मातङ्गीस्तुतिः १ Shri Matangi Stuti

मातङ्गीं नवयावकार्द्र चरणामुल्लासि कृष्णांशुकांवीणापुस्तक धारिणीं नतकुचां मुक्ताप्रवालावलिम् ।श्यामाङ्गीं शशिशङ्खकुण्डलधरां दन्तप्रभासुस्मितांआकर्णालकवेणिकञ्जनयनां ध्यायेच्छुक श्यामलाम् ॥ १॥

mātaṅgīṃ navayāvakārdra caraṇāmullāsi kṛṣṇāṃśukāṃvīṇāpustaka dhāriṇīṃ natakucāṃ muktāpravālāvalim |śyāmāṅgīṃ śaśiśaṅkhakuṇḍaladharāṃ dantaprabhāsusmitāṃākarṇālakaveṇikañjanayanāṃ dhyāyecchuka śyāmalām || 1||

कर्पूर शोभि कर्णाभरणाभिरामां माणिक्यभूषां सुमुखारविन्दाम् ।हालामदाघूर्णित लोचनाभां बालां भजे बालतमाल नीलाम् ॥ २॥

karpūra śobhi karṇābharaṇābhirāmāṃ māṇikyabhūṣāṃ sumukhāravindām |hālāmadāghūrṇita locanābhāṃ bālāṃ bhaje bālatamāla nīlām || 2||

कस्तूरी तिलकाभिराम रचिता कर्पूर ताटङ्किनीबाला नीलविशालचारुवदना प्रालम्बिधम्मिल्लका ।हारोदञ्चित पीवरस्तनतटी हालामदोल्लासिनीश्यामा काचन मोहिनी विजयते चञ्चत्प्रपञ्चीकृता ॥ ३॥

kastūrī tilakābhirāma racitā karpūra tāṭaṅkinībālā nīlaviśālacāruvadanā prālambidhammillakā |hārodañcita pīvarastanataṭī hālāmadollāsinīśyāmā kācana mohinī vijayate cañcatprapañcīkṛtā || 3||

अंशे वेणीं चिकुरकुसुमां चूलिकां नीलचेलांमुक्ताभूषाङ्करयुगलतां वल्लकीं वादयन्तीम् ।माध्वीमत्तां मधुकर निनदां श्यामलां कोमलाङ्गींमातङ्गीं तां सकलफलदां सन्ततं भावयामि ॥ ४॥

aṃśe veṇīṃ cikurakusumāṃ cūlikāṃ nīlacelāṃmuktābhūṣāṅkarayugalatāṃ vallakīṃ vādayantīm |mādhvīmattāṃ madhukara ninadāṃ śyāmalāṃ komalāṅgīṃmātaṅgīṃ tāṃ sakalaphaladāṃ santataṃ bhāvayāmi || 4||

वीणा पुस्तक धारिणीं स्मितमुखीं तालीदलाकल्पितस्फायत्कुण्डलभूषणां कुवलयश्यामां कुरङ्गीदृशीम् ।उत्तुङ्गस्तनकुम्भयुग्म विलसत्काश्मीरपत्रावलींमातङ्गीं पदकैरवं नवचरच्चन्द्रातपत्राम्भजे ॥ ५॥

vīṇā pustaka dhāriṇīṃ smitamukhīṃ tālīdalākalpitasphāyatkuṇḍalabhūṣaṇāṃ kuvalayaśyāmāṃ kuraṅgīdṛśīm |uttuṅgastanakumbhayugma vilasatkāśmīrapatrāvalīṃmātaṅgīṃ padakairavaṃ navacaraccandrātapatrāmbhaje || 5||

ध्यायेहं रत्नपीठेशुककुलरणितं शृण्वतीं श्यामलाङ्गींन्यस्तैकाघ्रिं सरोजे शशिशकलधरां वल्लकींवादयन्तीम् ।कल्ह्नाराबद्धमालां नियमितविलसच्चूलिकां रक्तवस्त्रांमातङ्गीं शङ्खपात्रां मधुमदविवशां चित्रकोद्भासिभालाम् ॥ ६॥

dhyāyehaṃ ratnapīṭheśukakularaṇitaṃ śṛṇvatīṃ śyāmalāṅgīṃnyastaikāghriṃ saroje śaśiśakaladharāṃ vallakīṃvādayantīm |kalhnārābaddhamālāṃ niyamitavilasaccūlikāṃ raktavastrāṃmātaṅgīṃ śaṅkhapātrāṃ madhumadavivaśāṃ citrakodbhāsibhālām || 6||

आराध्यमानाश्चरणां पिबन्तोब्रह्मादयो विश्रुत कीर्तिमापुः ।अन्येपरं वाग्विभवं मुनीन्द्रा परांश्रियं भक्तिभरेण चान्ये ॥ ७॥

ārādhyamānāścaraṇāṃ pibantobrahmādayo viśruta kīrtimāpuḥ |anyeparaṃ vāgvibhavaṃ munīndrā parāṃśriyaṃ bhaktibhareṇa cānye || 7||

नमामि देवीं नवचन्द्रमौलिं मातङ्गिनीं चन्द्रकलावतंसाम् ।आम्नाय वाक्यैः प्रतिपादनार्थे प्रबोधयन्तीं शुकमादरेण ॥ ८॥

namāmi devīṃ navacandramauliṃ mātaṅginīṃ candrakalāvataṃsām |āmnāya vākyaiḥ pratipādanārthe prabodhayantīṃ śukamādareṇa || 8||

मातङ्गलीला गमनेऽपि भक्त्या शिञ्जानमञ्जीरमिषाद्भजन्ति ।मातस्त्वदीयं चरणारविन्दमकृत्रिमाणां वचसां निरिच्छाः ॥ ९॥

mātaṅgalīlā gamane'pi bhaktyā śiñjānamañjīramiṣādbhajanti |mātastvadīyaṃ caraṇāravindamakṛtrimāṇāṃ vacasāṃ niricchāḥ || 9||

पराधिकाशिञ्जितनूपुराभ्यां कृतागमां पदवीं तां पदाभ्याम् ।आस्फोटयन्तीं करवल्लकीं तां मातङ्गिनीं मद्धृदये भजामि ॥ १०॥

parādhikāśiñjitanūpurābhyāṃ kṛtāgamāṃ padavīṃ tāṃ padābhyām |āsphoṭayantīṃ karavallakīṃ tāṃ mātaṅginīṃ maddhṛdaye bhajāmi || 10||

नीलांशुकाबद्धनितम्बबिम्बां नालीदलेनानतकर्णभूषाम् ।मध्ये मदाघूर्णित नेत्रपद्मां मातङ्गिनीं शम्भुवधूं नमामि ॥ ११॥

nīlāṃśukābaddhanitambabimbāṃ nālīdalenānatakarṇabhūṣām |madhye madāghūrṇita netrapadmāṃ mātaṅginīṃ śambhuvadhūṃ namāmi || 11||

नीलोत्पलानां श्रियमावहन्तीं काञ्च्या कटाक्षैकशुभां कराणाम् ।कदम्ब मालाङ्कितकेशपाशां मातङ्गकन्यां हृदिभावयामि ॥ १२॥

nīlotpalānāṃ śriyamāvahantīṃ kāñcyā kaṭākṣaikaśubhāṃ karāṇām |kadamba mālāṅkitakeśapāśāṃ mātaṅgakanyāṃ hṛdibhāvayāmi || 12||

स्तुत्यानया शङ्करधर्मपत्नीं मातङ्गिनीं वागधिदेवतां ताम् ।स्वर्गंगतिं भक्तजना मनुष्याः परां श्रियं भक्ति भरेण चान्ये ॥ १३॥

stutyānayā śaṅkaradharmapatnīṃ mātaṅginīṃ vāgadhidevatāṃ tām |svargaṃgatiṃ bhaktajanā manuṣyāḥ parāṃ śriyaṃ bhakti bhareṇa cānye || 13||

कुचकुम्भ तटन्यस्त मणिवीणामदालसाम् ।श्यामां वामाङ्क विन्यस्त मालिकां बालिकाम्भजे ॥ १४॥

kucakumbha taṭanyasta maṇivīṇāmadālasām |śyāmāṃ vāmāṅka vinyasta mālikāṃ bālikāmbhaje || 14||

अब्धौयाति सरोजचामरमरुद्दोधूयमानालकाचूलीचुम्बित चारुचम्पक दलागौरी मदोल्लासिनी ।नाली बाल पलाश कर्णविलसत्कल्लोल कालिच्छटाकाली साचलकन्यका विजयते मच्चित्त पद्मासना ॥ १५॥

abdhauyāti sarojacāmaramaruddodhūyamānālakācūlīcumbita cārucampaka dalāgaurī madollāsinī |nālī bāla palāśa karṇavilasatkallola kālicchaṭākālī sācalakanyakā vijayate maccitta padmāsanā || 15||

वीणानर्तित पाणि पङ्कजयुगामाशोणबिम्बाधरांवेणी बद्ध कदम्ब पुष्प कलिकामेणी विलोलेक्षणाम् ।श्रोणी लम्ब विराजमान सुजपा शोणाम्बरालङ्कृतांएणाङ्कार्क विभूषणां कलयतां भिल्लीं पुरन्ध्रीम्भजे ॥ १६॥

vīṇānartita pāṇi paṅkajayugāmāśoṇabimbādharāṃveṇī baddha kadamba puṣpa kalikāmeṇī vilolekṣaṇām |śroṇī lamba virājamāna sujapā śoṇāmbarālaṅkṛtāṃeṇāṅkārka vibhūṣaṇāṃ kalayatāṃ bhillīṃ purandhrīmbhaje || 16||

तमाल श्यामाङ्गीमतिमधुर सङ्गीत निरतांकृपापूर्णापाङ्गीं कुचभर नताङ्गीं स्मितमुखीम् ।भ्रमद्भ्रूभङ्गे ते विविध कुसुमैस्तैरिवयुतांभजेऽहं मातङ्गीं मदपरवशाङ्गीमनुदिनम् ॥ १७॥

tamāla śyāmāṅgīmatimadhura saṅgīta niratāṃkṛpāpūrṇāpāṅgīṃ kucabhara natāṅgīṃ smitamukhīm |bhramadbhrūbhaṅge te vividha kusumaistairivayutāṃbhaje'haṃ mātaṅgīṃ madaparavaśāṅgīmanudinam || 17||

सुकश्यामां श्यामां शुकरणित कल्लोल निरतांविपञ्ची सञ्चारारुण करसरोजां भगवतीम् ।मदासक्तामुक्ता फलगुणितहारस्तनतटांकृपावासामीशामतिरुचिरहासां भजशिवाम् ॥ १८॥

sukaśyāmāṃ śyāmāṃ śukaraṇita kallola niratāṃvipañcī sañcārāruṇa karasarojāṃ bhagavatīm |madāsaktāmuktā phalaguṇitahārastanataṭāṃkṛpāvāsāmīśāmatirucirahāsāṃ bhajaśivām || 18||

रक्तारविन्द मकरन्द रसानुलेपांपानप्रमत्त चलितालि कुलालकान्ताम् ।वीणामनोहरनिनादविनोदशीलांवाणीं भजे शुकनिभां मधुपान लोलाम् ॥ १९॥

raktāravinda makaranda rasānulepāṃpānapramatta calitāli kulālakāntām |vīṇāmanoharaninādavinodaśīlāṃvāṇīṃ bhaje śukanibhāṃ madhupāna lolām || 19||

सङ्गीत नाद रसपानघनार्द्रदेहांनेत्रारविन्द करुणामृतवाहिनीं ताम् ।रक्तारविन्द विनिवेशितवामपादांश्यामां मतङ्गतनयां मनसा स्मरामि ॥ २०॥

saṅgīta nāda rasapānaghanārdradehāṃnetrāravinda karuṇāmṛtavāhinīṃ tām |raktāravinda viniveśitavāmapādāṃśyāmāṃ mataṅgatanayāṃ manasā smarāmi || 20||

कस्तूरिका श्यामल कोमलाङ्गींकादम्बरीपानमदालसाङ्गीम् ।वामस्तनालिङ्गितरत्नवीणांमातङ्गकन्यां मनसास्मरामि ॥ २१॥

kastūrikā śyāmala komalāṅgīṃkādambarīpānamadālasāṅgīm |vāmastanāliṅgitaratnavīṇāṃmātaṅgakanyāṃ manasāsmarāmi || 21||

स्मरेत्प्रथम पुष्पिणीं रुधिरबिन्दु नीलाम्बरांगृहीतमधुपात्रिकां मदविघूर्ण नेत्रोज्वलाम् ।घनस्तनभरानतां गलित चूलिकां श्यामलांकरस्फुरित वल्लकीं विमलशङ्ख ताटङ्किनीम् ॥ २२॥

smaretprathama puṣpiṇīṃ rudhirabindu nīlāmbarāṃgṛhītamadhupātrikāṃ madavighūrṇa netrojvalām |ghanastanabharānatāṃ galita cūlikāṃ śyāmalāṃkarasphurita vallakīṃ vimalaśaṅkha tāṭaṅkinīm || 22||

माणिक्यवीणामुपलालयन्तीं मदालसां मञ्जुल वाग्विलासाम् ।माहेन्द्र नीलोत्पल कोमलाङ्गीं मातङ्ग कन्यां मनसास्मरामि ॥ २३॥

māṇikyavīṇāmupalālayantīṃ madālasāṃ mañjula vāgvilāsām |māhendra nīlotpala komalāṅgīṃ mātaṅga kanyāṃ manasāsmarāmi || 23||

कुवलय दलनीलाङ्गीं कुवलय चारुचञ्चलापाङ्गीम् ।कुवलय समोत्तमाङ्गीं कुवलय चूलीं नमामि मातङ्गीम् ॥ २४॥

kuvalaya dalanīlāṅgīṃ kuvalaya cārucañcalāpāṅgīm |kuvalaya samottamāṅgīṃ kuvalaya cūlīṃ namāmi mātaṅgīm || 24||

श्यामा कुवलयश्यामा नामकलाधाम भागस्था ।मधुपानरतारतापायाद्वाणी वीणाविनोदविश्रान्ता ॥ २५॥

śyāmā kuvalayaśyāmā nāmakalādhāma bhāgasthā |madhupānaratāratāpāyādvāṇī vīṇāvinodaviśrāntā || 25||

तमालपत्राञ्चितनीलगात्रीं तालीदलेनार्पित कर्णपत्राम् ।सप्तस्वरालापविशेषतन्त्रीं बालाम्भजे भव्यमतङ्गपुत्रीम् ॥ २६॥

tamālapatrāñcitanīlagātrīṃ tālīdalenārpita karṇapatrām |saptasvarālāpaviśeṣatantrīṃ bālāmbhaje bhavyamataṅgaputrīm || 26||

नित्यानुपात्रार्पितसत्कलाभां नीलाम्बरोद्भासिनितम्बबिम्बाम् ।भक्तोपरिन्यस्तकृपावलम्बां बालां भजे भव्यगुणां मदम्बाम् ॥ २७॥

nityānupātrārpitasatkalābhāṃ nīlāmbarodbhāsinitambabimbām |bhaktoparinyastakṛpāvalambāṃ bālāṃ bhaje bhavyaguṇāṃ madambām || 27||

शिवतनुभवसङ्गं शिवचूली लोल चञ्चलोत्सङ्गम् ।कलिमल तनुमङ्गं कलये मातङ्गकन्यकापाङ्गम् ॥ २८॥

śivatanubhavasaṅgaṃ śivacūlī lola cañcalotsaṅgam |kalimala tanumaṅgaṃ kalaye mātaṅgakanyakāpāṅgam || 28||

कलाधीशोत्तंसां करकलित वीणाहितरसांकलिन्दापत्याभां करकलित हृदयां रक्तवसनाम् ।पुराणीं कल्याणीं पुरमथनपुण्योदयकलामधीराक्षीं वन्दे बहुकुसुमसन्नद्धकबरीम् ॥ २९॥

kalādhīśottaṃsāṃ karakalita vīṇāhitarasāṃkalindāpatyābhāṃ karakalita hṛdayāṃ raktavasanām |purāṇīṃ kalyāṇīṃ puramathanapuṇyodayakalāmadhīrākṣīṃ vande bahukusumasannaddhakabarīm || 29||

कलोदञ्चद्वेणीं कनकदलताटङ्कमहितांस्तनाभ्यामानम्रां तरुणमिहिरां रक्तवसनाम् ।महाकल्याणीं तन्मधुमदभरां ताम्रनयनांतमालश्यामां नस्तवकयतु सौख्यानिसततम् ॥ ३०॥

kalodañcadveṇīṃ kanakadalatāṭaṅkamahitāṃstanābhyāmānamrāṃ taruṇamihirāṃ raktavasanām |mahākalyāṇīṃ tanmadhumadabharāṃ tāmranayanāṃtamālaśyāmāṃ nastavakayatu saukhyānisatatam || 30||

कराञ्चितविपञ्चिकां कलितचन्द्रचूडामणिंकपोलविलसन्महाकनकपत्र ताटङ्किनीम् ।तपः फलमिहाश्रितां तरुणभासरक्ताम्बरांतमालदलमेचकां तरुणलोचनामाश्रये ॥ ३१॥

karāñcitavipañcikāṃ kalitacandracūḍāmaṇiṃkapolavilasanmahākanakapatra tāṭaṅkinīm |tapaḥ phalamihāśritāṃ taruṇabhāsaraktāmbarāṃtamāladalamecakāṃ taruṇalocanāmāśraye || 31||

माता मरकतश्यामा मातङ्गी मधुशालिनी ।कटाक्षयतु कल्याणी कदम्बवनवासिनी ॥ ३२॥

mātā marakataśyāmā mātaṅgī madhuśālinī |kaṭākṣayatu kalyāṇī kadambavanavāsinī || 32||

जगदानन्दकलङ्ककण्ठमाला कबरी वेष्टन काङ्क्षणीय गुञ्जा ।कुरुतां दुरिताद्विमोक्षणं मे तुहिना भिल्लिकुटुम्बिनी भवानी ॥ ३३॥

jagadānandakalaṅkakaṇṭhamālā kabarī veṣṭana kāṅkṣaṇīya guñjā |kurutāṃ duritādvimokṣaṇaṃ me tuhinā bhillikuṭumbinī bhavānī || 33||

वामे विस्मृतशालिनी स्तनतटे विन्यस्त वीणामुखंतन्त्रीताल विराविणीमसकलैरास्फालयन्ती नखैः ।अर्धोन्मीलित लोचनं सविलसद्ग्रीवं मुखंविभ्रतीश्यामा काचन मोहिनी विजयते मातङ्गकन्यामयि ॥ ३४॥

vāme vismṛtaśālinī stanataṭe vinyasta vīṇāmukhaṃtantrītāla virāviṇīmasakalairāsphālayantī nakhaiḥ |ardhonmīlita locanaṃ savilasadgrīvaṃ mukhaṃvibhratīśyāmā kācana mohinī vijayate mātaṅgakanyāmayi || 34||

प्रतिष्ठा पयोधर प्रसार करपङ्कजं बलभिदः ।कदम्ब वनमालिकं शशिकला समुद्भासितम् ॥ ३५॥

pratiṣṭhā payodhara prasāra karapaṅkajaṃ balabhidaḥ |kadamba vanamālikaṃ śaśikalā samudbhāsitam || 35||

मतङ्ग कुलनन्दिनी मनसि मे मुहुजृम्भताम् ।समस्त सुखदायिनी तरुणपत्र ताटङ्किनी ॥ ३६॥

mataṅga kulanandinī manasi me muhujṛmbhatām |samasta sukhadāyinī taruṇapatra tāṭaṅkinī || 36||

लाक्षाराग कपोलपल्लवरतामापीन तुङ्गस्तनींकर्पूरोज्वलचारुशङ्खवलयां काश्मीररक्तांशुकाम् ।तन्त्रीतालसपाटलां गुलिदलां वन्दामहे मातरंमातङ्गीं मदमन्थरां मरकतश्यामां मनोहारिणीम् ॥ ३७॥

lākṣārāga kapolapallavaratāmāpīna tuṅgastanīṃkarpūrojvalacāruśaṅkhavalayāṃ kāśmīraraktāṃśukām |tantrītālasapāṭalāṃ gulidalāṃ vandāmahe mātaraṃmātaṅgīṃ madamantharāṃ marakataśyāmāṃ manohāriṇīm || 37||

स्रस्तं केतकिदामभिर्वलयितं धम्मिल्लमाबिभ्रतीतालीपत्र पुटान्तरैः समनतैस्ताटङ्किनी मौक्तिकैः ।भाले कल्पतरोः प्रसूनविलसदृष्ट्वैव सम्मोहिनीकाञ्ची दामवती विजयते वीणासवादानना ॥ ३८॥

srastaṃ ketakidāmabhirvalayitaṃ dhammillamābibhratītālīpatra puṭāntaraiḥ samanataistāṭaṅkinī mauktikaiḥ |bhāle kalpataroḥ prasūnavilasadṛṣṭvaiva sammohinīkāñcī dāmavatī vijayate vīṇāsavādānanā || 38||

मातङ्गीं भूषिताङ्गीं मधुमदमुदितां घूर्णमानाक्षियुग्मांस्विद्यद्वक्त्रां कदम्ब प्रविलसद्वेणिकामत्त वीणाम् ।बिम्बोष्ठीं रक्तवस्त्रां मृगमद तिलकामिन्दुरेखावतंसांकर्णोद्यच्छङ्खपत्रां करकलितशुकां नौमि तुङ्गस्तनीं ताम् ॥ ३९॥

mātaṅgīṃ bhūṣitāṅgīṃ madhumadamuditāṃ ghūrṇamānākṣiyugmāṃsvidyadvaktrāṃ kadamba pravilasadveṇikāmatta vīṇām |bimboṣṭhīṃ raktavastrāṃ mṛgamada tilakāmindurekhāvataṃsāṃkarṇodyacchaṅkhapatrāṃ karakalitaśukāṃ naumi tuṅgastanīṃ tām || 39||

उन्मीलिद्यावकाद्यान्निविडमदभरोद्विग्नभालालकाशांरत्नगैवेयहाराङ्गद कटिलसत्सूत्र मञ्जीरघोषाम् ।आनीयार्थानभीष्टान् स्मितमधुरदृशा साधिकं तर्पयन्तींध्यायेद्देवीं शुकाभांशुकमखिलकलारूपमस्याश्चपार्श्वे ॥ ४०॥

unmīlidyāvakādyānniviḍamadabharodvignabhālālakāśāṃratnagaiveyahārāṅgada kaṭilasatsūtra mañjīraghoṣām |ānīyārthānabhīṣṭān smitamadhuradṛśā sādhikaṃ tarpayantīṃdhyāyeddevīṃ śukābhāṃśukamakhilakalārūpamasyāścapārśve || 40||

वेणीमूल विलासितेन्दु शकलां वीणानिनादप्रियांक्षोणीपाल सुरेन्द्र पन्नगगणै राराधिताङ्घ्रिद्वयाम् ।एणीचञ्चललोचनां सुवदनां वाणीं पुराणोज्वलांश्रोणीभारभरालसामनिमिषां पश्यामि विश्वेश्वरीम् ॥ ४१॥

veṇīmūla vilāsitendu śakalāṃ vīṇāninādapriyāṃkṣoṇīpāla surendra pannagagaṇai rārādhitāṅghridvayām |eṇīcañcalalocanāṃ suvadanāṃ vāṇīṃ purāṇojvalāṃśroṇībhārabharālasāmanimiṣāṃ paśyāmi viśveśvarīm || 41||

कुचकलशनिषण्णवीणां कलमधुरध्वनि कम्पितोत्तमाङ्गीम् ।मरकतमणिभागमेचकाभांमदमविरोधमनस्विनीमुपासे ॥ ४२॥

kucakalaśaniṣaṇṇavīṇāṃ kalamadhuradhvani kampitottamāṅgīm |marakatamaṇibhāgamecakābhāṃmadamavirodhamanasvinīmupāse || 42||

तालीदलोल्लसितकोमलकर्णपालीं फालान्तराचिकुरामतिनीलवेणीम् ।वक्षोजपीठनिहितोज्वलचारुवीणां श्यामां नमामि मदिरारुणनेत्रयुग्माम् ॥ ४३॥

tālīdalollasitakomalakarṇapālīṃ phālāntarācikurāmatinīlaveṇīm |vakṣojapīṭhanihitojvalacāruvīṇāṃ śyāmāṃ namāmi madirāruṇanetrayugmām || 43||

मध्येबद्धमयूखपिच्छनिकरां श्यामाम्प्रबालाधरांभृङ्गीवादनतत्परां सुनयनां मूर्धालकैर्बर्बराम् ।गुञ्जाहारधरां समुन्नतकुचां चन्द्राननां शाम्भवींभिल्ली वेषधरां नमामि शबरी तामेकवीरां पराम् ॥ ४४॥

madhyebaddhamayūkhapicchanikarāṃ śyāmāmprabālādharāṃbhṛṅgīvādanatatparāṃ sunayanāṃ mūrdhālakairbarbarām |guñjāhāradharāṃ samunnatakucāṃ candrānanāṃ śāmbhavīṃbhillī veṣadharāṃ namāmi śabarī tāmekavīrāṃ parām || 44||

लसत्गुञ्जाहार स्तनभर समुन्मध्यलतिकामुदञ्चत्स्वेदाम्भः क्षणगणित फेनोद्गम रुचिम् ।शिवं शान्तं पात्रप्रवणमृगयाकारकरणंशिवामम्बज्ञातिं चरणमहमन्वेमिशरणम् ॥ ४५॥

lasatguñjāhāra stanabhara samunmadhyalatikāmudañcatsvedāmbhaḥ kṣaṇagaṇita phenodgama rucim |śivaṃ śāntaṃ pātrapravaṇamṛgayākārakaraṇaṃśivāmambajñātiṃ caraṇamahamanvemiśaraṇam || 45||

नटदगुञ्जा पञ्जाभरणकिरणां रक्तवसनांजपाकर्णाभूषां शिखिवरक्षकलापाम्बरवतीम् ।नदज्झल्ली वल्लीनवकिसलयैस्तां परिवृतांनवामोहारूढां कुटिलकबरीं मोहशबरीम् ॥ ४६॥

naṭadaguñjā pañjābharaṇakiraṇāṃ raktavasanāṃjapākarṇābhūṣāṃ śikhivarakṣakalāpāmbaravatīm |nadajjhallī vallīnavakisalayaistāṃ parivṛtāṃnavāmohārūḍhāṃ kuṭilakabarīṃ mohaśabarīm || 46||

गले गुञ्जा पुञ्जावलि मपि च कर्णे शिखिशिखांशिरो रङ्गे नृत्यत्कनकदल दूब मञ्जुलदलम् ।धनुर्वामे चापे शरमपरपाणौ निदधतींनितम्बे बर्हालिं कुटिलकबरीं नौमि शबरीम् ॥ ४७॥

gale guñjā puñjāvali mapi ca karṇe śikhiśikhāṃśiro raṅge nṛtyatkanakadala dūba mañjuladalam |dhanurvāme cāpe śaramaparapāṇau nidadhatīṃnitambe barhāliṃ kuṭilakabarīṃ naumi śabarīm || 47||

वीणावादन निरतं तल्लीला बद्धगीत वामकुचम् ।श्यामल कोमल गात्रं पाटलनयनं परं भजेधाम ॥ ४८॥

vīṇāvādana nirataṃ tallīlā baddhagīta vāmakucam |śyāmala komala gātraṃ pāṭalanayanaṃ paraṃ bhajedhāma || 48||

अङ्कित पाणिचतुष्ट्यमङ्कुशपाशेक्षु चापशकलम् ।शङ्कर जितेत्यमित्रं पङ्कजनेत्रं परं भजेधाम ॥ ४९॥

aṅkita pāṇicatuṣṭyamaṅkuśapāśekṣu cāpaśakalam |śaṅkara jitetyamitraṃ paṅkajanetraṃ paraṃ bhajedhāma || 49||

करकलित केसारालानुकारेयं कुचकलशा जयते जगताम् ।मातामातङ्गी मङ्गेस्वायतना ॥ ५०॥

karakalita kesārālānukāreyaṃ kucakalaśā jayate jagatām |mātāmātaṅgī maṅgesvāyatanā || 50||

मुदाकरकदम्ब कानने कनकमष्टपात्रस्थितेलसन्मणिमयासने सहचरीभिराराधिताम् ।लसत्कनककङ्कणां रजतमञ्जुमञ्जीरकांजगज्जनविमोहिनीं जपविधौ स्मरेदम्बिकाम् ॥ ५१॥

mudākarakadamba kānane kanakamaṣṭapātrasthitelasanmaṇimayāsane sahacarībhirārādhitām |lasatkanakakaṅkaṇāṃ rajatamañjumañjīrakāṃjagajjanavimohinīṃ japavidhau smaredambikām || 51||

अकृशा कुचयोर्विलग्ने विपुलं वक्षसि विस्तृतं नितम्बे ।अरुणाधरमाविरस्तुचित्ते करुणाशालि कपालि भागधेयम् ॥ ५२॥

akṛśā kucayorvilagne vipulaṃ vakṣasi vistṛtaṃ nitambe |aruṇādharamāvirastucitte karuṇāśāli kapāli bhāgadheyam || 52||

वीणाताल विनोदगीत निरतां नीलांशुकोल्लासिनीम् ।बिम्बोष्ठीं नवयावकार्द्र चरणामाकीर्ण केशोज्वलाम् ॥ ५३॥

vīṇātāla vinodagīta niratāṃ nīlāṃśukollāsinīm |bimboṣṭhīṃ navayāvakārdra caraṇāmākīrṇa keśojvalām || 53||

हृद्यावेशित शङ्खकुण्डलधरां माणिक्यभूषोज्वलांमातङ्गीं प्रणतोऽस्मि सुस्मितमुखां देवींशुकश्यामलाम् ॥ ५४॥

hṛdyāveśita śaṅkhakuṇḍaladharāṃ māṇikyabhūṣojvalāṃmātaṅgīṃ praṇato'smi susmitamukhāṃ devīṃśukaśyāmalām || 54||

दिव्यहालामदोन्मत्तां दिव्यभूषणभूषिताम् ।दिव्यगन्धर्वकन्याभिस्समाराधितपादुकाम् ॥ ५५॥

divyahālāmadonmattāṃ divyabhūṣaṇabhūṣitām |divyagandharvakanyābhissamārādhitapādukām || 55||

दिव्यसिंहासनासीनां शुकवीणालसत्कराम् ।सङ्गीत मातृकां वन्दे वरदां सुस्मिताननाम् ॥ ५६॥

divyasiṃhāsanāsīnāṃ śukavīṇālasatkarām |saṅgīta mātṛkāṃ vande varadāṃ susmitānanām || 56||

स्तुतिषु नवदेव देवि विविध कवि विलोहितमतिर्भवति ।निहितमतिर्यद्यपि मामपेतचेतीभवति स्तोतुं विलोभयति ॥ ५७॥

stutiṣu navadeva devi vividha kavi vilohitamatirbhavati |nihitamatiryadyapi māmapetacetībhavati stotuṃ vilobhayati || 57||

साध्याक्षरगर्भित पञ्चनव इत्यक्षरात्मिके जगन्मातः ।भगवति मातङ्गेश्वरि नमस्तुभ्यं महादेवि ॥ ५८॥

sādhyākṣaragarbhita pañcanava ityakṣarātmike jaganmātaḥ |bhagavati mātaṅgeśvari namastubhyaṃ mahādevi || 58||

इत्युमा साहचर्या भगवान्मातङ्गऋषिप्रणीता इयं स्तुतिः समाप्ता ।

ityumā sāhacaryā bhagavānmātaṅgaṛṣipraṇītā iyaṃ stutiḥ samāptā |