vikāratāriṇī taruḥ surāsuro'marāguruḥ || 35 ||

प्रकाशिका प्रकाशकः प्रचण्डिका विभाण्डकः ।त्रिशूलिनी गदाधरः प्रवालिका महाबलः ॥ ३६ ॥

prakāśikā prakāśakaḥ pracaṇḍikā vibhāṇḍakaḥ |triśūlinī gadādharaḥ pravālikā mahābalaḥ || 36 ||

क्रियावती जरापतिः प्रभाम्बरा दिगम्बरः ।कुलाम्बरा मृगाम्बरा निरन्तरा जरान्तरः ॥ ३७ ॥

kriyāvatī jarāpatiḥ prabhāmbarā digambaraḥ |kulāmbarā mṛgāmbarā nirantarā jarāntaraḥ || 37 ||

श्मशाननिलया शम्भुर्भवानी भीमलोचनः ।कृतान्तहारिणीकान्तः कुपिता कामनाशनः ॥ ३८ ॥

śmaśānanilayā śambhurbhavānī bhīmalocanaḥ |kṛtāntahāriṇīkāntaḥ kupitā kāmanāśanaḥ || 38 ||

चतुर्भुजा पद्मनेत्रो दशहस्ता महागुरुः ।दशानना दशग्रीवः क्षिप्ताक्षी क्षेपनप्रियः ॥ ३९ ॥

caturbhujā padmanetro daśahastā mahāguruḥ |daśānanā daśagrīvaḥ kṣiptākṣī kṣepanapriyaḥ || 39 ||

वाराणसी पीठवासी काशी विश्वगुरुप्रियः ।कपालिनी महाकालः कालिका कलिपावनः ॥ ४० ॥

vārāṇasī pīṭhavāsī kāśī viśvagurupriyaḥ |kapālinī mahākālaḥ kālikā kalipāvanaḥ || 40 ||

रन्ध्रवर्त्मस्थिता वाग्मी रती रामगुरुप्रभुः ।सुलक्ष्मीः प्रान्तरस्थश्च योगिकन्या कृतान्तकः ॥ ४१ ॥

randhravartmasthitā vāgmī ratī rāmaguruprabhuḥ |sulakṣmīḥ prāntarasthaśca yogikanyā kṛtāntakaḥ || 41 ||

सुरान्तका पुण्यदाता तारिणी तरुणप्रियः ।महाभयतरा तारास्तारिका तारकप्रभुः ॥ ४२ ॥

surāntakā puṇyadātā tāriṇī taruṇapriyaḥ |mahābhayatarā tārāstārikā tārakaprabhuḥ || 42 ||

तारकब्रह्मजननी महादृप्तः भवाग्रजः ।लिङ्गगम्या लिङ्गरूपी चण्डिका वृषवाहनः ॥ ४३ ॥

tārakabrahmajananī mahādṛptaḥ bhavāgrajaḥ |liṅgagamyā liṅgarūpī caṇḍikā vṛṣavāhanaḥ || 43 ||

रुद्राणी रुद्रदेवश्च कामजा काममन्थनः ।विजातीया जातितातो विधात्री धातृपोषकः ॥ ४४ ॥

rudrāṇī rudradevaśca kāmajā kāmamanthanaḥ |vijātīyā jātitāto vidhātrī dhātṛpoṣakaḥ || 44 ||

निराकारा महाकाशः सुप्रविद्या विभावसुः ।वासुकी पतितत्राता त्रिवेणी तत्त्वदर्शकः ॥ ४५ ॥

nirākārā mahākāśaḥ supravidyā vibhāvasuḥ |vāsukī patitatrātā triveṇī tattvadarśakaḥ || 45 ||

पताका पद्मवासी च त्रिवार्ता कीर्तिवर्धनः ।धरणी धारणाव्याप्तो विमलानन्दवर्धनः ॥ ४६ ॥

patākā padmavāsī ca trivārtā kīrtivardhanaḥ |dharaṇī dhāraṇāvyāpto vimalānandavardhanaḥ || 46 ||

विप्रचित्ता कुण्डकारी विरजा कालकम्पनः ।सूक्ष्माधारा अतिज्ञानी मन्त्रसिद्धिः प्रमाणगः ॥ ४७ ॥

vipracittā kuṇḍakārī virajā kālakampanaḥ |sūkṣmādhārā atijñānī mantrasiddhiḥ pramāṇagaḥ || 47 ||

वाच्या वारणतुण्डश्च कमला कृष्णसेवकः ।दुन्दुभिस्था वाद्यभाण्डो नीलाङ्गी वारणाश्रयः ॥ ४८ ॥

vācyā vāraṇatuṇḍaśca kamalā kṛṣṇasevakaḥ |dundubhisthā vādyabhāṇḍo nīlāṅgī vāraṇāśrayaḥ || 48 ||

वसन्ताद्या शीतरश्मिः प्रमाद्या शक्तिवल्लभः ।खड्गना चक्रकुन्ताढ्यः शिशिराल्पधनप्रियः ॥ ४९ ॥

vasantādyā śītaraśmiḥ pramādyā śaktivallabhaḥ |khaḍganā cakrakuntāḍhyaḥ śiśirālpadhanapriyaḥ || 49 ||

दुर्वाच्या मन्त्रनिलयः खण्डकाली कुलाश्रयः ।वानरी हस्तिहाराद्यः प्रणया लिङ्गपूजकः ॥ ५० ॥

durvācyā mantranilayaḥ khaṇḍakālī kulāśrayaḥ |vānarī hastihārādyaḥ praṇayā liṅgapūjakaḥ || 50 ||