नृसिंहस्तोत्रम् सर्वदुःखपरिहारकम् Sarvaduhkhapariharakam Nrisimhastotram

श्रीगणेशाय नमः । श्रीलक्ष्मीनृसिंहाय नमः ।नारायणं नमस्कृत्य नरं चैव नरोत्तमम् ।देवीं सरस्वतीं चैव ततो जयमुदीरयेत् ॥ १॥

śrīgaṇeśāya namaḥ | śrīlakṣmīnṛsiṃhāya namaḥ |nārāyaṇaṃ namaskṛtya naraṃ caiva narottamam |devīṃ sarasvatīṃ caiva tato jayamudīrayet || 1||

तप्तहाटककेशान्त ज्वलत्पावकलोचन ।वज्राधिकनखस्पर्श दिव्यसिंह नमोऽस्तु ते ॥ २॥

taptahāṭakakeśānta jvalatpāvakalocana |vajrādhikanakhasparśa divyasiṃha namo'stu te || 2||

पान्तु वो नरसिंहस्य नखलाङ्गकोटयः ।हिरण्यकशिपोर्वक्षः क्षेत्रासृक्कर्दमारुणः ॥ ३॥

pāntu vo narasiṃhasya nakhalāṅgakoṭayaḥ |hiraṇyakaśiporvakṣaḥ kṣetrāsṛkkardamāruṇaḥ || 3||

हिमवद्वासिनः सर्वे मुनयो वेदपारगाः ।त्रिकालज्ञा महात्मानो नैमिषारण्यवासिनः ॥ ४॥

himavadvāsinaḥ sarve munayo vedapāragāḥ |trikālajñā mahātmāno naimiṣāraṇyavāsinaḥ || 4||

येऽर्बुदारण्यनिरताः पुष्करारण्यवासिनः ।महेन्द्राद्रिरता ये च ये हि विन्ध्याद्रिवासिनः ॥ ५॥

ye'rbudāraṇyaniratāḥ puṣkarāraṇyavāsinaḥ |mahendrādriratā ye ca ye hi vindhyādrivāsinaḥ || 5||

धर्मारण्यरता ये च दण्डकारण्यवासिनः ।श्रीशैलनिरता ये च कुरुक्षेत्रनिवासिनः ॥ ६॥

dharmāraṇyaratā ye ca daṇḍakāraṇyavāsinaḥ |śrīśailaniratā ye ca kurukṣetranivāsinaḥ || 6||

कौमारपर्वते ये च ये च पम्पानिवासिनः ।एते चान्ये च बहवः सशिष्याः मुनयोऽमलाः ॥ ७॥

kaumāraparvate ye ca ye ca pampānivāsinaḥ |ete cānye ca bahavaḥ saśiṣyāḥ munayo'malāḥ || 7||

सूतमभ्यर्च्य तत्रैव स्थितवान्मुनयो गताः ।इत्येतत्सर्वमाख्यातं पुराणं नारसिंहकम् ॥ ८॥

sūtamabhyarcya tatraiva sthitavānmunayo gatāḥ |ityetatsarvamākhyātaṃ purāṇaṃ nārasiṃhakam || 8||

पठतां शृण्वतां नृणां नरसिंहः प्रसीदति ।सर्वपापहरं पुण्यं सर्वदुःखनिवारणम् ॥ ९॥

paṭhatāṃ śṛṇvatāṃ nṛṇāṃ narasiṃhaḥ prasīdati |sarvapāpaharaṃ puṇyaṃ sarvaduḥkhanivāraṇam || 9||

न तेषां कोऽपि बन्धस्तु कदाचिदपि जायते ।विष्णवेऽर्पितमिदं पुराणं सर्वकामदम् ॥ १०॥

na teṣāṃ ko'pi bandhastu kadācidapi jāyate |viṣṇave'rpitamidaṃ purāṇaṃ sarvakāmadam || 10||

भक्त्या च वदतामेतत् शृण्वतां च फलं शृणु ।शतजन्मार्जितैः पापैः सद्य एव विमोचिताः ॥ ११॥

bhaktyā ca vadatāmetat śṛṇvatāṃ ca phalaṃ śṛṇu |śatajanmārjitaiḥ pāpaiḥ sadya eva vimocitāḥ || 11||

सहस्रकुलसंयुक्ताः प्रयान्ति परमं पदम् ।किं तीथैर्गोप्रदानैर्वा तपोभिर्वा किमध्वरैः ॥ १२॥

sahasrakulasaṃyuktāḥ prayānti paramaṃ padam |kiṃ tīthairgopradānairvā tapobhirvā kimadhvaraiḥ || 12||

अहन्यहनि गोविन्दं तत्परत्वेन शृण्वताम् ।य पठेत्प्रातरुत्थाय पदस्य श्लोकविंशतिम् ॥ १३॥

ahanyahani govindaṃ tatparatvena śṛṇvatām |ya paṭhetprātarutthāya padasya ślokaviṃśatim || 13||

ज्योतिष्टोमफलं प्राप्य विष्णुलोके महीयते ।एतत्पवित्रं पूज्यं च न वाच्यमकृतात्मनाम् ॥ १४॥

jyotiṣṭomaphalaṃ prāpya viṣṇuloke mahīyate |etatpavitraṃ pūjyaṃ ca na vācyamakṛtātmanām || 14||

द्विजान्ना विष्णुभक्तानां श्राव्यमेतन्न संशयः ।एतत्पुराणश्रवणमिहामुत्रसुखप्रदम् ॥ १५॥

dvijānnā viṣṇubhaktānāṃ śrāvyametanna saṃśayaḥ |etatpurāṇaśravaṇamihāmutrasukhapradam || 15||

वदतां शृण्वतां सद्यः सर्वपापप्रणाशनम् ।बहुनात्र किमुक्तेन भूयो भूयो मुनीश्वराः ॥ १६॥

vadatāṃ śṛṇvatāṃ sadyaḥ sarvapāpapraṇāśanam |bahunātra kimuktena bhūyo bhūyo munīśvarāḥ || 16||

श्रद्धयाऽश्रद्धया वापि श्रोतव्यमिदमुत्तमम् ।भारद्वाजमुखात्सर्वे कृतकृत्या द्विजोत्तमाः ॥ १७॥

śraddhayā'śraddhayā vāpi śrotavyamidamuttamam |bhāradvājamukhātsarve kṛtakṛtyā dvijottamāḥ || 17||

सूतं हृष्टाः प्रपूज्याथ सर्वे स्वं स्वाश्रमं ययुः ।प्रक्षीणपापबन्धास्ते मुक्तिं यान्ति नरा इति ॥ १८॥

sūtaṃ hṛṣṭāḥ prapūjyātha sarve svaṃ svāśramaṃ yayuḥ |prakṣīṇapāpabandhāste muktiṃ yānti narā iti || 18||

इति श्रीनृसिंहपुराणे सर्वदुःखपरिहारकं नृसिंहस्तोत्रं सम्पूर्णम् ।

iti śrīnṛsiṃhapurāṇe sarvaduḥkhaparihārakaṃ nṛsiṃhastotraṃ sampūrṇam |