कालिकास्तोत्रम् २ Menaya Kritam Kalika Stotram 2

मेनोवाच ।महामायां जगद्धात्रीं चण्डिकाङ् लोकधारिणीम् ।प्रणमामि महादेवीं सर्वकामार्थदायिनीम् ॥ २१॥

menovāca |mahāmāyāṃ jagaddhātrīṃ caṇḍikāṅ lokadhāriṇīm |praṇamāmi mahādevīṃ sarvakāmārthadāyinīm || 21||

नित्यानन्दकरीं मायां योगनिद्रां जगत्प्रसूम् ।प्रणमामि सदासिद्धां शुभसारसमालिनीम् ॥ २२॥

nityānandakarīṃ māyāṃ yoganidrāṃ jagatprasūm |praṇamāmi sadāsiddhāṃ śubhasārasamālinīm || 22||

मातामहीं सदानन्दां भक्तशोकविनाशिनीम् ।आकल्पं वनितानां च प्राणिनां बुद्धिरूपिणीम् ॥ २३॥

mātāmahīṃ sadānandāṃ bhaktaśokavināśinīm |ākalpaṃ vanitānāṃ ca prāṇināṃ buddhirūpiṇīm || 23||

सा त्वं बन्धच्छेदहेतुर्यतीनां कस्ते गेयो मादृशीभिः प्रभावः ।हिंसाया वाथर्ववेदस्य सा त्वं नित्यं कामं त्वं ममेष्टं विधेहि ॥ २४॥

sā tvaṃ bandhacchedaheturyatīnāṃ kaste geyo mādṛśībhiḥ prabhāvaḥ |hiṃsāyā vātharvavedasya sā tvaṃ nityaṃ kāmaṃ tvaṃ mameṣṭaṃ vidhehi || 24||

नित्यानित्यैर्भावहीनैः परास्तैस्तत्तन्मात्रैर्योज्यते भूतवर्गः ।तेषां शक्तिस्त्वं सदा नित्यरूपा काले योषा योगयुक्ता समर्था ॥ २५॥

nityānityairbhāvahīnaiḥ parāstaistattanmātrairyojyate bhūtavargaḥ |teṣāṃ śaktistvaṃ sadā nityarūpā kāle yoṣā yogayuktā samarthā || 25||

योनिर्धरित्री जगतां त्वमेव त्वमेव नित्या प्रकृतिः परस्तात् ।यथा वशं क्रियते ब्रह्मरूपं सा त्वं नित्या मे प्रसीदाद्य मातः ॥ २६॥

yonirdharitrī jagatāṃ tvameva tvameva nityā prakṛtiḥ parastāt |yathā vaśaṃ kriyate brahmarūpaṃ sā tvaṃ nityā me prasīdādya mātaḥ || 26||

त्वं जातवेदोगतशक्तिरुग्रा त्वं दाहिका सूर्यकरस्य शक्तिः ।आह्लादिका त्वं बहुचन्द्रिका या तां त्वामहं स्तौमि नमामि चण्डीम् ॥ २७॥

tvaṃ jātavedogataśaktirugrā tvaṃ dāhikā sūryakarasya śaktiḥ |āhlādikā tvaṃ bahucandrikā yā tāṃ tvāmahaṃ staumi namāmi caṇḍīm || 27||

योषाणां सत्प्रिया च त्वं नित्या त्वं चोर्ध्वरेतसाम् ।वाञ्छा त्वं सर्वजगतां धाया च त्वं यथा हरेः ॥ २८॥

yoṣāṇāṃ satpriyā ca tvaṃ nityā tvaṃ cordhvaretasām |vāñchā tvaṃ sarvajagatāṃ dhāyā ca tvaṃ yathā hareḥ || 28||

या चेष्टरूपाणि विधाय देवी सृष्टिस्थितानाशमयी च कर्त्री ।ब्रह्माच्युतस्थाणुशरीरहेतुस्सा त्वं प्रसीदाद्य पुनर्नमस्ते ॥ २९॥

yā ceṣṭarūpāṇi vidhāya devī sṛṣṭisthitānāśamayī ca kartrī |brahmācyutasthāṇuśarīrahetussā tvaṃ prasīdādya punarnamaste || 29||

इति शिवपुराणे रुद्रसंहितायां पार्वतीखण्डेपञ्चमाध्यायान्तर्गतं मेनया कृतं कालिकास्तोत्रं समापतम् ।शिवपुराण । रुद्रसंहिता । पार्वतीखण्ड । अध्याय ५/२१२९॥शिवपुराण । रुद्रसंहिता । पार्वतीखण्ड । अध्याय ५/२१-२९॥

iti śivapurāṇe rudrasaṃhitāyāṃ pārvatīkhaṇḍepañcamādhyāyāntargataṃ menayā kṛtaṃ kālikāstotraṃ samāpatam |śivapurāṇa | rudrasaṃhitā | pārvatīkhaṇḍa | adhyāya 5/2129||śivapurāṇa | rudrasaṃhitā | pārvatīkhaṇḍa | adhyāya 5/21-29||