दुर्गास्तोत्रम् १९ Durga Stotram

ब्रह्मविष्णुशिवादीनां पूज्यां वन्द्यां सनातनीम् ।नारायणीं विष्णुमायां वैष्णवीं विष्णुभक्तिदाम् ॥ ९॥

brahmaviṣṇuśivādīnāṃ pūjyāṃ vandyāṃ sanātanīm |nārāyaṇīṃ viṣṇumāyāṃ vaiṣṇavīṃ viṣṇubhaktidām || 9||

सर्वस्वरूपां सर्वेषां सर्वाधारां परात्पराम् ।सर्वविद्यासर्वमन्त्रसर्वशक्तिस्वरूपिणीम् ॥ १०॥

sarvasvarūpāṃ sarveṣāṃ sarvādhārāṃ parātparām |sarvavidyāsarvamantrasarvaśaktisvarūpiṇīm || 10||

सगुणां निर्गुणां सत्त्वां वरां स्वेच्छामयीं सतीम् ।महाविष्णोश्च जननीं कृष्णस्यार्द्धाङ्गसम्भवाम् ॥ ११॥

saguṇāṃ nirguṇāṃ sattvāṃ varāṃ svecchāmayīṃ satīm |mahāviṣṇośca jananīṃ kṛṣṇasyārddhāṅgasambhavām || 11||

कृष्णप्रियां कृष्णशक्तिं कृष्णबुद्।ह्ध्यधिदेवताम् ।कृष्णस्तुतां कृष्णपूज्यां कृष्णवन्द्यां कृपामयीम् ॥ १२॥

kṛṣṇapriyāṃ kṛṣṇaśaktiṃ kṛṣṇabud|hdhyadhidevatām |kṛṣṇastutāṃ kṛṣṇapūjyāṃ kṛṣṇavandyāṃ kṛpāmayīm || 12||

तप्तकाञ्चनवर्णाभां कोटिसूर्यसमप्रभाम् ।ईषद्धास्यप्रसन्नास्यां भक्तानुग्रहकारिकाम् ॥ १३॥

taptakāñcanavarṇābhāṃ koṭisūryasamaprabhām |īṣaddhāsyaprasannāsyāṃ bhaktānugrahakārikām || 13||

दुर्गां शतभुजां देवीं महद्दुर्गतिनाशिनीम् ।त्रिलोचनप्रियां साध्वीं त्रिगुणां च त्रिलोचनाम् ॥ १४॥

durgāṃ śatabhujāṃ devīṃ mahaddurgatināśinīm |trilocanapriyāṃ sādhvīṃ triguṇāṃ ca trilocanām || 14||

त्रिलोचनप्राणरूपां शुद्धार्द्धचन्द्रशेखराम् ।बिभ्रतीं कबरीभारं मालतीमाल्यमण्डितम् ॥ १५॥

trilocanaprāṇarūpāṃ śuddhārddhacandraśekharām |bibhratīṃ kabarībhāraṃ mālatīmālyamaṇḍitam || 15||

वर्तुलं वामवक्त्रं च शम्भोर्मानसमोहिनीम् ।रत्नकुण्डलयुग्मेन गण्डस्थलविराजिताम् ॥ १६॥

vartulaṃ vāmavaktraṃ ca śambhormānasamohinīm |ratnakuṇḍalayugmena gaṇḍasthalavirājitām || 16||

नासादक्षिणभागेन बिभ्रतीं गजमौक्तिकम् ।अमूल्यरत्नं बहुलं बिभ्रतीं श्रवणोपरि ॥ १७॥

nāsādakṣiṇabhāgena bibhratīṃ gajamauktikam |amūlyaratnaṃ bahulaṃ bibhratīṃ śravaṇopari || 17||

मुक्तापङ्क्तिविनिन्द्यैकदन्तपङ्क्तिसुशोभिताम् ।पक्वबिम्बाधरोष्ठीं च सुप्रसन्नां सुमङ्गलाम् ॥ १८॥

muktāpaṅktivinindyaikadantapaṅktisuśobhitām |pakvabimbādharoṣṭhīṃ ca suprasannāṃ sumaṅgalām || 18||

चित्रपत्रावलीरम्यकपोलयुगलोज्ज्वलाम् ।रत्नकेयूरवलयरत्नमञ्जीररञ्जिताम् ॥ १९॥

citrapatrāvalīramyakapolayugalojjvalām |ratnakeyūravalayaratnamañjīrarañjitām || 19||

रत्नकङ्कणभूषाढ्यां रत्नपाशाङ्कशोभिताम् ।रत्नाङ्गुलीयनिकरैः कराङ्गुलिचयोज्ज्वलाम् ॥ २०॥

ratnakaṅkaṇabhūṣāḍhyāṃ ratnapāśāṅkaśobhitām |ratnāṅgulīyanikaraiḥ karāṅgulicayojjvalām || 20||

पादाङ्गुलिनखासक्तालक्तरेखासुशोभनाम् ।वह्निशुद्धांशुकाधानां गन्धचन्दनचर्चिताम् ॥ २१॥

pādāṅgulinakhāsaktālaktarekhāsuśobhanām |vahniśuddhāṃśukādhānāṃ gandhacandanacarcitām || 21||

बिभ्रतीं स्तनयुग्मं च कस्तूरीबिन्दुशोभितम् ।सर्वरूपगुणवतीं गजेन्द्रमन्दगामिनीम् ॥ २२॥

bibhratīṃ stanayugmaṃ ca kastūrībinduśobhitam |sarvarūpaguṇavatīṃ gajendramandagāminīm || 22||

अतीव कान्तां शान्तां च नितान्तां योगसिद्धिषु ।विधातुश्च विधात्रीं च सर्वधात्रीं च शङ्करीम् ॥ २३॥

atīva kāntāṃ śāntāṃ ca nitāntāṃ yogasiddhiṣu |vidhātuśca vidhātrīṃ ca sarvadhātrīṃ ca śaṅkarīm || 23||

शरत्पार्वणचन्द्रास्यामतीव सुमनोहराम् ।कस्तूरीबिन्दुभिः सार्द्धमधश्चन्दनबिन्दुना ॥ २४॥

śaratpārvaṇacandrāsyāmatīva sumanoharām |kastūrībindubhiḥ sārddhamadhaścandanabindunā || 24||

सिन्दूरबिन्दुना शश्वद्भालमध्यस्थलोज्ज्वलाम् ।शरन्मध्याह्नकमलप्रभामोचनलोचनाम् ॥ २५॥

sindūrabindunā śaśvadbhālamadhyasthalojjvalām |śaranmadhyāhnakamalaprabhāmocanalocanām || 25||

चारुकज्जलरेखाभ्यां सर्वतश्च समुज्ज्वलाम् ।कोटिकन्दर्पलावण्यलीलानिन्दितविग्रहाम् ॥ २६॥

cārukajjalarekhābhyāṃ sarvataśca samujjvalām |koṭikandarpalāvaṇyalīlāninditavigrahām || 26||

रत्नसिंहासनस्थां च सद्रत्नमुकुटोज्ज्वलाम् ।सृष्टौ स्रष्टुः शिल्परूपां दयां पातुश्च पालने ॥ २७॥

ratnasiṃhāsanasthāṃ ca sadratnamukuṭojjvalām |sṛṣṭau sraṣṭuḥ śilparūpāṃ dayāṃ pātuśca pālane || 27||

संहारकाले संहर्त्तुः परां संहाररूपिणीम् ।निशुम्भशुम्भमथिनीं महिषासुरमर्दिनीम् ॥ २८॥

saṃhārakāle saṃharttuḥ parāṃ saṃhārarūpiṇīm |niśumbhaśumbhamathinīṃ mahiṣāsuramardinīm || 28||

पुरा त्रिपुरयुद्धे च संस्तुता त्रिपुरारिणा ।मधुकैटभयोर्युद्धे विष्णुशक्तिस्वरूपिणीम् ॥ २९॥

purā tripurayuddhe ca saṃstutā tripurāriṇā |madhukaiṭabhayoryuddhe viṣṇuśaktisvarūpiṇīm || 29||

सर्वदैत्यनिहन्त्रीं च रक्तबीजविनाशिनीम् ।नृसिंहशक्तिरूपां च हिरण्यकशिपोर्वधे ॥ ३०॥

sarvadaityanihantrīṃ ca raktabījavināśinīm |nṛsiṃhaśaktirūpāṃ ca hiraṇyakaśiporvadhe || 30||

वराहशक्तिं वाराहे हिरण्याक्षवधे तथा ।परब्रह्मस्वरूपां च सर्वशक्तिं सदा भजे ॥ ३१॥

varāhaśaktiṃ vārāhe hiraṇyākṣavadhe tathā |parabrahmasvarūpāṃ ca sarvaśaktiṃ sadā bhaje || 31||

इति ध्यात्वा स्वशिरसि पुष्पं दत्त्वा विचक्षणः ।पुनर्ध्यात्वा चैव भक्त्या कुर्यादावाहनं ततः ॥ ३२॥

iti dhyātvā svaśirasi puṣpaṃ dattvā vicakṣaṇaḥ |punardhyātvā caiva bhaktyā kuryādāvāhanaṃ tataḥ || 32||

इति श्रीब्रह्मवैवर्त्ते महापुराणे द्वितीये प्रकृतिखण्डेचतुष्षष्टितमाध्यायान्तर्गतं दुर्गास्तोत्रं समाप्तम् ।ब्रह्मवैवर्तपुराण । प्रकृतिखण्ड । अध्याय ६४/९३१॥ब्रह्मवैवर्तपुराण । प्रकृतिखण्ड । अध्याय ६४/९-३१॥

iti śrībrahmavaivartte mahāpurāṇe dvitīye prakṛtikhaṇḍecatuṣṣaṣṭitamādhyāyāntargataṃ durgāstotraṃ samāptam |brahmavaivartapurāṇa | prakṛtikhaṇḍa | adhyāya 64/931||brahmavaivartapurāṇa | prakṛtikhaṇḍa | adhyāya 64/9-31||