संविच्छतकम् Sanvit Shatakam

॥ अथ त्यागराजविरचितम् संविच्छतकम् ॥यस्या नित्यं चरणकमलद्वन्द्वमैश्चर्यबीजंप्रध्यायन्तो हृदयकमले पुण्यभाजो मुनीन्द्राः ।निर्द्वन्द्वं तत् समरसमहो प्राप्य तिष्ठन्ति तस्मिन्तस्यै देव्यै तपनरुचये तत्त्वतोऽस्तु प्रणामः ॥ १॥

|| atha tyāgarājaviracitam saṃvicchatakam ||yasyā nityaṃ caraṇakamaladvandvamaiścaryabījaṃpradhyāyanto hṛdayakamale puṇyabhājo munīndrāḥ |nirdvandvaṃ tat samarasamaho prāpya tiṣṭhanti tasmintasyai devyai tapanarucaye tattvato'stu praṇāmaḥ || 1||

या कल्याणगुणप्रसूः परशिवानन्दामृतस्यन्दिनीभूमानन्दमयी परापरमयी तेजोमयी वाङ्ग्मयी ।आद्यान्तार्णतनूः शिवादिवसुधान्तान्तःप्रकाशात्मिकासा संवित् सुकृतोदया स्फुरतु नश्चित्ते सदा सर्वगा ॥ २॥

yā kalyāṇaguṇaprasūḥ paraśivānandāmṛtasyandinībhūmānandamayī parāparamayī tejomayī vāṅgmayī |ādyāntārṇatanūḥ śivādivasudhāntāntaḥprakāśātmikāsā saṃvit sukṛtodayā sphuratu naścitte sadā sarvagā || 2||

यस्यां प्रोतमिदं चतुर्दशजगत् सूत्रे मणिस्तोमवद्यस्यां भाति जडं जडेतरमिदं स्तम्भादिवद् दारुणि ।यस्यां पश्यति विश्वमज्ञहृदयाः स्थाणौ पुमांसं यथासा संवित् सुकृतोदया स्फुरतु नश्चित्ते सदा सर्वगा ॥ ३॥

yasyāṃ protamidaṃ caturdaśajagat sūtre maṇistomavadyasyāṃ bhāti jaḍaṃ jaḍetaramidaṃ stambhādivad dāruṇi |yasyāṃ paśyati viśvamajñahṛdayāḥ sthāṇau pumāṃsaṃ yathāsā saṃvit sukṛtodayā sphuratu naścitte sadā sarvagā || 3||

मूलौड्याणगलोपरोधनमहामुद्राप्रसन्ना परातेजःपुञ्जमयी सदा गतियुता हंसी सहस्रारकम् ।अम्भोजं परहंसकेलिसदनं या प्राप्य लेभे मुदंसा संवित् सुकृतोदया स्फुरतु नश्चित्ते सदा सर्वगा ॥ ४॥

mūlauḍyāṇagaloparodhanamahāmudrāprasannā parātejaḥpuñjamayī sadā gatiyutā haṃsī sahasrārakam |ambhojaṃ parahaṃsakelisadanaṃ yā prāpya lebhe mudaṃsā saṃvit sukṛtodayā sphuratu naścitte sadā sarvagā || 4||

प्राणापानरवीन्दुयोगपरमानन्दप्रबुद्धा सतीसंसुप्ता श्रुतिपत्रपद्मशयने सौषुम्नवीथ्याद्युतम् ।वर्षत्यसभानटं समरसानन्दामृतं प्राप्य यासा संवित् सुकृतोदया स्फुरतु नश्चित्ते सदा सर्वगा ॥ ५॥

prāṇāpānaravīnduyogaparamānandaprabuddhā satīsaṃsuptā śrutipatrapadmaśayane sauṣumnavīthyādyutam |varṣatyasabhānaṭaṃ samarasānandāmṛtaṃ prāpya yāsā saṃvit sukṛtodayā sphuratu naścitte sadā sarvagā || 5||

या मित्रावरुणालयात् समुदिता तेजोमयी वल्लरीवीणादण्डतरुश्रिता शिववियद्यान्ती स्वभावात् सदा ।नानावर्णपदादिपुष्पनिचयान् स्वस्मिन् किरन्तीच्छयासा संवित् सुकृतोदया स्फुरतु नश्चित्ते सदा सर्वगा ॥ ६॥

yā mitrāvaruṇālayāt samuditā tejomayī vallarīvīṇādaṇḍataruśritā śivaviyadyāntī svabhāvāt sadā |nānāvarṇapadādipuṣpanicayān svasmin kirantīcchayāsā saṃvit sukṛtodayā sphuratu naścitte sadā sarvagā || 6||

या चैकोत्तरखादिपञ्चकगुणाकारार्णमन्त्रात्मिकाया पीतारुणशुभ्रविग्रहमयी सन्ध्यात्रये राजते ।याप्येकाक्षरनादसन्ततिसुखोद्बोधैकमूर्तिः परासा संवित् सुकृतोदया स्फुरतु नश्चित्ते सदा सर्वगा ॥ ७॥

yā caikottarakhādipañcakaguṇākārārṇamantrātmikāyā pītāruṇaśubhravigrahamayī sandhyātraye rājate |yāpyekākṣaranādasantatisukhodbodhaikamūrtiḥ parāsā saṃvit sukṛtodayā sphuratu naścitte sadā sarvagā || 7||

याव्यक्ता नववारनाथकरुणापाङ्गा प्रकाशात्मिकानीलेन्दीवरपद्महर्षकरदृक्तत्त्वार्णमुक्तावलिः ।कामेश्यादिसुधांशुषोडशकलापूर्णात्मवक्त्राम्बुजासा संवित् सुकृतोदया स्फुरतु नश्चित्ते सदा सर्वगा ॥ ८॥

yāvyaktā navavāranāthakaruṇāpāṅgā prakāśātmikānīlendīvarapadmaharṣakaradṛktattvārṇamuktāvaliḥ |kāmeśyādisudhāṃśuṣoḍaśakalāpūrṇātmavaktrāmbujāsā saṃvit sukṛtodayā sphuratu naścitte sadā sarvagā || 8||

या सीमा नवखण्डचक्रवसुधालङ्कारमेरोः परानानादेशिकयोगिनीमणिलसच्छुभ्रादिवर्णावनेः ।कामेशाङ्कनिरभ्रनिर्मलमहाकाशस्थविद्युल्लतासा संवित् सुकृतोदया स्फुरतु नश्चित्ते सदा सर्वगा ॥ ९॥

yā sīmā navakhaṇḍacakravasudhālaṅkārameroḥ parānānādeśikayoginīmaṇilasacchubhrādivarṇāvaneḥ |kāmeśāṅkanirabhranirmalamahākāśasthavidyullatāsā saṃvit sukṛtodayā sphuratu naścitte sadā sarvagā || 9||

यस्याः प्रीतिरहर्निशं कुलगिरिस्रोतःसुधायां परानिष्कामप्रणतान्तरङ्गकुसुमे ह्रीङ्कारघण्टाध्वनौ ।गन्धेऽहं शिव एव नान्य इति यो दीपे विमर्शात्मकेसा संवित् सुकृतोदया स्फुरतु नश्चित्ते सदा सर्वगा ॥ १०॥

yasyāḥ prītiraharniśaṃ kulagirisrotaḥsudhāyāṃ parāniṣkāmapraṇatāntaraṅgakusume hrīṅkāraghaṇṭādhvanau |gandhe'haṃ śiva eva nānya iti yo dīpe vimarśātmakesā saṃvit sukṛtodayā sphuratu naścitte sadā sarvagā || 10||

या चित्रं त्रिपुरा पुरान्तकसमाश्लिष्टा परा ज्योतिषाम्अद्वैतापि शिवार्धर्मूर्तिरमला पाशापहा पाशिनी ।पद्माराध्यपदारविन्दयुगला भिक्षाटनेशप्रियासा संवित् सुकृतोदया स्फुरतु नश्चित्ते सदा सर्वगा ॥ ११॥

yā citraṃ tripurā purāntakasamāśliṣṭā parā jyotiṣāmadvaitāpi śivārdharmūrtiramalā pāśāpahā pāśinī |padmārādhyapadāravindayugalā bhikṣāṭaneśapriyāsā saṃvit sukṛtodayā sphuratu naścitte sadā sarvagā || 11||

या दूरा ललितापि दुष्कृतजुषां या कोमलाङ्ग्यद्रिजाया नीलाम्बुदमेचकापि भुवनं विद्योतयत्यद्भुतम् ।या कल्याणगुणप्रवाहसुमहावारांनिधिर्निर्गुणासा संवित् सुकृतोदया स्फुरतु नश्चित्ते सदा सर्वगा ॥ १२॥

yā dūrā lalitāpi duṣkṛtajuṣāṃ yā komalāṅgyadrijāyā nīlāmbudamecakāpi bhuvanaṃ vidyotayatyadbhutam |yā kalyāṇaguṇapravāhasumahāvārāṃnidhirnirguṇāsā saṃvit sukṛtodayā sphuratu naścitte sadā sarvagā || 12||

निष्क्रोधा नतलोकमृत्युमथने या बद्धकच्छा सदानिर्वैरा निजपूजनादिकृतिनां दैन्ये द्विषन्त्यद्भुतम् ।भक्तानां भयमोचिनी भवरता श्रीकामराजात्मिकासा संवित् सुकृतोदया स्फुरतु नश्चित्ते सदा सर्वगा ॥ १३॥

niṣkrodhā natalokamṛtyumathane yā baddhakacchā sadānirvairā nijapūjanādikṛtināṃ dainye dviṣantyadbhutam |bhaktānāṃ bhayamocinī bhavaratā śrīkāmarājātmikāsā saṃvit sukṛtodayā sphuratu naścitte sadā sarvagā || 13||

विद्यारण्यपुलिन्दिका श्रुतिगिरा तत्त्वोपदेष्ट्री सतांवाराही नकुली विलासकुतुका याप्युत्तमब्राह्मणी ।या चित्रं सुखशान्त्यतीतवसुधा श्रीचण्डिका शूलिनीसा संवित् सुकृतोदया स्फुरतु नश्चित्ते सदा सर्वगा ॥ १४॥

vidyāraṇyapulindikā śrutigirā tattvopadeṣṭrī satāṃvārāhī nakulī vilāsakutukā yāpyuttamabrāhmaṇī |yā citraṃ sukhaśāntyatītavasudhā śrīcaṇḍikā śūlinīsā saṃvit sukṛtodayā sphuratu naścitte sadā sarvagā || 14||

या शाला निगमागमस्मृतिकलालीलाततेस्त्र्यक्षरीया फालाक्षमहासती स्मरकलाहेला पराप्यद्भुतम् ।या कालानलकान्तिमत्यपि सदा नीलालका शीतलासा संवित् सुकृतोदया स्फुरतु नश्चित्ते सदा सर्वगा ॥ १५॥

yā śālā nigamāgamasmṛtikalālīlātatestryakṣarīyā phālākṣamahāsatī smarakalāhelā parāpyadbhutam |yā kālānalakāntimatyapi sadā nīlālakā śītalāsā saṃvit sukṛtodayā sphuratu naścitte sadā sarvagā || 15||

कल्याणाचलकार्मुकस्य महिषी पुण्ड्रेक्षुचापाद्भुतंलक्ष्मीवल्लभसायकस्य रमणी पुष्पेषुहस्ताम्बुजा ।या रामा परमेश्वरस्य ललिता लोकत्रयेऽत्यद्भुतंसा संवित् सुकृतोदया स्फुरतु नश्चित्ते सदा सर्वगा ॥ १६॥

kalyāṇācalakārmukasya mahiṣī puṇḍrekṣucāpādbhutaṃlakṣmīvallabhasāyakasya ramaṇī puṣpeṣuhastāmbujā |yā rāmā parameśvarasya lalitā lokatraye'tyadbhutaṃsā saṃvit sukṛtodayā sphuratu naścitte sadā sarvagā || 16||

या वाचामधिदेवताप्यविषया वाचां श्रुतेर्वर्णितुंश्रोत्रादीन्द्रियदेवतापि न जडैः श्रोत्रादिभिर्ज्ञायते ।अन्तःस्थामपि यां प्रचोदकतया नो जानते जन्तवःसा संवित् सुकृतोदया स्फुरतु नश्चित्ते सदा सर्वगा ॥ १७॥

yā vācāmadhidevatāpyaviṣayā vācāṃ śrutervarṇituṃśrotrādīndriyadevatāpi na jaḍaiḥ śrotrādibhirjñāyate |antaḥsthāmapi yāṃ pracodakatayā no jānate jantavaḥsā saṃvit sukṛtodayā sphuratu naścitte sadā sarvagā || 17||

या वीणा परमेश्वराङ्कनिलया ह्रीङ्कारमन्त्री सदाश्यामा कालसुमूर्च्छनादिकलनाहीनापि रागिण्यहो ।नाथेनाहतनादविभ्रमवती स्थाणुं शिवं चाकरोत्सा संवित् सुकृतोदया स्फुरतु नश्चित्ते सदा सर्वगा ॥ १८॥

yā vīṇā parameśvarāṅkanilayā hrīṅkāramantrī sadāśyāmā kālasumūrcchanādikalanāhīnāpi rāgiṇyaho |nāthenāhatanādavibhramavatī sthāṇuṃ śivaṃ cākarotsā saṃvit sukṛtodayā sphuratu naścitte sadā sarvagā || 18||

या मोहान्धतमोऽपनोदनविधौ बोधात्मिका कौमुदीसंसारार्णवतारणे दृढतरा नौकेन्द्रचापप्रभा ।दारिद्र्याद्रिविदारणे कनकरुग् दम्भोलिरिच्छात्मिकासा संवित् सुकृतोदया स्फुरतु नश्चित्ते सदा सर्वगा ॥ १९॥

yā mohāndhatamo'panodanavidhau bodhātmikā kaumudīsaṃsārārṇavatāraṇe dṛḍhatarā naukendracāpaprabhā |dāridryādrividāraṇe kanakarug dambholiricchātmikāsā saṃvit sukṛtodayā sphuratu naścitte sadā sarvagā || 19||

या तापत्रयजाड्यशोकशमने काचिन्नृणां स्वर्धुनीया शान्त्यादिगुणप्रवालमनिसंवृद्धौ सुधाम्बोनिधिः ।प्रत्यग्दृष्ट्यसिताब्जपोषणविधौ जाड्यापहा दीर्घिकासा संवित् सुकृतोदया स्फुरतु नश्चित्ते सदा सर्वगा ॥ २०॥

yā tāpatrayajāḍyaśokaśamane kācinnṛṇāṃ svardhunīyā śāntyādiguṇapravālamanisaṃvṛddhau sudhāmbonidhiḥ |pratyagdṛṣṭyasitābjapoṣaṇavidhau jāḍyāpahā dīrghikāsā saṃvit sukṛtodayā sphuratu naścitte sadā sarvagā || 20||

शोकारण्यकुठारिका शुभफलोद्यानस्य या वापिकापापक्ष्वेलसुपर्णकल्पघुटिका प्राज्ञाज्ञयोरम्बिका ।आशोच्चाटनमूलिका विपणिका वागर्थवृद्धेः कवेःसा संवित् सुकृतोदया स्फुरतु नश्चित्ते सदा सर्वगा ॥ २१॥

śokāraṇyakuṭhārikā śubhaphalodyānasya yā vāpikāpāpakṣvelasuparṇakalpaghuṭikā prājñājñayorambikā |āśoccāṭanamūlikā vipaṇikā vāgarthavṛddheḥ kaveḥsā saṃvit sukṛtodayā sphuratu naścitte sadā sarvagā || 21||

या वाञ्छापरिपूरणे सुरलता मोक्षेन्दिरा देवतास्रष्ट्रादेः कुलदेवता सुचरिता विद्यासु सर्वोन्नता ।नित्यानन्दरता सुकर्ममुदिता लोकत्रयाराधितासा संवित् सुकृतोदया स्फुरतु नश्चित्ते सदा सर्वगा ॥ २२॥

yā vāñchāparipūraṇe suralatā mokṣendirā devatāsraṣṭrādeḥ kuladevatā sucaritā vidyāsu sarvonnatā |nityānandaratā sukarmamuditā lokatrayārādhitāsā saṃvit sukṛtodayā sphuratu naścitte sadā sarvagā || 22||

सारासारपयोविवेचनविधौ हंसी परं तु त्विषाश्यामा मोहतमोपनोदनविधौ हंसः सदा भासकः ।प्रज्ञासौधविहारिनिस्तुलमहाज्योत्स्ना दिवापि ध्रुवासा संवित् सुकृतोदया स्फुरतु नश्चित्ते सदा सर्वगा ॥ २३॥

sārāsārapayovivecanavidhau haṃsī paraṃ tu tviṣāśyāmā mohatamopanodanavidhau haṃsaḥ sadā bhāsakaḥ |prajñāsaudhavihārinistulamahājyotsnā divāpi dhruvāsā saṃvit sukṛtodayā sphuratu naścitte sadā sarvagā || 23||

या चिन्तामणिरेव दोषशमने दाने परं त्वद्रिजावासन्ती पिकसुन्दरी श्रुतिसुखालापे स्वयं पञ्चमी ।याने यौवनसिन्धुतीरकरिणी पद्माटवीरक्षिणीसा संवित् सुकृतोदया स्फुरतु नश्चित्ते सदा सर्वगा ॥ २४॥

yā cintāmaṇireva doṣaśamane dāne paraṃ tvadrijāvāsantī pikasundarī śrutisukhālāpe svayaṃ pañcamī |yāne yauvanasindhutīrakariṇī padmāṭavīrakṣiṇīsā saṃvit sukṛtodayā sphuratu naścitte sadā sarvagā || 24||

या शम्भोर्नयनोत्पलेन्दुवदना कन्दर्पदूतीक्षणाचेतश्चातकनीलनीरदकचाजीवातुसीमन्तिनी ।शृङ्गाराद्वयशान्तिपाठसुकृतश्रेयःफलाग्रयस्तनीसा संवित् सुकृतोदया स्फुरतु नश्चित्ते सदा सर्वगा ॥ २५॥

yā śambhornayanotpalenduvadanā kandarpadūtīkṣaṇācetaścātakanīlanīradakacājīvātusīmantinī |śṛṅgārādvayaśāntipāṭhasukṛtaśreyaḥphalāgrayastanīsā saṃvit sukṛtodayā sphuratu naścitte sadā sarvagā || 25||

या त्र्यक्षस्य मनोरथः किमु तपःपाकः सुखं नैजकंदक्षस्येव तपःफलं कुलधनं दैवं हिमाद्रेरपि ।भाग्यं भक्तजनस्य देशिकदृशोः श्लाध्यं कवीनां गिरांसा संवित् सुकृतोदया स्फुरतु नश्चित्ते सदा सर्वगा ॥ २६॥

yā tryakṣasya manorathaḥ kimu tapaḥpākaḥ sukhaṃ naijakaṃdakṣasyeva tapaḥphalaṃ kuladhanaṃ daivaṃ himādrerapi |bhāgyaṃ bhaktajanasya deśikadṛśoḥ ślādhyaṃ kavīnāṃ girāṃsā saṃvit sukṛtodayā sphuratu naścitte sadā sarvagā || 26||

सेतुर्दुःखमहोदधेर्मणिमयच्छाया विभोस्तत्तरोःपान्थानां परमार्थिनां प्रतिपदं कारुण्यपाथःप्रपा ।सत्यानन्दचिदन्नदानविलसच्छाला च कल्याणधीःसा संवित् सुकृतोदया स्फुरतु नश्चित्ते सदा सर्वगा ॥ २७॥

seturduḥkhamahodadhermaṇimayacchāyā vibhostattaroḥpānthānāṃ paramārthināṃ pratipadaṃ kāruṇyapāthaḥprapā |satyānandacidannadānavilasacchālā ca kalyāṇadhīḥsā saṃvit sukṛtodayā sphuratu naścitte sadā sarvagā || 27||

या लोकत्रितयैकरत्नमजडं भान्विन्दुभाशीतलंनिर्दोषं गुणवर्जितं च निखिलैश्चर्यप्रदं देहिनाम् ।चित्रं भिक्षुकसार्वभौमनिलयं लोकत्रये भासतेसा संवित् सुकृतोदया स्फुरतु नश्चित्ते सदा सर्वगा ॥ २८॥

yā lokatritayaikaratnamajaḍaṃ bhānvindubhāśītalaṃnirdoṣaṃ guṇavarjitaṃ ca nikhilaiścaryapradaṃ dehinām |citraṃ bhikṣukasārvabhaumanilayaṃ lokatraye bhāsatesā saṃvit sukṛtodayā sphuratu naścitte sadā sarvagā || 28||

यापर्णाप्यनपायकल्पलतिका स्थाणुः पतिः कल्पकोयस्या भक्तफलप्रपूरणविधौ पुत्रो विशाखोऽद्भुतम् ।इत्थं नित्यकुटुम्बिनी त्रिजगतां रक्षाकरी राजतेसा संवित् सुकृतोदया स्फुरतु नश्चित्ते सदा सर्वगा ॥ २९॥

yāparṇāpyanapāyakalpalatikā sthāṇuḥ patiḥ kalpakoyasyā bhaktaphalaprapūraṇavidhau putro viśākho'dbhutam |itthaṃ nityakuṭumbinī trijagatāṃ rakṣākarī rājatesā saṃvit sukṛtodayā sphuratu naścitte sadā sarvagā || 29||

या पुण्याश्रम एव शाङ्करतपःसिद्ध्यै महायोगिनांनिर्वैरो गजपञ्चवक्त्रगतिमध्यः शान्तिरङ्गस्थलम् ।निर्द्वन्द्वस्तनचक्रवाकलसितः कोकारिचूडामणिःसा संवित् सुकृतोदया स्फुरतु नश्चित्ते सदा सर्वगा ॥ ३०॥

yā puṇyāśrama eva śāṅkaratapaḥsiddhyai mahāyogināṃnirvairo gajapañcavaktragatimadhyaḥ śāntiraṅgasthalam |nirdvandvastanacakravākalasitaḥ kokāricūḍāmaṇiḥsā saṃvit sukṛtodayā sphuratu naścitte sadā sarvagā || 30||

या केदारममूल्यमानमभयं निष्पङ्कमाशास्पदंश्रीकण्ठेतरभोगबन्धरहितं कल्पे कदाप्यद्भुतम् ।प्रज्ञाशालिन एव दित्सति बत ज्ञानाङ्कुरं कस्यचित्सा संवित् सुकृतोदया स्फुरतु नश्चित्ते सदा सर्वगा ॥ ३१॥

yā kedāramamūlyamānamabhayaṃ niṣpaṅkamāśāspadaṃśrīkaṇṭhetarabhogabandharahitaṃ kalpe kadāpyadbhutam |prajñāśālina eva ditsati bata jñānāṅkuraṃ kasyacitsā saṃvit sukṛtodayā sphuratu naścitte sadā sarvagā || 31||

या चित्रं करिणी हिमाचलभवा ताम्रारविन्देक्षणाकान्त्या भर्त्सयती वरं मरतकं पाशाङ्कुशोक्ष्वन्विता ।पञ्चास्यप्रभुमञ्चकोपरि वसत्यानन्दपुर्यां मुदासा संवित् सुकृतोदया स्फुरतु नश्चित्ते सदा सर्वगा ॥ ३२॥

yā citraṃ kariṇī himācalabhavā tāmrāravindekṣaṇākāntyā bhartsayatī varaṃ maratakaṃ pāśāṅkuśokṣvanvitā |pañcāsyaprabhumañcakopari vasatyānandapuryāṃ mudāsā saṃvit sukṛtodayā sphuratu naścitte sadā sarvagā || 32||

एणाङ्कार्भकमात्मकुन्तलतमोरात्र्यामपि द्योतयत्याश्चर्यं यमिनां कटाक्षयमुनाकल्लोलमालां च या ।नित्यं वक्त्रशशाङ्कमन्दहसितज्योत्स्नां कृपायां गुरोःसा संवित् सुकृतोदया स्फुरतु नश्चित्ते सदा सर्वगा ॥ ३३॥

eṇāṅkārbhakamātmakuntalatamorātryāmapi dyotayatyāścaryaṃ yamināṃ kaṭākṣayamunākallolamālāṃ ca yā |nityaṃ vaktraśaśāṅkamandahasitajyotsnāṃ kṛpāyāṃ guroḥsā saṃvit sukṛtodayā sphuratu naścitte sadā sarvagā || 33||

या दृष्टिः श्रुतिमूलशीलनपरा नीलाञ्जनाद्रिश्रियंस्वात्मस्मेरपयोदधौ सहभवं श्रीवल्लभं तन्वती ।वात्सल्यान्नतलोकमोहितिमिरं चित्रं धुनीते च यासा संवित् सुकृतोदया स्फुरतु नश्चित्ते सदा सर्वगा ॥ ३४॥

yā dṛṣṭiḥ śrutimūlaśīlanaparā nīlāñjanādriśriyaṃsvātmasmerapayodadhau sahabhavaṃ śrīvallabhaṃ tanvatī |vātsalyānnatalokamohitimiraṃ citraṃ dhunīte ca yāsā saṃvit sukṛtodayā sphuratu naścitte sadā sarvagā || 34||

या कारुण्यकटाक्षनीलवनजद्वेष्यात्मजाम्भःस्वहोमुग्धस्निग्धमृदुस्मितामरधुनीवीचीविलासाश्रिते ।सुस्नातं निजपादपङ्कजरजःसिक्तं बत व्यातनोत्सा संवित् सुकृतोदया स्फुरतु नश्चित्ते सदा सर्वगा ॥ ३५॥

yā kāruṇyakaṭākṣanīlavanajadveṣyātmajāmbhaḥsvahomugdhasnigdhamṛdusmitāmaradhunīvīcīvilāsāśrite |susnātaṃ nijapādapaṅkajarajaḥsiktaṃ bata vyātanotsā saṃvit sukṛtodayā sphuratu naścitte sadā sarvagā || 35||

श्रीकण्ठार्धशरीरिणी ध्रुवमपि श्रीकान्तसोदर्यहोनारायण्यपि सर्वदा कुलनगोत्तंसात्मजात्यद्भुतम् ।प्रालेयाचलकन्यकापि सकलाहंरूपिणी याद्भुतम्सा संवित् सुकृतोदया स्फुरतु नश्चित्ते सदा सर्वगा ॥ ३६॥

śrīkaṇṭhārdhaśarīriṇī dhruvamapi śrīkāntasodaryahonārāyaṇyapi sarvadā kulanagottaṃsātmajātyadbhutam |prāleyācalakanyakāpi sakalāhaṃrūpiṇī yādbhutamsā saṃvit sukṛtodayā sphuratu naścitte sadā sarvagā || 36||

आनङ्गस्मृतिसम्प्रदायमखिलं स्वापाङ्गशिष्येण याकामद्रोहिणमेव शिक्षयति हा लोकोत्तरात्यद्भुतम् ।तेनैवात्मपदारविन्दरसपानोथं त्रिलोकेऽन्यथासा संवित् सुकृतोदया स्फुरतु नश्चित्ते सदा सर्वगा ॥ ३७॥

ānaṅgasmṛtisampradāyamakhilaṃ svāpāṅgaśiṣyeṇa yākāmadrohiṇameva śikṣayati hā lokottarātyadbhutam |tenaivātmapadāravindarasapānothaṃ triloke'nyathāsā saṃvit sukṛtodayā sphuratu naścitte sadā sarvagā || 37||

बन्धूकस्तबकं रुचा परिहसत्यम्भोजमप्यद्भुतंकर्णास्येक्षणपाणिना वनचरं मध्येन वक्षोरुहा ।गत्या स्वादुगिरा सुधाकरकलोत्तंसैश्च नीलालकैःसा संवित् सुकृतोदया स्फुरतु नश्चित्ते सदा सर्वगा ॥ ३८॥

bandhūkastabakaṃ rucā parihasatyambhojamapyadbhutaṃkarṇāsyekṣaṇapāṇinā vanacaraṃ madhyena vakṣoruhā |gatyā svādugirā sudhākarakalottaṃsaiśca nīlālakaiḥsā saṃvit sukṛtodayā sphuratu naścitte sadā sarvagā || 38||

निःस्पन्दं निगमागमाद्यविषयं श्रोत्रादिहीनं परंनिःशब्दं तदहो पुमांसमकरोत् कामेश इत्याख्यया ।या चित्रं निजदासमच्छहृदयं शक्त्या तनोत्यन्यथासा संवित् सुकृतोदया स्फुरतु नश्चित्ते सदा सर्वगा ॥ ३९॥

niḥspandaṃ nigamāgamādyaviṣayaṃ śrotrādihīnaṃ paraṃniḥśabdaṃ tadaho pumāṃsamakarot kāmeśa ityākhyayā |yā citraṃ nijadāsamacchahṛdayaṃ śaktyā tanotyanyathāsā saṃvit sukṛtodayā sphuratu naścitte sadā sarvagā || 39||

वागर्थेन यथा युतापि परमानन्दात्मना शूलिनानित्यं या विहरत्यहो जनमनोगेहेषु मुग्धेषु हा ।निर्भीता कुलटेव कर्म कुरुते सर्वेन्द्रियाणां सदासा संवित् सुकृतोदया स्फुरतु नश्चित्ते सदा सर्वगा ॥ ४०॥

vāgarthena yathā yutāpi paramānandātmanā śūlinānityaṃ yā viharatyaho janamanogeheṣu mugdheṣu hā |nirbhītā kulaṭeva karma kurute sarvendriyāṇāṃ sadāsā saṃvit sukṛtodayā sphuratu naścitte sadā sarvagā || 40||

नासामौक्तिकदैत्यदेशिकमहो मन्दस्मितैः पुष्णतीताटङ्कद्युतिभिर्दिनेशशशिनौ देवौ तिरस्कुर्वती ।मारारेर्गुहमेधिनी मनसिजं रक्षत्यपाङ्गोटजेसा संवित् सुकृतोदया स्फुरतु नश्चित्ते सदा सर्वगा ॥ ४१॥

nāsāmauktikadaityadeśikamaho mandasmitaiḥ puṣṇatītāṭaṅkadyutibhirdineśaśaśinau devau tiraskurvatī |mārārerguhamedhinī manasijaṃ rakṣatyapāṅgoṭajesā saṃvit sukṛtodayā sphuratu naścitte sadā sarvagā || 41||

बन्धच्छेदविचक्षणा पशुजनस्तोमातिदूराद्भुतंया रक्षत्यगराजशेखरसुताप्याम्नायसूत्रैर्दृढम् ।बद्ध्वा देवपशून् सदा पशुपतेः संसर्गदोषेण हासा संवित् सुकृतोदया स्फुरतु नश्चित्ते सदा सर्वगा ॥ ४२॥

bandhacchedavicakṣaṇā paśujanastomātidūrādbhutaṃyā rakṣatyagarājaśekharasutāpyāmnāyasūtrairdṛḍham |baddhvā devapaśūn sadā paśupateḥ saṃsargadoṣeṇa hāsā saṃvit sukṛtodayā sphuratu naścitte sadā sarvagā || 42||

धारा देशिकदिव्यदृष्टिमधुनो मारारिनेत्रामृतंधारा दुर्मतदारुदारिपरशोस्तारावलिर्योगिनाम् ।तीरं मन्त्रमहोदधेः कविगिरां पूरः सुखाम्भोनिधेःसा संवित् सुकृतोदया स्फुरतु नश्चित्ते सदा सर्वगा ॥ ४३॥

dhārā deśikadivyadṛṣṭimadhuno mārārinetrāmṛtaṃdhārā durmatadārudāriparaśostārāvaliryoginām |tīraṃ mantramahodadheḥ kavigirāṃ pūraḥ sukhāmbhonidheḥsā saṃvit sukṛtodayā sphuratu naścitte sadā sarvagā || 43||

कामाक्षीति वदन्ति केचन बुधाः कामेश्वरीत्यद्भुतंरामास्तोमशिरोमणीति मदनारातेर्दृशोः पारणा ।सीमा भूमसुखस्य चिन्मयकला शृङ्गारमूर्तिश्च यासा संवित् सुकृतोदया स्फुरतु नश्चित्ते सदा सर्वगा ॥ ४४॥

kāmākṣīti vadanti kecana budhāḥ kāmeśvarītyadbhutaṃrāmāstomaśiromaṇīti madanārāterdṛśoḥ pāraṇā |sīmā bhūmasukhasya cinmayakalā śṛṅgāramūrtiśca yāsā saṃvit sukṛtodayā sphuratu naścitte sadā sarvagā || 44||

मुग्धस्निग्धकटाक्षमित्रतनया यस्याः सदानन्दिनीमन्दस्मेरपयोनिधिं निजपतिं सङ्गम्य वाणीश्रियः ।संसूय प्रददात्ययाचिततत्या भक्तेभ्य एवादरात्सा संवित् सुकृतोदया स्फुरतु नश्चित्ते सदा सर्वगा ॥ ४५॥

mugdhasnigdhakaṭākṣamitratanayā yasyāḥ sadānandinīmandasmerapayonidhiṃ nijapatiṃ saṅgamya vāṇīśriyaḥ |saṃsūya pradadātyayācitatatyā bhaktebhya evādarātsā saṃvit sukṛtodayā sphuratu naścitte sadā sarvagā || 45||

औन्नत्यं मुहुरेति चित्रममरश्रेणीषु यद्योगतोदक्षद्वेष्यपि भिक्षुकोऽपि विषमाक्षोऽप्युक्षयानोऽपि वा ।अज्ञातान्वयसम्भवोऽपि निगमातीतोऽपि लुब्धस्तथासा संवित् सुकृतोदया स्फुरतु नश्चित्ते सदा सर्वगा ॥ ४६॥

aunnatyaṃ muhureti citramamaraśreṇīṣu yadyogatodakṣadveṣyapi bhikṣuko'pi viṣamākṣo'pyukṣayāno'pi vā |ajñātānvayasambhavo'pi nigamātīto'pi lubdhastathāsā saṃvit sukṛtodayā sphuratu naścitte sadā sarvagā || 46||

या लोकैकसुमङ्गला स्मरकला नीलाम्बुदश्यामलाडोला शङ्करलोचनद्वयशिशोर्मालाष्टसिद्धिश्रियाम् ।कालातीतकला कलानिधिकलोत्तंसातुला निर्मलासा संवित् सुकृतोदया स्फुरतु नश्चित्ते सदा सर्वगा ॥ ४७॥

yā lokaikasumaṅgalā smarakalā nīlāmbudaśyāmalāḍolā śaṅkaralocanadvayaśiśormālāṣṭasiddhiśriyām |kālātītakalā kalānidhikalottaṃsātulā nirmalāsā saṃvit sukṛtodayā sphuratu naścitte sadā sarvagā || 47||

अस्तं या नलिनेक्षणेन नयति क्षोभातपं योगिनांस्वानन्दामृतचन्द्रिकां करुणया नित्यं तनोत्यद्भुतम् ।वर्षत्याननपङ्कजे सुकवितापीयूषधाराः कवेःसा संवित् सुकृतोदया स्फुरतु नश्चित्ते सदा सर्वगा ॥ ४८॥

astaṃ yā nalinekṣaṇena nayati kṣobhātapaṃ yogināṃsvānandāmṛtacandrikāṃ karuṇayā nityaṃ tanotyadbhutam |varṣatyānanapaṅkaje sukavitāpīyūṣadhārāḥ kaveḥsā saṃvit sukṛtodayā sphuratu naścitte sadā sarvagā || 48||

या विद्युत्कमलेषु तिष्ठति परा तापिञ्छगुच्छच्छविश्चितं प्राणभृतां दृशोः सुखकरी भीमप्रकाशिन्यलम् ।ज्योतिः शीतलभूभृतस्त्रिभुवनक्षेमप्रवाहप्रदासा संवित् सुकृतोदया स्फुरतु नश्चित्ते सदा सर्वगा ॥ ४९॥

yā vidyutkamaleṣu tiṣṭhati parā tāpiñchagucchacchaviścitaṃ prāṇabhṛtāṃ dṛśoḥ sukhakarī bhīmaprakāśinyalam |jyotiḥ śītalabhūbhṛtastribhuvanakṣemapravāhapradāsā saṃvit sukṛtodayā sphuratu naścitte sadā sarvagā || 49||

या काचिद्धरिणी मरालगमना चिद्व्योमसञ्चारिणीह्रीङ्कारस्वनसन्ततेः परवशा हृद्यानवद्या दृशाम् ।अस्त्रैव्यार्धवरं पिनाकिनमहो संमोहयन्त्यन्वहंसा संवित् सुकृतोदया स्फुरतु नश्चित्ते सदा सर्वगा ॥ ५०॥

yā kāciddhariṇī marālagamanā cidvyomasañcāriṇīhrīṅkārasvanasantateḥ paravaśā hṛdyānavadyā dṛśām |astraivyārdhavaraṃ pinākinamaho saṃmohayantyanvahaṃsā saṃvit sukṛtodayā sphuratu naścitte sadā sarvagā || 50||

धेनुर्या परमात्मनः पशुपतेः सर्वज्ञतादोहिनीचित्रं षण्मुखवक्रतुण्डजननी प्रालेयशैलात्मजा ।निर्निद्रामलपुण्डरीकनयना शुभ्रांशुचूडामणिःसा संवित् सुकृतोदया स्फुरतु नश्चित्ते सदा सर्वगा ॥ ५१॥

dhenuryā paramātmanaḥ paśupateḥ sarvajñatādohinīcitraṃ ṣaṇmukhavakratuṇḍajananī prāleyaśailātmajā |nirnidrāmalapuṇḍarīkanayanā śubhrāṃśucūḍāmaṇiḥsā saṃvit sukṛtodayā sphuratu naścitte sadā sarvagā || 51||

यां दण्डं वरविद्रुमात्मकमतिश्लक्षणं सुसूक्ष्मं ध्रुवंगाढं निर्विषयाः पुराणपुरुषा आलम्ब्य गच्छन्त्यहो ।तीर्त्वा दुस्तरजन्मपङ्कनिबिडं मायामहीमण्डलंसा संवित् सुकृतोदया स्फुरतु नश्चित्ते सदा सर्वगा ॥ ५२॥

yāṃ daṇḍaṃ varavidrumātmakamatiślakṣaṇaṃ susūkṣmaṃ dhruvaṃgāḍhaṃ nirviṣayāḥ purāṇapuruṣā ālambya gacchantyaho |tīrtvā dustarajanmapaṅkanibiḍaṃ māyāmahīmaṇḍalaṃsā saṃvit sukṛtodayā sphuratu naścitte sadā sarvagā || 52||

या कुम्भोद्भव एव मन्मथरिपोर्धैर्याम्बुधेः प्राशनेप्रारब्धात्मकविन्ध्यभूधरगतिध्वंसे तथा धीमताम् ।आचार्यः शिवबोधने निजपतेरानङ्गदीक्षाक्रमेसा संवित् सुकृतोदया स्फुरतु नश्चित्ते सदा सर्वगा ॥ ५३॥

yā kumbhodbhava eva manmatharipordhairyāmbudheḥ prāśaneprārabdhātmakavindhyabhūdharagatidhvaṃse tathā dhīmatām |ācāryaḥ śivabodhane nijapaterānaṅgadīkṣākramesā saṃvit sukṛtodayā sphuratu naścitte sadā sarvagā || 53||

या क्षीराब्धिसहोदरस्मितरुचा कम्बुं तिरस्कुर्वतीकामारेर्हृदयं विशुद्धमपि संमुग्धं करोत्यन्वहम् ।आश्चर्यां नमतां धुनोति तिमिरं स्वाज्ञानरूपं परंसा संवित् सुकृतोदया स्फुरतु नश्चित्ते सदा सर्वगा ॥ ५४॥

yā kṣīrābdhisahodarasmitarucā kambuṃ tiraskurvatīkāmārerhṛdayaṃ viśuddhamapi saṃmugdhaṃ karotyanvaham |āścaryāṃ namatāṃ dhunoti timiraṃ svājñānarūpaṃ paraṃsā saṃvit sukṛtodayā sphuratu naścitte sadā sarvagā || 54||

यस्या हासमरालिकामृदुगतिः श्रीकामजेत्रे मुदाविद्यां बोधयितुं परां वितनुतेऽपाङ्गार्कजातोर्मिषु ।स्थित्वा श्रौतपथस्थकुण्डलयुगेनालोचनासन्ततंसा संवित् सुकृतोदया स्फुरतु नश्चित्ते सदा सर्वगा ॥ ५५॥

yasyā hāsamarālikāmṛdugatiḥ śrīkāmajetre mudāvidyāṃ bodhayituṃ parāṃ vitanute'pāṅgārkajātormiṣu |sthitvā śrautapathasthakuṇḍalayugenālocanāsantataṃsā saṃvit sukṛtodayā sphuratu naścitte sadā sarvagā || 55||

यस्या वीक्षणशक्रमेचकमणीसाम्राज्यसिंहासनंश्रित्वा पुष्पशरप्रभुर्विजयते त्र्यक्षस्य पार्श्वेऽद्भुतम् ।पीयूषार्णवफेनजेतृसहितश्रीचामरासेवितःसा संवित् सुकृतोदया स्फुरतु नश्चित्ते सदा सर्वगा ॥ ५६॥

yasyā vīkṣaṇaśakramecakamaṇīsāmrājyasiṃhāsanaṃśritvā puṣpaśaraprabhurvijayate tryakṣasya pārśve'dbhutam |pīyūṣārṇavaphenajetṛsahitaśrīcāmarāsevitaḥsā saṃvit sukṛtodayā sphuratu naścitte sadā sarvagā || 56||

नीहाराद्रियशोऽभिवर्धनपरे कुञ्जे कटाक्षात्मकेयस्याः क्रीडति नीलकण्ठविमलप्रज्ञामयूरार्भकः ।पश्यन् नित्यसुगन्धिकुन्तलमयीं कादम्बिनीं सन्ततंसा संवित् सुकृतोदया स्फुरतु नश्चित्ते सदा सर्वगा ॥ ५७॥

nīhārādriyaśo'bhivardhanapare kuñje kaṭākṣātmakeyasyāḥ krīḍati nīlakaṇṭhavimalaprajñāmayūrārbhakaḥ |paśyan nityasugandhikuntalamayīṃ kādambinīṃ santataṃsā saṃvit sukṛtodayā sphuratu naścitte sadā sarvagā || 57||

या हासार्जुनभूभृता सुखयति द्राग् भीमचित्तं परंधर्मं पालयति प्रवेशयति वैवर्णेऽनुकूलां गतिम् ।मालिन्यं नयतेतरां ध्रुवमहो तद्धार्तराष्ट्रं कुलंसा संवित् सुकृतोदया स्फुरतु नश्चित्ते सदा सर्वगा ॥ ५८॥

yā hāsārjunabhūbhṛtā sukhayati drāg bhīmacittaṃ paraṃdharmaṃ pālayati praveśayati vaivarṇe'nukūlāṃ gatim |mālinyaṃ nayatetarāṃ dhruvamaho taddhārtarāṣṭraṃ kulaṃsā saṃvit sukṛtodayā sphuratu naścitte sadā sarvagā || 58||

या मुक्ताफलमद्भुतं गिरिभवं श्यामं प्रकाशास्पदंसत्सूत्रं सकलार्थदं शशिकलाचूडं त्रिणेत्रं चरम् ।निर्दोषम्भवकौतुकप्रदमनाद्यन्तं परं निस्तुलंसा संवित् सुकृतोदया स्फुरतु नश्चित्ते सदा सर्वगा ॥ ५९॥

yā muktāphalamadbhutaṃ giribhavaṃ śyāmaṃ prakāśāspadaṃsatsūtraṃ sakalārthadaṃ śaśikalācūḍaṃ triṇetraṃ caram |nirdoṣambhavakautukapradamanādyantaṃ paraṃ nistulaṃsā saṃvit sukṛtodayā sphuratu naścitte sadā sarvagā || 59||

या वापी भुवनप्रदा रसमयी तृष्णार्दितानां परंनिष्पाशाभिगताभिमानममतापाशाभिलाषान्विता ।सत्पात्रे फलदायिनी स्मृतिमतां तापत्रयध्वंसिनीसा संवित् सुकृतोदया स्फुरतु नश्चित्ते सदा सर्वगा ॥ ६०॥

yā vāpī bhuvanapradā rasamayī tṛṣṇārditānāṃ paraṃniṣpāśābhigatābhimānamamatāpāśābhilāṣānvitā |satpātre phaladāyinī smṛtimatāṃ tāpatrayadhvaṃsinīsā saṃvit sukṛtodayā sphuratu naścitte sadā sarvagā || 60||

शृङ्गाराम्बुधवीचिविभ्रमवती शृङ्गारबीजानिलव्यालोला कुमुदप्रियध्वजपटी प्रत्यक्चरी पार्वती ।द्रोणी या विषमेक्षणानुसरणी चित्रं सदा राजतेसा संवित् सुकृतोदया स्फुरतु नश्चित्ते सदा सर्वगा ॥ ६१॥

śṛṅgārāmbudhavīcivibhramavatī śṛṅgārabījānilavyālolā kumudapriyadhvajapaṭī pratyakcarī pārvatī |droṇī yā viṣamekṣaṇānusaraṇī citraṃ sadā rājatesā saṃvit sukṛtodayā sphuratu naścitte sadā sarvagā || 61||

यस्या नीरदभाः कटाक्षयदुपः कर्णानुवृत्तोऽद्भुतंदीव्यत्कुण्डलहासचक्रजलजश्लिष्टः कृपानीरदः ।स्थानोर्गोकुलमन्वहं नयति तद्वक्षोजशैलान्तरंसा संवित् सुकृतोदया स्फुरतु नश्चित्ते सदा सर्वगा ॥ ६२॥

yasyā nīradabhāḥ kaṭākṣayadupaḥ karṇānuvṛtto'dbhutaṃdīvyatkuṇḍalahāsacakrajalajaśliṣṭaḥ kṛpānīradaḥ |sthānorgokulamanvahaṃ nayati tadvakṣojaśailāntaraṃsā saṃvit sukṛtodayā sphuratu naścitte sadā sarvagā || 62||

या चित्रं महतीं महागुणवतीमप्यश्रितं सन्ततंकाठिन्यं न विमुञ्चति स्तनयुगं मान्द्यं गतिः कुन्तलाः ।कौटिल्यं नयनाम्बुजं चपलतां बिम्बाधरो रागितांसा संवित् सुकृतोदया स्फुरतु नश्चित्ते सदा सर्वगा ॥ ६३॥

yā citraṃ mahatīṃ mahāguṇavatīmapyaśritaṃ santataṃkāṭhinyaṃ na vimuñcati stanayugaṃ māndyaṃ gatiḥ kuntalāḥ |kauṭilyaṃ nayanāmbujaṃ capalatāṃ bimbādharo rāgitāṃsā saṃvit sukṛtodayā sphuratu naścitte sadā sarvagā || 63||

या मन्दस्मितकौमुदीं वितनुते नित्योदिते सर्वतस्ताटङ्कात्मनि भास्करे स्वयमहो कालाम्बुदश्यामला ।बिम्बोष्ठद्युतिसन्ध्यया द्विजगणे श्रीशाम्भवे रागितांसा संवित् सुकृतोदया स्फुरतु नश्चित्ते सदा सर्वगा ॥ ६४॥

yā mandasmitakaumudīṃ vitanute nityodite sarvatastāṭaṅkātmani bhāskare svayamaho kālāmbudaśyāmalā |bimboṣṭhadyutisandhyayā dvijagaṇe śrīśāmbhave rāgitāṃsā saṃvit sukṛtodayā sphuratu naścitte sadā sarvagā || 64||

जारे मारकिरातजीवनकरे चित्रं कटाक्षात्मकेयस्याः कुण्डलरश्मिवेणुकलिते लग्ना सुखं राजते ।कामारेर्मतिशारिका श्रुतिशिरोद्यानान्तरोल्लासिनीसा संवित् सुकृतोदया स्फुरतु नश्चित्ते सदा सर्वगा ॥ ६५॥

jāre mārakirātajīvanakare citraṃ kaṭākṣātmakeyasyāḥ kuṇḍalaraśmiveṇukalite lagnā sukhaṃ rājate |kāmārermatiśārikā śrutiśirodyānāntarollāsinīsā saṃvit sukṛtodayā sphuratu naścitte sadā sarvagā || 65||

नित्यं सोमकलाधरोऽध्वरपतिर्व्याघ्राजिनालङ्कृतस्ताटङ्कद्युतिवह्निवीक्षणशिखाधूमातिलोलेक्षणः ।यस्या हासपयोनिधाववभृथव्याजेन मज्जत्यहोसा संवित् सुकृतोदया स्फुरतु नश्चित्ते सदा सर्वगा ॥ ६६॥

nityaṃ somakalādharo'dhvarapatirvyāghrājinālaṅkṛtastāṭaṅkadyutivahnivīkṣaṇaśikhādhūmātilolekṣaṇaḥ |yasyā hāsapayonidhāvavabhṛthavyājena majjatyahosā saṃvit sukṛtodayā sphuratu naścitte sadā sarvagā || 66||

यस्याः कापि दयात्मिका प्रतिदिनं शैलूषबालाद्भुतंनीरागालयकालवर्जितवती निर्मूर्च्छना कामना ।निर्लज्जैव दिगम्बरा नटति हा संमोहशान्त्यै नृणांसा संवित् सुकृतोदया स्फुरतु नश्चित्ते सदा सर्वगा ॥ ६७॥

yasyāḥ kāpi dayātmikā pratidinaṃ śailūṣabālādbhutaṃnīrāgālayakālavarjitavatī nirmūrcchanā kāmanā |nirlajjaiva digambarā naṭati hā saṃmohaśāntyai nṛṇāṃsā saṃvit sukṛtodayā sphuratu naścitte sadā sarvagā || 67||

माङ्गल्यं हरिनीलकान्तिसुगुणं श्लाध्यं सुरस्त्रीजनैर्यस्या मञ्जुलवीक्षणं स्मरहाराजस्य देव्या रतेः ।ओष्ठशीर्वरकुङ्कुमं स्मितमहो स्रङ्माधवी शाश्वतीसा संवित् सुकृतोदया स्फुरतु नश्चित्ते सदा सर्वगा ॥ ६८॥

māṅgalyaṃ harinīlakāntisuguṇaṃ ślādhyaṃ surastrījanairyasyā mañjulavīkṣaṇaṃ smarahārājasya devyā rateḥ |oṣṭhaśīrvarakuṅkumaṃ smitamaho sraṅmādhavī śāśvatīsā saṃvit sukṛtodayā sphuratu naścitte sadā sarvagā || 68||

चित्रं कापि सुधा शिवेतरसुरालभ्या हिमाद्र्युद्भवाद्रुह्यन्ती कुरुविन्दमात्मरुचिभिर्दोषाकरोत्तंसिनी ।आस्ते या मदनज्वरं शशिभृतः सन्धुक्षयन्त्यन्वहंसा संवित् सुकृतोदया स्फुरतु नश्चित्ते सदा सर्वगा ॥ ६९॥

citraṃ kāpi sudhā śivetarasurālabhyā himādryudbhavādruhyantī kuruvindamātmarucibhirdoṣākarottaṃsinī |āste yā madanajvaraṃ śaśibhṛtaḥ sandhukṣayantyanvahaṃsā saṃvit sukṛtodayā sphuratu naścitte sadā sarvagā || 69||

अर्धं राज्यमनन्यसाध्यमखिलैश्चर्यप्रदं शूलिनःशुद्धं मूर्तिमयं ययातिविनयैः प्राप्तं तदन्यत् पुनः ।व्याप्तुं वाञ्छति गारुडोपलवपुः कान्त्या महत्या परंसा संवित् सुकृतोदया स्फुरतु नश्चित्ते सदा सर्वगा ॥ ७०॥

ardhaṃ rājyamananyasādhyamakhilaiścaryapradaṃ śūlinaḥśuddhaṃ mūrtimayaṃ yayātivinayaiḥ prāptaṃ tadanyat punaḥ |vyāptuṃ vāñchati gāruḍopalavapuḥ kāntyā mahatyā paraṃsā saṃvit sukṛtodayā sphuratu naścitte sadā sarvagā || 70||

अर्धं सोमकलाधरी शशिकलाचूडस्य या त्र्यम्बकस्त्र्यक्षाया अथवा सनातनतनू जायापती शाश्वतौ ।एकं वेत्यवधारितुं मुनिवरा अद्याप्यलं नाद्भुतंसा संवित् सुकृतोदया स्फुरतु नश्चित्ते सदा सर्वगा ॥ ७१॥

ardhaṃ somakalādharī śaśikalācūḍasya yā tryambakastryakṣāyā athavā sanātanatanū jāyāpatī śāśvatau |ekaṃ vetyavadhārituṃ munivarā adyāpyalaṃ nādbhutaṃsā saṃvit sukṛtodayā sphuratu naścitte sadā sarvagā || 71||

दारिद्र्यास्तधराधरोऽपि परमं भद्रोदयोऽत्यद्भुतंपापारण्यदवानलोऽपि नमतां कारुण्यधाराधरः ।या दुह्खाम्बुदमालिकापवनराण्नैश्चल्यरूपास्ति वैसा संवित् सुकृतोदया स्फुरतु नश्चित्ते सदा सर्वगा ॥ ७२॥

dāridryāstadharādharo'pi paramaṃ bhadrodayo'tyadbhutaṃpāpāraṇyadavānalo'pi namatāṃ kāruṇyadhārādharaḥ |yā duhkhāmbudamālikāpavanarāṇnaiścalyarūpāsti vaisā saṃvit sukṛtodayā sphuratu naścitte sadā sarvagā || 72||

श्रौतं मार्गमतीत्य गच्छति मुदा कापालिकं दृक् परंमध्यः शून्यमतं गतोऽतिविमले द्वन्द्वे कुचौ द्वैतिनौ ।सौरे कुण्डलयुग्ममात्मरुचिभिर्यस्याः कृपा शाम्भवेसा संवित् सुकृतोदया स्फुरतु नश्चित्ते सदा सर्वगा ॥ ७३॥

śrautaṃ mārgamatītya gacchati mudā kāpālikaṃ dṛk paraṃmadhyaḥ śūnyamataṃ gato'tivimale dvandve kucau dvaitinau |saure kuṇḍalayugmamātmarucibhiryasyāḥ kṛpā śāmbhavesā saṃvit sukṛtodayā sphuratu naścitte sadā sarvagā || 73||

वल्ली कापि शिवाङ्कणे लसति या मन्दस्मितैः पुष्पिताताम्बूलेन सुगन्धिता सुफलिता वक्षोरुहाभ्यां परम् ।कान्त्या पल्लविता कचैर्भ्रमरिता दृग्भ्यां परं पत्रितासा संवित् सुकृतोदया स्फुरतु नश्चित्ते सदा सर्वगा ॥ ७४॥

vallī kāpi śivāṅkaṇe lasati yā mandasmitaiḥ puṣpitātāmbūlena sugandhitā suphalitā vakṣoruhābhyāṃ param |kāntyā pallavitā kacairbhramaritā dṛgbhyāṃ paraṃ patritāsā saṃvit sukṛtodayā sphuratu naścitte sadā sarvagā || 74||

यस्या वीक्षणदेशिकः श्रुतिगतिस्तेजोमयः सर्ववित्सन्तुष्टो जितकामशत्रुरणिमाद्यष्टाभिराराधिता ।सच्चित्सौख्यरतः शिवं नटमपि क्षिप्रं करोत्यद्भुतंसा संवित् सुकृतोदया स्फुरतु नश्चित्ते सदा सर्वगा ॥ ७५॥

yasyā vīkṣaṇadeśikaḥ śrutigatistejomayaḥ sarvavitsantuṣṭo jitakāmaśatruraṇimādyaṣṭābhirārādhitā |saccitsaukhyarataḥ śivaṃ naṭamapi kṣipraṃ karotyadbhutaṃsā saṃvit sukṛtodayā sphuratu naścitte sadā sarvagā || 75||

यस्याश्चारुकपोलदर्पणतले दृष्ट्वा कपर्दी रुषाभीतो जह्नुसुतां मृदुस्मितमयीं सङ्केतमित्थं व्यधात् ।मुग्धे गच्छ निजस्थलं द्रुततर्ं जागर्ति दृष्टिर्यतःसा संवित् सुकृतोदया स्फुरतु नश्चित्ते सदा सर्वगा ॥ ७६॥

yasyāścārukapoladarpaṇatale dṛṣṭvā kapardī ruṣābhīto jahnusutāṃ mṛdusmitamayīṃ saṅketamitthaṃ vyadhāt |mugdhe gaccha nijasthalaṃ drutatarṃ jāgarti dṛṣṭiryataḥsā saṃvit sukṛtodayā sphuratu naścitte sadā sarvagā || 76||

शृङ्गारैकरसं वसन्तसुहृदं कन्दर्पदर्पप्रदंचित्रं कोकनदप्रबोधनकरं चन्द्रोदयं श्रीकरम् ।यस्या हासमयं चिरमप्यास्ते पुराणः शिवःसा संवित् सुकृतोदया स्फुरतु नश्चित्ते सदा सर्वगा ॥ ७७॥

śṛṅgāraikarasaṃ vasantasuhṛdaṃ kandarpadarpapradaṃcitraṃ kokanadaprabodhanakaraṃ candrodayaṃ śrīkaram |yasyā hāsamayaṃ ciramapyāste purāṇaḥ śivaḥsā saṃvit sukṛtodayā sphuratu naścitte sadā sarvagā || 77||

या काचित् पिककामिनी श्रुतिगतिः सप्तस्वरालापिनीनित्यं माधवबोधिनी त्रिभुवने निष्पक्षपाता सुखम् ।चित्रं चूतनवप्रसूनविशिखद्वेष्याश्रये राजतेसा संवित् सुकृतोदया स्फुरतु नश्चित्ते सदा सर्वगा ॥ ७८॥

yā kācit pikakāminī śrutigatiḥ saptasvarālāpinīnityaṃ mādhavabodhinī tribhuvane niṣpakṣapātā sukham |citraṃ cūtanavaprasūnaviśikhadveṣyāśraye rājatesā saṃvit sukṛtodayā sphuratu naścitte sadā sarvagā || 78||

यस्या वीक्षणमान्त्रिकः सुकृतिनामग्रेसरः शङ्करीमन्त्राम्भोनिधिपारगः स्मितविभूत्योच्चालयन् सर्वदा ।द्वेषं शङ्करकर्तृकं सुमशरे विभ्राजते शाश्वतःसा संवित् सुकृतोदया स्फुरतु नश्चित्ते सदा सर्वगा ॥ ७९॥

yasyā vīkṣaṇamāntrikaḥ sukṛtināmagresaraḥ śaṅkarīmantrāmbhonidhipāragaḥ smitavibhūtyoccālayan sarvadā |dveṣaṃ śaṅkarakartṛkaṃ sumaśare vibhrājate śāśvataḥsā saṃvit sukṛtodayā sphuratu naścitte sadā sarvagā || 79||

यस्या दृग्रमणीमणिर्विवदते कामारिसल्लापनेस्वाधीनप्रियया मृदुस्मितशरीरिण्या परं गङ्गया ।आद्याहंश्रुतिमूलगाधरभवा त्वं स्वीकृतेति ध्रुवंसा संवित् सुकृतोदया स्फुरतु नश्चित्ते सदा सर्वगा ॥ ८०॥

yasyā dṛgramaṇīmaṇirvivadate kāmārisallāpanesvādhīnapriyayā mṛdusmitaśarīriṇyā paraṃ gaṅgayā |ādyāhaṃśrutimūlagādharabhavā tvaṃ svīkṛteti dhruvaṃsā saṃvit sukṛtodayā sphuratu naścitte sadā sarvagā || 80||

या काचिद् भुजगी सदा सरलगा पीयूषदायिन्यहोपद्मारण्यविहारिणी श्रुतिमती तेजस्तनूर्निर्भया ।जन्माब्धिप्लववर्धिनी वशयति श्रीनीलकण्ठं दृशासा संवित् सुकृतोदया स्फुरतु नश्चित्ते सदा सर्वगा ॥ ८१॥

yā kācid bhujagī sadā saralagā pīyūṣadāyinyahopadmāraṇyavihāriṇī śrutimatī tejastanūrnirbhayā |janmābdhiplavavardhinī vaśayati śrīnīlakaṇṭhaṃ dṛśāsā saṃvit sukṛtodayā sphuratu naścitte sadā sarvagā || 81||

आस्याम्भोजभवा पतिं निजमनाद्यन्तं कटाक्षात्मकंपृच्छन्तीति पयोनिधेः स्मितमयान्मज्जन्म किं वाम्बुजात् ।यस्या निःस्मरसम्पदं सुधनिकं कर्तुं शिवं काङ्क्षतेसा संवित् सुकृतोदया स्फुरतु नश्चित्ते सदा सर्वगा ॥ ८२॥

āsyāmbhojabhavā patiṃ nijamanādyantaṃ kaṭākṣātmakaṃpṛcchantīti payonidheḥ smitamayānmajjanma kiṃ vāmbujāt |yasyā niḥsmarasampadaṃ sudhanikaṃ kartuṃ śivaṃ kāṅkṣatesā saṃvit sukṛtodayā sphuratu naścitte sadā sarvagā || 82||

यस्याः पाणिपरिग्रहे मृदुतनोर्हेमाद्रिधन्वा शिवःपादान्यासविधौ दृषद्यपि सुरस्त्रीणां पुरो लज्जितः ।मन्दाक्षं गतवाननङ्गकलिकां यां वीक्षितुं नाद्भुतंसा संवित् सुकृतोदया स्फुरतु नश्चित्ते सदा सर्वगा ॥ ८३॥

yasyāḥ pāṇiparigrahe mṛdutanorhemādridhanvā śivaḥpādānyāsavidhau dṛṣadyapi surastrīṇāṃ puro lajjitaḥ |mandākṣaṃ gatavānanaṅgakalikāṃ yāṃ vīkṣituṃ nādbhutaṃsā saṃvit sukṛtodayā sphuratu naścitte sadā sarvagā || 83||

यस्याः पादकेशशयश्रियमहो श्रुत्वानिलादन्वहंगाङ्गान्यम्बुरुहाणि हन्त कतिचित् प्राप्तुं परां तां द्रुतम् ।पीत्वा क्षीरलवं तपन्ति तपनं पश्यन्ति मज्जन्त्यलंसा संवित् सुकृतोदया स्फुरतु नश्चित्ते सदा सर्वगा ॥ ८४॥

yasyāḥ pādakeśaśayaśriyamaho śrutvānilādanvahaṃgāṅgānyamburuhāṇi hanta katicit prāptuṃ parāṃ tāṃ drutam |pītvā kṣīralavaṃ tapanti tapanaṃ paśyanti majjantyalaṃsā saṃvit sukṛtodayā sphuratu naścitte sadā sarvagā || 84||

नित्यं सन्धिमपेक्षते सुचरिता दूती कटाक्षात्मिकाराजस्याधररामयापि न तया गर्भे वहन्त्यामृतम् ।कामारे रतिसात्त्विकद्विजमणेर्मोदाय सुश्रेयसेसा संवित् सुकृतोदया स्फुरतु नश्चित्ते सदा सर्वगा ॥ ८५॥

nityaṃ sandhimapekṣate sucaritā dūtī kaṭākṣātmikārājasyādhararāmayāpi na tayā garbhe vahantyāmṛtam |kāmāre ratisāttvikadvijamaṇermodāya suśreyasesā saṃvit sukṛtodayā sphuratu naścitte sadā sarvagā || 85||

पक्षे शैवमनोमहीभृति मनोजाग्निं ध्रुवं साधयन्यस्या मञ्जुकटाक्षधूमशिशुना श्रौतेन सद्धेतुना ।ओष्ठद्वन्द्वसभान्तरे स्मितमयो नैयायिको भासतेसा संवित् सुकृतोदया स्फुरतु नश्चित्ते सदा सर्वगा ॥ ८६॥

pakṣe śaivamanomahībhṛti manojāgniṃ dhruvaṃ sādhayanyasyā mañjukaṭākṣadhūmaśiśunā śrautena saddhetunā |oṣṭhadvandvasabhāntare smitamayo naiyāyiko bhāsatesā saṃvit sukṛtodayā sphuratu naścitte sadā sarvagā || 86||

या पद्मं हिमशैलजं मरतकं भासा भृशं भर्त्सयत्कन्दर्पस्य ज्येन्दिराजनिगृहं निर्हेतुकोत्फुल्लनम् ।स्थाणोर्लोचनभृङ्गसम्भ्रमकरं शीतांशुलेखाङ्कितंसा संवित् सुकृतोदया स्फुरतु नश्चित्ते सदा सर्वगा ॥ ८७॥

yā padmaṃ himaśailajaṃ maratakaṃ bhāsā bhṛśaṃ bhartsayatkandarpasya jyendirājanigṛhaṃ nirhetukotphullanam |sthāṇorlocanabhṛṅgasambhramakaraṃ śītāṃśulekhāṅkitaṃsā saṃvit sukṛtodayā sphuratu naścitte sadā sarvagā || 87||

यस्या मन्दगतिः परं शुभगतिः कामस्य कामद्रुहःकामोद्रेकगतिश्चिरं भजनकृद्धंसाङ्गनासन्ततेः ।कामं दत्तगतिः सदा विजयते हंसात्मिका योगिनांसा संवित् सुकृतोदया स्फुरतु नश्चित्ते सदा सर्वगा ॥ ८८॥

yasyā mandagatiḥ paraṃ śubhagatiḥ kāmasya kāmadruhaḥkāmodrekagatiściraṃ bhajanakṛddhaṃsāṅganāsantateḥ |kāmaṃ dattagatiḥ sadā vijayate haṃsātmikā yogināṃsā saṃvit sukṛtodayā sphuratu naścitte sadā sarvagā || 88||

निःस्नेहापि शिवातिरागकलिता या दीपिका काप्यहोझञ्झामारुतभीतिदापि चपला निष्कल्मषा साञ्जना ।त्रैलोक्येऽपि विराजते श्रितवती श्रीशङ्कराङ्कं ध्रुवंसा संवित् सुकृतोदया स्फुरतु नश्चित्ते सदा सर्वगा ॥ ८९॥

niḥsnehāpi śivātirāgakalitā yā dīpikā kāpyahojhañjhāmārutabhītidāpi capalā niṣkalmaṣā sāñjanā |trailokye'pi virājate śritavatī śrīśaṅkarāṅkaṃ dhruvaṃsā saṃvit sukṛtodayā sphuratu naścitte sadā sarvagā || 89||

निर्यत्नैव महासती सुचरिता या शैलराजात्मजानाथं लोकविलक्षणं प्रहृतवत्यद्यापि सेवाजने ।गाण्डीवेन वराश्मभिश्च मुसलेनोपानहा वर्ततेसा संवित् सुकृतोदया स्फुरतु नश्चित्ते सदा सर्वगा ॥ ९०॥

niryatnaiva mahāsatī sucaritā yā śailarājātmajānāthaṃ lokavilakṣaṇaṃ prahṛtavatyadyāpi sevājane |gāṇḍīvena varāśmabhiśca musalenopānahā vartatesā saṃvit sukṛtodayā sphuratu naścitte sadā sarvagā || 90||

यस्याः पादकिसालयप्रभुवरं याचन्त्यजस्रं परंकस्तूर्यः सुरयोषितां तिलकिताः सद्वासनां रागिताम् ।बिम्बोष्ठं मृदुतां श्रियं च युगपद्धस्ताः प्रवालप्रियाःसा संवित् सुकृतोदया स्फुरतु नश्चित्ते सदा सर्वगा ॥ ९१॥

yasyāḥ pādakisālayaprabhuvaraṃ yācantyajasraṃ paraṃkastūryaḥ surayoṣitāṃ tilakitāḥ sadvāsanāṃ rāgitām |bimboṣṭhaṃ mṛdutāṃ śriyaṃ ca yugapaddhastāḥ pravālapriyāḥsā saṃvit sukṛtodayā sphuratu naścitte sadā sarvagā || 91||

यस्याः पादसहस्ररश्मिचरलं कामारिचित्तात्मकंहैमं भ्रामयति प्रणाशयति सन्तापं सतामङ्कुरम् ।प्रज्ञानात्मकमद्भुतं शिशिरयत्यक्षीण्यलं पश्यतांसा संवित् सुकृतोदया स्फुरतु नश्चित्ते सदा सर्वगा ॥ ९२॥

yasyāḥ pādasahasraraśmicaralaṃ kāmāricittātmakaṃhaimaṃ bhrāmayati praṇāśayati santāpaṃ satāmaṅkuram |prajñānātmakamadbhutaṃ śiśirayatyakṣīṇyalaṃ paśyatāṃsā saṃvit sukṛtodayā sphuratu naścitte sadā sarvagā || 92||

चित्रं या कुरुते मनोऽपि यमिनां बद्धं महायत्नतोमुक्तं शोणपदारविन्दयुगले नीरागिणं रागिणम् ।मञ्जीरस्वनमन्मथस्मितरवैः संमोहनं शूलिनःसा संवित् सुकृतोदया स्फुरतु नश्चित्ते सदा सर्वगा ॥ ९३॥

citraṃ yā kurute mano'pi yamināṃ baddhaṃ mahāyatnatomuktaṃ śoṇapadāravindayugale nīrāgiṇaṃ rāgiṇam |mañjīrasvanamanmathasmitaravaiḥ saṃmohanaṃ śūlinaḥsā saṃvit sukṛtodayā sphuratu naścitte sadā sarvagā || 93||

पादाम्भोजरजो रजांसि हरति प्रौढानि यस्या नृणांसत्त्वं वर्धयति प्रदर्शयति सन्मार्गं सुराणामपि ।जन्मव्याधिमृतिप्रवाहमतुलं संरोधयत्यद्भुतंसा संवित् सुकृतोदया स्फुरतु नश्चित्ते सदा सर्वगा ॥ ९४॥

pādāmbhojarajo rajāṃsi harati prauḍhāni yasyā nṛṇāṃsattvaṃ vardhayati pradarśayati sanmārgaṃ surāṇāmapi |janmavyādhimṛtipravāhamatulaṃ saṃrodhayatyadbhutaṃsā saṃvit sukṛtodayā sphuratu naścitte sadā sarvagā || 94||

नाहं विश्वमिदं चराचरमयं मायाविलासास्पदंदृश्यत्वादिति शोधयन्ति सुधियः सर्वं यया प्रज्ञया ।आत्मैवायमिदं वदन्ति पुनस्तूष्णीम्भवन्तः स्थिताःसा संवित् सुकृतोदया स्फुरतु नश्चित्ते सदा सर्वगा ॥ ९५॥

nāhaṃ viśvamidaṃ carācaramayaṃ māyāvilāsāspadaṃdṛśyatvāditi śodhayanti sudhiyaḥ sarvaṃ yayā prajñayā |ātmaivāyamidaṃ vadanti punastūṣṇīmbhavantaḥ sthitāḥsā saṃvit sukṛtodayā sphuratu naścitte sadā sarvagā || 95||

राहुं निन्दति चन्द्रचूडचिकुरैस्ताटङ्ककान्त्या रविंवक्त्राब्जेन विधुं गुरुं नतगिरा सौग्यं दृशा भद्रया ।गत्या मन्दमहो कुजं तनुरुचा नासाग्रमण्या कविंसा संवित् सुकृतोदया स्फुरतु नश्चित्ते सदा सर्वगा ॥ ९६॥

rāhuṃ nindati candracūḍacikuraistāṭaṅkakāntyā raviṃvaktrābjena vidhuṃ guruṃ natagirā saugyaṃ dṛśā bhadrayā |gatyā mandamaho kujaṃ tanurucā nāsāgramaṇyā kaviṃsā saṃvit sukṛtodayā sphuratu naścitte sadā sarvagā || 96||

निःश्रेणी कृतिनां परामृतफलप्राप्तौ प्रवालद्युतिर्या नीलाञ्जनमक्षरात्मकनिधेः सन्दर्शने श्रीमताम् ।नित्यानन्दरसा परोक्षकरणे श्रीदेशिकश्रीकृपासा संवित् सुकृतोदया स्फुरतु नश्चित्ते सदा सर्वगा ॥ ९७॥

niḥśreṇī kṛtināṃ parāmṛtaphalaprāptau pravāladyutiryā nīlāñjanamakṣarātmakanidheḥ sandarśane śrīmatām |nityānandarasā parokṣakaraṇe śrīdeśikaśrīkṛpāsā saṃvit sukṛtodayā sphuratu naścitte sadā sarvagā || 97||

या कुण्ठीकुरुते निजस्तुतिविधौ गर्वात् प्रवृत्तां गिरंवेदानामपि गीष्पतेरपि महाभाष्यार्थविज्ञानिनः ।दत्ते वाग्भववैभवामृतझरीं मूकाज्ञयोर्वाग्मितांसा संवित् सुकृतोदया स्फुरतु नश्चित्ते सदा सर्वगा ॥ ९८॥

yā kuṇṭhīkurute nijastutividhau garvāt pravṛttāṃ giraṃvedānāmapi gīṣpaterapi mahābhāṣyārthavijñāninaḥ |datte vāgbhavavaibhavāmṛtajharīṃ mūkājñayorvāgmitāṃsā saṃvit sukṛtodayā sphuratu naścitte sadā sarvagā || 98||

आद्यामम्बुरुहेक्षणामनुपमामापीनतुङ्गस्तनीमार्यामागमसारमूर्तिमरुणामानन्दचन्द्राननाम् ।साध्वीं सत्कविवाग्झरीं समरसानन्दामृतस्यन्दिनींसा संवित् सुकृतोदया स्फुरतु नश्चित्ते सदा सर्वगा ॥ ९९॥

ādyāmamburuhekṣaṇāmanupamāmāpīnatuṅgastanīmāryāmāgamasāramūrtimaruṇāmānandacandrānanām |sādhvīṃ satkavivāgjharīṃ samarasānandāmṛtasyandinīṃsā saṃvit sukṛtodayā sphuratu naścitte sadā sarvagā || 99||

गुरुचरणसरोजं गुप्तगङ्गातरङ्गस्तिमितममितशुक्लज्योतिषां ज्योतिरेकम् ।निरुपममकरन्दस्पन्दमानन्दकन्दंनिधनजननहीनो निर्मलोऽहं निषेवे ॥ १००॥

gurucaraṇasarojaṃ guptagaṅgātaraṅgastimitamamitaśuklajyotiṣāṃ jyotirekam |nirupamamakarandaspandamānandakandaṃnidhanajananahīno nirmalo'haṃ niṣeve || 100||

शार्दूलवृत्तमपि साधु भवत्यहो तत्सारस्वतं समरसामृतलोचनानाम् ।सद्यो जयत्यघरिपुं श्रुतिमार्गयोगात्त्यागेशसान्द्रकरुणाद्भुतमेव भद्रम् ॥ १०१॥

śārdūlavṛttamapi sādhu bhavatyaho tatsārasvataṃ samarasāmṛtalocanānām |sadyo jayatyagharipuṃ śrutimārgayogāttyāgeśasāndrakaruṇādbhutameva bhadram || 101||

इत्यानन्दनाथपादपपद्मोपजीविना काश्यपगोत्रोत्पन्नेनान्ध्रेणत्यागराजनाम्ना विरचितं संविच्छतकं सम्पूर्णम् ।

ityānandanāthapādapapadmopajīvinā kāśyapagotrotpannenāndhreṇatyāgarājanāmnā viracitaṃ saṃvicchatakaṃ sampūrṇam |