दुर्गास्तोत्रम् २१ Devaih Kritam 08 Durga Stotram

देवाः कैलासमासाद्य सुस्थाने प्रणिपद्य च ।सस्मरुश्च प्रणेमुश्च तुष्टुवुश्च तदा सतीम् ॥ ३॥

devāḥ kailāsamāsādya susthāne praṇipadya ca |sasmaruśca praṇemuśca tuṣṭuvuśca tadā satīm || 3||

देव्युभे ओमिति त्वं वै गायत्री परमेश्वरी ।पूजिता ब्रह्ममुनिभिरूर्जिता राजभिर्नृपैः ॥ ४॥

devyubhe omiti tvaṃ vai gāyatrī parameśvarī |pūjitā brahmamunibhirūrjitā rājabhirnṛpaiḥ || 4||

त्वं भूरितिविड्भिः पृथ्वी शूद्रैः शिवेति पूजिता ।क्षान्तिर्मुनीनामक्षोभ्या दया नियमिनामपि ॥ ५॥

tvaṃ bhūritiviḍbhiḥ pṛthvī śūdraiḥ śiveti pūjitā |kṣāntirmunīnāmakṣobhyā dayā niyamināmapi || 5||

त्वं महोपायसन्दोहा नीतिर्नयविसर्पिणाम् ।परिचितिस्त्वमर्थानां त्वमीहा प्राणिहृच्छ्रया ॥ ६॥

tvaṃ mahopāyasandohā nītirnayavisarpiṇām |paricitistvamarthānāṃ tvamīhā prāṇihṛcchrayā || 6||

त्वं मुक्तिः सर्वभूतानां त्वं मतिः सर्वदेहिनाम् ।ईतिस्त्वं रक्तचित्तानां प्रीतिस्त्वं हृदि देहिनाम् ॥ ७॥

tvaṃ muktiḥ sarvabhūtānāṃ tvaṃ matiḥ sarvadehinām |ītistvaṃ raktacittānāṃ prītistvaṃ hṛdi dehinām || 7||

त्वं कीर्तिः सत्यभूतानां त्वं शान्तिर्दुष्टकर्मणाम् ।त्वं भ्रान्तिः सर्वभूतानां त्वं गतिः क्रतुयाजिनाम् ॥ ८॥

tvaṃ kīrtiḥ satyabhūtānāṃ tvaṃ śāntirduṣṭakarmaṇām |tvaṃ bhrāntiḥ sarvabhūtānāṃ tvaṃ gatiḥ kratuyājinām || 8||

त्वं समुद्रमहावेला त्वं च लीला विलासिनाम् ।सम्भूतिस्त्वं पदार्थानां स्थितिस्त्वं लोकपालिनाम् ॥ ९॥

tvaṃ samudramahāvelā tvaṃ ca līlā vilāsinām |sambhūtistvaṃ padārthānāṃ sthitistvaṃ lokapālinām || 9||

त्वं कालरात्रिर्निःशेषभुवनावलिवासिनी ।प्रियकण्ठग्रहानन्ददायिनी त्वं विभावरी ॥ १०॥

tvaṃ kālarātrirniḥśeṣabhuvanāvalivāsinī |priyakaṇṭhagrahānandadāyinī tvaṃ vibhāvarī || 10||

रक्षिका त्वमनाथानां दर्शनं देहि चाम्बिके ।अनेकैर्विविधैर्लोके रूपैर्देवि त्वमर्चिता ॥ ११॥

rakṣikā tvamanāthānāṃ darśanaṃ dehi cāmbike |anekairvividhairloke rūpairdevi tvamarcitā || 11||

सदा शिवप्रिये दुर्गे त्वां नमामो महेश्वरि ।श्रीशक्तिं पावनीं पुष्टिं महदव्यक्तरूपिणीम् ॥ १२॥

sadā śivapriye durge tvāṃ namāmo maheśvari |śrīśaktiṃ pāvanīṃ puṣṭiṃ mahadavyaktarūpiṇīm || 12||

वयं नमामहे भक्त्या शुद्धां ब्रह्मपरायणाम् ।अन्तर्विद्यासुविद्याभ्यां सुप्रीतां त्वां नमामहे ॥ १३॥

vayaṃ namāmahe bhaktyā śuddhāṃ brahmaparāyaṇām |antarvidyāsuvidyābhyāṃ suprītāṃ tvāṃ namāmahe || 13||

त्वं दीधितिः सूर्यगता कौमुदी चन्द्रसङ्गता ।आप्याययसि ब्रह्मादितृणान्तं त्वां नमामहे ॥ १४॥

tvaṃ dīdhitiḥ sūryagatā kaumudī candrasaṅgatā |āpyāyayasi brahmāditṛṇāntaṃ tvāṃ namāmahe || 14||

गायत्री त्वं वेदमाता त्वं सावित्री सरस्वती ।त्वं वार्ता सर्वजगतां त्वं त्रयी धर्मरूपिणी ॥ १५॥

gāyatrī tvaṃ vedamātā tvaṃ sāvitrī sarasvatī |tvaṃ vārtā sarvajagatāṃ tvaṃ trayī dharmarūpiṇī || 15||

त्वं निद्रा सर्वभूतेषु क्षुधा तृप्तिस्त्वमेव ह ।त्वं लक्ष्मीः पुण्यकर्तॄणामलक्ष्मीः पापिनां तथा ॥ १६॥

tvaṃ nidrā sarvabhūteṣu kṣudhā tṛptistvameva ha |tvaṃ lakṣmīḥ puṇyakartṝṇāmalakṣmīḥ pāpināṃ tathā || 16||

त्वं शान्तिः सर्वजगतां त्वं धात्री प्राणपोषिणी ।गीतिस्त्वं सामवेदस्य ग्रन्थिस्त्वं यजुषां हुतिः ॥ १७॥

tvaṃ śāntiḥ sarvajagatāṃ tvaṃ dhātrī prāṇapoṣiṇī |gītistvaṃ sāmavedasya granthistvaṃ yajuṣāṃ hutiḥ || 17||

ऋग्वेदस्य तथा मात्राऽथर्वणस्य परा गतिः ।समस्तगीर्वाणशक्तिर्दुःखनिस्तारकारिणी ॥ १८॥

ṛgvedasya tathā mātrā'tharvaṇasya parā gatiḥ |samastagīrvāṇaśaktirduḥkhanistārakāriṇī || 18||

शिवे रुद्राणि सन्निद्रे चण्डे कात्यायनि सति ।कौशिकि चण्डिके कालि नारायणि नमोऽस्तु ते ॥ १९॥

śive rudrāṇi sannidre caṇḍe kātyāyani sati |kauśiki caṇḍike kāli nārāyaṇi namo'stu te || 19||

तपःप्रिये सदादृश्ये पार्वति ते नमोनमः ।प्रसन्ना भव देवेशि दर्शनं देहि सुव्रते ॥ २०॥

tapaḥpriye sadādṛśye pārvati te namonamaḥ |prasannā bhava deveśi darśanaṃ dehi suvrate || 20||

मेनायां लभ पुत्रीत्वं महादेवि नमोऽस्तु ते ।इत्थं देवैः स्तुता देवी दुर्गा दुर्गतिनाशिनी ॥ २१॥

menāyāṃ labha putrītvaṃ mahādevi namo'stu te |itthaṃ devaiḥ stutā devī durgā durgatināśinī || 21||

आविर्बभूव देवानां पुरतो जगदम्बिका ।बभूवाऽऽनन्दसन्दोहः सर्वेषां त्रिदिवौकसाम् ॥ २२॥

āvirbabhūva devānāṃ purato jagadambikā |babhūvā''nandasandohaḥ sarveṣāṃ tridivaukasām || 22||

इति श्रीलक्ष्मीनारायणीयसंहितायां प्रथमे कृतयुगसन्ताने १८०अध्यायान्तर्गतंदेवैः कृतं दुर्गास्तोत्रं सम्पूर्णम् ।लक्ष्मीनारायणीयसंहिता । खण्ड १। अध्याय १८०/३२२॥लक्ष्मीनारायणीयसंहिता । खण्ड १। अध्याय १८०/३-२२॥

iti śrīlakṣmīnārāyaṇīyasaṃhitāyāṃ prathame kṛtayugasantāne 180adhyāyāntargataṃdevaiḥ kṛtaṃ durgāstotraṃ sampūrṇam |lakṣmīnārāyaṇīyasaṃhitā | khaṇḍa 1| adhyāya 180/322||lakṣmīnārāyaṇīyasaṃhitā | khaṇḍa 1| adhyāya 180/3-22||