दत्तमानसपूजा Datta Manasa Puja

परानन्दमयो विष्णुर्हृत्स्थोऽवेद्योऽप्यतीन्द्रियः ।सदा सम्पूज्यते भक्तैर्भगवान् भक्तिभावनः ॥ १॥

parānandamayo viṣṇurhṛtstho'vedyo'pyatīndriyaḥ |sadā sampūjyate bhaktairbhagavān bhaktibhāvanaḥ || 1||

अचिन्त्यस्य कुतो ध्यानं कूटस्थावाहनं कुतः ।क्वासनं विश्वसंस्थस्य पाद्यं पूतात्मनः कुतः ॥ २॥

acintyasya kuto dhyānaṃ kūṭasthāvāhanaṃ kutaḥ |kvāsanaṃ viśvasaṃsthasya pādyaṃ pūtātmanaḥ kutaḥ || 2||

क्वानर्घोरुक्रमस्याघ्र्यं विष्णोराचमनं कुतः ।निर्मलस्य कुतः स्नानं क्व निरावरणेऽम्बरम् ॥ ३॥

kvānarghorukramasyāghryaṃ viṣṇorācamanaṃ kutaḥ |nirmalasya kutaḥ snānaṃ kva nirāvaraṇe'mbaram || 3||

स्वसूत्रस्य कुतः सूत्रं निर्मलस्य च लेपनम् ।निस्तृषः सुमनोभिः किं किमक्लेद्यस्य धूपतः ॥ ४॥

svasūtrasya kutaḥ sūtraṃ nirmalasya ca lepanam |nistṛṣaḥ sumanobhiḥ kiṃ kimakledyasya dhūpataḥ || 4||

स्वप्रकाशस्य दीपैः किं किं भक्ष्याद्यैर्जगद्भृतः ।किं देयं परितृप्तस्य विराजः क्व प्रदक्षिणाः ॥ ५॥

svaprakāśasya dīpaiḥ kiṃ kiṃ bhakṣyādyairjagadbhṛtaḥ |kiṃ deyaṃ paritṛptasya virājaḥ kva pradakṣiṇāḥ || 5||

किमनन्तस्य नतिभिः स्तौति को वागगोचरम् ।अन्तर्बहिःप्रपूर्णस्य कथमुद्वासनं भवेत् ॥ ६॥

kimanantasya natibhiḥ stauti ko vāgagocaram |antarbahiḥprapūrṇasya kathamudvāsanaṃ bhavet || 6||

सर्वतोऽपीत्यसम्भाव्यो भाव्यते भक्तिभावनः ।सेव्यसेवकभावेन भक्तैर्लीलानृविग्रहः ॥ ७॥

sarvato'pītyasambhāvyo bhāvyate bhaktibhāvanaḥ |sevyasevakabhāvena bhaktairlīlānṛvigrahaḥ || 7||

तवेशातीन्द्रियस्यापि पारम्पर्याश्रुतां तनुम् ।प्रकल्प्याश्मादावर्चन्ति प्रार्चयेऽर्चां मनोमयीम् ॥ ८॥

taveśātīndriyasyāpi pāramparyāśrutāṃ tanum |prakalpyāśmādāvarcanti prārcaye'rcāṃ manomayīm || 8||

कलसुश्लोकगीतेन भगवन्दत्त जागृहि ।भक्तवत्सल सामीप्यं कुरु मे मानसार्चने ॥ ९॥

kalasuślokagītena bhagavandatta jāgṛhi |bhaktavatsala sāmīpyaṃ kuru me mānasārcane || 9||

श्रीदत्तं खेचरीमुद्रामुद्रितं योगिसद्गुरुम् ।सिद्धासनस्थं ध्यायेऽभीवरप्रदकरं हरिम् ॥ १०॥

śrīdattaṃ khecarīmudrāmudritaṃ yogisadgurum |siddhāsanasthaṃ dhyāye'bhīvarapradakaraṃ harim || 10||

दत्तात्रेयाह्वयाम्यत्र परिवारैः सहार्चने ।श्रद्धाभक्त्येश्वरागच्छ ध्यातधाम्नाञ्जसा विभो ॥ ११॥

dattātreyāhvayāmyatra parivāraiḥ sahārcane |śraddhābhaktyeśvarāgaccha dhyātadhāmnāñjasā vibho || 11||

सौवर्णं रत्नजडितं कल्पितं देवतामयम् ।रम्यं सिंहासनं दत्त तत्रोपविश यन्त्रिते ॥ १२॥

sauvarṇaṃ ratnajaḍitaṃ kalpitaṃ devatāmayam |ramyaṃ siṃhāsanaṃ datta tatropaviśa yantrite || 12||

पाद्यं चन्दनकर्पूरसुरभि स्वादु वारि ते ।गृहाण कल्पितं तेन दत्ताङ्घ्री क्षालयामि ते ॥ १३॥

pādyaṃ candanakarpūrasurabhi svādu vāri te |gṛhāṇa kalpitaṃ tena dattāṅghrī kṣālayāmi te || 13||

गन्धाब्जतुलसीबिल्वशमीपत्राक्षतान्वितम् ।साम्ब्वघ्र्यं स्वर्णपात्रेण कल्पितं दत्त गृह्यताम् ॥ १४॥

gandhābjatulasībilvaśamīpatrākṣatānvitam |sāmbvaghryaṃ svarṇapātreṇa kalpitaṃ datta gṛhyatām || 14||

सुस्वाद्वाचमनीयाम्बु हैमपात्रेण कल्पितम् ।तुभ्यमाचम्यतां दत्त मधुपर्कं गृहाण च ॥ १५॥

susvādvācamanīyāmbu haimapātreṇa kalpitam |tubhyamācamyatāṃ datta madhuparkaṃ gṛhāṇa ca || 15||

पुष्पवासितसत्तैलमङ्गेष्वालिप्य दत्त भोः ।पञ्चामृतैश्च गाङ्गाद्भिः स्नानं ते कल्पयाम्यहम् ॥ १६॥

puṣpavāsitasattailamaṅgeṣvālipya datta bhoḥ |pañcāmṛtaiśca gāṅgādbhiḥ snānaṃ te kalpayāmyaham || 16||

भक्त्या दिगम्बराचान्तजलेदं दत्त कल्पितम् ।काषायपरिधानं तद् गृहाणैणेयचर्म च ॥ १७॥

bhaktyā digambarācāntajaledaṃ datta kalpitam |kāṣāyaparidhānaṃ tad gṛhāṇaiṇeyacarma ca || 17||

नानासूत्रधरैते ते ब्रह्मसूत्रे प्रकल्पिते ।गृहाण दैवतमये श्रीदत्त नवतन्तुके ॥ १८॥

nānāsūtradharaite te brahmasūtre prakalpite |gṛhāṇa daivatamaye śrīdatta navatantuke || 18||

भूतिमृत्स्नासुकस्तूरीकेशरान्वितचन्दनम् ।रत्नाक्षताः कल्पितास्त्वामलङ्कुर्वेऽथ दत्त तैः ॥ १९॥

bhūtimṛtsnāsukastūrīkeśarānvitacandanam |ratnākṣatāḥ kalpitāstvāmalaṅkurve'tha datta taiḥ || 19||

सच्छमीबिल्वतुलसीपत्रैः सौगन्धिकैः सुमैः ।मनसा कल्पितैर्नानाविधैर्दत्तार्चयाम्यहम् ॥ २०॥

sacchamībilvatulasīpatraiḥ saugandhikaiḥ sumaiḥ |manasā kalpitairnānāvidhairdattārcayāmyaham || 20||

लाक्षासिताभ्रश्रीवासश्रीखण्डागरुगुग्गुलैः ।युक्तोऽग्नियोजितो धूपो हृदा स्वीकुरु दत्त तम् ॥ २१॥

lākṣāsitābhraśrīvāsaśrīkhaṇḍāgaruguggulaiḥ |yukto'gniyojito dhūpo hṛdā svīkuru datta tam || 21||

स्वर्णपात्रे गोघृताक्तवर्तिप्रज्वालितं हृदा ।दीपं दत्त सकर्पूरं गृहाण स्वप्रकाशक ॥ २२॥

svarṇapātre goghṛtāktavartiprajvālitaṃ hṛdā |dīpaṃ datta sakarpūraṃ gṛhāṇa svaprakāśaka || 22||

सषड्रसं षड्विधान्नं नैवेद्यं गव्यसंयुतम् ।कल्पितं हैमपात्रे ते भुङ्क्ष्व दत्ताम्ब्वदः पिब ॥ २३॥

saṣaḍrasaṃ ṣaḍvidhānnaṃ naivedyaṃ gavyasaṃyutam |kalpitaṃ haimapātre te bhuṅkṣva dattāmbvadaḥ piba || 23||

प्रक्षाल्यास्यं करौ चाद्भिर्दत्ताचम्य प्रगृह्यताम् ।ताम्बूलं दक्षिणां हैमीं कल्पितानि फलानि च ॥ २४॥

prakṣālyāsyaṃ karau cādbhirdattācamya pragṛhyatām |tāmbūlaṃ dakṣiṇāṃ haimīṃ kalpitāni phalāni ca || 24||

नीराज्य रत्नदीपैस्त्वां प्रणम्य मनसा च ते ।परितस्त्वत्कथोद्घातैः कुर्वे दत्त प्रदक्षिणाः ॥ २५॥

nīrājya ratnadīpaistvāṃ praṇamya manasā ca te |paritastvatkathodghātaiḥ kurve datta pradakṣiṇāḥ || 25||

मन्त्रवन्निहितो मूर्ध्न दत्त ते कुसुमाञ्जलिः ।कल्प्यन्ते मनसा गीतवाद्यनृत्योपचारकाः ॥ २६॥

mantravannihito mūrdhna datta te kusumāñjaliḥ |kalpyante manasā gītavādyanṛtyopacārakāḥ || 26||

प्रेर्यमाणप्रेरकेण त्वया दत्तेरितेन ते ।कृतेयं मनसा पूजा श्रीमंस्तुष्टो भवानया ॥ २७॥

preryamāṇaprerakeṇa tvayā datteritena te |kṛteyaṃ manasā pūjā śrīmaṃstuṣṭo bhavānayā || 27||

दत्त मानसतल्पे मे सुखनिद्रां रहः कुरु ।रम्ये व्यायतभक्त्यामतूलिकाढ्ये सुवीजिते ॥ २८॥

datta mānasatalpe me sukhanidrāṃ rahaḥ kuru |ramye vyāyatabhaktyāmatūlikāḍhye suvījite || 28||

इति श्रीवासुदेवानन्दसरस्वतीविरचिता दत्तमानसपूजा सम्पूर्णा ।

iti śrīvāsudevānandasarasvatīviracitā dattamānasapūjā sampūrṇā |