वराहाष्टोत्तरशतनामस्तोत्रम् Shrivarahashtottarashatanamastotram

श्रीमुष्णमाहात्म्यतःशङ्करःनारायण मम ब्रूहि येन तुष्टो जगत्पतिः ।तूर्णमेव प्रसन्नात्मा मुक्तिं यच्छति पापहा ॥ १॥

śrīmuṣṇamāhātmyataḥśaṅkaraḥnārāyaṇa mama brūhi yena tuṣṭo jagatpatiḥ |tūrṇameva prasannātmā muktiṃ yacchati pāpahā || 1||

सदा चञ्चलचित्तानां मानवानां कलौ युगे ।जपे च देवपूजायां मनो नैकत्र तिष्ठति ॥ २॥

sadā cañcalacittānāṃ mānavānāṃ kalau yuge |jape ca devapūjāyāṃ mano naikatra tiṣṭhati || 2||

तादृशा अपि वै मर्त्या येन यान्ति परां गतिम् ।अन्येषां कर्मणां पुर्तिर्येन स्यात् फलितेन च ॥ ३॥

tādṛśā api vai martyā yena yānti parāṃ gatim |anyeṣāṃ karmaṇāṃ purtiryena syāt phalitena ca || 3||

तादृक् स्तोत्रं मम ब्रूहि महापातकनाशनम् ।एकैकं च वराहस्य नाम वेदाधिकं किल ॥ ४॥

tādṛk stotraṃ mama brūhi mahāpātakanāśanam |ekaikaṃ ca varāhasya nāma vedādhikaṃ kila || 4||

तादृशानि च नामानि वराहस्य महात्मनः ।सन्ति चेद्ब्रूहि विश्वात्मन् श्रेतुं कौतूहलं हि मे ॥ ५॥

tādṛśāni ca nāmāni varāhasya mahātmanaḥ |santi cedbrūhi viśvātman śretuṃ kautūhalaṃ hi me || 5||

श्रीनारायणःशृणु शङ्कर वक्ष्यामि वराहस्तोत्रमुत्तमम् ।दुष्टग्रहकुठारोऽयं महापापदवानलः ॥ ६॥

śrīnārāyaṇaḥśṛṇu śaṅkara vakṣyāmi varāhastotramuttamam |duṣṭagrahakuṭhāro'yaṃ mahāpāpadavānalaḥ || 6||

महाभयगिरीन्द्राणाम् कुलिशं मुक्तिदं शुभम् ।कामधुक् कामिनामेतद्भक्तानां कल्पपादपः ॥ ७॥

mahābhayagirīndrāṇām kuliśaṃ muktidaṃ śubham |kāmadhuk kāmināmetadbhaktānāṃ kalpapādapaḥ || 7||

वक्ष्यामि परमं स्तोत्रं यत्सुगोप्यं दुरात्मनाम् ।नारायण ऋषिश्चात्र श्रीवराहश्च देवता ॥ ८॥

vakṣyāmi paramaṃ stotraṃ yatsugopyaṃ durātmanām |nārāyaṇa ṛṣiścātra śrīvarāhaśca devatā || 8||

छन्दोऽनुष्टुप् च हुं बीजं ह्रीं शक्तिः क्लीं च कीलकम् ।वराहप्रीतिमुद्दिश्य विनियोगस्तु निर्वृतौ ॥ ९॥

chando'nuṣṭup ca huṃ bījaṃ hrīṃ śaktiḥ klīṃ ca kīlakam |varāhaprītimuddiśya viniyogastu nirvṛtau || 9||

न्यसेद्धृदयं द्रेकारं वराहाय च मूर्धनि ।नमो भगवते पश्चाच्छिखायां विन्यसेद्बुधः ॥ १०॥

nyaseddhṛdayaṃ drekāraṃ varāhāya ca mūrdhani |namo bhagavate paścācchikhāyāṃ vinyasedbudhaḥ || 10||

ज्ञानात्मने च नेत्राभ्यां कवचाय बलात्मने ।भूर्भुवः सुव इत्यस्त्राय फटित्यन्तं न्यसेद्बुधः ॥ ११॥

jñānātmane ca netrābhyāṃ kavacāya balātmane |bhūrbhuvaḥ suva ityastrāya phaṭityantaṃ nyasedbudhaḥ || 11||

यज्ञाय यज्ञरूपाय यज्ञाङ्गाय महात्मने ।नमो यज्ञभुजे यज्ञकृते यज्ञेश्वराय च ॥ १२॥

yajñāya yajñarūpāya yajñāṅgāya mahātmane |namo yajñabhuje yajñakṛte yajñeśvarāya ca || 12||

यज्ञस्य फलदात्रे च यज्ञगुह्याय यज्वने ।एभिर्नामपदैर्दिव्यैरङ्गुलिन्यासमाचरेत् ॥ १३॥

yajñasya phaladātre ca yajñaguhyāya yajvane |ebhirnāmapadairdivyairaṅgulinyāsamācaret || 13||

अन्नदात्रे नम इति करपृष्ठं च मार्जयेत् ।नमः श्वेतवराहाय स्वाहान्तेन महामतिः ॥ १४॥

annadātre nama iti karapṛṣṭhaṃ ca mārjayet |namaḥ śvetavarāhāya svāhāntena mahāmatiḥ || 14||

व्यापकन्यासकृत्पश्चाद्ध्यायेद्देवमधोक्षजम् ।ध्यानम्ॐ श्वेतं सुदर्शनदराङ्कितबाहुयुग्मंदंष्ट्राकरालवदनं धराय समेतम् ।ब्रह्मादिभिः सुरगणैः परिसेव्यमानंध्यायेद्वराहवपुषं निगमैकवेद्यम् ॥ १५॥

vyāpakanyāsakṛtpaścāddhyāyeddevamadhokṣajam |dhyānamoṃ śvetaṃ sudarśanadarāṅkitabāhuyugmaṃdaṃṣṭrākarālavadanaṃ dharāya sametam |brahmādibhiḥ suragaṇaiḥ parisevyamānaṃdhyāyedvarāhavapuṣaṃ nigamaikavedyam || 15||

श्रीवराहो महीनाथः पूर्णानन्दो जगत्पतिः ।निर्गुणो निष्कलोऽनन्तो दण्डकान्तकृदव्ययः ॥ १६॥

śrīvarāho mahīnāthaḥ pūrṇānando jagatpatiḥ |nirguṇo niṣkalo'nanto daṇḍakāntakṛdavyayaḥ || 16||

हिरण्याक्षान्तकृद्देवः पूर्णषाड्गुण्यविग्रहः ।लयोदधिविहारी च सर्वप्राणिहिते रतः ॥ १७॥

hiraṇyākṣāntakṛddevaḥ pūrṇaṣāḍguṇyavigrahaḥ |layodadhivihārī ca sarvaprāṇihite rataḥ || 17||

अनन्तरूपोऽनन्तश्रीर्जितमन्युर्भयापहः ।वेदान्तवेद्यो वेदी च वेदगर्भः सनातनः ॥ १८॥

anantarūpo'nantaśrīrjitamanyurbhayāpahaḥ |vedāntavedyo vedī ca vedagarbhaḥ sanātanaḥ || 18||

सहस्राक्षः पुण्यगन्धः कल्पकृत् क्षितिभृद्धरिः ।पद्मनाभः सुराध्यक्षो हेमाङ्गो दक्षिणामुखः ॥ १९॥

sahasrākṣaḥ puṇyagandhaḥ kalpakṛt kṣitibhṛddhariḥ |padmanābhaḥ surādhyakṣo hemāṅgo dakṣiṇāmukhaḥ || 19||

महाकोलो महाबाहुः सर्वदेवनमस्कृतः ।हृषीकेशः प्रसन्नात्मा सर्वभक्तभयापहः ॥ २०॥

mahākolo mahābāhuḥ sarvadevanamaskṛtaḥ |hṛṣīkeśaḥ prasannātmā sarvabhaktabhayāpahaḥ || 20||

यज्ञभृद्यज्ञकृत्साक्षी यज्ञाङ्गो यज्ञवाहनः ।हव्यभुघव्यदेवश्च सदाव्यक्तः कृपाकरः ॥ २१॥

yajñabhṛdyajñakṛtsākṣī yajñāṅgo yajñavāhanaḥ |havyabhughavyadevaśca sadāvyaktaḥ kṛpākaraḥ || 21||

देवभूमिगुरुः कान्तो धर्मगुह्यो वृषाकपिः ।स्रुवत्तुण्डो वक्रदंष्ट्रो नीलकेशो महाबलः ॥ २२॥

devabhūmiguruḥ kānto dharmaguhyo vṛṣākapiḥ |sruvattuṇḍo vakradaṃṣṭro nīlakeśo mahābalaḥ || 22||

पूतात्मा वेदनेता च वेदहर्तृशिरोहरः ।वेदादिकृद्वेदगुह्यः सर्ववेदप्रवर्तकः ॥ २३॥

pūtātmā vedanetā ca vedahartṛśiroharaḥ |vedādikṛdvedaguhyaḥ sarvavedapravartakaḥ || 23||

गभीराक्षस्त्रिधर्मा च गम्भीरात्मा महेश्वरः ।आनन्दवनगो दिव्यो ब्रह्मनासासमुद्भवः ॥ २४॥

gabhīrākṣastridharmā ca gambhīrātmā maheśvaraḥ |ānandavanago divyo brahmanāsāsamudbhavaḥ || 24||

विन्धुतीरनिवासी च क्षेमकृत्सात्त्वतां पतिः ।इन्द्रत्राता जगत्त्राता महेन्द्रोद्दण्वर्गहा ॥ २५॥

vindhutīranivāsī ca kṣemakṛtsāttvatāṃ patiḥ |indratrātā jagattrātā mahendroddaṇvargahā || 25||

भक्तवश्यो सदोद्युक्तो निजानन्दो रमापतिः ।स्तुतिप्रियः शुभाङ्गश्च पुण्यश्रवणकीर्तनः ॥ २६॥

bhaktavaśyo sadodyukto nijānando ramāpatiḥ |stutipriyaḥ śubhāṅgaśca puṇyaśravaṇakīrtanaḥ || 26||

सत्यकृत्सत्यसङ्कल्पः सत्यवाक्सत्यविक्रमः ।सत्येन गूढः सत्यात्मा कालातीतो गुणाधिकः ॥ २७॥

satyakṛtsatyasaṅkalpaḥ satyavāksatyavikramaḥ |satyena gūḍhaḥ satyātmā kālātīto guṇādhikaḥ || 27||

परं ज्योतिः परं धाम परमः पुरुषः परः ।कल्याणकृत्कविः कर्ता कर्मसाक्षी जितेन्द्रियः ॥ २८॥

paraṃ jyotiḥ paraṃ dhāma paramaḥ puruṣaḥ paraḥ |kalyāṇakṛtkaviḥ kartā karmasākṣī jitendriyaḥ || 28||

कर्मकृत्कर्मकाण्डस्य सम्प्रदायप्रवर्तकः ।सर्वान्तकः सर्वगश्च सर्वार्थः सर्वभक्षकः ॥ २९॥

karmakṛtkarmakāṇḍasya sampradāyapravartakaḥ |sarvāntakaḥ sarvagaśca sarvārthaḥ sarvabhakṣakaḥ || 29||

सर्वलोकपतिः श्रीमान् श्रीमुष्णेशः शुभेक्षणः ।सर्वदेवप्रियः साक्षीत्येतन्नामाष्टकं शतम् ॥ ३०॥

sarvalokapatiḥ śrīmān śrīmuṣṇeśaḥ śubhekṣaṇaḥ |sarvadevapriyaḥ sākṣītyetannāmāṣṭakaṃ śatam || 30||

सर्ववेदाधिकं पुण्यं वराहस्य महात्मनः ।सततं प्रातरुत्थाय सम्यगाचम्य वारिणा ॥ ३१॥

sarvavedādhikaṃ puṇyaṃ varāhasya mahātmanaḥ |satataṃ prātarutthāya samyagācamya vāriṇā || 31||

जितासनो जितक्रोधः पश्चान्मन्त्रमुदीरयेत् ।ब्राह्मणो ब्रह्मविद्यां च क्षत्रियो राज्यमाप्नुयात् ॥ ३२॥

jitāsano jitakrodhaḥ paścānmantramudīrayet |brāhmaṇo brahmavidyāṃ ca kṣatriyo rājyamāpnuyāt || 32||

वैश्यो धनसमृद्धः स्यात् शूद्रः सुखमवाप्नुयात् ।सद्यो रोगाद्विमुच्येत शतवारं पठेद्यदि ॥ ३३॥

vaiśyo dhanasamṛddhaḥ syāt śūdraḥ sukhamavāpnuyāt |sadyo rogādvimucyeta śatavāraṃ paṭhedyadi || 33||

सकामो लभते कामान्निष्कामो मोक्षमाप्नुयात् ।सद्यो रोगाद्विमुच्येत शतवारं पठेद्यदि ॥ ३३॥

sakāmo labhate kāmānniṣkāmo mokṣamāpnuyāt |sadyo rogādvimucyeta śatavāraṃ paṭhedyadi || 33||

सकामो लभते कामान्निष्कामो मोक्षमाप्नुयात् ।बालरोगग्रहाद्याश्च नश्यन्त्येव न संशयः ॥ ३४॥

sakāmo labhate kāmānniṣkāmo mokṣamāpnuyāt |bālarogagrahādyāśca naśyantyeva na saṃśayaḥ || 34||

राजद्वारे महाघोरे सङ्ग्रामे शत्रुसङ्कटे ।स्तोत्रमेतन्महापुण्यं पठेत्सद्यो भयापहम् ॥ ३५॥

rājadvāre mahāghore saṅgrāme śatrusaṅkaṭe |stotrametanmahāpuṇyaṃ paṭhetsadyo bhayāpaham || 35||

इत्येतद्धारयेद्यस्तु करे मूर्ध्नि हृदन्तरे ।तं नमस्यन्ति भूतानि मुच्यते सर्वतो भयात् ॥ ३६॥

ityetaddhārayedyastu kare mūrdhni hṛdantare |taṃ namasyanti bhūtāni mucyate sarvato bhayāt || 36||

राजप्रसादजनकं सर्वलोकवशङ्करम् ।आभिचरिककृत्यान्तं महाभयनिवारणम् ॥ ३७॥

rājaprasādajanakaṃ sarvalokavaśaṅkaram |ābhicarikakṛtyāntaṃ mahābhayanivāraṇam || 37||

शतवारं पठेद्यस्तु मुच्यते व्याधिबन्धनात् ।यः पठेत्त्रिषु कालेषु स्तोत्रमेतज्जितेन्द्रियः ॥ ३८॥

śatavāraṃ paṭhedyastu mucyate vyādhibandhanāt |yaḥ paṭhettriṣu kāleṣu stotrametajjitendriyaḥ || 38||

वैकुण्ठवासमाप्नोति दशपुर्वैर्दशापरैः ।अश्वत्थमूलेऽर्कवारे स्थित्वा स्तोत्रं पठेद्यदि ॥ ३९॥

vaikuṇṭhavāsamāpnoti daśapurvairdaśāparaiḥ |aśvatthamūle'rkavāre sthitvā stotraṃ paṭhedyadi || 39||

अपस्मारविनाशः स्यात्क्षयरोगश्च नश्यति ।मध्याह्ने तु गुरोर्वारे जलमध्ये शतं जपेत् ॥ ४०॥

apasmāravināśaḥ syātkṣayarogaśca naśyati |madhyāhne tu gurorvāre jalamadhye śataṃ japet || 40||

कुष्ठव्याधिविनाशः स्यात् ज्ञानं चैवाधिगच्छाति ।प्रातः प्रातः पठेद्यस्तु स्तोत्रमेतच्छुभावहम् ॥ ४१॥

kuṣṭhavyādhivināśaḥ syāt jñānaṃ caivādhigacchāti |prātaḥ prātaḥ paṭhedyastu stotrametacchubhāvaham || 41||

अन्त्यकाले स्मृतिर्विष्णोर्भवेत् तस्य महात्मनः ।अष्टोत्तरशतैर्दिव्यैर्नामभिः किटिरूपिणः ॥ ४२॥

antyakāle smṛtirviṣṇorbhavet tasya mahātmanaḥ |aṣṭottaraśatairdivyairnāmabhiḥ kiṭirūpiṇaḥ || 42||

तुलसीमर्पयेद्यस्तु स मुक्तो नास्ति संशयः ।पूजाकाले वराहस्य नाम्नामष्टोत्तरं शतम् ॥ ४३॥

tulasīmarpayedyastu sa mukto nāsti saṃśayaḥ |pūjākāle varāhasya nāmnāmaṣṭottaraṃ śatam || 43||

जप्त्वाऽथ जापयित्वा वा साम्राज्यमधिगच्छाति ।निष्कामो मोक्षमाप्नोति नात्र कार्या विचारणा ॥ ४४॥

japtvā'tha jāpayitvā vā sāmrājyamadhigacchāti |niṣkāmo mokṣamāpnoti nātra kāryā vicāraṇā || 44||

अष्टोत्तरसहस्रं तु यः पठेन्नियतेन्द्रियः ।पायसेन तथा हुत्वा वन्ध्या पुत्रवती भवेत् ॥ ४५॥

aṣṭottarasahasraṃ tu yaḥ paṭhenniyatendriyaḥ |pāyasena tathā hutvā vandhyā putravatī bhavet || 45||

नमः श्वेतवराहाय भूधराय महात्मने ।निरञ्जनाय सत्याय सात्त्वतां पतये नमः ॥ ४६॥

namaḥ śvetavarāhāya bhūdharāya mahātmane |nirañjanāya satyāya sāttvatāṃ pataye namaḥ || 46||

इति मन्त्रं पठेन्नित्यमन्ते मोक्षमवाप्नुयात् ॥ ४७॥

iti mantraṃ paṭhennityamante mokṣamavāpnuyāt || 47||

इति श्रीवराहपुराणे श्रीमुष्णमाहात्म्ये नवमोऽध्यायः ।नीलवराहपरब्रह्मणे नमः ।इति श्रीवराहाष्टोत्तरशतनामस्तोत्रं सम्पूर्णम् ।

iti śrīvarāhapurāṇe śrīmuṣṇamāhātmye navamo'dhyāyaḥ |nīlavarāhaparabrahmaṇe namaḥ |iti śrīvarāhāṣṭottaraśatanāmastotraṃ sampūrṇam |