नक्षत्रमालिकास्तोत्रम् Nakshatramalika Stotram

गोदावर्या महानद्या उत्तरे सिंहपर्वते ।सुपुण्ये माहुरपुरे सर्वतीर्थसमन्विते ॥ १॥

godāvaryā mahānadyā uttare siṃhaparvate |supuṇye māhurapure sarvatīrthasamanvite || 1||

जज्ञेऽत्रेरनसूयायां प्रदोषे बुधवासरे ।मार्गशीष्र्यां महायोगी दत्तात्रेयो दिगम्बरः ॥ २॥

jajñe'treranasūyāyāṃ pradoṣe budhavāsare |mārgaśīṣryāṃ mahāyogī dattātreyo digambaraḥ || 2||

मालां कुण्डीं च डमरुं शूलं शङ्खं सुदर्शनम् ।दधानः षड्भुजैस्त्र्यात्मा योगमार्गप्रवर्तकः ॥ ३॥

mālāṃ kuṇḍīṃ ca ḍamaruṃ śūlaṃ śaṅkhaṃ sudarśanam |dadhānaḥ ṣaḍbhujaistryātmā yogamārgapravartakaḥ || 3||

भस्मोद्धूलितसर्वाङ्गो जटाजूटविराजितः ।रुद्राक्षभूषिततनुः शाम्भवीमुद्रया युतः ॥ ४॥

bhasmoddhūlitasarvāṅgo jaṭājūṭavirājitaḥ |rudrākṣabhūṣitatanuḥ śāmbhavīmudrayā yutaḥ || 4||

भक्तानुग्रहकृन्नित्यं पापतापार्तिभञ्जनः ।बालोन्मत्तपिशाचाभः स्मर्तृगामी दयानिधिः ॥ ५॥

bhaktānugrahakṛnnityaṃ pāpatāpārtibhañjanaḥ |bālonmattapiśācābhaḥ smartṛgāmī dayānidhiḥ || 5||

यस्यास्ति माहुरे निद्रा निवासः सिंहपर्वते ।प्रातःस्नानं च गङ्गायां ध्यानं गन्धर्वपत्तने ॥ ६॥

yasyāsti māhure nidrā nivāsaḥ siṃhaparvate |prātaḥsnānaṃ ca gaṅgāyāṃ dhyānaṃ gandharvapattane || 6||

कुरुक्षेत्रे चाचमनं धूतपापेश्वरे तथा ।विभूतिधारणं प्रातःसन्ध्या च करहाटके ॥ ७॥

kurukṣetre cācamanaṃ dhūtapāpeśvare tathā |vibhūtidhāraṇaṃ prātaḥsandhyā ca karahāṭake || 7||

कोलापुरेऽस्य भिक्षा च पाञ्चालेऽपि च भोजनम् ।तिलको विठ्ठलपुरे तुङ्गापानं दिने दिने ॥ ८॥

kolāpure'sya bhikṣā ca pāñcāle'pi ca bhojanam |tilako viṭhṭhalapure tuṅgāpānaṃ dine dine || 8||

पुराणश्रवणं यस्य नरनारायणाश्रमे ।विश्रामो रैवते सायंसन्ध्या पश्चिमसागरे ॥ ९॥

purāṇaśravaṇaṃ yasya naranārāyaṇāśrame |viśrāmo raivate sāyaṃsandhyā paścimasāgare || 9||

कार्तवीर्यार्जुनायादाद्योगर्धिमुभयीं प्रभुः ।स्वात्मतत्त्वं च यदवे बहुगुर्वाप्तमुत्तमम् ॥ १०॥

kārtavīryārjunāyādādyogardhimubhayīṃ prabhuḥ |svātmatattvaṃ ca yadave bahugurvāptamuttamam || 10||

आन्वीक्षिकीमलर्काय प्रह्लादाय च धीमते ।आयूराजाय च वरान्साध्येभ्यो मोक्षसाधनम् ॥ ११॥

ānvīkṣikīmalarkāya prahlādāya ca dhīmate |āyūrājāya ca varānsādhyebhyo mokṣasādhanam || 11||

मन्त्रांश्च विष्णुदत्ताय सोमकान्ताय कर्म च ।स एवाविरभूद्भूयः पूर्वार्णवसमीपतः ॥ १२॥

mantrāṃśca viṣṇudattāya somakāntāya karma ca |sa evāvirabhūdbhūyaḥ pūrvārṇavasamīpataḥ || 12||

भाद्रे मासि सिते पक्षे चतुर्थ्यां राजविप्रतः ।सुमत्यां प्राक्सिन्धुतीरे रम्ये पीठापुरे वरे ॥ १३॥

bhādre māsi site pakṣe caturthyāṃ rājaviprataḥ |sumatyāṃ prāksindhutīre ramye pīṭhāpure vare || 13||

य आचारव्यवहृतिप्रायश्चित्तोपदेशकृत् ।निजाग्रजावन्धपङ्गू विलोक्य प्रव्रजन्सुधीः ॥ १४॥

ya ācāravyavahṛtiprāyaścittopadeśakṛt |nijāgrajāvandhapaṅgū vilokya pravrajansudhīḥ || 14||

मातापित्रोर्मुदे दृष्टि गतिं ताभ्यामुपानयत् ।महीं प्रदक्षिणीकृत्य गोकर्णे त्र्यब्दमावसत् ॥ १५॥

mātāpitrormude dṛṣṭi gatiṃ tābhyāmupānayat |mahīṃ pradakṣiṇīkṛtya gokarṇe tryabdamāvasat || 15||

ततः कृष्णातटं प्राप्य मर्तुकामां सपुत्रकाम् ।निवत्र्य ब्राह्मणीं मन्दप्रदोषव्रतमादिशत् ॥ १६॥

tataḥ kṛṣṇātaṭaṃ prāpya martukāmāṃ saputrakām |nivatrya brāhmaṇīṃ mandapradoṣavratamādiśat || 16||

तत्पुत्रं विबुधं कृत्वा तस्या जन्मान्तरे प्रभुः ।पुत्रोऽभूद्यो नरहरिनामको देश उत्तरे ॥ १७॥

tatputraṃ vibudhaṃ kṛtvā tasyā janmāntare prabhuḥ |putro'bhūdyo naraharināmako deśa uttare || 17||

करञ्जनगरेऽप्यम्बामाधवद्विजतो विभुः ।मासि पौषे सिते पक्षे द्वितीयायां शनेर्दिने ॥ १८॥

karañjanagare'pyambāmādhavadvijato vibhuḥ |māsi pauṣe site pakṣe dvitīyāyāṃ śanerdine || 18||

जातमात्रोऽपि चौङ्कारं प्रपाठायापि मूकवत् ।सप्ताब्दान्लीलया स्थित्वा नानाकौतुककृत्प्रभुः ॥ १९॥

jātamātro'pi cauṅkāraṃ prapāṭhāyāpi mūkavat |saptābdānlīlayā sthitvā nānākautukakṛtprabhuḥ || 19||

उपनीतोऽपठद्वेदान्सप्तमे वत्सरे स्वयम् ।आश्वास्य जननीं पुत्रद्वयदानेन बोधदः ॥ २०॥

upanīto'paṭhadvedānsaptame vatsare svayam |āśvāsya jananīṃ putradvayadānena bodhadaḥ || 20||

काशीं गत्वाष्टाङ्गयोगाभ्यासी कृष्णसरस्वतीम् ।वृत्वा गुरुं यतिर्भूत्वा वेदार्थान्सम्प्रकाश्य च ॥ २१॥

kāśīṃ gatvāṣṭāṅgayogābhyāsī kṛṣṇasarasvatīm |vṛtvā guruṃ yatirbhūtvā vedārthānsamprakāśya ca || 21||

लुप्तसन्न्यासिधर्मं च तेने तुर्याश्रमोक्तकृत् ।मेरुं प्रदक्षिणीकृत्य शिष्यान्कृत्वापि भूरिशः ॥ २२॥

luptasannyāsidharmaṃ ca tene turyāśramoktakṛt |meruṃ pradakṣiṇīkṛtya śiṣyānkṛtvāpi bhūriśaḥ || 22||

पितृभ्यां दर्शनं दत्वा द्विजं शूलरुजार्दितम् ।कृत्वानामयमाश्वास्य सायन्देवं महामतिम् ॥ २३॥

pitṛbhyāṃ darśanaṃ datvā dvijaṃ śūlarujārditam |kṛtvānāmayamāśvāsya sāyandevaṃ mahāmatim || 23||

अब्दं स्थित्वा वैद्यनाथक्षेत्रे कृष्णातटे ततः ।भिल्लवाट्यां चतुर्मासान्विभुर्गत्वा ततोऽग्रतः ॥ २४॥

abdaṃ sthitvā vaidyanāthakṣetre kṛṣṇātaṭe tataḥ |bhillavāṭyāṃ caturmāsānvibhurgatvā tato'grataḥ || 24||

नृसिंहवाटिकाक्षेत्रे द्वादशाब्दान्वसन्सुधीः ।तत्र स्थित्वापि गन्धर्वपुरमेत्यावसन्मठे ॥ २५॥

nṛsiṃhavāṭikākṣetre dvādaśābdānvasansudhīḥ |tatra sthitvāpi gandharvapurametyāvasanmaṭhe || 25||

जीवयित्वा मृतान्दुग्ध्वा वन्ध्यां च महिषीं हरिः ।विश्वरूपं दर्शयित्वा यतये विश्वनाटकः ॥ २६॥

jīvayitvā mṛtāndugdhvā vandhyāṃ ca mahiṣīṃ hariḥ |viśvarūpaṃ darśayitvā yataye viśvanāṭakaḥ || 26||

बह्वीरमानुषीलीलाः कृत्वा गुप्तोऽपि तत्र च ।य आस्ते भगवान्दत्तः सोऽस्मान्रक्षतु सर्वदा ॥ २७॥

bahvīramānuṣīlīlāḥ kṛtvā gupto'pi tatra ca |ya āste bhagavāndattaḥ so'smānrakṣatu sarvadā || 27||

या सप्तविंशतिश्लोकैः कृता नक्षत्रमालिका ।तद्भक्तेभ्योऽर्पिता भक्ताभिन्नश्रीदत्ततुष्टये ॥ २८॥

yā saptaviṃśatiślokaiḥ kṛtā nakṣatramālikā |tadbhaktebhyo'rpitā bhaktābhinnaśrīdattatuṣṭaye || 28||

द्वादश्यामाश्विने कृष्णे श्रीपादस्योत्सवो महान् ।माघे कृष्णे प्रतिपदि नरसिंहप्रभोस्तथा ॥ २९॥

dvādaśyāmāśvine kṛṣṇe śrīpādasyotsavo mahān |māghe kṛṣṇe pratipadi narasiṃhaprabhostathā || 29||

इति श्रीवासुदेवानन्दसरस्वतीविरचिता नक्षत्रमालिका सम्पूर्णा ।

iti śrīvāsudevānandasarasvatīviracitā nakṣatramālikā sampūrṇā |