वराहस्तोत्रम् Sanakadi Rishibhih Kritam Varahastotram

ऋषय ऊचुः ।नमस्ते देवदेवाय ब्रह्मणे परमेष्ठिने ।पुरुषाय पुराणाय शाश्वताय जयाय च ॥ १॥

ṛṣaya ūcuḥ |namaste devadevāya brahmaṇe parameṣṭhine |puruṣāya purāṇāya śāśvatāya jayāya ca || 1||

नमः स्वयम्भुवे तुभ्यं स्रष्ट्रे सर्वार्थवेदिने ।नमो हिरण्यगर्भाय वेधसे परमात्मने ॥ २॥

namaḥ svayambhuve tubhyaṃ sraṣṭre sarvārthavedine |namo hiraṇyagarbhāya vedhase paramātmane || 2||

नमस्ते वासुदेवाय विष्णवे विश्वयोनये ।नारायणाय देवाय देवानां हितकारिणे ॥ ३॥

namaste vāsudevāya viṣṇave viśvayonaye |nārāyaṇāya devāya devānāṃ hitakāriṇe || 3||

नमोऽस्तु ते चतुर्वक्त्रे शार्ङ्गचक्रासिधारिणे ।सर्वभूतात्मभूताय कूटस्थाय नमो नमः ॥ ४॥

namo'stu te caturvaktre śārṅgacakrāsidhāriṇe |sarvabhūtātmabhūtāya kūṭasthāya namo namaḥ || 4||

नमो वेदरहस्याय नमस्ते वेदयोनये ।नमो बुद्धाय शुद्धाय नमस्ते ज्ञानरूपिणे ॥ ५॥

namo vedarahasyāya namaste vedayonaye |namo buddhāya śuddhāya namaste jñānarūpiṇe || 5||

नमोऽस्त्वानन्दरूपाय साक्षिणे जगतां नमः ।अनन्तायाप्रमेयाय कार्याय करणाय च ॥ ६॥

namo'stvānandarūpāya sākṣiṇe jagatāṃ namaḥ |anantāyāprameyāya kāryāya karaṇāya ca || 6||

नमस्ते पञ्चभूताय पञ्चभूतात्मने नमः ।नमो मूलप्रकृतये मायारूपाय ते नमः ॥ ७॥

namaste pañcabhūtāya pañcabhūtātmane namaḥ |namo mūlaprakṛtaye māyārūpāya te namaḥ || 7||

नमोऽस्तु ते वराहाय नमस्ते मत्स्यरूपिणे ।नमो योगाधिगम्याय नमः सङ्कर्षणाय ते ॥ ८॥

namo'stu te varāhāya namaste matsyarūpiṇe |namo yogādhigamyāya namaḥ saṅkarṣaṇāya te || 8||

नमस्त्रिमूर्तये तुभ्यं त्रिधाम्ने दिव्यतेजसे ।नमः सिद्धाय पूज्याय गुणत्रयविभागिने ॥ ९॥

namastrimūrtaye tubhyaṃ tridhāmne divyatejase |namaḥ siddhāya pūjyāya guṇatrayavibhāgine || 9||

नमोऽस्त्वादित्यवर्णाय नमस्ते पद्मयोनये ।नमोऽमूर्त्ताय मूर्ताय माधवाय नमो नमः ॥ १०॥

namo'stvādityavarṇāya namaste padmayonaye |namo'mūrttāya mūrtāya mādhavāya namo namaḥ || 10||

त्वयैव सृष्टमखिलं त्वय्येव लयमेष्यति ।पालयैतज्जगत्सर्वं त्राता त्वं शरणं गतिः ॥ ११॥

tvayaiva sṛṣṭamakhilaṃ tvayyeva layameṣyati |pālayaitajjagatsarvaṃ trātā tvaṃ śaraṇaṃ gatiḥ || 11||

इत्थं स भगवान् विष्णुः सनकाद्यैरभिष्टुतः ।प्रसादमकरोत्तेषां वराहवपुरीश्वरः ॥ १२॥

itthaṃ sa bhagavān viṣṇuḥ sanakādyairabhiṣṭutaḥ |prasādamakarotteṣāṃ varāhavapurīśvaraḥ || 12||

इति कूर्मपुराणे पूर्वभागे षष्ठाध्यायान्तर्गतंसनकादि ऋषिभिः कृतं वराहस्तोस्त्रं समाप्तम् ।कूर्मपुराणे पूर्वभागे ६/११२२

iti kūrmapurāṇe pūrvabhāge ṣaṣṭhādhyāyāntargataṃsanakādi ṛṣibhiḥ kṛtaṃ varāhastostraṃ samāptam |kūrmapurāṇe pūrvabhāge 6/1122